လိူၼ်မေႊ 2026 ၼႆႉ လူင်ပွင်ၸိုင်ႈထႆး တိုၵ်ႉပိုၼ်ၽၢဝ်ႇ တႃႇၵႂၢတ်ႇလၢင်ႉႁႅင်းၵၢၼ် ဢၼ်ဢမ်ႇယူႇၸွမ်းပၵ်းပိူင်ၸိုင်ႈမိူင်း တႃႇၶၢဝ်းယၢဝ်းၶၢဝ်းပွတ်းၼႆသေ ၵူတ်ႇထတ်းတီႉၺွပ်းမႃးယူႇၶိူဝ်းယႂ်း ။ ၵွၼ်ႇၼႃႈၼၼ်ႉၵေႃႈ လူင်ပွင်ၸိုင်ႈထႆး ပိုၼ်ၽၢဝ်ႇဝႆႉ ၶၢဝ်းယၢမ်းတမ်ႇၼွႆႉမွင်ၸႂ်ၸွမ်းၸဝ်ႈၼၢင်းလူင်တူၼ်ထူၼ်ႈၵဝ်ႈ ဢၼ်ၸၢမ်ႇပူႈၼွၼ်းၽေးၵႂႃႇၽွင်းႁၢင်ပီ ပီၵၢႆသေ ယင်းပႆႇလႆႈလုမ်းလႃးသၢင်းၵဵဝ်ႇၽဝ်ၶၢပ်ႈတူဝ်။ ၵမ်းၼႆႉသမ်ႉ မိူင်းထႆး မႃးမီးလွင်ႈတမ်ႇၼွႆႉမွင်ၸႂ်ထႅင်ႈ ယွၼ်ႉပိူဝ်ႈ လုၵ်ႈယိင်းလူင် ၸဝ်ႈမုၼ်ယႂ်ႇၶုၼ်ႁေႃၶမ်းတူၼ်ထူၼ်ႈသိပ်း လႆႈၸၢမ်ႇပူႈၼွၼ်းၽေးၵႂႃႇထႅင်ႈ ။

ၵွပ်ႈၼႆလႄႈယူႇတီႈႁႅင်းၵၢၼ်ယၢၼ်မိူင်း တၵ်းလႆႈမေႃယူႇသဝ်း မေႃတူၺ်းငဝ်းလၢႆးသေ ႁဵတ်းၸွမ်းပၵ်းပိူင်ဝၢၼ်ႈမိူင်းပိူၼ်ႈ ၸင်ႇတေၸၢင်ႈလွတ်ႈၽေး။ သင်ဢမ်ႇမေႃတူၺ်းငဝ်းလၢႆး ဢမ်ႇမေႃယူႇၸွမ်း ၵႃလၻေသ ၸိုင်ၸၢင်ႈယူႇယၢပ်ႇ ၸၢင်ႈတုမ်ႉတိူဝ်ႉၼႂ်းၵၢၼ်ႁႃၵိၼ်လဵင်ႉတွင်ႉ။

