ပၢင်လိူၵ်ႈတင်ႈ ပွၵ်ႈၵမ်း 2 ဢၼ်သိုၵ်းမၢၼ်ႈယိုတ်းမိူင်း ၸတ်းႁဵတ်းၵႂႃႇၼႆႉ ၼႂ်းမိူင်းတႆးပွတ်းဢွၵ်ႇ ပႃႇတီႇသၢင်ႇသီႈ USDP လႆႈၶႅပ်းၵၢင်ၸႂ် ၼမ်လိူဝ်ပိူၼ်ႈသုတ်း ဝႃႈၼႆ။

ၸႄႈဝဵင်းၸိူဝ်းလႆႈၸတ်းႁဵတ်းပၢင်လိူၵ်ႈတင်ႈ ပွၵ်ႈၵမ်း 2 ၼႂ်းမိူင်းတႆးပွတ်းဢွၵ်ႇ ပႃး 6 ၸႄႈဝဵင်း ပဵၼ်ၸႄႈဝဵင်းမိူင်းၶၢၵ်ႇ၊ ၸႄႈဝဵင်းမိူင်းတူၼ်၊ ၸႄႈဝဵင်းမိူင်းၽျၢၵ်ႈ၊ ၸႄႈဝဵင်းမိူင်းပဵင်း၊ ၸႄႈဝဵင်းမိူင်းယွင်း၊ ၸႄႈဝဵင်းမိူင်းယၢင်း ။

ၸၢႆးလိူၼ်ၶမ်း ၼေႃႇတႅၼ်းၽွင်းၸႄႈမိူင်း ပႃႇတီႇသၢင်ႇသီႈ ဝဵင်းမိူင်းယၢင်း လၢတ်ႈၼႄတီႈၽူႈတွႆႇႁွၵ်ႈဝႃႈ “မိူဝ်ႈလဵဝ် တီႈဝဵင်းမိူင်းယၢင်းႁဝ်းၶႃႈတႄႉ လႆႈႁူႉၶေႃႈတွပ်ႇမၼ်းၶၢဝ်ႉၶၢဝ်ႉယဝ်ႉၶႃႈ။ ပႃႇတီႇသၢင်ႇသီႈႁဝ်း တိုၼ်းပေႉၵိၼ်ၶၢတ်ႇယဝ်ႉဢေႃႈ။ ဢၼ်ႁဝ်းလူဝ်ႇလႆႈႁူႉႁူဝ်ၼပ်ႉၶႅပ်းၵၢင်ၸႂ်ၼႆႉ ၵိုတ်း 4 တီႈ ၸိူဝ်းၼိူဝ်လွႆ ၼၼ်ႉၵူၺ်း။ လႆႈဝႃႈ ႁဝ်းပေႉဝႆႉတႃႇ 81% ယဝ်ႉၶႃႈ။ ၵူႈၸႄႈဝဵင်းၼႂ်းမိူင်းတႆးပွတ်းဢွၵ်ႇၼႆႉ ပႃႇတီႇသၢင်ႇသီႈ ႁဝ်းတိုၼ်းပေႉၼႄႉၼွၼ်းယဝ်ႉၶႃႈ ” ဝႃႈၼႆ။

တီႈမိူင်းယၢင်းၼႆႉ မီးပႃႇတီႇသၢင်ႇသီႈလႄႈပႃႇတီႇသိူဝ်ၽိူၵ်ႇၵူၺ်း ဢၼ်ၶေႉၶဵင်ႇၵၼ်။ ၵူၺ်းၵႃႈႁူဝ်ၼပ်ႉၶႅပ်းၵၢင်ၸႂ်လႆႈဝႆႉၼၼ်ႉ ႁၢင်ႇပိူင်ႈၵၼ် ႁူဝ်ႁဵင်ၶႅပ်းမၼ်း။ သင်ပႃႇတီႇသၢင်ႇသီႈ လႆႈ 4000 ၶႅပ်းၸိုင် ပႃႇတီႇသိူဝ်ၽိူၵ်ႇလႆႈယူႇ မွၵ်ႈ 1000 ၶႅပ်းပၢႆၵူၺ်းၼႆ ၼေႃႇတႅၼ်းၽွင်းပႃႇတီႇသၢင်ႇသီႈ လၢတ်ႈၼႄၼင်ႇၼႆ။

ၼႂ်းၸႄႈဝဵင်းမိူင်းယၢင်းၼႆႉ ၼေႃႇတႅၼ်းၽွင်းၵူၼ်းမိူင်း ပဵၼ်လုင်းၸၢႆးသၢမ်၊ ၼေႃႇတႅၼ်းၽွင်းၸႄႈမိူင်း ဢွင်ႈတီႈ (FPTP) ပဵၼ်ၸၢႆးလိူၼ်ၶမ်း လႄႈ ၸၢႆးသႅင်ဝုၼ်း (PR) သေ ၼေႃႇတႅၼ်းၽွင်းၸိူဝ်ႉၸၢတ်ႈ ဢွင်ႈတီႈ FPTP တႄႉ ပဵၼ်တွၵ်ႇတႃႇၵျေႃႇထုၼ်း ဝႃႈၼႆ။

ႁူဝ်ၼပ်ႉႁူင်းပၼ်သဵင် ၼႂ်းၸႄႈဝဵင်းမိူင်းယၢင်းၼႆႉ မီးယူႇ 23 တီႈ တၢင်းၼမ်ၵူၼ်းမိူင်းၸိူဝ်းမီးသုၼ်ႇပၼ်ၶႅပ်း ၵၢင်ၸႂ် မီး 6303 ၵေႃႉသေ ၵူၼ်းၸိူဝ်းၵႂႃႇပၼ်သဵင် ၼႂ်းဝၼ်းပၢင်လိူၵ်ႈတင်ႈမိူဝ်ႈၼႆႉ (11/01/2026) ၼႆႉ မီးယူႇ 5098 ၵေႃႉ ဝႃႈၼႆ။

ၼႂ်းမိူင်းယၢင်းၼႆႉမီးတႆးလူင် တႆးၶိုၼ် တႆးလိုဝ်ႉ ဢိၵ်ႇလၢႆလၢႆၸၢဝ်းၶိူဝ်းႁူမ်ႈၵၼ်ယူႇသဝ်းဝႆႉ။ ၵူၺ်းၵႃႈ ဢၼ်သႂ်ႇပၼ်ၶႅပ်းမႄးပႃႇတီႇတႆး မီးဢႄႇၼႃႇ။ ဝဵင်းမိူင်းယၢင်းၼႆႉၸဵမ်မိူဝ်ႈပၢင်လိူၵ်ႈတင်ႈ 2010 မႃးတေႃႇထိုင်ယၢမ်းလဵဝ်ပႃႇတီႇသၢင်ႇသီႈဢွင်ႇပေႉၵိၼ်ၶၢတ်ႇမႃးတႃႇသေႇ။