တႃႇလူတ်းယွၼ်ႇၵၢၼ်ၸႂ်ႉၼမ်ႉမၼ်းၸၢၵ်ႈၼႆသေ သိုၵ်းမၢၼ်ႈယိုတ်းမိူင်း ဢွၵ်ႇမၢႆမီႈမႂ်ႇ  ႁႂ်ႈတူၺ်းၸွမ်းဝႂ်လၢႆႊသိၼ်ႊရူတ်ႉၵိၵ်ႈ/ၵူႈသေ ၸင်ႇဢွၵ်ႇႁိူၼ်းၸွမ်းဝၼ်းၵိၵ်ႈဝၼ်းၵူႈ ၊တင်ႈတႄႇၵၢင်လိူၼ်မၢတ်ႉၶျ်ၼႆႉမႃး ပလိၵ်ႈမၢၼ်ႈပႂ်ႉၵူတ်ႇထတ်းရူတ်ႉၵႃးၸိူဝ်းဢမ်ႇၸွမ်းမၢႆမီႈ – ယိုတ်းပႃးလၢႆႊသိၼ်ႊရူတ်ႉ  တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ။

ၵူၼ်းၸၢႆးဝဵင်းတူၼ်ႈတီးၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ မိူဝ်ႈဝႃးၼႆႉ ၶဝ်ၸႅတ်ႈရူတ်ႉၵႃးၸိူဝ်းတေလႆႈၶီႇဝၼ်းၵိၵ်ႈ / ဝၼ်းၵူႈၼၼ်ႉသေ တီႉပႃးၵႃးW ( ဢမ်ႇမီးဝႂ်လၢႆႊသိၼ်ႊ ) ၊ ၵႃးတႆးၵေႃႉၶႃႈတႄႉပႃးၵႂႃႇဢေႃႈ ၊ ပိူင်ႇလူင် ၶဝ်တေၵူတ်ႇထတ်းတီႈသဵၼ်ႈတၢင်းလူင်ၶႃႈ”- ဝႃႈၼႆ ။

ၽွင်းပလိၵ်ႈသိုၵ်းမၢၼ်ႈၵူတ်ႇထတ်း ရူတ်ႉၵႃး ၶီႇဝၼ်းၵိၵ်ႈ / ဝၼ်းၵူႈၼၼ်ႉ သင်ႇၸိူဝ်ႉဝႃႈ  ဢွၵ်ႇမႃးဢမ်ႇမႅၼ်ႈၸွမ်းဝၼ်းမၼ်းၸိုင် မၢပ်ႇယွၼ်းငိုၼ်း 1 မိုၼ်ႇပျႃး ထိုင် 5 မိုၼ်ႇပျႃး ။ ပိူင်လူင် တေပႂ်ႉၵူတ်ႇထတ်း တီႈၼိူဝ်သဵၼ်ႈတၢင်းလူင်ၵၢင်ဝဵင်းတူၼ်ႈတီးလႄႈ ပၢမ်ႉၼမ်ႉမၼ်း BOC ၸိူဝ်းၼႆႉ  ဝႃႈၼႆ ။

ၵူၼ်းၸၢႆးဢႃယု 50 ယူႇဝဵင်းပၢင်လွင်းလၢတ်ႈၽူႈတွႆႇႁွၵ်ႈဝႃႈ -“ တီႈတူၼ်ႈတီးတႄႉ ၶဝ်ႈၸႅတ်ႈ ပေႃးၶီႇဢမ်ႇမႅၼ်ႈဝၼ်းမၼ်း ပေႃးတီႉလႆႈၶဝ်ယွၼ်းငိုၼ်း  15000 ထိုင် 50000 ပျႃး ၊ လႆႈပၼ်ဢမ်ႇမိူၼ်ၵၼ် ၶဝ်တူၺ်းၵူၼ်းသေယွၼ်း ၊ မၢင်ဝၼ်းထတ်းပႃးလၢႆႊသိၼ်ႊ  မၢင်ဝၼ်းၵေႃႈဢမ်ႇထတ်းပႃး ၊ မီးၼႂ်းမိုဝ်းၶဝ်မူတ်းလႄႈ ပေႃးယွၼ်းငိုၼ်းၵေႃႈ ၵႃႈလႆႈပၼ် ”- ဝႃႈၼႆ ။