ၼႂ်းၸိုင်ႈထႆးၼႆႉ တိုၵ်ႉႁႃပိုၼ်ၽၢဝ်ႇယဝ်ႉၵႂႃႇဝၼ်းတမ်ႇၼွႆႉမွင်ၸႂ်ၸွမ်း ၸဝ်ႈၼၢင်း သီႇရီႇၵိတ်ႇ ၽရပရူမ်မရႃ ၶျိၼီၼၢတ်ႉ ၽရပရူမ်မရၢတ်ႉၶျၶျူၼ်ၼၼီ ၽၼ်းပီလူင် – ၵေႃႉပဵၼ်မႄႈၸဝ်ႈၵေးၸူး ၸဝ်ႈမုၼ်ယႂ်ႇၶုၼ်ႁေႃၶမ်းတူၼ်ထူၼ်ႈ 10 မိူင်းထႆးယၢမ်းလဵဝ် ပူၼ်ႉမႃးလၢႆလိူၼ်ၵူၺ်း ယၢမ်းလဵဝ် သမ်ႉမီးလွင်ႈမွင်ၸႂ်ၸွမ်း လုၵ်ႈယိင်းလူင် ၸဝ်ႈမုၼ်ယႂ်ႇၶုၼ်ႁေႃၶမ်းထႆး တူၼ်ထူၼ်ႈ 10 ၼႆထႅင်ႈ ။ ၼႂ်းၶၢဝ်းယၢမ်း မိူင်းထႆး မီးလွင်ႈမွင်ၸႂ်ၸိူင်ႉၼႆ ႁႅင်းၵၢၼ်ယၢၼ်မိူင်းၵေႃႈ ၼင်ႇႁိုဝ်တေဢမ်ႇပဵၼ်ဢၼ် ၵၢႆးႁူၵၢႆးတႃ ၸဝ်ႈၶွင်ဝၢၼ်ႈမိူင်းၼၼ်ႉ ထုၵ်ႇလီယူႇၸိူင်ႉႁိုဝ် ထုၵ်ႇလႆႈလဵပ်ႈႁဵၼ်းဝႆႉ ။

သင်မီး ငဝ်းလၢႆး ၶိုၵ်ႉၶၵ်ႉ ၊ ၽွင်းထႆး ပိုၼ်ၽၢဝ်ႇ လွင်ႈတမ်ႇၼွႆႉမွင်ၸႂ်သေပိူင်ပိူင်ၸိုင် လူင်ပွင်ၸိုင်ႈထႆး ၵႆႉပိုၼ်ၽၢဝ်ႇ ႁဵတ်းၸွမ်းၼင်ႇ ၶေႃႈၸိူဝ်းၼႆႉ
1) ဢွင်ႈတီႈၶႃႈႁၢပ်ႇၵၢၼ်ၶုၼ်ႁဵတ်းၵၢၼ်ၸိူဝ်းၼၼ်ႉ တေလႆႈလူတ်းတုင်းၸိူဝ်ႉၸၢတ်ႈထႆးလူင်းၶိုင်ႈသဝ်
2) ၶႃႈႁၢပ်ႇၵၢၼ်ၶုၼ် ႁႂ်ႈၼုင်ႈၶူဝ်းသီလမ် ႁိုဝ်ဢမ်ႇၼၼ် သီၶၢဝ်သေ ၼႄလွင်ႈတမ်ၼွႆႉမွင်ၸႂ်
3) တႃႇၵူၼ်းဝၢၼ်ႈၵူၼ်းမိူင်းသမ်ႉ ႁႂ်ႈၼုင်ႈပၼ်ၶူဝ်းလမ် ဢမ်ႇၼၼ် ၶူဝ်းသီသဝ်ႈ ဢၼ်ဢမ်ႇပေႃးၶွင်ႇပေႃးလႅင်ၼၼ်ႉ
4) တေဢမ်ႇႁႂ်ႈၸတ်းပၢင်ၵိၼ်ၵျေႃႇ သဵင်ၼၼ်ႈပၼ်းဢူၼ် ၊ မိူၼ်ၼင်ႇ ႁၢၼ်ႉၵိၼ်ၵျေႃႇ ( Pub , Bar ၽၢပ်ႊ ၊ ၿႃႊ ) ၊ ႁၢၼ်ႉႁွင်ႉၵႂၢမ်း KTV ပႃးၸဵမ်ပွႆးလၢမ်းၵူႈသႅၼ်းသႅၼ်း ၸိူဝ်းၼႆႉ ႁႂ်ႈၵိုတ်း ႁိုဝ်ဢမ်ႇၼၼ် လူတ်းယွမ်းလွင်ႈတူင်ႉၼိုင် ႁႂ်ႈမႅၼ်ႈၸွမ်းငဝ်းလၢႆး ၼႆၸိူဝ်းၼႆႉ ။

