တပ်ႉသိုၵ်းၵဝ်ႈၵၢင်ႉ ၸတ်းႁဵတ်းပၢင်မၢႆတွင်း ၶိုၼ်းတင်ႈၼႃႈလိၼ်ၶိုၵ်ႉတွၼ်းမၢႆ 1။ ၶိုၼ်းၶွတ်ႇၽွတ်ႈတမ်းဝၢင်းဝၢၼ်ႈဢိူင်ႇဝဵင်း လၢႆးမႂ်ႇမႂ်ႇ။ၼႂ်းၼႃႈလိၼ်ၶိုၵ်ႉတွၼ်းမၢႆ 1 ၼႆႉပႃးဝႆႉ ၸႄႈတွၼ်ႈ 4 ဢၼ်လႄႈ ဝဵင်းလူင် 1 ဝဵင်း။

ၼႂ်းၾၢင်ႁၢင်ႈၼႃႈလိၼ်ၶိုၵ်ႉတွၼ်းဢၼ်မႂ်ႇၼႆႉ ၶဝ်ဢဝ် ဝဵင်းလၢဝ်ႇၵၢႆး (ဢၼ်ၶဝ်ယိုတ်းလႆႈၽွင်းၽႅၼ်ယၼ်ႇသိုၵ်း 1027 )ၼၼ်ႉ ပဵၼ်ဝႆႉဝဵင်းလူင်ၶဝ်။

ၸႄႈတွၼ်ႈ 4 ဢၼ်ၼႂ်းပိူင်ၽွင်းငမ်း MNDAA

ပေႃးတူၺ်းၶိုၼ်းၼႂ်းပိူင်ပိုင်းလၵ်းမိူင်း2008 ၼၼ်ႉတႄႉၼႂ်းၼႃႈလိၼ်ၶိုၵ်ႉတွၼ်းမၢႆ 1 ၼႆႉၶဝ်သႂ်ႇဝႆႉ 2 ဝဵင်းၵူၺ်း။ပဵၼ်ဝဵင်းၵွင်းၸၢင်ႉလႄႈ လၢဝ်ႇၵၢႆး။

တင်ႈတႄႇသိုၵ်းၵဝ်ႈၵၢင်ႉ တူၵ်းလူင်းၵိုတ်းတိုၵ်းၵၼ်တင်းသိုၵ်းမၢၼ်ႈ ၽွင်းႁူဝ်ပီ 2025 မႃးၼၼ်ႉသေ MNDAA ၶိုၼ်းၶွတ်ႇၽွတ်ႈဝႆႉ တေယုၵ်ႉဢဝ်ဝဵင်းၵူတ်ႉၶၢႆ၊ သႅၼ်ဝီ၊ မိူင်းၵူဝ်းလႄႈ လၢဝ်ႇၵၢႆး ၸိူဝ်းၼႆႉ ၶိုၼ်ႈပဵၼ်ၸၼ်ႉၸႄႈတွၼ်ႈ 4 ဢၼ် ၶဝ်ႈပႃးၼႂ်းၼႃႈလိၼ်ၶိုၵ်ႉတွၼ်းမၢႆ 1 ၊ဢဝ် ဝဵင်းလၢဝ်ႇၵၢႆးပဵၼ်ဝဵင်းလူင်သေပၼ်ႇၵၢၼ်ၽွင်းငမ်းၵႂႃႇ-ၼႆၽူႈမီးပုၼ်ႈၽွၼ်းၼႂ်းတပ်ႉသိုၵ်းၵဝ်ႈၵၢင်ႉၵေႃႉၼိုင်ႈၵေႃႈလၢတ်ႈဝႆႉတီႈၶၢဝ်ႇ BBC ဝႆႉ။ ဝဵင်းၸိူဝ်းဢၼ်ၶဝ်ယုၵ်ႉပဵၼ်ၸႄႈတွၼ်ႈဝႆႉၸိူဝ်းၼႆႉ ပဵၼ်ဝဵင်းဢၼ် ၸုမ်းဢူၺ်းလီပွတ်းႁွင်ႇ 3 ၸုမ်း (ၵဝ်ႈၵၢင်ႉ MNDAA – တဢၢင်း TNLA – ရၶႅင်ႇ AA ) ၶဝ်ႁူမ်ႈၵၼ်ပိုတ်းယိုဝ်းယိုတ်းလႆႈဝႆႉတီႈသိုၵ်းမၢၼ်ႈ ၽွင်းၽႅၼ်ယၼ်ႇသိုၵ်း 1027 (ဢၼ်တႄႇမႃးမိူဝ်ႈဝၼ်းတီႈ 27 လိူၼ်ဢွၵ်ႊထူဝ်ႊပိူဝ်ႊ ပီ 2023) ၼၼ်ႉ။

