ဝၼ်းတီႈ 18/01/2026 ၼႆႉ ပီႈၼွင်ႉတႆး ၼႂ်းမိူင်းထႆး တေႁူမ်ႈၵၼ် ၵႂႃႇၼွမ်းတူဝ်ၵူမ်ႈႁူဝ်ဝႆသႃ ၶၢပ်ႈတူဝ် ၸဝ်ႈၼၢင်းႁေႃၶမ်းထႆး တူၼ်ထူၼ်ႈ 9 – သူမ်ႊၻဵတ်ႊၽရႃႊၼၢင်းၸဝ်ႈ သီႊရီႊၵိတ်ႊ ၽရႃႊပရူမ်ႊမရႃႊၶျီႊၼီႊၼၢတ်ႊ ၽရပရူမ်မရၢတ်ၶျၶျူၼ်ၼၼီ ၽၼ်းပီလူင် ။

ဝၼ်းတီႈ 17/1/2026 ၼႆႉ ပီၼွင်ႉတႆး ဢၼ်ယူႇၼႂ်းၶဵတ်ႇၵဵင်းမႂ်ႇ တေၵႂႃႇၶွၼ်ႈတုမ်ၵၼ် တီႈ ပၢင်ႇလဵၼ်ႈႁႅင်း (သၼၢမ်ၵီးလႃးထဵတ်ႉသပၢၼ်း) ၸႄႈဝဵင်းၵဵင်းမႂ်ႇ ဢၼ်မီးၾၢႆႇလင်ဝတ်ႉၵူႇတဝ်ႈ သေၸင်ႇဢွၵ်ႇၶၢဝ်းတၢင်းၵႂႃႇ။
ၶၢဝ်းတၢင်းပွၵ်ႈၼႆႉ ပဵၼ် သမႃးၶူမ်းပၢႆးပၺ်ႇၺႃႇလႄႈၾိင်ႈငႄႈတႆး ၸိုင်ႈထႆး ၼမ်းသေ တေဢွၼ်ၵၼ်ၵႂႃႇၼႄ ဢဵၼ်ႁႅင်းပီႈၼွင်ႉတႆးၼႂ်းမိူင်းထႆး ႁႂ်ႈပဵၼ်ၼႃႈပဵၼ်တႃပီႈၼွင်ႉတႆး ၊ ပိူင်လူင်တႄႉ တႃႇၼႄပိူင်ၾၢင်တႆး ၊ တႃႇၼႄဝႃႈ တႆးၼႆႉ ယူႇပိုင်ႈႁူမ်ႈၵေႃႈ ဢမ်ႇလိုမ်းႁူမ်ႈ ဢမ်ႇလိုမ်းၵုင်ႇမုၼ် ဢၼ်ၶုၼ်ႁေႃၶမ်း ၼၢင်းႁေႃၶမ်း ယၢမ်ႈတူၺ်းထိုင် ၸၢဝ်းၶိူဝ်းတႆးမႃး ပၢၼ်သိုပ်ႇပၢၼ်ၼၼ်ႉ ၼႆယူႇ။

လုင်းၸၢႆးသႅင်ယ ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႂ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ တႃႇတေပႂ်ႉၵၼ် လႆႈၼမ် တီႈၵိုတ်းရူတ်ႉၵေႃႈငၢႆႈတႄႉ ပဵၼ်သၼၢမ်ၵီးလႃးထဵတ်ႉသပၢၼ်း ( ပၢင်ႇလဵၼ်ႈႁႅင်း) တၢင်းလင်ဝတ်ႉၵူႈတဝ်ႈ ၵဵင်းမႂ်ႇၼၼ်ႉ။ ပေႃးဝႃႈ တေၶႂ်ႈၵႂႃႇၸွမ်းၼႆ ႁႂ်ႈၶွၼ်ႈတုမ်ၵၼ် ပဵၼ်ၸုမ်းသေ သူင်ႇမႃးပၼ်သဵၼ်ႈၸိုဝ်ႈ ယဝ်ႉၵေႃႈ ၵႂႃႇၸွမ်းၶပ်ႉမၢႆဢၼ်တမ်းဝႆႉ ။ တေမဝ်ရူတ်ႉပၢတ်ႉသ်ၵႂႃႇ မၼ်းၶဝ်ႈၵူၼ်းၼမ် ၵႃးၵေႃႈ တေဢမ်ႇလႆႈပဵၼ်လၢႆလမ်းသေ တေယူႇလႆႈပဵၼ်မူႇပဵၼ်ၵေႃ ” – ဝႃႈၼႆ။
ရူတ်ႉပတ်ႉသ် ၼႆႉ ၼိုင်ႈလမ်း တေၶဝ်ႈၵူၼ်းမွၵ်ႈ 50 ၵေႃႉ ၊ တေတူၺ်းႁူဝ်ၼပ်ႉၵူၼ်းသေ ၶၢတ်ႈၵႂႃႇလၢႆလမ်းယူႇ ။ ၽႂ်တေၶႂ်ႈၵႂႃႇၸွမ်းၵေႃႈ ႁႂ်ႈႁၢင်ႈႁႅၼ်းၵႃႈရူတ်ႉ တၢင်းၵႂႃႇတၢင်းမႃး တေတူၵ်းၵေႃႉ 1700 ဝၢတ်ႇ ဝႃႈၼႆ။

