တႄႇၵၢင်လိူၼ်မေႊၼႆႉမႃး သိုၵ်းမၢၼ်ႈႁူမ်ႈပျီႇတူႉၸိတ်ႉ PNO ၶဝ်ႈၵူတ်ႇထတ်းသဵၼ်ႈမၢႆၶႅၵ်ႇ ၼႂ်းပွၵ်ႉၼႂ်းယွမ်ႇ  ၼႂ်းဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း သေဢမ်ႇၵႃး ၵူတ်ႇထတ်းၵူၼ်းၵႂႃႇမႃးႁၢဝ်းႁႅင်း  ။

ၵူၼ်းၸၢႆးၼႂ်းဝဵင်းယွင်ႁူၺ်ႈလၢတ်ႈၽူႈတွႆႇႁွၵ်ႈဝႃႈ -“ တလဵဝ်ၼႆႉ သိုၵ်းမၢၼ်ႈၶဝ်ႈ ၵူတ်ႇထတ်း သဵၼ်ႈမၢႆၶႅၵ်ႇသေ  တီႉၺွပ်းပႃး ၊ ၸွမ်းၵဵတ်ႉလၢၼ်ႇၸိူဝ်းၼၼ်ႉၵေႃႈ ၵူတ်ႇထတ်းၵူၼ်းၵႂႃႇမႃး  ႁၢဝ်ႈႁႅင်း  ယၢမ်းလဵဝ်ၼႆႉ ပေႃးဢမ်ႇၸႂ်ႈၵူၼ်းပိုၼ်ႉတီႈၼႆႉ လီၾၢင်ႉၵႂႃႇၾၢင်ႉမႃးၵၼ်ၼႃႇ ”- ဝႃႈၼႆ ။ 

မိူၼ်ၼင်ၼႆ ၼႂ်းဝၼ်းတီႈ 21 /5/2026 ၼၼ်ႉ သွင်ၽူဝ်မေး ၵူၼ်းဝၢၼ်ႈၼမ်ႉပၼ်ႇ ဢၢၼ်းၵႂႃႇၼွၼ်းတီႈ ဝဵင်းယွင်ႁူၺ်ႈ ထုၵ်ႇသိုၵ်းမၢၼ်ႈတီႉၺွပ်း ထိုင်ဝၼ်းမိူဝ်ႈၼႆႉ ဢမ်ႇလႆႈတင်းၵပ်းသိုပ်ႇၵၼ်တင်းၵူၼ်းတီႈႁိူၼ်း ၼႆယဝ်ႉ ။

လိူဝ်ၼၼ်ႉ ဝၢၼ်ႈသွင်းပျွင်း ဝၢၼ်ႈၸမ် လႅၼ်လိၼ်မိူင်းပၢႆး- ၾၢႆႇၶုၼ်ၸိူဝ်းၼၼ်ႉ လႆႈယိၼ်းသဵင်ၵွင်ႈသဵင်မၢၵ်ႇၵူႈဝၼ်းလႄႈ ႁဵတ်းႁႂ်ႈၵူၼ်းပိုၼ်ႉတီႈ မႆႈၸႂ်လွင်ႈႁူမ်ႇလူမ်ႈၵူဝ် ပဵၼ်ပၢင်တိုၵ်းၵၼ်ၶိုၼ်း ။

ၵူၼ်းၸၢႆး ၵူၼ်းပိုၼ်ႉတီႈဝဵင်းယွင်ႁူၺ်ႈလၢတ်ႈၽူႈတွႆႇႁွၵ်ႈဝႃႈ -“ဝၢၼ်ႈဢၼ်ၸမ် ၸွမ်းလႅၼ်လိၼ်မိူင်းယၢင်းလႅင်ၼၼ်ႉတႄႉ ၵႆႉလႆႈယိၼ်းသဵင်ၵွင်ႈသဵင်မၢၵ်ႇၼႃႇ ၊ လႆႈယိၼ်းၵူႈဝၼ်း ၊ ၵူဝ်ပဵၼ်ပၢင်တိုၵ်းၵၼ်ၶိုၼ်းၵူၺ်းယဝ်ႉ၊ ပေႃးပဵၼ်ထႅင်ႈၵေႃႈ ဢမ်ႇၸၢင်ႈပၢႆႈၵႂႃႇလႂ်ၶိုၼ်းယဝ်ႉ  ”- ဝႃႈၼႆ ။

လိူဝ်ၼၼ်ႉ ယၢမ်းလဵဝ် တီႈၼႂ်းၼွင်ႁၢႆးယႃႈ ၾူၼ်တူၵ်းထပ်းၵၼ်လၢႆလၢႆဝၼ်း ၼမ်ႉၼႂ်းၼွင်ယိုင်ႈၶိုၼ်ႈ 3-4 ထတ်း သူၼ်ၽုၵ်ႇသွမ်ႈၵမ်ႈၽွင်ႈ လူႉၵွႆ ။

