သင်ၶၸဝ်ႈ – ပီႈၼွင်ႉတႆး ၸိူဝ်းႁွတ်ႈမိူင်းထႆး ႁူမ်ႈၵၼ်သူတ်ႇမူၼ်းႁဵတ်းၵၢၼ်လီၵုသူလ် သူင်ႇမဵတ်ႉတႃႇယိုၼ်ႈၸူးထိုင်  လုၵ်ႈယိင်း ၶုၼ်ႁေႃးၶမ်းထႆး တူၼ်ထူၼ်ႈ 10 ဢၼ်ဢမ်ႇယူႇလီသေယူတ်းယႃတူဝ်ဝႆႉယူႇယၢမ်းလဵဝ်ၼႆႉၼၼ်ႉ ႁႂ်ႈၸဵဝ်းၸိုၼ်ႈၶႅၼ်း ၶိုၼ်းဝႆးဝႆး ဝႃႈၼႆ။

မိူဝ်ႈဝၼ်းတီႈ 31/12/2022 ယၢမ်းၵၢင်ၶမ်ႈ 9 မူင်းၶိုင်ႈထိုင် 12 မူင်းၵၢင်ၶိုၼ်း ယူႇတီႈ သင်ၶၸဝ်ႈလႄႈ ပီႈၼွင်ႉတႆး (ႁႅင်း ၵၢၼ်) ႁူမ်ႈၵၼ် ၸတ်းႁဵတ်းပၢင်သုတ်ႇမုၼ်း ၵၢၼ်လီၵုသူလ် တီႈဝတ်ႉပႃႇပဝ်ႈ ဢိူင်ႇသီၽုမ်း ဝဵင်းၵဵင်းမႆႇ ၸိုင်ႈထႆး။ သူင်ႇမဵတ်ႉတႃႇယိုၼ်ႈၸူးထိုင် ၸဝ်ႈယိင်းၽတ်ႉၶျရၵီႇတီႇယႃးၽႃး ၼရေထိလႃးထိပ်ႉယုဝတီႇ ၵေႃႉပဵၼ်လုၵ်ႈယိင်း ၶုၼ်ႁေႃၶမ်းထႆး တူၼ်ထူၼ်ႈ 10။  ႁႂ်ႈတၢင်းပဵၼ်မၼ်းၸဝ်ႈ ၸိုၼ်ႈ ၶႅၼ်းလွတ်ႈၽေးၶဵၼ်  ။

ၸဝ်ႈၶူး မႁႃႇသႅင်ၾႃႉ ၽူႈဢွၼ်ႁူဝ်တူင်ႉၼိုင် တီႈဝတ်ႉပႃႇပဝ်ႈ လၢတ်ႈတီႈၽူႈတွႆႇႁွၵ်ႈဝႃႈ -“ယွၼ်ႉႁဝ်းၶႃႈ လႆႈမႃးယူႇၼႂ်း ဝၢၼ်ႈမိူင်းထႆး မႃးပိုင်ႈႁူမ်ႈပိုင်ႈၽုၺ်း ၸဝ်ႈမုၼ်ယႂ်ႇၶုၼ်ႁေႃၶမ်းႁဝ်း ၵမ်းၼႆႉ တၢမ်တူဝ်လုၵ်ႈယိင်းၸဝ်ႈႁဝ်း ဢမ်ႇယူႇလီ ၸိူင်ႉၼႆသေ ႁဝ်းၸဝ်ႈၶဝ် ဢွၼ်ဢဝ်တၵ်ႉၵႃႇပီႈၼွင်ႉႁႅင်းၵၢၼ်ယၢၼ်မိူင်းႁဝ်းၶႃႈ ႁူမ်ႈၵၼ်မႃးသုတ်ႇမုၼ်း တီႈဝတ်ႉပႃႇပဝ်ႈၼႆႉ တွၼ်ႈတႃႇယွၼ်းသူးပၼ် ၸဝ်ႈယိင်း ႁႂ်ႈၸဵဝ်းႁၢႆၸဵဝ်းၶႅၼ်း”- ဝႃႈၼႆ။