မိူၼ်ၼင်ႇၼႆ တီႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်းၵေႃႈ တႄႇၵၢင်လိူၼ်မတ်ႉၶျ်ႉၼႆႉမႃး ပလိၵ်ႈသိုၵ်းမၢၼ်ႈ ပႂ်ႉၵူတ်ႇထတ်း ရူတ်ႉၵႃးၶီႇ ဝၼ်းၵိၵ်ႈ / ဝၼ်းၵူႈ တီႈၵၢင်ဝဵင်းၼမ်ႉၸၢင်ႇ သေ ၵူတ်ႇထတ်းပႃး ဝတ်းဝႂ်လၢႆႊသိၼ်ႊ။ သင်တီႉၺွပ်းလႆႈၸိုင်ႇ ယိုတ်းသိမ်းဝႆႉယဝ်ႉ ၵူၼ်းပိုၼ်ႉတီႈ လႆႈပၼ်ငိုၼ်း 5 မိုၼ်ႇပျႃး ၵႂႃႇထုတ်ႇဢဝ်ၶိုၼ်း ။

ၵူၼ်းၸၢႆးဢႃယု 50 ၵူၼ်းဝဵင်းၼမ်ႉၸၢင်လၢတ်ႈၽူႈတွႆႇႁွၵ်ႈဝႃႈ -“ ပူၼ်ႉမႃး 3-4 ဝၼ်းၼႆႉ ၺွပ်းသေ ၶဝ်ဢဝ်ၵႂႃႇဝႆႉတီႈပၢင်ႇပိတ်ႉမၢၵ်ႇၼင် ၊ ထႅင်ႈဝၼ်းၵေႃႈ လႆႈဢဝ်ငိုၼ်း ၵႂႃႇထုတ်ႇၶိုၼ်း ၊ ၵွၼ်ႇၼႃႈၼႆႉယွၼ်ႉမီး လုၵ်ႈဢွၼ်ႇG-12 တွပ်ႇလိၵ်ႈဝႆႉလႄႈ ၶဝ်ပႆႇတီႉတႄႉတႄႉ ၊  တႄႇမိူဝ်ႈၼႆႉၵႂႃႇတႄႉ ၶဝ်တေၵႆႉၵႆႉတီႉယဝ်ႉ ၊ ၼမ်ႉမၼ်းၵေႃႈႁႃသိုဝ်ႉယၢပ်ႇၼႃႇ မိူဝ်ႈလဵဝ်”- ဝႃႈၼႆ။

ယၢမ်းလဵဝ် တီႈၸႄႈဝဵင်းၼမ်ႉၸၢင် ၼမ်ႉမၼ်းၸၢၵ်ႈ (ထၢတ်ႈသီႇ) ၼိုင်ႈလိတ်ႉ/လီႇတႃႇလႂ် မီးမွၵ်ႈ 4000 ပျႃး၊ မၢင်တီႈမၢင်ၸႄႈဝဵင်း ၵႃႈၶၼ်သုင်လိူဝ်ၼၼ်ႉ သွင်ပုၼ်ႈ၊ ၶႂ်ႈသိုဝ်ႉၼမ်ၵေႃႈ ဢမ်ႇလႆႈ၊ သိုဝ်ႉလႆႈ ၸွမ်းၼင်ႇပၢမ်ႉၼမ်ႉမၼ်းၶဝ် မၵ်းတတ်းဝႆႉၼၼ်ႉ ၼႆယဝ်ႉ ။  

