ၼႂ်းႁူဝ်လိူၼ်တီႊသႅမ်ႊပိူဝ်ႊၼႆႉ သိုၵ်းမၢၼ်ႈယိုတ်းမိူင်းၸိူဝ်းပၵ်းသဝ်းၼႂ်းၸႄႈဝဵင်းလႃႈသဵဝ်ႈ ႁွင်ႉဢဝ်ၸုမ်းၶိုင်ပွင်ပၢင်လိူၵ်ႈတင်ႈ ၶဝ်ႈၵႂႃႇၼႂ်းထုင်ႉၼမ်ႉပွင်ႈ ၼႃႈတီႈၸုမ်းသိုၵ်းၵဝ်ႈ ၵၢင်ႉၵုမ်းၵမ်ဝႆႉသေ ပၢဝ်ႇသေႃႇ ႁႂ်ႈၵူၼ်းမိူင်းဢဝ်ဝႂ်မုင်ႉႁေႃႁိူၼ်းၵႂႃႇၼႄ ၼႆယဝ်ႉ။

မိူဝ်ႈၼႆႉ ဝၼ်းတီႈ 4 လိူၼ်တီႊသႅမ်ႊပိူဝ်ႊ ယၢမ်းၵၢင်ၼႂ် သိုၵ်းမၢၼ်ႈ တင်း ၸုမ်းပွင်ၵၢၼ်ပၢင်လိူၵ်ႈတင်ႈၶဝ် ႁွတ်ႈၽႅဝ်ထိုင်တီႈ လုမ်းၶႄၾႆးတီႈၼမ်ႉပွင်ႈသေ လူင်းၵဵပ်းၶေႃႈမုၼ်း ၵူၼ်းမိူင်း တႃႇပၢင်လိူၵ်ႈတင်ႈယူႇ ၼႆယဝ်ႉ။

ၼၢင်းယိင်း ၵေႃႉယူႇၼႂ်းထုင်ႉၼမ်ႉပွင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ – “ၵၢင်ၼႂ်ၼႆႉ သိုၵ်းမၢၼ်ႈၶဝ် ႁွင်ႉဢဝ် ၵူၼ်းၶဝ် ပလိၵ်ႈ (ယႄး) တင်း ၸုမ်းပွင်ၵၢၼ်ပၢင်လိူၵ်ႈတင်ႈၶဝ် မႃးတီႈလုမ်းၶႄၾႆးႁဝ်းၼႆႉ။ ႁႂ်ႈၵူၼ်းၼႂ်းပွၵ်ႉ ဢဝ်ဝႂ်မုင်ႉႁေႃႁိူၼ်းၵႂႃႇပၼ်ၶဝ်ႁႄ လၢတ်ႈႁႂ်ႈၵူၼ်းဝၢၼ်ႈၵႂႃႇသႂ်ႇမႄးပၼ်ၶဝ်” ဝႃႈၼႆ။

ဝၢႆးပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ယဝ်ႉ လင်သိုၵ်းမၢၼ်ႈၶဝ်ႈၵုမ်းၵမ်ၶိုၼ်း ၼႂ်းဝဵင်းလႃႈသဵဝ်ႈယဝ်ႉၼႆႉ သိုၵ်းမၢၼ်ႈယိုတ်းမိူင်း ႁွင်ႉဢဝ်ၵူၼ်းသိုၵ်း၊ ပလိၵ်ႈ လႄႈ ၸုမ်းပွင် ၵၢၼ်ပၢင်လိူၵ်ႈတင်ႈ ၶဝ်ႈ ၵႂႃႇၼႂ်းၼႃႈတီႈၸုမ်းသိုၵ်းၵဝ်ႈၵၢင်ႉၵုမ်းၵမ်ၼႆႉ ပဵၼ်ပွၵ်ႈၵမ်းႁႅၵ်ႈ ၼႆယဝ်ႉ။

ၵူၼ်းၼုမ်ႇ ၵေႃႉယူႇဝႆႉၼႂ်းထုင်ႉၼမ်ႉပွင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “ၶဝ်ႁွင်ႉဢဝ်ၵူၼ်းၶဝ်ၶဝ်ႈမႃးၸိူင်ႉၼႆ ၾၢႆႇသိုၵ်းၵဝ်ႈၵၢင်ႉၵေႃႈဢမ်ႇဝႃႈသင်။ ပၼ်သိုၵ်းမၢၼ်ႈၸိူဝ်းၼႆႉၶဝ်ႈမႃးလီလီယူႇ။ ထၢင်ႇတႄႉ ၶဝ်တေ ၽႄၼႃႈတီႈၵၼ်ႁႄ ႁူမ်ႈၵၼ်ၵုမ်းၵမ်ၵႂႃႇႁိုဝ်ၵေႃႈဢမ်ႇႁူႉ” ဝႃႈၼႆ။

ထုင်ႉၼမ်ႉပွင်ႈၼႆႉ သိုၵ်းၵဝ်ႈၵၢင်ႉ (MNDAA) ၵုမ်းၵမ်ဝႆႉ တင်ႈတႄႇပဵၼ်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်း 2 မႃး ႁိုင်ၶၢဝ်းတၢင်းၸမ် 2 ပီယဝ်ႉသေ ပၼ်ႇၵၢၼ်ၽွင်း ငမ်းဝႆႉ ။