ဝဵင်းလၢဝ်ႇၵၢႆးၼႆႉ သိုၵ်းမၢၼ်ႈတိုၵ်းႁိမ်ဢဝ်တႂ်ႈၼႃႈလိၼ်ၶိုၵ်ႉတွၼ်းမၢႆ 1 ၸဵမ်မိူဝ်ႈပူၼ်ႉမႃး 10 ပီပၢႆ။ ဝၢႆးလင်သိုၵ်းၵဝ်ႈၵၢင်ႉယိုတ်းလႆႈၶိုၼ်းမိူဝ်ႈပီ 2023 ၼၼ်ႉၵေႃႈ MNDAA ၼႅတ်ႈပိုၼ်ၽၢဝ်ႇၵိုတ်းၵၢၼ်ၽွင်းငမ်းသိုၵ်းမၢၼ်ႈသေ ၶိုၼ်းတႄႇၵၢၼ်ၽွင်းငမ်း MNDAA ႁင်းၶေႃမႃးၶိုၼ်း။

တႄႇဢဝ်ၼၼ်ႉမႃး သိုၵ်းၵဝ်ႈၵၢင်ႉၶိုၼ်း ၶွတ်ႇၽွတ်ႈ ပိူင်တပ်ႉသိုၵ်း၊ ပိူင်ၵၢၼ်မိူင်း ၊ ၵၢၼ်ၽွင်းငမ်း၊ လၢႆးယူႇသဝ်းၵိၼ်သၢင်ႈၶိူင်ႈၸႂ်ႉၶူဝ်းသွႆ ၵေႃႉႁၢၼ်ၵေႃႉသိုၵ်း သိုၵ်းၵဝ်ႈၵၢင်ႉၶဝ်ၶိုၼ်းမူတ်း။

ပေႃးၶူၼ်ႉတူၺ်းၶိုၼ်းပိုၼ်းၼႆၸိုင်- တပ်ႉသိုၵ်းၵဝ်ႈၵၢင်ႉဢၼ် ၽိူင်ၵျႃးသိူင်း ဢွၼ်ၼမ်းၼႆႉ ၵိုတ်းတိုၵ်းၵၼ်တင်းသိုၵ်းမၢၼ်ႈ ၼဢၽ သေ ဢဝ်လွင်ႈငမ်းယဵၼ်ၸဵမ်မိူဝ်ႈပီ 1989 ။ ယွၼ်ႉၼၼ်လႄႈသိုၵ်းမၢၼ်ႈၸင်ႇမၵ်းမၼ်ႈ ဝဵင်းလၢဝ်ႇၵၢႆး (ၵၢတ်ႇၵဝ်ႇ) လႄႈ ဝဵင်းၵွင်းၸၢင်ႉ ၼၼ်ႉပဵၼ်ၼႃႈလိၼ်ၶိုၵ်ႉတွၼ်းမၢႆ 1 ၼႆသေ ပၼ်တပ်ႉသိုၵ်းၵဝ်ႈၵၢင်ႉၽွင်းငမ်းမႃး။

