ၼႂ်းႁူဝ်လိူၼ်တီႊသႅမ်ႊပိူဝ်ႊမႃးၼႆႉ သိုၵ်းၵဝ်ႈၵၢင်ႉ MNDAA ၵူတ်ႇထတ်းၶိုၼ်း မၢႆၾၢင်ရူတ်ႉၵႃးၸိူဝ်းလတ်းၵႂႃႇမႃး ၼႂ်းၸႄႈဝဵင်းသႅၼ်ဝီ မိူင်းတႆးပွတ်းႁွင်ႇ။
ပေႃးဢမ်ႇမီးဝႂ်ႁပ်ႉႁွင်း လၢႆႊသိၼ်ႊဢၼ်ၸုမ်းသိုၵ်းၵဝ်ႈၵၢင်ႉႁဵတ်းဢွၵ်ႇဝႆႉပၼ်ၼၼ်ႉ တိုၼ်းဢမ်ႇပၼ် လတ်းၶၢမ်ႈၵဵတ်ႉလၢၼ်ႇၼႆ ၸဝ်ႈၵႃးၵေႃႉၺႃးၵူတ်ႇထတ်း တီႈၵဵတ်ႉလၢၼ်ႇသိုၵ်းၵဝ်ႈၵၢင်ႉ ၼႂ်းၸႄႈဝဵင်းသႅၼ်ဝီ လၢတ်ႈၼႄတီႈၽူႈတွႆႇႁွၵ်ႈ ၼင်ႇၼႆ။
“ၶဝ်ထတ်းဝႂ်ၵႃးၵူႈသႅၼ်း ။ ၸူဝ်ႈၶၢဝ်းၼႆႉၶဝ်ၵူတ်ႇထတ်းႁႅင်းၼႃႇ။ ပေႃးဢမ်ႇမီးဝႂ်ဢၼ်ၶဝ်ႁဵတ်းပၼ်ၼၼ်ႉ တိုၼ်းဢမ်ႇပၼ်ၶၢမ်ႈ ၵဵတ်ႉၶဝ်။ လႆႈႁူၼ်လင်ၶိုၼ်းတင်းမူတ်း။ လၢတ်ႈဝႃႈ တေၵႂႃႇႁိမ်းဝၢၼ်ႈၼႆႉၼႆၵူၺ်းၵေႃႈဢမ်ႇလႆႈ။ ၼွၵ်ႈလိူဝ်ၵႃးသိုၵ်းၶဝ်ယဝ်ႉ ပေႃးပဵၼ်ၵႃးၵူၼ်းႁိူၼ်း သင်ဝႃႈဢမ်ႇမီးဝႂ် ဢၼ်တီႈလုမ်းၶဝ်ႁဵတ်းဢွၵ်ႇပၼ်ၼၼ်ႉၼႆ တိုၼ်းဝႃႈဢမ်ႇပၼ်လတ်းလႃးလႃး။”
ဝႂ်ရူတ်ႉၵႃးၼႆႉ ယၢမ်းလဵဝ်ၵေႃႈသိုၵ်းၵဝ်ႈၵၢင်ႉ (MNDAA) တိုၵ်ႉပိုတ်ႇႁပ်ႉႁဵတ်းပၼ်ယူႇၵူႈဝၼ်း။ ၸဝ်ႈရူတ်ႉၸဝ်ႈၵႃး လႆႈၵႂႃႇတၢင်ႇယိုၼ်ႈယွၼ်းႁဵတ်းတီႈလုမ်းဢၼ်ၶၢႆႉၵႂႃႇတင်ႈဝႆႉ တၢင်းဝၢၼ်ႈပၢင်ႇလေႃႉၼၼ်ႉဝႃႈၼႆ။
လႆႈႁူႉဝႃႈ ဢွင်ႈတီႈၸုမ်းသိုၵ်းၵဝ်ႈၵၢင်ႉၶဝ် ၵူတ်ႇထတ်းႁၢဝ်ႈႁႅင်းလိူဝ်ပိူၼ်ႈၼႆႉ ပဵၼ်ၵဵတ်ႉလၢၼ်ႇ ဢၼ်တင်ႈဝႆႉတီႈဝၢၼ်ႈၼမ်ႉဢုၼ်ႇ ဢိူင်ႇပဵင်းသႃႇ ၼိူဝ်သဵၼ်ႈတၢင်းလူင် ႁၢႆႊဝေႊ ၵႂႃႇမႃး လႃႈသဵဝ်ႈ-သႅၼ်ဝီ-မူႇၸေႊ ႁိမ်းသဵၼ်ႈတၢင်းၽႄ တၢင်းၶဝ်ႈဢွၵ်ႇ ဢိူင်ႇမိူင်းပႃး သဵၼ်ႈတၢင်းၵႂႃႇမႃး မိူင်းယဵၼ်- ဝဵင်းသႅၼ်ဝီ ၼၼ်ႉဝႃႈၼႆ။
ဝႂ်ၶွၼ်ႇရူတ်ႉၵႃး ဢၼ်သိုၵ်းၵဝ်ႈၵၢင်ႉႁဵတ်းဢွၵ်ႇပၼ်ၼႆႉ ၸႂ်ႉတိုဝ်းလႆႈတႃႇဢွၵ်ႇၶၢဝ်းတၢင်း ၼႂ်းမိူင်းတႆးပွတ်းႁွင်ႇ ၸိူဝ်းပိုၼ်ႉတီႈဢၼ်သိုၵ်းၵဝ်ႈၵၢင်ႉတင်း သိုၵ်းတဢၢင်းၶဝ် ၵုမ်းၵမ်ဝႆႉၼၼ်ႉၵူၺ်း။ ဢႃယုဝႂ်ၶွၼ်ႇႁေႃႈရူတ်ႉၵႃးၼႆႉ လႆႈပၼ်ငိုၼ်း ၼိုင်ႈဝႂ်ဢေႇသုတ်း 80,000 ပျႃး တေႃႇၼိုင်ႈသႅၼ်ပျႃး၊ ၸႂ်ႉလႆႈၶၢဝ်းယၢမ်းႁိုင်ထိုင် 6 လိူၼ် ။
တပ်ႉသိုၵ်းၵဝ်ႈၵၢင်ႉၼႆႉ ႁူမ်ႈၵၼ်တင်း သိုၵ်းၸၢဝ်းၶိူဝ်းလၢႆလၢႆၸုမ်းသေယိုတ်းဢဝ်ၸႄႈဝဵင်းလႃႈ သဵဝ်ႈ၊ သႅၼ်ဝီ၊ ၵုၼ်လူင်၊ ႁူဝ်ပၢင်ႇ၊ လၢဝ်ႇၵၢႆး (ၵၢတ်ႇၵဝ်ႇ) ၸဵမ်ၸိူဝ်းၼႆႉ။ တင်ႈတႄႇႁူဝ်လိူၼ်ၵျႅၼ်ႊၼိဝ်ႊရီႊ ပီ 2025 ၼႆႉမႃး ၶဝ်ဢွၵ်ႇပၵ်းပိူင်ဝႃႈၸိူဝ်းမီးရူတ်ႉၵႃး တေလႆႈသႂ်ႇၶွၼ်ႇလႄႈ ႁဵတ်းဝႂ်ႁေႃႈရူတ်ႉၵႃး – ဝႃႈၼႆဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