ႁူဝ်ပီ 2026 ၼႂ်းလိူၼ်ၵျႅၼ်ႊၼိဝ်ႊရီႊမႃးၼႆႉ သိုၵ်းမၢၼ်ႈ တင်း သိုၵ်းၵဝ်ႈၵၢင်ႉ (MNDAA) ႁူပ်ႉဢုပ်ႇဢူဝ်း လႆႈၶေႃႈတူၵ်းလူင်းၵၼ်သေ သိုၵ်းၵဝ်ႈၵၢင်ႉ ၸိူဝ်းတင်ႈၵဵတ်ႉလၢၼ်ႇၸွမ်းသဵၼ်ႈတၢင်းလူင်ၵႄႈၵၢင် ဝဵင်းသီႇပေႃႉ လႄႈ ဝဵင်းလႃႈသဵဝ်ႈဝႆႉၼၼ်ႉ လႆႈထွၼ်ဢဝ်ႁႅင်းသိုၵ်းထွႆဢွၵ်ႇႁၢင်ႇ ၶဝ်ႈၵႂႃႇယူႇသဝ်းဝႆႉၶိုၼ်း ၸွမ်းဝၢၼ်ႈ ၸိူဝ်းႁၢင်ႇၵႆၵၼ်တင်း သဵၼ်ႈတၢင်းလူင်ႁၢႆးဝေးၼၼ်ႉ ဝႃႈၼႆ။

မိူဝ်ႈဝၼ်းတီႈ 2/12/2026 သိုၵ်းၵဝ်ႈၵၢင်ႉတႄႇထွၼ်သၢႆသိုၵ်းဢွၵ်ႇၵႂႃႇယူႇဝႆႉၸွမ်းဝၢၼ်ႈ ဢၼ်လုၵ်ႉတၢင်း ဝဵင်းသီႇပေႃႉ ၽႄဢွၵ်ႇၵႂႃႇ တၢင်းထုင်ႉ ၼမ်ႉလၼ်ႈ တီႈတၢင်းၽႄ 9 လၵ်း ၼႂ်းၸႄႈဝဵင်းသီႇပေႃႉၼႆ ၵူၼ်းၼုမ်ႇ ဝဵင်းၼမ်ႉလၼ်ႈ ၵေႃႉၵႆႉဢွၵ်ႇၶၢဝ်းတၢင်းၵႂႃႇမႃး ၼႂ်းဝဵင်းသီႇပေႃႉ လၢတ်ႈၼႄတီႈၽူႈတွႆႇႁွၵ်ႈဝႆႉၼင်ႇၼႆ။

“မိူဝ်ႈဢွၼ်တၢင်းၼႆႉ ၵဝ်ႈၵၢင်ႉၶဝ် ယူႇတေႃႇထိုင် ႁူဝ်ၶူဝ်သီႇပေႃႉ။ ဢွင်ႈတီႈၶဝ်ထွႆမႃးယူႇဝႆႉမိူဝ်ႈလဵဝ်ၼႆႉ ပဵၼ်တီႈတၢင်းၽႄ လုၵ်ႉသီႇပေႃႉၵႂႃႇၼမ်ႉလၼ်ႈ၊ လုၵ်ႉၼမ်ႉလၼ်ႈၵႂႃႇသီႇပေႃႉ။ မိူဝ်ႈလဵဝ်ၼႆႉ ၵဝ်ႈၵၢင်ႉၶဝ် လုၵ်ႉတၢင်းၼႃးမၢၵ်ႇၶေႃႁႄ ထွႆဢွၵ်ႇၵႂႃႇမူတ်းယဝ်ႉႁႄ ၶိုၼ်းၵႂႃႇယူႇဝႆႉတၢင်း ဝၢၼ်ႈပၢင်ၼိဝ်ႉ- ၵုင်းမူင်ႈပုၼ်ႉၼေႈ။”