မိူၼ်ၼင်ႇ ၸဝ်ႈႁၢၼ်ႉၶၢႆၼမ်ႉမၼ်း တီႈဝဵင်းၼမ်ႉၸၢင် ၊ ပၢင်လွင်း ၊ ၵုၼ်ႁဵင် ၊ ၶူဝ်လမ် ၸိူဝ်းၼႆႉ မၵ်းတတ်းဝႆႉဝႃႈ ပေႃးပဵၼ်ၵႃးၼိုင်ႈလမ်း သႂ်ႇၼမ်ႉမၼ်းလႆႈ 30000 ပျႃး ၊ ရူတ်ႉၶိူင်ႈ သမ်ႉသႂ်ႇလႆႈ 5000 ပျႃး တေႃႇဝၼ်းၵူၺ်းလႄႈ ႁဵတ်းႁႂ်ႈၵူၼ်းမိူင်း ယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉ -ဝႃႈၼႆ ။

ၼၢင်းယိင်းယူႇဝဵင်းၵုၼ်ႁဵင်လၢတ်ႈၽူႈတွႆႇႁွၵ်ႈဝႃႈ -“ၼမ်ႉမၼ်းတီႈဝၢၼ်ႈ လႆႈသိုဝ်ႉ ၼိုင်ႈလီတႃႇ 7000 ပျႃးဢေႃႈ ၊ တေႃႇလဵဝ်ပဵၼ်ၽွင်း ဢိတ်ႇၶဝ်ႈၵၢပ်ႇလႄႈ လူဝ်ႇၼမ်ႉမၼ်းၼႃႇၶႃႈ ၊ ၼမ်ႉမၼ်းသမ်ႉႁႃသိုဝ်ႉယၢပ်ႇ လႆႈၼိုင်ႈဝၼ်းဢိတ်းၵူၺ်းလႄႈ ယၢပ်ႇတႃႇၵူၼ်းႁဵတ်းသူၼ်ႁဵတ်းႁႆႈ ၊  တလဵဝ်ၼႆႉ ပိူၼ်ႈဢမ်ႇၸႂ်ႉဝူဝ်း၊ ၵႂၢႆးယဝ်ႉလႄႈ ၶိူင်ႈၸၢၵ်ႈၸိူဝ်းၼႆႉ ပေႃးဢမ်ႇမီးၼမ်ႉမၼ်းၵေႃႈႁဵတ်းသင်ဢမ်ႇလႆႈ ”- ဝႃႈၼႆ ။

ၸဵမ်မိူဝ်ႈ မိူင်းဢဵၼ်ႁႅင်းယႂ်ႇ တီႈတႃဝၼ်းဢွၵ်ႇၵၢင် ပဵၼ်ပၢင်တိုၵ်းၵၼ်ၼၼ်ႉ ၸိုင်ႈမိူင်းလၢႆလၢႆမိူင်း ဢိၵ်ႇပႃးမိူင်းမၢၼ်ႈ ထူပ်းလွင်ႈယၢပ်ႇၽိုတ်ႇ ၼမ်ႉမၼ်းၸၢၵ်ႈ (ၼမ်ႉမၼ်းၸိူဝ်ႉၾႆး)။

တေႃႇထိုင်ယၢမ်းလဵဝ် ပၢင်တိုၵ်း မိူင်းဢဵၼ်ႁႅင်းယႂ်ႇ တီႈထုင်ႉ တႃဝၼ်းဢွၵ်ႇၵၢင်ၼၼ်ႉ တိုၵ်ႉသိုပ်ႇပဵၼ်ယူႇႁၢဝ်ႈႁႅင်း၊ သၢႆၼမ်ႉ ႁေႃႊမူတ်ႉသ် ဢၼ်လွင်ႈယႂ်ႇတႃႇၵူႈမိူင်းမိူင်း တေႃႉသူင်ႇၵႃႉၶၢႆ ၼမ်ႉမၼ်းမဵၼ်ၼၼ်ႉ တိုၵ်ႉၺႃးပိၵ်ႉဢိုတ်းဝႆႉ။