ၾၢႆႇၼိုင်ႈၵေႃႈ ပဵၼ်ဝၼ်းပီ 2022 မူတ်းသဵင်ႈသေ ႁပ်ႉပီ 2023 ၊ ၼင်ႇႁိုဝ် ပေႃးတေပဵၼ်မင်ႇၵလႃႇ  ၼႂ်းပီမႂ်ႇလုမ်ႈၾႃႉၼႆႉသေ ႁႂ်ႈၵူၼ်းတင်းလုမ်ႈၾႃႉ ပေႃးတေယူႇလီၵိၼ်ဝၢၼ် သိုပ်ႇႁဵတ်းၵၢၼ်ႁႂ်ႈၶိုၼ်ႈယႂ်ႇမႂ်ႇသုင်ၵႂႃႇထႅင်ႈတင်းၼႃႈၼႆၵေႃႈ လႆႈၸတ်းႁဵတ်းပၢင်သုတ်ႇမုၼ်း ယွၼ်းသူးပၼ်တႃႇတူဝ်ၸဝ်ႈ ၵဝ်ႇထႅင်ႈ ဝႃႈၼႆ။

ပၢင်သုတ်ႇမုၼ်း တီႈဝတ်ႉပႃႇပဝ်ႈၼႆႉ တေမီးသင်ၶၸဝ်ႈ ၶဝ်ႈႁူမ်ႈ 15 တူၼ်၊ တၵ်ႉၵႃႇ (ႁႅင်းၵၢၼ်) မွၵ်ႈ 50 ၵေႃႉ။ ယဝ်ႉၵေႃႈ ပေႃးထိုင်မႃး ဝၼ်းတီႈ 5/1/2023 ယၢမ်းၵၢင်ၶမ်ႈ 7 မူင်းၸိုင် တေယူႇတီႈသင်ၶၸဝ်ႈသေ ဢွၼ်ႁူဝ်တၵ်ႉၵႃႇ ႁႅင်းၵၢၼ် ႁဵတ်း ၵၢၼ်လီၵုသူလ် သုတ်ႇမုၼ်းပၼ် ၼႂ်းဝၼ်းၵိူတ်ႇ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တီႈဝတ်ႉပႃႇပဝ်ႈထႅင်ႈ ၸဝ်ႈၶူး မႁႃႇသႅင် ၾႃႉ လၢတ်ႈ။  

ဢိင်ၼိူဝ် လွင်ႈၼႆႉ မိူဝ်ႈဝၼ်းတီႈ 1/1/2023 ယၢမ်းၵၢင်ဝၼ်း 10 မူင်း ယူႇတီႈသင်ၶၸဝ်ႈလႄႈ ပီႈၼွင်ႉႁႅင်းၵၢၼ် ႁူမ်ႈၵၼ်  သူင်ႇမဵတ်ႉတႃႇယိုၼ်ႈၸူး ၸဝ်ႈယိင်း တီႈဝတ်ႉၼၼ်းထရၢမ်း ဝဵင်းသႃရႃးၽီးး မီးသင်ၶၸဝ်ႈ ၶဝ်ႈႁူမ်ႈ 21 တူၼ် ႁႅင်းၵၢၼ်မွၵ်ႈ 300 ၵေႃႉ ၼႆယဝ်ႉ။

လုင်းၸၢႆးၽူဝ်းဢွင်ႇ ၽူႈဢွၼ်ႁူဝ်တူင်ႉၼိုင် လၢတ်ႈတီႈၽူႈတွႆႇႁွၵ်ႈဝႃႈ – “ဢွၼ်တၢင်းတႄႉ ႁဝ်းဝႃႈ တေၸတ်းႁဵတ်း ပၢင်ႁူမ် ၸူမ်း ႁပ်ႉၸုမ်ႈၶူး လုၵ်ႈၸၢင်းၶႃႈ။ ၵမ်းၼႆႉ လုၵ်ႈယိင်း ၸဝ်ႈၶုၼ်ႁေႃၶမ်း (ၸဝ်ႈၾႃႉယူႇႁူဝ်) ဢမ်ႇယူႇလီလႄႈ ႁဝ်းၶႃႈ ဢဝ် တိုဝ်ႉတၢင်းၼႆႉသေ ပၢင်းသင်ၶၸဝ်ႈ မႃးသုတ်ႇမုၼ်း (သူတ်ႇမူၼ်း)သူင်ႇမဵတ်ႉတႃႇၽႄၵုသူလ်ပၼ် ၸဝ်ႈယိင်း ႁႂ်ႈပူၼ်ႉလွတ်ႈတၢင်းပဵၼ် ႁႂ်ႈ ၸဵဝ်းၸိုၼ်ႈၶႅၼ်းၼႆၶႃႈဢေႃႈ”- ဝႃႈၼႆ။