ၵၢၼ်ၵႃႉၶၢႆၸွမ်းလႅၼ်လိၼ်

ဝၢႆးလင် MNDAA ပိုၼ်ၽၢဝ်ႇပိူင်ၽွင်းငမ်းမႂ်ႇၶဝ်ဢမ်ႇႁိုင်လၢႆဝၼ်းၵေႃႈ ၵၢၼ်ၵႃႉၶၢႆၸွမ်းလႅၼ်လိၼ်တႆး-ၶႄႇ ၵေႃႈၶိုၼ်းတူင်ႉၼိုင်ၶဝ်ႈဢွၵ်ႇၶိုၼ်း။ ၵဵတ်ႉလၢၼ်ႇၵေႃႈပၼ်ရူတ်ႉၵႃးတၢင်ႇၶူဝ်းၵုၼ်ႇ ၶဝ်ႈဢွၵ်ႇၵႂႃႇမႃးၶိုၼ်းၽွင်ႈ။

မိူၼ်ၼင်ႇ ၵဵတ်ႉ/လၢၼ်ႇ ၶျိၼ်ႊသူၺ်ႇႁေႃႇ (ဢၼ်ယႂ်ႇသုတ်းထိ 2 ၼႂ်းလၢၼ်ႇလႅၼ်လိၼ် တႆး-ၶႄႇ ၼၼ်ႉ) တႄႉ ပၼ်ၵႃးတၢင်ႇၶူဝ်းၵုၼ်ႇဢၼ်လုၵ်ႉၼႂ်းၼႃႈလိၼ်ၵဝ်ႈၵၢင်ႉၵုမ်းၼၼ်ႉ ၶဝ်ႈဢွၵ်ႇၵူႈဝၼ်းယဝ်ႉၼႆ သိုၵ်းၵဝ်ႈၵၢင်ႉပိုၼ်ၽၢဝ်ႇမိူဝ်ႈႁူဝ်လိူၼ်ၵျႅၼ်ႊၼိဝ်ႊရီႊ ၼႆႉၼင်ႇၼႆ။

လၢၼ်ႇလႅၼ်လိၼ် ၶျိၼ်းသူၺ်ႇႁေႃႇၼႆႉ ၵွၼ်ႇၼႃႈပၢင်တိုၵ်းၽႅၼ်ယၼ်ႇသိုၵ်း 1027 ၼၼ်ႉ ရူတ်ႉၵႃးၶူဝ်းၵုၼ်ႇၶဝ်ႈဢွၵ်ႇ ၼိုင်ႈဝၼ်းတေမီးၵႃႈၶၼ်ဢမ်ႇယွမ်း 6 လၢၼ်ႉၻေႃႊလႃႊ ၼႆ ISP Myanmar ပိုၼ်ၽၢဝ်ႇဝႆႉၼင်ႇၼႆ။

လၢၼ်ႇလႅၼ်လိၼ် တႆး- ၶႄႇဢၼ်ၼႆႉ သိုၵ်းၵဝ်ႈၵၢင်ႉ ပိုၼ်ၽၢဝ်ႇတႄႇပိုတ်ႇပၼ်ၶိုၼ်း မိူဝ်ႈလိူၼ်မၢတ်ႉၶျ် 2025 ၼၼ်ႉဝႃႈၼႆသေတႃႉ မိူင်းၶႄႇသမ်ႉ ဢမ်ႇယွမ်းပိုတ်ႇပၼ်လႄႈ ၵၢၼ်ၵႃႉၶၢႆလႅၼ်လိၼ် လႆႈၵိုတ်းၵႂႃႇတင်းႁိုင်။

ယွၼ်ႉဝႃႈ လၢၼ်ႇၵၢၼ်ၵႃႉလႅၼ်လိၼ်ၸိူဝ်းၼႆႉ ၶႄႇသင်ႇပိၵ်ႉၸဵမ်မိူဝ်ႈပၢင်တိုၵ်းၽႅၼ်ယၼ်ႇသိုၵ်း 1027 ၼၼ်ႉ ၽွင်းပီ 2024 ဢွၵ်ႊထူဝ်ႊပိူဝ်ႊ ၼၼ်ႉမႃး။