ၼၢင်းယိင်းၸဝ်ႈသူၼ်ၽုၵ်ႇသွမ်ႈၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ -“ တူၼ်ႈၵႃႈတူၼ်ႈဢွၼ်ႇ ဢၼ်တိုၵ်ႉႁုၼ်ႈၶိုၼ်ႈမႃးၼၼ်ႉ ၺႃးၼမ်ႉၾူၼ်ၼမ်သေ လူႉၵွႆ ၊   မၢၵ်ႇၶိူဝ်သူမ်ႈၼႂ်းသူၼ် မၢင်ၸိူဝ်းပႆႇလႆႈဢဝ်ၶၢႆသေဢိတ်း လူႉၵွႆၵႂႃႇတင်းၼမ် ၊ လွၵ်းၼႃးၵေႃႈၸၢင်ႈမီးလွင်ႈလူႉသုမ်း ၶၼ်ၶဝ်ႈၵေႃႈဢမ်ႇလႆႈၼမ်”- ဝႃႈၼႆ ။

ဢၼ်ၺႃးၾူၼ်ၼမ်သေ လူႉၵွႆၵႂႃႇၵမ်ႈၼမ်ၼႆႉ ပဵၼ်သူၼ် မၢၵ်ႇၶိူဝ်သူမ်ႈ လႄႈ သူၼ်ဢႃႇလူး ၊ မၢၵ်ႇပၵ်ႉ ၊ တႅင် ၊ ထူဝ်ႇ  ။ ယွၼ်ႉထုၵ်ႇၼမ်ႉထူမ်ႈလႄႈ ၵုၼ်ႇလိပ်း ဢမ်ႇလႆႈၵႃႈၶၼ်ၼမ် ႁဵတ်းႁႂ်ႈ ၵူၼ်းပိုၼ်ႉတီႈႁႃၵိၼ်လဵင်ႉတွင်ႉ ယၢပ်ႇၽိုတ်ႇၵိၼ်းၸႂ်ဝႆႉ ဝႃႈၼႆ ။

တီႈၼႂ်းၼွင်ႁၢႆးယႃႈၼႆႉ ပေႃးပဵၼ်ၶၢဝ်းႁိုဝ်ႉၼမ်ႉႁႅင်ႈ ၊ ပေႃးၾူၼ်တူၵ်းဢိတ်ႉၼိုင်ႈၵူၺ်းၵေႃႈ ၼမ်ႉၵိုင်ႉၵၢင်ႉၶိုၼ်ႈႁႅင်း ။ ၾၢႆႇပၵ်းတႃသိင်ႇဝႅတ်ႉလွမ်ႉၶဝ်တႄႉလၢတ်ႈဝႃႈ ပဵၼ်ယွၼ်ႉၸဝ်ႈငိုၼ်းသႃး မႃးၶူႈထႆႁဵတ်းႁူင်းႁႅမ်းႁူင်းလိုဝ်ႈသဝ်း ၸွမ်းၾင်ႇၼွင် ၊ သမ်ႉဢမ်ႇၸွႆႈၵၼ်တူၺ်းလူ လွင်ႈလၢႆႇၼမ်ႉ လူင်းၼွင် ႁဵတ်းႁႂ်ႈ လၢႆႇတၼ်၊ ၵၢၼ်ၶုတ်းႁႄႈယႃႉပႃႇထိူၼ်ႇၵေႃႈဢမ်ႇၵိုတ်းဢမ်ႇယင်ႉလႄႈ ထိုင်တီႈငႂ်ႈလိၼ် ၶႅၵ်ႉၶႄႈ တူၼ်ႈမႆႉယႂ်ႇၸိူဝ်းၼႆႉ လူင်းမႃးၼႂ်းၼွင် ႁဵတ်းႁႂ်ႈပိုၼ်ႉၼွင်သုင်ၶိုၼ်ႈ။

ၵဵဝ်ၵပ်းလွင်ႈၼႆႉၵူၼ်းပိုၼ်ႉတီႈတုၵ်းယွၼ်းၽူႈမီးပုၼ်ႈၽွၼ်းၼႂ်းပိုၼ်ႉတီႈ  ႁႂ်ႈမူၼ်ႉမႄးႁဵတ်းသၢင်ႈၵႄႈလိတ်ႈ ႁႃတင်းဢွၵ်ႇပၼ်တွၼ်ႈတႃႇၵူၼ်းၽုၵ်ႇသွမ်ႈၵႂႃႇ – ၵူၼ်းပိုၼ်ႉတီႈလၢတ်ႈ ။