လွင်ႈၸိူဝ်းၼႆႉ ထႆးပိုၼ်ၽၢဝ်ႇၵေႃႈယဝ်ႉ ဢမ်ႇပိုၼ်ၽၢဝ်ႇၵေႃႈယႃႇ ႁႅင်းၵၢၼ်ယၢၼ်မိူင်း ၸိူဝ်းႁွတ်ႈသူႇ ႁဵတ်းၵၢၼ်ႁႃလဵင်ႉတွင်ႉယူႇမိူင်းထႆးၼႆႉတႄႉ ႁႂ်ႈမေႃၾၢင်ႉႁူႉသေ ယူႇၸွမ်းငဝ်းလၢႆး ၸင်ႇတေဢမ်ႇတုမ်ႉတိူဝ်ႉၵူၼ်းႁိမ်းႁွမ်း ၸင်ႇၸၢင်ႈယူႇငၢႆႈလူမ်ၸႂ် ။

ၼၢင်းမူဝ်ၶၢဝ်ၼူၼ်း ၽူႈၸတ်းလၢႆးၵၢၼ်ၽႃသႃတႆး ၼႂ်းႁူင်းပွႆႇသဵင်သေႃဝေႃႊထေႃႊ ၵဵင်းမႂ်ႇ ၸိုင်ႈထႆး လၢတ်ႈပၼ်ၾၢင်ႉဝႆႉၼင်ႇၼႆ –
” လွင်ႈၼႆႊလူင် ในหลวง ၵေႃႈ လွင်ႈၼႆႊလူင် ၵူၺ်းၵႃႈ ႁဝ်းသမ်ႉလူဝ်ႇလႆႈ ဝၢင်းတူဝ်ၸိူင်ႉႁိုဝ် ။ ၶႃႈဝၢၼ်ႈၵူၼ်းမိူင်း တေလႆႈႁဵတ်းၸိူင်ႉႁိုဝ်ဢၼ်ဝႃႈၼၼ်ႉ ပိူၼ်ႈတိုၵ်ႉဢုပ်ႇၵၼ်ပႆႇယဝ်ႉလီၶႃႈ ။ ဢၼ်ထီႉၼိုင်ႈၵေႃႈ ပူတ်းၸွမ်ပိဝ် လူင်းၵိုင်ႇသဝ် ။ ယဝ်ႉၵေႃႈ ၽူႈၸၢႆး သႂ်ႇၶူဝ်းသီလမ်ယိၼ်ႇငႄႈ ၼၢင်းယိင်းၵေႃႈသႂ်ႇၶူဝ်းသီလမ်ယိၼ်ႇငႄႈ ၼၼ်ႉၼႃႇ

လုၵ်ႈယိင်းလူင် ၸဝ်ႈမုၼ်ယႂ်ႇၶုၼ်ႁေႃၶမ်းထႆး တူၼ်ထူၼ်ႈ 10 ဢၼ်ၸၢမ်ႇပူၼွၼ်းၽေးၵႂႃႇၼႆႉ ၸိုဝ်ႈၸဝ်ႈယိင်း ၽတ်းၶျရ ၵိတ်ႇတိယႃႊၽႃႊ ၼရဵၼ်ႊထိရႃႊ ထဵပ်ႉၽယဝတီ ၵရူမ်ႊလူင် ရၢတ်ႉၶျသႃရိၼီႊ သီႇရီႇၽတ်း မႁႃဝတ်ႉၶျရထိၻႃႊ ။ ၵူၼ်းမိူင်းထႆးဢွၼ်ၵၼ်ႁွင်ႉလူၺ်ႈႁၵ်ႉလႄႈၼပ်ႉယမ်ဝႃႈ ၽရဢူင်ႊၽႃႊ ။