ၵူၺ်းၵႃႈ ႁူဝ်ပီ 2026 ၼႂ်းၶၢဝ်းတၢင်း ၽၢၵ်ႇလိူၼ်သၢဝ်းဝၼ်းၼႆႉၵူၺ်း ၸူဝ်ႈလၢၼ်ႇၶိုၼ်းပိုတ်ႇမႃးၼႆႉ ရူတ်ႉၵႃးတၢင်ႇၶူဝ်းၵုၼ်ႇဢၼ်လုၵ်ႉတၢင်းၾင်ႇမိူင်းတႆးၶဝ်ႈၵႂႃႇမိူင်းၶႄႇ ၼိုင်ႈဝၼ်းဢမ်ႇယွမ်း 200 လမ်း- ၼႆၵူၼ်းပိုၼ်ႉတီႈၵေႃႈလၢတ်ႈၼင်ႇၼႆ။

ၵူၺ်းၵႃႈ ၸဝ်ႈၼႃႈတီႈတင်းသွင်ၾင်ႇၸိုင်ႈမိူင်း ၵူတ်ႇထတ်းရူတ်ႉတၢင်ႇၵုၼ်ႇႁၢဝ်ႈႁႅင်း ။ ပိူင်လူင် ထတ်းတူၺ်းၵူဝ်ပႃးၶိူင်ႈၵွင်ႈၵၢင်ႇလႄႈ ၶိူင်ႈၸႂ်ႉၼႂ်းၵၢၼ်သိုၵ်း မႃးၵူၺ်းၼင်ႇၵဝ်ႇ ။ ယွၼ်ႉဝႃႈၵွၼ်ႈၼႃႈပၢင်တိုၵ်းၸိူဝ်းၼၼ်ႉ ယၢမ်ႈမီးမႃးဝႃႈ ၸုမ်းယိပ်းၵွင်ႈၵၢင်ႇသၢၼ်ၶတ်းၸဝ်ႈဢႃႇၼႃႇသိုၵ်းယူႇယၢမ်းလဵဝ်ယၢမ်ႈသင်ႇသိုဝ်ႉ သိူဝ်ႈၶူဝ်းသိုၵ်းၼႂ်းမိူင်းၶႄႇၶဝ်ႈမႃး။ ယွၼ်ႉဝႃႈၶူဝ်းတၢင်းမိူင်းၶႄႇ ၵႃထုၵ်ႇၵႃႈပေႃး- ၸဝ်ႈၵႃးလၢတ်ႈၼင်ႇၼႆ။

ၾၢႆႇၼိုင်ႈ ၶူဝ်ၽႅၼ် ၵုၼ်လူင် ဢၼ်မီးၼိူဝ်သဵၼ်ႈတၢင်း သႅၼ်ဝီ – ၶျိၼ်းသူၺ်ႇႁေႃႇ -ဢၼ်လူႉၵွႆၵႂႃႇယွၼ်ႉၵဝ်ႇၽင်ႉ ၸိူဝ်းၼၼ်ႉၵေႃႈ သိုၵ်းၵဝ်ႈၵၢင်ႉၶိုၼ်းမႄးၵုမ်းၵေႃႇၵၢႆႇ ၼႂ်းၵၢင်ပီ 2025 ယဝ်ႉတူဝ်ႈလီငၢမ်း – ဢၼ်ၼႆႉၵေႃႈႁဵတ်းႁႂ်ႈ ၵၢၼ်ၵႃႉၶၢႆၶႅမ်ႉလႅပ်ႈဝႆးၶၼ်လီ ။ ပိူင်လူင်တႄႉ ဝဵင်းၸဝ်ႈၾႃႉသႅၼ်ဝီ ဢၼ်သိုၵ်းၵဝ်ႈၵၢင်ႉယိုတ်းလႆႈပဵၼ်ဝဵင်းဢွၼ်တၢင်းသုတ်း ၼႂ်းၽႅၼ်ယၼ်ႇသိုၵ်း 1027 ၼၼ်ႉၵေႃႉ သိုၵ်းမၢၼ်ႈတိုၵ်ႉၵုမ်းဝႆႉယူႇတေႃႇထိုင်ယၢမ်းလဵဝ်။

