ပၢင်လိူၵ်ႈတင်ႈပွၵ်ႈၵမ်း 2 ၼႆႉ တီႈၼင်ႈတႅၼ်းၽွင်းၵူၼ်းမိူင်း မီးတႃႇ 52 တီႈ ၾၢႆႇၶွမ်ႊမသျိၼ်ႊၵမ်ၵၢၼ် ပၢင်လိူၵ်ႈတင်ႈ မိူင်းႁူမ်ႈတုမ် ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ ၼေႃႇ ၽွင်းတႅၼ်းပႃႇတီႇသၢင်ႇသီႈ USDP ပေႉပၢင်လိူၵ်ႈတင်ႈဝႆႉတႃႇ 44 ၵေႃႉ ဝႃႈၼႆ။

ၼေႃႇၽွင်းတႅၼ်း ပႃႇတီႇသၢင်ႇသီႈ ၸိူဝ်းဢွင်ႇပေႉပၢင်လိူၵ်ႈတင်ႈ ပွၵ်ႈၵမ်း 1 ၼၼ်ႉသေ လႆႈဝႆႉတီႈၼင်ႈၼႂ်းလုမ်းသၽႃးၵူၼ်းမိူင်း တင်းသဵင်ႈမီးယူႇ 102 ၵေႃႉ၊ ပွၵ်ႈၵမ်း 2 ၼႆႉ သမ်ႉ လႆႈတီႈၼင်ႈထႅင်ႈ 44 တီႈလႄႈ ႁူမ်ႈသဵၼ်ႈပဵၼ် 146 ၵေႃႉၼႆယဝ်ႉ။

ၼႂ်းပၢင်လိူၵ်ႈတင်ႈ ပွၵ်ႈၵမ်း 2 ၼႆႉ ၼေႃႇတႅၼ်းၽွင်းပႃႇတီႇၸိူဝ်ႉၸၢတ်ႈတႃႇ 8 ၵေႃႉလႆႈတီႈ ၼင်ႈဝႆႉ ၼႂ်းလုမ်းသၽႃးၵူၼ်းမိူင်း။

ပၢင်လိူၵ်ႈတင်ႈ ၼႂ်းၸႄႈမိူင်းၶၢင်လႄႈ ၸႄႈမိူင်းယၢင်းၼႆႉ ၼေႃႇၽွင်းတႅၼ်းပႃႇတီႇသၢင်ႇသီႇ USDP ဢွင်ႇပေႉၵိၼ်ၶၢတ်ႇၵႂႃႇတင်းသဵင်ႈ ၼႆယဝ်ႉ။

မိူၼ်ၼႆၼင်ႇၵဝ်ႇ ၼႂ်းတိူင်းၸႄႈၵႅင်းၵေႃႈ ၼေႃႇၽွင်းတႅၼ်းပႃႇတီႇသၢင်ႇသီႈ တႃႇ 7 ၵေႃႉ လႆႈၵႂႃႇတီႈၼင်ႈ ၼႂ်းလုမ်းသၽႃးၵူၼ်းမိူင်းဝႆႉ။

ၼႂ်းၸႄႈမိူင်းမွၼ်းတႄႉ ၼေႃႇၽွင်းတႅၼ်းပႃႇတီႇသၢင်ႇသီႈ လႆႈတီႈၼင်ႈၼႂ်းလုမ်း သၽႃးၵူၼ်းမိူင်းၵႂႃႇ 1 ၵေႃႉၵူၺ်းသေ ၼေႃႇတႅၼ်းၽွင်းပႃႇတီႇၽွမ်ႉႁူမ်ႈမွၼ်း လႆႈၵႂႃႇ 4 ၵေႃႉ ၼႆယဝ်ႉ။

ၽွၼ်းၵၢၼ်ပၢင်လိူၵ်ႈတင်ႈ ပွၵ်ႈၵမ်း 2 ဢၼ်ၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈ မိူင်းႁူမ်ႈတုမ် (UEC) ပိုၼ်ၽၢဝ်ႇဢွၵ်ႇဝႆႉ ပဵၼ်တၢင်းၵၢၼ်ၼႆႉ ပႃးဝႆႉ ၸႄႈမိူင်း လႄႈ တိူင်း 9 တီႈၵူၺ်း။ တႃႇမိူင်းတႆး လႄႈ တိူင်းတႃႈၵုင်ႈ (ယၼ်ႇၵုင်ႇ) တင်း တိူင်းဢေႇယႃႇဝတီႇ ၸိူဝ်းၼႆႉ ပႆႇပိုၼ်ဢွၵ်ႇဝႆႉ။

ၸွမ်းၼင်ႇ ၸုမ်းၶၢဝ်ႇၽူႈတွႆႇႁွၵ်ႈ ၵဵပ်းၶေႃႈမုၼ်း လႄႈ တိတ်းတၢမ်း ၶၢဝ်ႇငၢဝ်း ၼႂ်းပိုၼ်ႉတီႈဝႆႉ ၼႂ်းဝၼ်းၸတ်းပၢင်လိူၵ်ႈတင်ႈ လႄႈ ဝၢႆးလင်ၸတ်းပၢင်လိူၵ်ႈတင်ႈယဝ်ႉၼၼ်ႉတႄႉ ၼႂ်းမိူင်းတႆးပွတ်းဢွၵ်ႇၵေႃႈ ပၢင်လိူၵ်ႈတင်ႈပွၵ်ႈၵမ်း 1 တင်း ပွၵ်ႈၵမ်း 2 ၼႆႉ ပႃႇတီႇ USDP ဢွင်ႇပေႉၵိၼ်ၶၢတ်ႇ။ ပႃႇတီႇသိူဝ်ၽိူၵ်ႇ SNDP တႄႉလႆႈဝႆႉ 4 တီႈၼင်ႈ။