ၸဝ်ႈယိင်း လႆႈၼွၼ်းၽေးၵႂႃႇ ၼႂ်းဝၼ်းတီႈ 11/06/2026 ယၢမ်းၵၢင်ၶမ်ႈ 7 မူင်း 48 မိၼိတ်ႉ တီႈႁူင်းယႃ ၵျူႊလႃႊလူင်ႊၵွၼ်ႊသၽႃးၵႃၶျၢတ်ႉထႆး ၽွင်း ဢႃယု ထူၼ်ႈထိုင် 48 ပီ ။
ဢိင်ၼိူဝ် တၢင်းပဵၼ်လၢႆသႅၼ်းသေ ႁဵတ်းႁႂ်ႈ တုမ်ႉတိူဝ်ႉၶိူင်ႈၼႂ်းတူဝ် ၸဝ်ႈယိင်း လၢႆၸိူဝ်ႉလၢႆပိူင် ထိုင်တီႈ လိုမ်းတူဝ်မႃးၶၢဝ်းတၢင်း 4 ပီ ၼႆ ႁွင်ႈၵၢၼ်ၾၢႆႇပွင်ႇၶၢဝ်ႇႁေႃၶမ်းပိုၼ်ၽၢဝ်ႇဝႆႉ ။

ၸဝ်ႈယိင်းၼႆႉ ၸဵမ်မိူဝ်ႈဝၼ်းတီႈ 15/12/2022 ၽွင်းတိုၵ်ႉၾိုၵ်းပၼ် မႃလၵ်းလႅမ်မၼ်းၸဝ်ႈယူႇၼၼ်ႉ ၵိုင်ႉၵၢင်ႉလိုမ်းတူဝ်ၵႂႃႇလူၺ်ႈတၢင်းပဵၼ်ႁူဝ်ၸႂ်သေ ဢမ်ႇၶိုၼ်းႁူႉတူဝ် တေႃႇထိုင်ပေႃးၼွၼ်းၽေးၵႂႃႇ ဝၼ်းတီႈ 11/06/2026 တႃႇၶၢဝ်းတၢင်း 4 ပီ ။

ၶဝ်ႈယူတ်းယႃတူဝ်တီႈႁူင်းယႃလူင်း ၵျူႊလႃႊလူင်ႊၵွၼ်ႊ ၾၢႆႇတၢင်းမေႃယႃၵႆႉပိုၼ်ၽၢဝ်ႇပၼ်ငဝ်းလၢႆးပၢႆးယူႇလီ ၸဝ်ႈယိင်း ပဵၼ်တၢင်းပဵၼ် ႁူဝ်ၸႂ်တဵၼ်ႈဢမ်ႇမၢၼ်ႇ ၸိူဝ်ႉမႅင်းၶဝ်ႈၼႂ်းသဵၼ်ႈလိူတ်ႈ တပ်းတႂ်ဢမ်ႇႁဵတ်းၵၢၼ် ပဵၼ်ၸဵပ်းတီႈလမ်းသႆႈယႂ်ႇ ၸဵမ်ၸိူဝ်းၼႆ့ ။

ၸဝ်ႈယိင်းၼႆႉ ပဵၼ်လုၵ်ႈယိင်းလူင် ၸဝ်ႈမုၼ်ယႂ်ႇၶုၼ်ႁေႃၶမ်းထႆး တူၼ်ထူၼ်ႈ 10 လႄႈၸဝ်ႈၼၢင်းသူမ်ႊသဝရီႊ။
ပဵၼ်လၢၼ်ယိင်းၸဝ်ႈမုၼ်ယႂ်ႇၶုၼ်ႁေႃၶမ်းတူၼ်ထူၼ်ႈၵဝ်ႈ ။ ၸဝ်ႈၼၢင်းႁေႃၶမ်းလူင်တူၼ်ထူၼ်ႈၵဝ်ႈ ဢၼ်ပဵၼ်ဢွၵ်ႇၸဝ်ႈမၼ်းၸဝ်ႈၵေႃႈ ၸင်ႇႁႃၸၢမ်ႇပူႈၼွၼ်းၽေးၵႂႃႇမိူဝ်ႈလိူၼ်ထူၼ်ႈ 10 ပီၵၢႆ 2025 ၼႆႉၵူၺ်း ယင်းပႆႇလႆႈလုမ်းလႃးၽဝ်ၶၢပ်ႈတူဝ် ။