လၢၼ်ႇၶျိၼ်းသူၺ်ႇႁေႃႇၶိုၼ်းပိုတ်ႇယဝ်ႉသေတႃႉ လၢၼ်ႇလႅၼ်လိၼ် 105 လၵ်းတႄႉပႆႇပိုတ်ႇၶိုၼ်းတေႃႇထိုင် ၵၢင်လိူၼ်ႊၼိဝ်ႊရီႊ 2026 ၼႆႉ။

ဝဵင်းသႅၼ်ဝီ ဝဵင်းလီတႃႇၵၢၼ်ၵႃႉၶၢႆ

မိူင်းၶႄႇယူႇၵၢင်ၸွႆႈၵႄႈလိတ်ႈလႄႈ သိုၵ်းၵဝ်ႈၵၢင်ႉၽွမ်ႉထွႆဢွၵ်ႇဝဵင်းလႃႈသဵဝ်ႈပၼ်သိုၵ်းမၢၼ်ႈၶဝ်ႈၵုမ်းၵမ်ၶိုၼ်းသေတႃႉ ဝဵင်းသႅၼ်ဝီတႄႉ ပဵၼ် ပိုၼ်ႉတီႈလမ်ႇလွင်ႈ လွၵ်းၵၢတ်ႇလူင်တွၼ်ႈတႃႇၵၢၼ်ၵႃႉၶၢႆ မိူင်းၶႄႇ- မိူင်းမၢၼ်ႈ လႄႈ သိုၵ်းၶႄႇၵဝ်ႈၵၢင်ႉလႄႈတင်းသိုၵ်းမၢၼ်ႈ ၶႂ်ႈလႆႈယူႇႁင်းၽႂ်မၼ်း။

တႃႇတေလႆႈၶိုၼ်းဝဵင်းသႅၼ်ဝီၼၼ်ႉသိုၵ်းမၢၼ်ႈ ၶဝ်ႈႁႃ ဢုပ်ႇၵုမ်ၵၼ်တင်းၽူႈၼမ်းၸိၵ်းၸွမ် သိုၵ်းၵဝ်ႈၵၢင်ႉလၢႆလၢႆၵမ်းယူႇၵေႃႈ ဢမ်ႇဢွင်ႇမၢၼ်မႃးသေၵမ်း။

ယင်းမီးၶၢဝ်ႇဢွၵ်ႇမႃးဝႃႈ တႃႇတေဢမ်ႇလႆႈဢဝ်ဝဵင်းသႅၼ်ဝီပၼ်ၶိုၼ်းၼႂ်းမိုဝ်းသိုၵ်းမၢၼ်ႈၼၼ်ႉ ၽွင်းပီ 2025 ပူၼ်ႉမႃးၼႆႉ သိုၵ်းၵဝ်ႈၵၢင်ႉ ဢဝ်ႁူဝ်ၶေႃႈဝႃႈ ၵႂႃႇႁၢႆးငၢၼ်းလွင်ႈၵၢၼ်ၽွင်းငမ်းဝဵင်းသႅၼ်ဝီၼႆသေ လၵ်ႉလွမ်ၵႂႃႇဢုပ်ႇတင်းမိူင်းၶႄႇလၢႆလၢႆၵမ်းယူႇ – ဝႃႈၼႆ။

ၵူၺ်းၵႃႈ တီႈပၢင်ႁူပ်ႉထူပ်းတင်းၶႄႇၼၼ်ႉ သိုၵ်းၵဝ်ႈၵၢင်ႉတုၵ်းယွၼ်းတီႈၶႄႇ – ႁႂ်ႈၶႄႇပၼ်ႁႅင်းဢီးသိုၵ်းမၢၼ်ႈ – ယႃႇႁႂ်ႈယွၼ်းဝဵင်းသႅၼ်ဝီၶိုၼ်းတီႈၵဝ်ႈၵၢင်ႉ – ၼႆၼၼ်ႉၵေႃႈ ပေႃးတူၺ်းၶိုၼ်းယၢမ်းလဵဝ်သိုၵ်းမၢၼ်ႈဢမ်ႇယွၼ်းထႅင်ႈလႄႈ လႆႈဝႃႈ ၵၢၼ်ဢုပ်ႇဢူဝ်းၼၼ်ႉဢွင်ႇမၢၼ်ယူႇ – ၼႆ ဢိင်ၼိူဝ် ၵူၼ်းၸမ်ၸႂ် တင်းသိုၵ်းၵဝ်ႈၵၢင်ႉၵေႃႉၼိုင်ႈၶိုၼ်းလၢတ်ႈၼေၼႆသေ ၶၢဝ်ႇ BBC တႅမ်ႈတၢင်ႇဝႆႉၼင်ႇၼႆ။

