သိုၵ်းၵဝ်ႈၵၢင်ႉ MNDAA ႁွင်ႉဢဝ် လၢဝ်းပၢၼ်းၶႄႇ ၸိူဝ်းမီးငိုၼ်းၼမ် မႃးလူင်းတိုၼ်း ၼႂ်းၸႄႈဝဵင်းသႅၼ်ဝီ မိူင်းတႆးပွတ်းႁွင်ႇသေ ၸွမ်းသိုဝ်ႉဢွင်ႈတီႈလိၼ်ၽုၵ်ႇသွမ်ႈၵူၼ်းမိူင်း တူင်ႈၼႃး ၸိူဝ်းမီးယူႇၸွမ်းသၢပ်ႇတၢင်း ၼိူဝ်သဵၼ်ႈတၢင်းလူင်ႁၢႆႊဝေႊ လႃႈသဵဝ်ႈ-ၵူတ်ႉၶၢႆ ၊ လႃႈသဵဝ်ႈ-သႅၼ်ဝီ-လၢဝ်ႇၵၢႆး-ၶျိၼ်းသူၺ်ႇႁေႃႇ ၸဵမ်ၸိူဝ်းၼႆႉယူႇ ၼႆယဝ်ႉ။

မိူဝ်ႈၽွင်းပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ယဝ်ႉသေ သိုၵ်းၵဝ်ႈၵၢင်ႉတႄႇၶဝ်ႈၵုမ်း ပၼ်ႇၵၢၼ်ၽွင်းငမ်း ပဵၼ်တၢင်းၵၢၼ်ၼၼ်ႉ MNDAA ၸီႉသင်ႇတီႈၵူၼ်းမိူင်းၸိူဝ်းယူႇၼႂ်း ပိုၼ်ႉတီႈၸႄႈဝဵင်းသႅၼ်ဝီ “ၼႂ်းၶၢဝ်းတၢင်း 6 လိူၼ်ၼႆႉ ႁၢမ်ႈၶၢႆတီႈလိၼ်သူၼ် ႁႆႈ ၼႃး ဢွင်ႈတီႈႁိူၼ်း” ၼႆသေ ဝၢႆးလင်ၼၼ်ႉ ႁွင်ႉဢဝ် လၢဝ်းပၢၼ်းၶႄႇ မႃးတဵၵ်းၶၢတ်ႈသူၼ် ႁႆႈ ၼႃး ၵူၼ်းမိူင်း။

ထိုင်မႃးၼႂ်းၵၢင်ပီ 2025 တေႃႇထိုင် ပီ 2026 လိူၼ်ဢေႊပရႄႇလ်ၼႆႉ သိုၵ်းၵဝ်ႈၵၢင်ႉ ၸွမ်းသူင်ႇ လၢဝ်းပၢၼ်းၶႄႇ ႁႃတဵၵ်းသိုဝ်ႉတီႈလိၼ်ၽုၵ်ႇသွမ်ႈၵူၼ်းမိူင်း ၸိူဝ်းယူႇဝႆႉၼႂ်းၸႄႈ ဝဵင်းသႅၼ်ဝီ မိူင်းတႆးပွတ်းႁွင်ႇယူႇ ၼႆယဝ်ႉ။

ၵူၼ်းမိူင်းၵေႃႉယူႇဝႆႉ ၼႂ်းၸႄႈဝဵင်းသႅၼ်ဝီၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “မိူဝ်ႈလဵဝ် ထုင်ႉၼႃးသႅၼ်ဝီႁဝ်း ၸိူဝ်းမီးယူႇ ႁိမ်းသၢပ်ႇတၢင်းၼၼ်ႉ ၶႄႇၶဝ်ပၼ်ၵႃႈယႂ်ႇၶၼ် လူင်ႁႄ သိုဝ်ႉဢဝ်မူတ်းယဝ်ႉ တီႈၶဝ်ၵျိူၵ်ႈၼၼ်ႉ လႆႈၶၢႆပၼ်မူတ်းယဝ်ႉ။ ၵၢင်ၶမ်ႈ ၵၢင်ၼႂ် ၵမ်းၵမ်းမႃးဢုပ်ႇ မႃး လၢတ်ႈယူႇတိၵ်းတိၵ်း ပေႃးတေဢမ်ႇၶၢႆၵေႃႈ ႁိမ်းႁွမ်းႁဝ်းၼၼ်ႉ ပိူၼ်ႈပေႃးၶၢႆမူတ်းယဝ်ႉ။ ၼိုင်ႈဢေႇၵ(ဢေႊၶိူဝ်ႊ)ၼႆႉ ၶဝ်မႃးပၼ် သၢမ်ႁဵင်သႅၼ်ပျႃး။ ၼႃးၸိူဝ်းၾင်ႇတၢင်းတႄႉ ၶၢႆပၼ်ၶႄႇၶဝ်ၵမ်ႈပႃႈၼမ်ယဝ်ႉၶႃႈ” ဝႃႈၼႆ။