ၸဝ်ႈယိင်း ၽတ်းၶျရ ၵိတ်ႇတိယႃႊၽႃႊ ၼရဵၼ်ႊထိရႃႊ ၼႆႉ ၸိုဝ်ႈလိုဝ်း ၼႂ်းၸၼ်ႉၸဝ်ႈၸၼ်ႉၶုၼ်ၵေႃႉၼိုင်ႈ မၼ်းၼၢင်း ယၢမ်ႈတူင်ႉၼိုင်ၼႂ်းတွၼ်ႈ ၾၢႆႇပၵ်းပိူင် ၊ ၵၢၼ်ၵပ်းသိုပ်ႇၵပ်းသၢၼ်မိူင်းတေႃႇမိူင်းၸိူဝ်းၼႆႉ ။
မၼ်းၼၢင်း ယၢမ်ႈႁၢပ်ႇၵၢၼ် ပဵၼ်ၽွင်းတၢင်မိူင်းထႆး တီႈမိူင်းဢေႃႊသတီႊလျႃႊ ၊ လိူဝ်ၼၼ်ႉ ယၢမ်ႈႁူမ်ႈတူင်ႉၼိုင်ႈၸွမ်းၸုမ်းၸၢတ်ႈၸိုင်ႈလုမ်ႈၾႃႉလႄႈ တူင်ႉၼိုင်တႃႇသုၼ်ႇလႆႈ ၼၢင်းယိင်း ပႃးၸဵမ် ၵူၼ်းတူၵ်းၶွၵ်ႈ ၸိူဝ်းၼႆႉလူးၵွၼ်ႇ ဝႃႈၼႆ။

ယၢမ်းလဵဝ် မႅၼ်ႈၽွင်း လူင်ပွင်ၸိုင်ႈထႆး ၸုမ်းၸိူဝ်းၵဵဝ်ႇၶွင်ႈ ၼႂ်းဝၢင်းႁေႃၶမ်း တိုၵ်ႉၸတ်းပၢင်ၵုမ်ၶိုၵ်ႉၶၵ်ႉ တႃႇႁၢင်ႈႁႅၼ်း ပၢင်ၸႃႇပၼ ၸဝ်ႈယိင်း ၽတ်းၶျရ ၵိတ်ႇတိယႃႊၽႃႊ ဝႆႉယူႇ ဝႃႈ တေဝႆႉၶၢပ်ႈတူဝ် ႁိုင်ထိုင်လၢႆဝၼ်း ၊ တေၸတ်းၸိူင်ႉႁိုဝ် ၼႆၸိူဝ်းၼႆႉ။

ဝၢႆးဝၼ်း မိူဝ်ႈၼႆႉတႄႉ လူင်ပွင်ႈၸိုင်ႈထႆး ပိုၼ်ၽၢဝ်ႇထႅင်ႈၵမ်းၼိုင်ႈဝႃႈ ဝၼ်းတီႈ 13/06/2026 မိူဝ်ႈၽုၵ်ႈ ဝၼ်းသဝ်ၼႆႉ ၶၢဝ်းယၢမ်း 8 မူင်းၶိုင်ႈ တေႃႇထိုင် ၵၢင်ဝၼ်း 12 မူင်း တေပၼ်ႁႂ်ႈ ၵူၼ်းမိူင်းၶဝ်ႈၼပ်ႉယမ်ဝႆႈသႃ ၶၢပ်ႈတူဝ်ၸဝ်ႈယိင်း တီႈ ၼႂ်းဝၢင်းႁေႃၶမ်း ศาลาสหทัยสมาคม พระบรมมหาราชวัง ဝႃႈၼႆ။

ယူႇတီႈၸုမ်းၶၢဝ်ႇၽူႈတွႆႇႁွၵ်ႈႁဝ်းၶႃႈ ယိၼ်းသေလၢႆမွင်ၸႂ်ၸွမ်းတႄႉတႄႉယူႇၶႃႈဢေႃႈ။