ၾၢႆႇၼိုင်ႈ – တွၼ်ႈတႃႇပိုတ်ႇလၢၼ်ႇလႅၼ်လိၼ်ၶျိၼ်းသူၺ်ႇႁေႃႇလႄႈ လၢၼ်ႇၵၢၼ်ၵႃႉလႅၼ်လိၼ်တီႈမူႇၸေႊ ၼႆသေ ၼႂ်းၸႄႈတွၼ်ႈသႅၼ်ဝီၼၼ်ႉသိုၵ်းၵဝ်ႈၵၢင်ႉ တင်ႈၵဵတ်ႉ/လၢၼ်ႇၵဵပ်းၶွၼ်ႇ ၵူတ်ႇထတ်း ဢၼ်မႂ်ႇထႅင်ႈ 6 တီႈ။ သိုၵ်းၵဝ်ႈၵၢင်ႉၼႄၶေႃႈဢၢင်ႈဝႃႈ ဢဝ်ႁူမ်ႇလူမ်ႈပၼ်ရူတ်ႉၵႃးတၢင်ႇၶူဝ်းၵုၼ်ႇ တႃႇႁႂ်ႈၶိုၼ်ႈလူင်းၵႂႃႇမႃးလႆႈတင်းဝၼ်းတင်းၶိုၼ်းဝႃႈၼႆ။

ၵၢၼ်ၽွင်းငမ်းလႄႈ တႅပ်းတတ်းတြႃး

ၵၢၼ်ၽွင်းငမ်းလႄႈတႅပ်းတတ်းတြႃး 4 ၸႄႈတွၼ်ႈ ဢၼ်ၶဝ်ႈပႃးၼႂ်းၼႃႈလိၼ်ၶိုၵ်းတွၼ်းမၢႆ 1 ၶွင်ၵဝ်ႈၵၢင်ႉ ဢၼ်ၶိုၼ်းၶွတ်ႇၽွတ်ႈမႂ်ႇၼႆႉ တေပဵၼ်သိုၵ်းၵဝ်ႈၵၢင်ႉၵုမ်းၵမ်ၵူၺ်း။

ၵူၺ်းၵႃႈ မိူၼ်ၼင်ႇၼႂ်းၸႄႈတွၼ်ႈၵူတ်ႉၶၢႆ – ၼွၵ်ႈလိူဝ်သိုၵ်းၵဝ်ႈၵၢင်ႉယဝ်ႉ ယင်းမီးပႃး သိုၵ်းတဢၢင်း TNLA သိုၵ်းၶၢင် KIA ၸိူဝ်းၼႆႉထႅင်ႈလႄႈ လႆႈမႅင်ႇၼႃႈတီႈၵၼ်ၽွင်းငမ်း၊ သိုၵ်းၵဝ်ႈၵၢင်ႉ ဢမ်ႇၸၢင်ႈၽွင်းငမ်းပတ်းပိုၼ်ႉတင်းမူတ်း ဝႃႈၼႆ။ ၵူၺ်းၵႃႈ ဢၼ်ၵိုတ်း 3 ၸႄႈတွၼ်ႈၼၼ်ႉတႄႉ ပဵၼ်တႂ်ႈပိူင်ၽွင်းငမ်းသိုၵ်းၵဝ်ႈၵၢင်ႉ။ ၸင်ႇဝႃႈ ၵႆႉလႆႈႁၼ်သိုၵ်းၵဝ်ႈၵၢင်ႉ တႅပ်းတတ်းတြႃး ပၼ်တူတ်ႈတၢမ်ႇ ၵူၼ်းမီးတၢင်းၽိတ်း ၼႂ်းပိုၼ်ႉတီႈ ။ တၢင်းၽိတ်းတူတ်ႈတၢမ်ႇႁၢႆႉႁႅင်းသုတ်းၵေႃႈ ပၼ်တၢမ်ႇတၢႆ – ယိုဝ်းတၢႆတေႃႇၼႃႈတေႃႇတႃ ၵူၼ်းမိူင်း။

