ၵူၼ်းၼွၵ်ႈမိူင်း ၸိူဝ်းဢဝ် ဝီႊသႃႊ Visa 60 ဝၼ်းသေ ၶဝ်ႈမႃးၼႂ်းမိူင်းထႆးယဝ်ႉ ႁဵတ်းၵၢၼ်ဢမ်ႇထုၵ်ႇမႅၼ်ႈၸွမ်း ပၵ်းပိူင်ၼမ်ၶိုၼ်ႈမႃးၵူႈမိုဝ်ႉၵူႈဝၼ်းလႄႈ ႁွင်ႈၵၢၼ်ၽွင်းလူင်ၼွၵ်ႈမိူင်း မိူင်းထႆး ႁၢင်ႈႁႅၼ်း တေလူတ်းယွၼ်ႇၶိုၼ်း သုၼ်ႇလႆႈ Free Visa 60 ဝၼ်း ႁႂ်ႈပဵၼ်ၵႂႃႇ 30 ဝၼ်းၵူၺ်းယဝ်ႉဝႃႈၼႆ ။
ၽွင်းလူင်ၾၢႆႇၼွၵ်ႈမိူင်း မိူင်းထႆး သီႊႁသၵ်ႊ ၽူင်ႊၵဵတ်ႇၵႅဝ်ႉ (Sihasak Phuangketkeow) ပိုၼ်ၽၢဝ်ႇလၢတ်ႈၵႂႃႇတီႈ သိုဝ်ႇၶၢဝ်ႇထႆး Thai PBS ဝႆႉဝႃႈ “ ပၼ်ဝႆႉသုၼ်ႇၵူၼ်းမိူင်း ၼွၵ်ႈ ၶဝ်ႈမႃးဢႅဝ်ႇလႄႇ ၼႂ်းမိူင်းထႆး Visa 60 ဝၼ်းၼႆႉ မၼ်းႁိုင်ႁႅင်းၼႃႇ။ ၵမ်ႈၼမ်ၼႆႉ ဢမ်ႇၸႂ်ႈၵူၼ်းမႃးဢႅဝ်ႇ တွင်ႈထဵဝ်း တေႉတေႉ။ မၢင်ၸိူဝ်းၸႂ်ႉတိုဝ်း သုၼ်ႇလႆႈ ဝီႇၸႃႇ 60 ဝၼ်းၼႆႉသေ ၶဝ်ႈမႃးႁဵတ်းၵၢၼ် ဢၼ်ဢမ်ႇထုၵ်ႇမႅၼ်ႈတၢင်းၵၢၼ်ၼႆႉ ၼမ်ၼႃႇ။ ၵွပ်ႈၼၼ် ႁဝ်းၶႃႈႁၼ်ထိုင်ဝႃႈ တေလႆႈၵုမ်းထိင်း ၵူတ်ႇထတ်းၵႂႃႇၶိုၼ်းႁၢဝ်ႈႁႅင်းယူႇ” ၼႆယဝ်ႉ။
ၾၢႆႇလူင်ပွင်ၸိုင်ႈမိူင်းထႆး ႁၢင်ႈႁႅၼ်း တေလူတ်းသုၼ်ႇ ၸႂ်ႉ Visa ဝီႊသႃႊ 60 ဝၼ်းၼၼ်ႉၵူၺ်းဢမ်ႇၵႃး – ဝီႊသႃႊ ၵူႈသႅၼ်းသႅၼ်း ၸိူဝ်းမီးလွင်ႈၶွင်ႉၶမ် မီးပၼ်ႁႃၸိူဝ်းၼၼ်ႉၵေႃႈ တေၶိုၼ်း ထတ်းထွင် လႄႈ ၵူတ်ႇထတ်းၵႂႃႇ။ ၵူၼ်းၸိူဝ်းၸႂ်ႉတိုဝ်းဝႆႉ Visa ဢႅဝ်ႇယဵမ်ႈတွင်ႈထဵဝ်းၼၼ်ႉၵေႃႈ ၸဝ်ႈၼႃႈတီႈၶဝ် တေလူင်းၵူတ်ႇထတ်းၶိုၼ်းသေ ပၵ်းတႃပႂ်ႉတူၺ်း ၸွမ်းဝႃႈ ၸွင်ႇမႃး ဢႅဝ်ႇယဵမ်ႈတွင်ႈတဵဝ်းၼႂ်းမိူင်းထႆးတေႉတေႉၸဵမ်ၸိူဝ်းၼႆႉ ။
ၵၢၼ်လူင်းပိုၼ်ႉတီႈ ၵူတ်ႇထတ်း လႄႈ မူၼ်ႉမႄးၶိုၼ်း ပိူင်ၵၢၼ်ၸႂ်ႉ Visa ဢႅဝ်ႇယဵမ်ႈတွင်ႈထဵဝ်း လႄႈ ၵူႈသႅၼ်းသႅၼ်းၼၼ်ႉ ဢမ်ႇလႆႈယိူင်းၸူးတေႃႇ ၵူၼ်းမိူင်းၶႄႇ ႁင်းၵူၺ်းမိူင်းလဵဝ်။ တေၵူတ်ႇထတ်း ၵူၼ်းၼွၵ်ႈမိူင်း ၵူႈၵေႃႉ ၸိူဝ်းၶဝ်ႈမႃးယူႇၼႂ်းမိူင်းထႆး လူၺ်ႈဢမ်ႇထုၵ်ႇမႅၼ်ႈၸွမ်းပၵ်းပိူင် တင်းသဵင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