ၵူၼ်းမိူင်းၸိူဝ်းယူႇၼႂ်းဝၢၼ်ႈ ၼႂ်းပွၵ်ႉ ၸႄႈဝဵင်းၵုၼ်ႁဵင် ဢမ်ႇသူၼ်ၸႂ်ၼိူဝ်ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်း တေၼမ်း ၸတ်းႁဵတ်းၼႆႉၵူၺ်းဢမ်ႇၵႃး ၾၢႆႇၼိုင်ႈၵေႃႈ ယွၼ်ႉပႃႇတီႇၵၢၼ်မိူင်း ၵူႈၸုမ်းဢမ်ႇၶဝ်ႈႁူမ်ႈပႃးလႆႈလႄႈ ၸင်ႇဢမ်ႇတူင်ႉတိုၼ်ႇ သင်ၵၼ်ၸွမ်း ၼႆယဝ်ႉ။

တႄႇႁူဝ်လိူၼ်ၵျႅၼ်ႊၼိဝ်ႊရီႊ ပီ 2026 ၼႆႉမႃး ၶႃႈႁၢပ်ႇၵၢၼ်ၶုၼ် တႂ်ႈသိုၵ်းမၢၼ်ႈယိုတ်းမိူင်း ၸိူဝ်းတူၵ်းပုၼ်ႈၽွၼ်းယူႇၼႂ်း ၸႄႈဝဵင်းၵုၼ်ႁဵင် လႄႈ ၵႃလိၼၼ်ႉ ၸီႉသင်ႇႁႂ်ႈ ၽူႈ ၵွၼ်းပွၵ်ႉ၊ ၵွၼ်းဢိူင်ႇၶဝ်ၵႂႃႇဢဝ်ၶႅပ်းဝႂ်တူဝ် (တုံကင်ကတ်) တႃႇၵႂႃႇတွတ်ႈၶႅပ်းၵၢင်ၸႂ် ပၼ်သဵင် ၼႂ်းဝၼ်းပၢင်လိူၵ်ႈတင်ႈ ဢၼ်တေၸတ်းႁဵတ်း ဝၼ်းတီႈ 11/01/2026 ဝၼ်းတိတ်ႉ ၼႆႉ ဝႃႈၼႆ။

ၶႅပ်းဝႂ်တူဝ် တႃႇၵႂႃႇတွတ်ႈၶႅပ်းၵၢင်ၸႂ်ၼၼ်ႉ ၽူႈမီးပုၼ်ႈၽွၼ်း လႄႈ ၶႃႈႁၢပ်ႇၵၢၼ်ၶုၼ်တႂ်ႈသိုၵ်းမၢၼ်ႈၶဝ် ဢွၼ်ၵၼ်ဢဝ်ၵႂႃႇပၼ် ၵူၼ်းမိူင်း ထိုင်ႁိူၼ်းထိုင်ယေးသေ လၢတ်ႈႁႂ်ႈ ၵူၼ်းမိူင်းၵႂႃႇသႂ်ႇပၼ်ၶႅပ်းၵၢင်ၸႂ်ၶဝ် ၼႆယဝ်ႉ။

ၼၢင်းယိင်း ဢႃႇယု 30 ပီပၢႆ ၵေႃႉယူႇဝႆႉ တီႈဝဵင်းၵုၼ်ႁဵင် လၢတ်ႈတီႈ ၽူႈတွႆႇႁွၵ်ႈဝႃႈ “ ဝႂ်တူင်ႇၵိၼ်ႇမၼ်း ၼၼ်ႉ ၶဝ်ပၢဝ်ႇႁႂ်ႈၵူၼ်းမိူင်းၵႂႃႇဢဝ်တီႈလုမ်း။ ပေႃးဢမ်ႇၵႂႃႇဢဝ် ၶဝ်မႃး သူင်ႇထိုင်ႁိူၼ်း။ လၢႆးႁဵတ်းၶဝ်ၼႆႉ ပေႃးၸိူင်ႉၼႆၼႆႉ ဢမ်ႇၸႂ်ႈဝႃႈ ဢဝ်သဵင်ၵၢင်ၸႂ်ၵူၼ်းမိူင်းယဝ်ႉ။ မိူၼ်ၵၼ်တင်းၶဝ်တဵၵ်းတဵင် လွၵ်ႇငိုတ်ႈႁႂ်ႈႁဝ်း ၵႂႃႇသႂ်ႇပၼ်မႄးၶဝ်ၵူၺ်း” ဝႃႈၼႆ။