တွၼ်ႈတႃႇၵၢၼ်ၽွင်းငမ်းတေၶႅမ်ႉလႅပ်ႈၼၼ်ႉသိုၵ်းၵဝ်ႈၵၢင်ႉ ပိုတ်ႇပၢင်သွၼ် ၵၢၼ်ၽွင်းငမ်း ယဝ်ႉတူဝ်ႈထိုင်ပွၵ်ႈၵမ်း 4 ယဝ်ႉ သိုၵ်းၵဝ်ႈၵၢင်ႉပိုၼ်ၽၢဝ်ႇဝႆႉၼင်ႇၼႆ။

ၽွင်းပွႆးလူင်ပၢင်သွၼ်ၸုပ်ႈ 4 မိူဝ်ႈဝၼ်းတီႈ 5/1/2026 ၼၼ်ႉၵေႃႈ ၵႅမ်ၸွမ်ႁၢၼ် ၵျိၼ်ႊသျိၼ်ႊ ၽူႈၶဝ်ႈၸုမ်း ပိဝ်ႊရူဝ်ႊၵၢၼ်မိူင်း ၶွမ်ႊမတီႊငဝ်ႈငုၼ်းသိုၵ်းၵဝ်ႈၵၢင်ႉ လၢတ်ႈတီႈပွႆးလူင်းပၢင်သွၼ်ၼၼ်ႉဝႃႈ – ယၢမ်းလဵဝ်ပဵၼ်ၶၢဝ်းလႅၵ်ႈလၢႆႈ လုၵ်ႉဢဝ်တီႈ ၵၢၼ်ပူၵ်းပွင်သေ တေၵႂႃႇတီႈ ၵၢၼ်ၽွင်းငမ်းလႄႈလွင်ႈႁုၼ်ႈမုၼ်းမႂ်ႇသုင် ဝႃႈၼႆ။

ယူႇတီႈၵူၼ်းသိုၵ်းၵေႃႉႁၢၼ်ၶဝ်ႈၵေႃႈ တၵ်းလႆႈမေႃထတ်းသၢင်ငဝ်းလၢႆးၵၢၼ်သိုၵ်းၵူၺ်းဢမ်ႇၵႃး တႃႇၶၢဝ်းယၢဝ်းမိူဝ်းၼႃႈၼၼ်ႉ ႁႂ်ႈမေႃၸတ်းၵၢၼ် ၼႂ်းၽႅၼ်ပၢႆးတိုၵ်း ပၢႆးသိုၵ်း ႁႂ်ႈလႆႈလွင်ႈဢွင်ႇမၢၼ်ယူႇတႃႇသေႇၼႆ ႁႂ်ႈပဵၼ်ဢဵၼ်ႁႅင်းမႂ်ႇ ႁႅင်းယႂ်ႇတွၼ်ႈတႃႈမိူဝ်းၼႃႈၵဝ်ႈၵၢင်ႉ – လၢတ်ႈၵႂႃႇပႃးၼင်ႇၼႆ။

ပၢႆးယူႇလီလႄႈပၢႆးပၺ်ၺႃ

ၼႂ်းၼႃႈလိၼ်ဢၼ်သိုၵ်းၵဝ်ႈၵၢင်ႉၵုမ်းၵမ်ၼၼ်ႉ ၸဵမ်ႁွင်ႈပၼ်ယႃ လႄႈ ႁူင်းယႃလူင် ဢမ်ႇယွမ်း 10 တီႈၸိူဝ်းၼႆႉၵေႃႈပဵၼ် ၾၢႆႇပၢႆးယူႇလီသိုၵ်းၵဝ်ႈၵၢင်ႉ ၵုမ်းၵမ်ဝႆႉ။ မိူၼ်ၼင်ႇႁူင်းယႃလူင် တီႈဝဵင်း ၵုၼ်လူင် ၊ ၵိဝ်ႇၵူတ်ႉ(ပၢင်ႇသၢႆး)၊ မိူင်းၵူဝ်း၊ လၢဝ်ႇၵၢႆး၊ သႅၼ်ဝီ လႄႈၼွင်မွၼ် ၸိူဝ်းၼႆႉဝႃႈၼႆ။