လႆႈႁူႉဝႃႈ သိုၵ်းၵဝ်ႈၵၢင်ႉၼႆႉ ယၢမ်းလဵဝ် ၵိုတ်းဝႆႉၸွမ်း ၾၢႆႇဢွၵ်ႇတၢင်းၵႃး ၼႂ်းၵႄႈ ဝၢၼ်ႈပၢင်ၼိဝ်ႉ ၵႂႃႇတၢင်း ဝၢၼ်ႈသွင်ၵေး – ဝၢၼ်ႈသႅင်ၵႅဝ်ႉ – ဝၢၼ်ႈႁူဝ်ယႃႉ ၸဵမ်ၸိူဝ်းၼႆႉသေ ၼိူဝ်သဵၼ်ႈတၢင်းလူင်ႁၢႆးဝေးၼႆႉ ဢမ်ႇမီး ၸုမ်းသိုၵ်းလႂ်တင်ႈၵဵတ်ႉလၢၼ်ႇယဝ်ႉ ဝႃႈၼႆ။

ယၢမ်းလဵဝ် တီႈၶူဝ်လူင်ဝဵင်းသီႇပေႃႉၼၼ်ႉၵေႃႈ ပဵၼ်သိုၵ်းမၢၼ်ႈၵုမ်းၵမ်ဝႆႉၶိုၼ်းတင်းသဵင်ႈသေတႃႉ ႁၢၼ်ႉ တေႃႇထိုင်ဝၼ်းမိူဝ်ႈၼႆႉ (5/1/2025) ၵေႃႈပႆႇပိုတ်ႇပၼ်ၵူၼ်းမိူင်းၵႂႃႇမႃး လတ်းၽၢၼ်ႇလႆႈ လွတ်ႈလွတ်ႈ လႅဝ်းလႅဝ်း ႁဵတ်းႁႂ်ႈၶၼ်ၵုၼ်ႇပုင်ႈၶိုၼ်ႈသွင်ပုၼ်ႈ လႄႈ ၵူၼ်းမိူင်းႁူပ်ႉတၢင်းယၢပ်ႇႁႅင်း ၼႆယဝ်ႉ။

ၼၢင်းဢွင်ႇ ဢႃႇယု 30 ပီပၢႆ ၵေႃႉယူႇဝႆႉၼႂ်းဝဵင်းသီႇပေႃႉ လၢတ်ႈၼႄတီႈၽူႈတွႆႇႁွၵ်ႈဝႃႈ – “ ၶူဝ်ၼႆႉ ဢိုတ်းဝႆႉ ႁိုင်ႁႅင်းၼႃႇယဝ်ႉဢိူဝ်ႈ။ သိုၵ်းၵဝ်ႈၵၢင်ႉၵေႃႈထွႆဢွၵ်ႇၵႂႃႇပၼ်ယဝ်ႉႁႄ ထၢင်ႇၵိူဝ်းဝႃႈတေပိုတ်ႇဝၼ်း လုတ်ႉလၢတ်ႈယေးၼေႉ (ဝၼ်းလွတ်ႈလႅဝ်း)ၼႆ ပိူၼ်ႈၵေႃႈ ဢွၼ်ၵၼ် မုင်ႈမွင်းဝႆႉၼၼ်ႉၼႃႇ။ ၶဝ်ပိၵ်ႉပႅတ်ႈၶူဝ်ၼႆႉ ၵူၼ်းမိူင်းႁဝ်း ယၢပ်ႇၸႂ်ယၢပ်ႇ ၶေႃး ၼႃႇ။ ပေႃးယူႇဢမ်ႇလီၵိၼ်ဢမ်ႇဝၢၼ်မႃးၵေႃႈ တုၵ်ႉၶၼႃႇ။ ယၢပ်ႇႁႅင်း ၼႂ်းၵၢၼ်ၵႂႃႇမႃး ဢိူဝ်ႈ။ ၶဝ်ဢိုတ်းၶူဝ်ၼႆႉ ႁဝ်းလႆႈၵႂႃႇၶၢမ်ႈတၢင်းတႃႈႁိူဝ်းဢဝ်။ ၵႃႈၶၢမ်ႈတႃႈႁိူဝ်း၊ ၵႃႈၸၢင်ႈပိူၼ်ႈႁပ်ႉသူင်ႇ ၵႂႃႇၵႂႃႇမႃး မႃးၼႆႉ ၼိုင်ႈပွၵ်ႈသဵင်ႈပဵၼ် 5 မိုၼ်ႇ 6 မိုၼ်ႇ။ ၼႆႉပႆႇပႃးၵႃႈယႃႈယႃၵွၼ်ႇ။ ၵိၼ်းတေႉတေႉဢေႃႈ။ ၵၢပ်ႈမိူဝ်ႈ လဵဝ် ပၢႆသလိူဝ်ပဵၼ်ၶူဝ်ႇဝိတ်ႉ၊ သမ်ႉၺႃးပၢင်တိုၵ်း၊ ႁမ်ႉလႆႈပၢႆႈၽေးသိုၵ်းထႅင်ႈ။ ဝၢႆးၼၼ်ႉ ၵွပ်ႈသဵၼ်ႈတၢင်း ၵႂႃႇမႃးဢမ်ႇလီႁႄ ၶၼ်ၵုၼ်ႇသမ်ႉၶိုၼ်ႈ။ ႁိူဝ်ႇ……….သိုၵ်းၸိူဝ်းၼႆႉသမ်ႉမႃးဢိုတ်းၶူဝ်ထႅင်ႈၼႆႁႄ ၶၼ်ၵုၼ်ႇ ၼႆႉယိုင်ႈၶႅၼ်းပုင်ႈၶိုၼ်ႈၵႂႃႇထႅင်ႈ 2 ပုၼ်ႈ။ ယၢပ်ႇၼိုင်ႈယဝ်ႉၵိၼ်းသွင်ဢိူဝ်ႈႁဝ်းၵူၼ်းမိူင်းတႄႉ။ မိူၼ်ၺႃး ႁတ်ႉၵူႈၾၢႆႇၾၢႆႇယဝ်ႉ” ဝႃႈၼႆ။