ၸႄႈဝဵင်းၵုၼ်ႁဵင်ၼႆႉ ၶဝ်ႈပႃးၼႂ်းသဵၼ်ႈၸိုဝ်ႈ ၸႄႈဝဵင်းၸိူဝ်းတေလႆႈၸတ်းပၢင်လိူၵ်ႈတင်ႈ ပဵၼ်ပွၵ်ႈၵမ်း 2 သေ တႄႇဝၼ်းတီႈ 7/01/2026 မႃး ၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈ တင်ႈ တႂ်ႈသိုၵ်းမၢၼ်ႈ ၵုမ်းၵမ်ဝႆႉၼၼ်ႉ ၸႂ်ႉၵူၼ်းမိူင်းၸိူဝ်းမီးၵၢၼ်တေဢွၵ်ႇၶၢဝ်း တၢင်း လႄႈ ၵူၼ်းသိုၵ်း တင်း ၶႃႈႁၢပ်ႇၵၢၼ်ၶုၼ်ၼႂ်းႁွင်ႈၵၢၼ်လူင်ပွင်ၸိုင်ႈ (ၸိူဝ်တူၵ်းပုၼ်ႈ ၽွၼ်း တေလႆႈၵႂႃႇပႂ်ႉႁူင်းတွတ်ႈ ၶႅပ်းၵၢင်ၸႂ် ၼႂ်းဝၼ်းပၢင်လိူၵ်ႈတင်ႈၼၼ်ႉ) သႂ်ႇၶႅပ်းၵၢင်ၸႂ်ဝႆႉလူင်ႈၼႃႈယဝ်ႉ ဝႃႈၼႆ။

ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်းၼမ်းၸတ်းၼႆႉ ယွၼ်ႉဢမ်ႇမီးလွင်ႈၽဵင်ႇပဵင်းပဵၼ်ထမ်းၵေႃႈပိူင် ၼိုင်ႈ၊ ပဵၼ်ၶၢဝ်းၵူၼ်းမိူင်း ႁူပ်ႉတၢင်းယၢပ်ႇၵၢၼ်ႁႃၵိၼ်လဵင်ႉတွင်ႉၵေႃႈပိူင်ၼိုင်ႈ၊ ၾၢႆႇၼိုင်ႈၵေႃႈ ၵွၼ်ႇၼႃႈ ပၢင်လိူၵ်ႈတင်ႈၼႆႉ ၵူၼ်းမိူင်းလႆႈႁူႉႁၼ်ၸွမ်း လွင်ႈႁဵတ်းသၢင်ႈ သိုၵ်းမၢၼ်ႈ ပေႉၵိၼ်လူလၢႆ ၶႃႈႁႅမ်တၢႆ ၵူၼ်းမိူင်းၸဝ်ႈၵဝ်ႇၼၼ်ႉၵေႃႈပိူင်ၼိုင်ႈလႄႈ ၸင်ႇဢမ်ႇတဵမ်ၸႂ် ဢမ်ႇတူင်ႉတိုၼ်ႇတႃႇၵႂႃႇပၼ်ၶႅပ်းၵၢင်ၸႂ်တေႉတေႉ ၼႆ ၵူၼ်းမိူင်း ၵေႃႉယူႇဝႆႉၼႂ်းဝဵင်းၵႃလိ လၢတ်ႈၼႄၼင်ႇၼႆ။

“ၵူၼ်းမိူင်းႁဝ်းတႄႉ ဢမ်ႇသူၼ်ၸႂ်၊ ဢမ်ႇမီးၽႂ်တဵမ်ၸႂ်ႁႄၵႂႃႇပၼ်။ မိူဝ်ႈပူၼ်ႉမႃးပၢင်လိူၵ်ႈတင်ႈၸိူဝ်းၼၼ်ႉ ၵေႃႈ ပႃႇတီႇလႂ်ပေႉမႃးၵေႃႈ ဢမ်ႇမႃးႁဵတ်းသင်ပၼ်ႁဝ်းတေႉတေႉ။ မိူဝ်ႈလဵဝ်သမ်ႉ သိုၵ်းမၢၼ်ႈသမ်ႉမႃး သိမ်းဢႃႇၼႃႇဝႆႉႁႄၼႆ တေဝႃႈဢမ်ႇၵႂႃႇသႂ်ႇၶႅပ်းမႄးသေ ဢိတ်းၼႆၵေႃႈ ႁဝ်းတႄႉလွမ်ၵူဝ်ၶဝ်ႁဵတ်းတီႈႁဝ်းဝႆႉ ယူႇဢေႃႈ။ မိူဝ်ႈလဵဝ်ၵေႃႈ ၶဝ်မႃးလၢတ်ႈႁဝ်းထိုင်ႁိူၼ်း ႁႂ်ႈၵႂႃႇပၼ်မႄးၼႆဝႃႇ။ တေလႆႈၵႂႃႇသႂ်ႇပၼ်ၶဝ်ၵူၺ်းဢေႃႈ။”

