သိုၵ်းမၢၼ်ႈလွၵ်ႇငိုတ်ႈၵူၼ်းမိူင်းလွႆၶေႃ မိူင်းယၢင်းလႅင်ဝႃႈ တွၼ်ႈတႃႇပၢင်လိူၵ်ႈတင်ႈဢၼ်တေၸတ်းႁဵတ်းၼႂ်းႁၢင်လိူၼ်ၻီႊသႅမ်ႊပိူဝ်ႊၼႆႉ သင်ဢမ်ႇၵႂႃႇသႂ်ႇၶႅပ်းၵၢင်ၸႂ်ၼႆၸိုင် တေဢမ်ႇဢဝ်ပုၼ်ႈၽွၼ်းလွင်ႈႁူမ်ႇလူမ်ႈပၼ် ၼႆသေ ၸႂ်ႉၵႂႃႇပၼ်ၶႅပ်းၵၢင်ၸႂ်လူင်ႈၼႃႈၼႆယဝ်ႉ ။

တႄႇႁူဝ်လိူၼ် တီႊသႅမ်ႊပိူဝ်ႊ ၼႆႉမႃး ႁွင်ႈၵၢၼ်ၾၢႆႇၵူတ်ႇထတ်းၵူၼ်းၶဝ်ႈမိူင်း လဝၵ ၵဵပ်းဢဝ်သဵၼ်ႈမၢႆမုင်ႉႁေႃႁိူၼ်း ၵူၼ်းမိူင်းၼႂ်းဝဵင်းလွႆၶေႃသေ ပိုၼ်ၽၢဝ်ႇတႃႇမႃးပၼ်ၶႅပ်းၵၢင်ၸႂ် ၊ သင်ဢမ်ႇၵႂႃႇပၼ်ၶႅပ်းၵၢင်ၸႂ် တွၼ်ႈတႃႇပၢင်လိူၵ်ႈတင်ႈၼႆၸိုင် တေဢမ်ႇဢဝ်ပုၼ်ႈၽွၼ်းပၼ် လွင်ႈႁူမ်ႇလူမ်ႈသင်ၼႆ လွၵ်ႇငိုတ်ႈပႃးထႅင်ႈၼင်ႇၼႆ ။

ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၵၢင်ႉၵႄႇၼႂ်းပွၵ်ႉလႄႇလမ်းႁႃလၢတ်ႈ မၢႆဢၼ်တေလႆႈၵႂႃႇ သႂ်ႇၼၼ်ႉ။  မိူၼ်ၼင်ႇ တူၵ်းမႅၼ်ႈမၢႆ 15 ၼႆၵေႃႈ  ပေႃးႁွတ်ႈမၢႆ 15 ၼၼ်ႉၵူၼ်းၵေႃႉၼၼ်ႉ တေလႆႈၵႂႃႇသႂ်ႇ ၊ သင်ဝႃႈႁဝ်းဢမ်ႇၶႂ်ႈသႂ်ႇလႄႈဢမ်ႇၵႂႃႇပၼ်သဵင်ၵၢင်ၸႂ်ၼႆၵေႃႈ ယွၼ်ႉဝႃႈၶဝ်မီးမၢႆႁဝ်းဝႆႉယဝ်ႉလႄႈ ၶဝ်ၵေႃႈတေႁူႉဝႃႈႁဝ်းဢမ်ႇၵႂႃႇသႂ်ႇ ။ ပေႃးၼၼ်ၶဝ်ၶႂ်ႈဢဝ်တၢင်းၽိတ်းႁဝ်းၸိူင်ႉႁိုဝ်ၵေႃႈလႆႈ။ ၵွပ်ႈၼႆႁဝ်းၵေႃႈဢမ်ႇမီးလွင်ႈႁူမ်ႇလူမ်ႈၼၼ်ႉၼႃႇ ”  – ဝႃႈၼႆ ။

ၼႂ်းႁၢင်လိူၼ် ၼူဝ်ႊဝႅမ်ႊပိူဝ်ႊ ၽွင်းပႃႇတီႇသၢင်ႇသီႈ USDP ၊ ပႃႇတီႇ PPP  မႃးသူၼ်းတုမ် တႃႇပၢင်လိူၵ်ႈတင်ႈၼၼ်ႉ  ၶဝ်ပၼ်ၵူၼ်းမႃးထွမ်ႇၶဝ်လၢတ်ႈၼၼ်ႉ ၼိုင်ႈၵေႃႉ ၶဝ်ႈသၢၼ်ၼိုင်ႈပေႇလႄႈၼမ်ႉမၼ်းၼိုင်ႈတဝ်ႈ- ၼႆ ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈၼင်ႇၼႆ။

“ၶဝ်ဢွၵ်ႇပိူင်ဝႆႉၼႆႉ တႃႇသူၼ်းတုမ်ၼႆႉ-  တေဢမ်ႇလႆႈႁဵတ်းပိုၼ်ႉတီႈၵူၼ်းၵိုၼ်းၶွၼ်ႈ ၼႆလူး။  ၊ မိူၼ်ၼင်ႇ ၼႂ်းၵၢတ်ႇ ၊ ၵျွင်းမုၼ်ၸဝ်ႈ ၸိူဝ်းၼႆႉတေဢမ်ႇလႆႈႁဵတ်းၼႆပဵၼ်ၶဝ်ၵေႃႈဢွၵ်ႇဝႆႉၵူၺ်း ။ ဢၼ်ၸၢင်ႈႁဵတ်းၼႆႉႁဵတ်းလႆႈတီႈ ၼႂ်ဝၢင်းႁိူၼ်းၵူၼ်းမိူင်း ၊ ၸလွပ်ႈၵၢင်ဝၢၼ်ႈ၊ တီႈထမ်ႇမႃႇယူင်ႇဝၢၼ်ႈၸိူဝ်းၼႆႉၵူၺ်းၼႃႇ ။  ”- ဝႃႈၼႆ ။ 