ၼႂ်းႁူဝ်ပီ 2026 ၼႆႉၵူၺ်း လႆႈႁၼ်သိုၵ်းၵဝ်ႈၵၢင်ႉ ပိုၼ်ၽၢဝ်ႇႁွင်ႉၵူၼ်းႁဵတ်းၵၢၼ်ၾၢႆႇပၢႆးယူႇလီ လႄႈ ၾၢႆႇယိပ်းၵၢၼ်လုမ်းၸိူဝ်းၼႆႉ ၊ ယင်းပၢႆႁွင်ႉပႃး ၽူႈမီးတၢင်းႁူႉၸိူဝ်းၼႆႉပႃးလူးၵွၼ်ႇ။

ယွၼ်ႉပိူဝ်ႈတီႈဝဵင်းသႅၼ်ဝီၼႆႉ ယၢမ်းလဵဝ် သိုၵ်းၵဝ်ႈၵၢင်ႉ တိုၵ်ႉၵေႃႇသၢင်ႈႁူင်းယႃလူင်ဝႆႉယူႇလင်ၼိုင်ႈ ဢၼ်တေၵိုၵ်းပႃးၸွမ်း ၵၢတ်ႇလူင်လင်ၼိုင်ႈ တီႈပွၵ်ႉ 1 ဝဵင်းသႅၼ်ဝီ။ မီးၶၢဝ်ႇဝွင်းဝႅင်းဢွၵ်ႇမႃးဝႃႈ တီႈႁူင်းယႃမႂ်ႇၼႆႉ တေဢဝ် မေႃယႃလူင် ၊ ၶူးမေႃယႃလူင် ဢၼ်ပဵၼ်ၶႄႇၵဝ်ႈၵၢင်ႉၼၼ်ႉမႃးပၼ်တီႈယူႇဝႆႉ- ဝႃႈၼႆ။

ဢၼ်ပဵၼ်ၾၢႆႇပၢႆးပၺ်ႇၺႃႇသမ်ႉ ႁူင်းႁဵၼ်းၸိူဝ်းလူႉၵွႆယွၼ်ႉပၢင်တိုၵ်း 1027 ၼၼ်ႉ ယၢမ်းလဵဝ်သိုၵ်းၵဝ်ႈၵၢင်ႉၶိုၼ်းမႄးၵုမ်းၵေႃႇသေ တႄႇပိုတ်ႇပၼ်ၶိုၼ်းယူႇၽွင်ႈယဝ်ႉ။ တီႈဝဵင်းလၢဝ်ႇၵၢႆးၵေႃႈ ၽွင်းပီမႂ်ႇလုမ်ႈၾႃႉၼၼ်ႉ ႁူင်းႁဵၼ်းယႂ်ႇၼႂ်းဝဵင်းလၢဝ်ႇၵၢႆး ၸတ်းႁဵတ်းပွႆး (ၸူင်ႇၺီႇပွႆးတေႃႇ) ။ ၽွင်းၼၼ်ႉ ၽူႈၵွၼ်းၾၢႆႇၽွင်းငမ်း မွၵ်ႇလၢတ်ႈၶေႃႈၵႂၢမ်းဝႃႈ တေသၢင်ႈပၼ်ပၢႆးပၺ်ၺႃ လုၵ်ႈဢွၼ်ႇၼႂ်းၼႃႈတီႈၵဝ်ႈၵၢင်ႉၽွင်းငမ်း ႁႂ်ႈလႆႈပၢႆးပၺ်ၺႃဢၼ်ၶႅမ်ႉဢၼ်လီ” ဝႃႈၼႆ။