ၶၼ်ၵုၼ်ႇၼႂ်းဝဵင်းသီႇပေႃႉၼႆႉ ယၢမ်းလဵဝ် ၼိူဝ်ႉမူၼိုင်ႈၸွႆႉ မွၵ်ႈ 5 မိုၼ်ႇပျႃး၊ မၢၵ်ႇၶိူဝ်သူမ်ႈ ၼိုင်ႈၸွႆႉ မွၵ်ႈ 8 ႁဵင်ပျႃး ဝႃႈၼႆ။

ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ယဝ်ႉ သိုၵ်းၵဝ်ႈၵၢင်ႉၵုမ်းၵမ်ဝႆႉဝၢၼ်ႈ၊ ဢိူင်ႇ ၸိူဝ်းမီးၼႂ်းၵႄႈၵၢင် ဝဵင်းလႃႈသဵဝ်ႈ တင်း ဝဵင်းသီႇပေႃႉ တေႃႇထိုင်ၶူဝ်လူင်တၢင်းၶဝ်ႈဝဵင်းသီႇပေႃႉၼၼ်ႉသေ သိုၵ်းတဢၢင်း (TNLA) သမ်ႉၵုမ်းၵမ်ဝႆႉ ၼႂ်းဝဵင်းသီႇပေႃႉ။

မိူဝ်ႈပူၼ်ႉမႃး ဝၼ်းတီႈ 16 လိူၼ်ဢွၵ်ႉထူဝ်ႊပိူဝ်ႊ ပီ 2025 သိုၵ်းမၢၼ်ႈယိုတ်းဢဝ်ၶိုၼ်း ၼႂ်းဝဵင်းသီႇပေႃႉ တီႈသိုၵ်းတဢၢင်း (TNLA) သေ တႄႇဝၼ်းၻိႈ 14 လိူၼ်ၼူဝ်ႊဝႅမ်ႊပိူဝ်ႊ ပီ 2025 မႃး သိုၵ်းမၢၼ်ႈ တင်း သိုၵ်းၵဝ်ႈၵၢင်ႉ ဢိုတ်းပႅတ်ႈၶူဝ်လူင် ဝဵင်းသီႇပေႃႉ ဢမ်ႇပၼ်ၵူၼ်းမိူင်းလတ်းၶၢမ်ႈၵႂႃႇမႃး ႁၢၼ်ႉတေႃႇထိုင် ယၢမ်းလဵဝ် ။