လိူဝ်ၼၼ်ႉ တႄႇ ၼႂ်းလိူၼ် ၼူဝ်ႊဝႅမ်ႊပိူဝ်ႊမႃးသိုၵ်းမၢၼ်ႈလႄႈ ႁွင်ႈၵၢၼ်ၾၢႆႇၽွင်းငမ်းၵူႈလွင်ႈ လၢတ်ႈတီႈလုၵ်ႈႁဵၼ်းပိုၼ်ႉတီႈဝႃႈ ပေႃးၶႂ်ႈၵႂႃႇႁဵၼ်းလိၵ်ႈၼႆၸိုင် တေလႆႈပၼ်ၶႅပ်းၵၢင်ၸႂ် လူင်ႈၼႃႈယဝ်ႉ ၸင်ႇတေလႆႈၶိုၼ်ႈႁဵၼ်းၼႆယဝ်ႉ ။

တီႈဝဵင်းလွႆၶေႃၼႆႉ ပႃႇတီႇဢၼ်ၶဝ်ႈလိူၵ်ႈတင်ႈၼႆႉတေမီး ပႃႇတီႇသၢင်ႇသီႈ USDP ၊ ပႃႇတီႇ PPP ၊  ပႃႇတီႇၽွမ်ႉႁူမ်ႈၸၢဝ်းၶိူဝ်း (တသၺ) လႄႈ ပႃႇတီႇၵူၼ်းမိူင်း ၸဵမ်ၸိူဝ်းၼႆႉ ။

ယၢမ်းလဵဝ်ယွၼ်ႉပၢင်လိူၵ်ႈတင်ႈၸမ်မႃးလႄႈ သိုၵ်းမၢၼ်ႈထႅမ်ဢဵၼ်ႁႅင်း ၵူတ်ႇထတ်းၵူၼ်းၶဝ်ႈဢွၵ်ႇဝဵင်းႁၢဝ်ႈႁႅင်းဝႆႉ – ၵူၼ်းပိုၼ်ႉတီႈလၢတ်ႈ ။

ဝဵင်းလွႆၶေႃ မိူင်းယၢင်းလႅင်ၼႆႉၵေႃႈ ပဵၼ်ပိုၼ်ႉတီႈဢၼ်ထူပ်းၽေးပၢင်တိုၵ်းႁၢဝ်ႈႁႅင်းတီႈၼိုင်ႈ။ တေႃႇထိုင်ယၢမ်းလဵဝ်ၵူၼ်းမိူင်း ပႆႇၸၢင်ႈပူၵ်းပွင်ႁိူၼ်းယေးလႄႈၵၢၼ်ႁႃၵိၼ်လဵင်ႉတွင်ႉလႆႈၶိုၼ်းလီလီ။ သိုၵ်းမၢၼ်ႈသမ်ႉမႃးတဵၵ်းတဵင်တႃႇပၢင်လိူၵ်ႈတင်ႈထႅင်ႈ။

မိူၼ်ၼင်ႇၼႆ တီႈၼႂ်းၸႄႈဝဵင်းၼမ်ႉၸၢင်ၵေႃႈ ပလိၵ်ႈသိုၵ်းမၢၼ်ႈ တင်း ၾၢႆႇၽွင်းငမ်းဝဵင်း လဝၵ ၶဝ် ဢဝ်သဵၼ်ႈမၢႆၸိုဝ်ႈ ၸွမ်းၼႄထိုင်ၼႂ်းပွၵ်ႉၼႂ်းႁိူၼ်း။ ဢဝ်ဝႂ်မုင်ႉႁေႃႁိူၼ်း တင်း သဵၼ်ႈမၢႆၸိုဝ်ႈ တႃႇသႂ်ႇၶႅပ်းၵၢင်ၸႂ် ပိူင်ႈၵၼ်ၸိူင်ႉႁိုဝ်၊ ၵူၼ်းၵႂႃႇမီးတီႈၵႆ ၸွင်ႇၸၢင်ႈမႃးသႂ်ႇၶႅပ်းၵၢင်ၸႂ် ၽွင်းပၢင်လိူၵ်ႈတင်ႈ၊ တွင်ႈထၢမ်ပႃးၵူၼ်းၼႂ်းမုင်ႉႁေႃႁိူၼ်းၸိူဝ်းၼႆႉ ဝႃႈၼႆ။

ၼႂ်းႁၢင်လိူၼ် တီႊသႅမ်ႊပိူဝ်ႊ ဝၼ်းတီႈ 28 မႃးၼႆႉ သိုၵ်းမၢၼ်ႈယိုတ်းမိူင်း တေဢွၼ်ၼမ်းၸတ်းႁဵတ်းပၢင်လိူၵ်ႈၼႆသေ ပိုၼ်ၽၢဝ်ႇပဵၼ်တၢင်းၵၢၼ်ဝႆႉ။ ၼႂ်းပၢင်လိူၵ်ႈတင်ႈဢၼ်သိုၵ်းမၢၼ်ႈဢွၼ်ၼမ်းႁဵတ်းတွၼ်ႈၼိုင်ႈၼၼ်ႉ ပႃးဝဵင်းလွႆၶေႃ လႄႈ ဝဵင်းၼမ်ႉၸၢင် ဝႃႈၼႆ။