ယၢမ်းလဵဝ် တႃႇငိုၼ်းၵမ်ႉၸွႆႈ ၵူၼ်းႁၢပ်ႇ ၵၢၼ်သိုၵ်းၼႆသေ သိုၵ်းမၢၼ်ႈယိုတ်းမိူင်းၵဵပ်းဢဝ်ငိုၼ်း တီႈၵူၼ်းမိူင်းၼႂ်းၸႄႈဝဵင်းၵုၼ်ႁဵင် ၼိုင်ႈလိူၼ်လႂ် ၼိုင်ႈႁိူၼ်း ဢေႇသုတ်း 5 မိုၼ်ႇပျႃး တေႃႇ 1 သႅၼ်ပျႃးဝႆႉလႄႈ ၽွင်းႁဵတ်းသၢင်သင်ၵေႃႈ ဢမ်ႇပေႃးပဵၼ်ၵၢၼ်ယူႇၼႆႉ ၵူၼ်းမိူင်းမုင်ႈမွင်းၶႂ်ႈႁႂ်ႈလူတ်းယွၼ်ႇပၼ်ၵႃႈၸႂ်ႉၸၢႆႇ ၸိူဝ်းၼႆႉသေ ၸင်ႇတေၵႂႃႇပၼ်ၶႅပ်းၵၢင် ၸႂ် ၼႆယဝ်ႉ။

လိူဝ်ၼၼ်ႉ ၶိူင်ႈၸၢၵ်ႈဢၼ်သိုၵ်းမၢၼ်ႈယိုတ်းမိူင်းႁဵတ်းဢွၵ်ႇမႃး တႃႇႁႂ်ႈၵူၼ်းမိူင်းၵႂႃႇၼဵၵ်း/တဵၵ်းပၼ်သဵင်ၵၢင်ၸႂ်ပႃႇတီႇလႂ်၊ ပႃႇတီႇၼၼ်ႉၵေႃႈ ၵူၼ်းမိူင်းၼႂ်းၸႄႈဝဵင်းၵုၼ်ႁဵင် ဢမ်ႇပွင်ႇၸႂ်ၵၼ်တေႉတေႉ ၼႆယဝ်ႉ။

ၼုမ်ႇၸၢႆး ဢႃႇယု 45 ပီ ၵေႃႉယူႇၼႂ်းဝဵင်းၵုၼ်ႁဵင်ဝႆႉ လၢတ်ႈၼႄတီႈၽူႈတွႆႇႁွၵ်ႈဝႃႈ “ယႃႇဝႃႈ ၵူၼ်းၸိူဝ်းယူႇ ၸွမ်းဝၢၼ်ႈဝႃႈ တေႃႈၼင်ႇၵူၼ်းၼႂ်းပွၵ်ႉ၊ ၼႂ်းဝဵင်းၵမ်ႈၼမ် ယင်းဢမ်ႇ ႁူႉဝႃႈ တေလႆႈၸႂ်ႉတိုဝ်းၶိူင်ႈၸၢၵ်ႈၼၼ်ႉ ၸိူင်ႉႁိုဝ်။ တမ်ႉဢမ်ႇပွင်ႇၸႂ်ၵၼ်တေႉတေႉ။ မိူဝ်ႈၶဝ်မႃးႁဵတ်းၼႄ၊ သွၼ်ၼႄၼၼ်ႉၵေႃႈ ၵူၼ်းၵႂႃႇတူၺ်းမၼ်းၼႆႉ မီးဢိတ်းၼိုင်ႈၵူၺ်း။ ၵွပ်ႈဝႃႈ ပၢင်လိူၵ်ႈတင်ႈၼႆႉ ၵူၼ်းမိူင်းဢမ်ႇသူၼ်ၸႂ်ၵၼ်လူး” ဝႃႈၼႆ။

ၼႂ်းၸႄႈဝဵင်းၵုၼ်ႁဵင်ၼႆႉ ပႃႇတီႇၸိူဝ်းတေၶဝ်ႈလိူၵ်ႈတင်ႈ မီးပႃႇတီႇသၢင်ႇသီႈ လႄႈ ပႃႇတီႇသိူဝ်ၽိူၵ်ႇၵူၺ်းသေ ႁူင်းပၼ်သဵင် တင်းသဵင်ႈမီးယူႇ 47 တီႈ။ သဵၼ်ႈမၢႆႁူဝ်ၼပ်ႉၵူၼ်း ၸိူဝ်းမီးသုၼ်ႇတေလႆႈပၼ်သဵင် ဢၼ်သိုၵ်းမၢၼ်ႈယိုတ်းမိူင်းပိုၼ်ၽၢဝ်ႇဢွၵ်ႇဝႆႉ မီးယူႇ 35221 ၵေႃႉ ၼႆယဝ်ႉ။