သမႃးၶူမ်းပၢႆးပၺ်ႇၺႃႇလႄႈၾိင်ႈငႄႈတႆး ဢၼ်တေဢွၼ်ၼမ်းပီႈၼွင်ႉတႆးၵႂႃႇၶဝ်ႈႁူမ်ႈပၢင်ၼပ်ႉယမ်ဝႆသႃ ၶၢပ်ႈတူဝ်ၸဝ်ႈၼၢင်းႁေႃၶမ်းတူၼ်ၵဝ်ႈၼႆႉ ပဵၼ်တူဝ်တႅၼ်း ၸၢဝ်းၶိူဝ်းတႆးၼႂ်းမိူင်းထႆးပတ်းပိုၼ်ႉ ။ ၸင်ႇၼၼ်လႄႈ ၸဵမ်ဢဝ် မႄႈသၢႆ ၊ ၵဵင်းႁၢႆး ၊ ၵဵင်းမႂ်ႇ ၊ မႄႈႁွင်ႈသွၼ် ၊ မႄႈဢၢႆး ၊ ဝၢၼ်ႈမႂ်ႇမွၵ်ႇၸၢမ် ၊ ၾၢင် ၊ မႄႈသွတ်ႇ ၊ ရယွင်း ၊ ၵုင်းထဵပ်ႈ ၸိူဝ်းၼႆႉတႄႇၵႂႃႇ ႁႂ်ႈပေႃးၼႄလႆႈ လွင်ႈၽွမ်ႉၽဵင်ႇၵၼ်ၼၼ်ႉ ထုၵ်ႇလီၵႂႃႇၽွမ်ႉၵၼ်ယူႇ။ သင်ဝႃႈ ၵႂႃႇၽႂ်ၵႂႃႇမၼ်းၵူၺ်းတႄႉ ပိူၼ်ႈဢမ်ႇၸၢင်ႈမၵ်းမၼ်ႈဝႃႈ ၼႄဢဵၼ်ႁႅင်း ၼႆ – ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႂ်ႇ သိုပ်ႇလၢတ်ႈၼင်ႇၼႆ။

ယူႇတီႈဝဵင်းလႂ်ၵေႃႈ ပႂ်ႉၵႂႃႇႁူမ်ႈၵၼ် တီႈၵုင်းထဵပ်ႈၵမ်းသိုဝ်ႈၵေႃႈလႆႈ ၊ သင်ဝႃႈ ယူႇၼႂ်းၶဵတ်ႇၵဵင်းမႂ်ႇၼႆၵေႃႈ ႁႂ်ႈၶွၼ်ႈတုမ်ၵၼ်တီႈၵဵင်းမႂ်ႇသေ ၶွၼ်ႈတုမ်ၵၼ်ၵႂႃႇ ဝၼ်းတီႈ 17 ။ ထိုင်မႃး 18 ၼၼ်ႉ ၸင်ႇဢွၼ်ၵၼ် ယႆ ပႆ ၶဝ်ႈၵႂႃႇ ၼႂ်းဝၢင်းႁေႃ ဢၼ်ဝႆႉၶၢပ်ႈတူဝ်ၼၢင်းႁေႃၶမ်းၼၼ်ႉ ။