ၼွၵ်ႈလိူဝ်ၼၼ်ႉ တီႈဝတ်ႉႁူဝ်ၶူဝ် ဝဵင်းလမ်းပုၼ်းၵေႃႈ ယူႇတီႈသင်ၶၸဝ်ႈ ဢွၼ်ႁူဝ် တၵ်ႉၵႃႇသတ်ႉထႃး ႁႅင်းၵၢၼ်တႆး သုတ်ႇ မုၼ်း သူင်ႇမဵတ်ႉတႃႇယိုၼ်ႈၸူးထိုင်။ ယဝ်ႉၵေႃႈ တီႈဝတ်ႉမႂ်ႇတႆး သႃထုပရႃႊတိတ်ႇ ၵိဝ်ႇ 44/1 မိူင်းၵွၵ်ႇ ၸိုင်ႈထႆးၵေႃႈ ၸတ်း ႁဵတ်းပၢင်ၵၢပ်ႈသွမ်းလူႇတၢၼ်း ယွၼ်းသူးပၼ်ၸဝ်ႈယိင်း ႁႂ်ႈၸဵဝ်းၸိုၼ်ႈၶႅၼ်း မိူၼ်ၵၼ် ၼႆယဝ်ႉ။

ၸဝ်ႈယိင်းၽတ်ႉၶျရၵီႇတီႇယႃးၽႃး ၼရေထိလႃးထိပ်ႉယုဝတီႇ ဢၼ်ပဵၼ်လုၵ်ႈယိင်း ၶုၼ်ႁေႃၶမ်းထႆးတူၼ်ထူၼ်ႈ 10 ၼႆႉ ၵိုင်ႉၵၢင်ႉဢမ်ႇယူႇလီတၢႆလိုမ်းၵႂႃႇ မိူဝ်ႈဝၼ်းတီႈ 14/12/ 2022 ယၢမ်းႁူဝ်ၶမ်ႈ 6 မူင်းပၢႆ ၽွင်းၸဝ်ႈယိင်း တိုၵ်ႉၽိုၵ်းမႃလၵ်း လႅမ် တႃႇတေၶေႉၶဵင်ႇ Thailand Working Dog Championship by Royal Thai Army တီႈၼႂ်းတပ်ႉႁေႃၶမ်း ၸႄႈ ဝဵင်းပၢၵ်ႇၶျွင်ႉ ၸႄႈတွၼ်ႈၼၶွၼ်းရႃႉၶျ်သီမႃး မိူင်းထႆး။

ယူႇတီႈ မုၵ်ႉၸုမ်းၼမ်းၼႃႈသင်ႇၶၸဝ်ႈၼႂ်းႁေႃၶမ်းၵေႃႈ ဢွၵ်ႇလိၵ်ႉသင်ႇထိုင်မူႇၸုမ်းသင်ႇၶရ ႁၢၼ်းၵူႈဝတ်ႉ ၼႂ်းမိူင်းပတ်း ပိုၼ်ႉ၊ တပ့်သိုၵ်း ႁႂ်ႈဢွၼ်ၵၼ်သုတ်ႇမုၼ်းသူင်ႇမဵတ်ႉတႃႇ ႁႂ်ႈၸဝ်ႈယိင်း ၸဵဝ်းၸိုၼ်ႈၸဵဝ်းၶႅၼ်း။ ၸဝ်ႈယိင်းၽတ်ႉၶျရၵီႇတီႇ ယႃးၽႃးၼႆ့ ဢႃႇယုမီး 44 ပီ ပဵၼ်လုၵ်ႈယိင်း ၶုၼ်ႁေႃၶမ်းထႆး တူၼ်ထူၼ်ႈ 10 လႄႈ တင်းၸဝ်ႈၼၢင်းသူမ်သဝလီး  ။