ၼႂ်းဝၼ်းၼၼ်ႉ ႁႂ်ႈဢွၼ်ၵၼ် ၼုင်ႈၶူဝ်းသီလမ် ၶဵၼ်းႁူဝ်တႆး ( ႁၢမ်ႈၼုင်ႈ သီလႅင် ၶွင်ႇ သီႁိူဝ်ႈ ) ႁႂ်ႈမီးဝတ်းဝႂ်တဵမ်ထူၼ်ႈၵၼ်ၵူႈၵေႃႉ ဝႃႈၼႆ။
တေဢွၵ်ႇၵဵင်းမႂ်ႇၵႂႃႇ ဝၢႆးဝၼ်း ဝၼ်းတီႈ 17 သေ ၊ ႁူဝ်ၼႂ် ဝၼ်းတီႈ 18 ၼၼ်ႉ တေဢွၼ်ၵၼ်ပိၼ်ႇလၢႆႈသိူဝ်ႈၶူဝ်းတီႈဢယုတ်းထယႃး ။ ဝၢႆးၼၼ်ႉၵေႃႈ ၵႂႃႇႁူမ်ႈတူဝ်ၵၼ် ၼႃႈဝၢင်းႁေႃ ( သၼၢမ်လူင်) ဝၢင်းႁေႃၶမ်း မိူင်းၵွၵ်ႇၸိုင်ႈထႆး ၼၼ်ႉ ၶၢဝ်းယၢမ်း 7 မူင်း ႁႂ်ႈတူဝ်ႈတၼ်းဝႆႉ ။ 8 မူင်းထိုင် 10 မူင်း ၵၢင်ၼႂ်ၼၼ်ႉ တေတႄႇၶဝ်ႈဝႆသႃၶၢပ်ႈတူဝ်ၸဝ်ႈၼၢင်းႁေႃၶမ်း ၼႆ လိၵ်ႈပိုၼ်ၽၢဝ်ႇၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႂ်ႇ ပႃးဝႆႉၼင်ႇၼႆ။

ၽႂ်ယူႇၸမ်ဝဵင်းလႂ်ၵေႃႈ ႁႂ်ႈၵပ်းသိုပ်ႇၸူးဝဵင်းၼၼ်ႉလႆႈ ။ တႃႇၵဵင်းမႂ်ႇလႄႈၵဵင်းႁၢႆးၼႆႉ ႁႂ်ႈၵပ်းသိုပ်ႇၸူး ၼွင်ႉၶမ်းဢိင်ႇ 098 764 3181 ၊ ပီႈၼၢင်းသႅင် 085 708 7547 ။
တႃႇ မႄႈႁွင်ႈသွၼ် – ဢႃးၸၢၼ်ၵေႊ 080 130 4141 ။ တႃႇမိူင်းၵွၵ်ႇ – ၼၢင်းမႂ်ႇ 085 377 6769 ၊ ၸၢႆးထုၼ်းလႅင်း 084 697 0016 ( မၢႆတွင်း ၵႃႈရူတ်ႉ 100 ဝၢတ်ႇ( ပွၵ်ႈၶိုၼ်းႁင်းၵူၺ်း) ။
တႃႇဝဵင်းရယွင်း – ၸၢႆးလႅင်းပၢင်ႇ 087 587 5742။

ၸဝ်ႈၼၢင်း သီႇရီႇၵိတ်ႇ ၽရပရူမ်မရႃ ၶျိၼီၼၢတ်ႉ ၽရပရူမ်မရၢတ်ႉၶျၶျူၼ်ၼၼီ ၽၼ်းပီလူင် – ၵေႃႉပဵၼ်မႄႈၸဝ်ႈၵေးၸူး ၸဝ်ႈမုၼ်ယႂ်ႇၶုၼ်ႁေႃၶမ်းတူၼ်ထူၼ်ႈ 10 မိူင်းထႆးယၢမ်းလဵဝ်၊ ၵေႃႉပဵၼ်ၼၢင်းၶၢင်းႁူဝ် ၸဝ်ႈမုၼ်ယႂ်ႇၶုၼ်ႁေႃၶမ်းတူၼ်ထူၼ်ႈ 9 ၼၼ်ႉၸၢမ်ႇပူႈၼွၼ်းၽေးၵႂႃႇ ၽွင်းဢႃယုထူၼ်ႈထိုင် 93 ပီ မိူဝ်ႈဝၼ်းတီႈ 24/10/2025 ယၢမ်းၵၢင်ၶမ်ႈ 9 မူင်း 21 မိၼိတ်ႉ ။