လႆႈႁူႉဝႃႈ ၸွမ်းႁိမ်းၾင်ႇသွင်ၾၢၵ်ႇၶၢင်ႈ ၶူဝ်ၼမ်ႉတူႈ (ၶူဝ်လူင်တၢင်းၶဝ်ႈဝဵင်းသႅၼ်ဝီ) ၼၼ်ႉ တူင်ႈၼႃးၸိူဝ်း မီးၾၢႆႇဢွၵ်ႇသဵၼ်ႈတၢင်း မွၵ်ႈ 10 ဢေႊၶိူဝ်ႊၼႆႉ လႆႈၶၢႆပၼ်လၢဝ်းပၢၼ်းၶႄႇၶဝ်ၵႂႃႇယဝ်ႉလႄႈ လီလႆႈမႆႈၸႂ်တႃႇ ၵၢၼ်ၽုၵ်ႇသွမ်ႈ မိူဝ်းၼႃႈၶၢဝ်းၵႆ တွၼ်ႈတႃႇၵူၼ်းမိူင်းပိုၼ်ႉတီႈယူႇ ၼႆယဝ်ႉ။

ၼုမ်ႇၸၢႆး ဢႃႇယု 40 ပီပၢႆ ၵေႃႉယူႇဝႆႉ ၼႂ်းၸႄႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “တႃႇသိုဝ်ႉဢဝ်တိူၵ်ႇႁႆႈလွၵ်းၼႃး ဢၼ်ၶဝ်ၵျိုၵ်ႈၼၼ်ႉ မၢင်ပွၵ်ႈၵေႃႈ သိုၵ်းၶႄႇၶဝ်ႁွင်ႉလၢဝ်းပၢၼ်းမႃး။ မၢင်ပွၵ်ႈၵေႃႈ လၢဝ်းပၢၼ်းၶဝ်မႃးၸွမ်းပွႆးၸႃး။ လိုၼ်းလၢႆးဝၢႆး ၼႆႉမႃး သၽႃႇဝ တူင်ႈၼႃးဢွၼ်ႇ တၢင်းၶဝ်ႈဝဵင်းႁဝ်းတႄႉ ၵူဝ်ယဵၼ်းပဵၼ် ႁူင်းသဝ်း မႄႈမွၵ်ႇယႃႈၶဝ်ၵႂႃႇ ၵူၺ်း ယဝ်ႉ။ ၼၵ်းၸႂ်တႃႇပီႈၼွင်ႉတႆးႁဝ်းယူႇဢေႃႈ” ဝႃႈၼႆ။

ၵဵဝ်ႇလူၺ်ႈ ၵူၼ်းမိူင်းၶႄႇ ၶဝ်ႈမႃးႁဵတ်းၵၢၼ်သိုဝ်ႉၶၢႆ ၶၢတ်ႈသူၼ် တိူၵ်ႇႁႆႈ လွၵ်းၼႃး ၸွမ်းၼႂ်းၸႄႈဝဵင်းသႅၼ်ဝီ ၼႃႈတီႈသိုၵ်းၵဝ်ႈၵၢင်ႉၵုမ်းၵမ်ၼၼ်ႉသေ ၽူႈတၢင်လၢတ်ႈတႆးၵေႃႉ ၼိုင်ႈ ထတ်းသၢင်လၢတ်ႈၼႄတီႈ ၽူႈတွႆႇႁွၵ်ႈဝႃႈ “ ၸွမ်းၼင်ႇပၵ်းပိူင်ၸိုင်ႈမိူင်း ယၢမ်းလဵဝ်မီးဝႆႉၼၼ်ႉတႄႉ တႃႇသိုဝ်ႉဢွင်ႈတီႈသူၼ်ႁႆႈၼႃး ၼၼ်ႉ မၼ်းမီးပၵ်းပိူင်ဝႆႉတႅတ်ႈတေႃးယူႇ ႁင်းမၼ်း။ ယႃႇဝႃႈ ၵူၼ်းမိူင်းၼွၵ်ႈတေမႃးသိုဝ်ႉတီႈလိၼ်လႃႈ တေႃႈၼင်ႇၵူၼ်းၼႂ်းမိူင်းၵေႃႈ ပေႃးတေသိုဝ်ႉတီႈလိၼ်ၼႆႉ တေလႆႈၸွမ်းပၵ်းပိူင်။ ၼႂ်းပၵ်းပိူင်ၾိင်ႈမိူင်းၵေႃႈ ၵူၼ်းမိူင်းၼွၵ်ႈၼႆႉ ဢမ်ႇမီးသုၼ်ႇၶဝ်ႈမႃးသိုဝ်ႉ လႆႈ တီႈလိၼ်သူၼ်ႁႆႈၼႃး ၼႂ်းမိူင်း။ မိူဝ်ႈလဵဝ် ၸႄႈဝဵင်းသႅၼ်ဝီၼႆႉ သိုၵ်းၵဝ်ႈၵၢင်ႉၵုမ်းၵမ်ဝႆႉ ၸူဝ်ႈၶၢဝ်းၵူၺ်း ဢမ်ႇမီးလုမ်းမီးၸႆး ပဵၼ်ဝႆႉတၢင်းၵၢၼ်လႄႈ ၵၢၼ်သိုဝ်ႉၶၢႆတီႈလိၼ် တိူၵ်ႇႁႆႈလွၵ်းၼႃးၸိူဝ်းၼႆႉၵေႃႈ ဢမ်ႇၶဝ်ႈပဵၼ်တၢင်းၵၢၼ်” ၼႆယဝ်ႉ။

ဝဵင်းသႅၼ်ဝီၼႆႉ တူၵ်းဝႆႉပဵၼ်သုၼ်ၵၢင် ၵၢၼ်ၵႃႉၶၢႆ မိူင်းတႆး-မိူင်းမၢၼ်ႈ ဝဵင်းၼိုင်ႈၼႆၵေႃႈဝႃႈလႆႈလႄႈ ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃး ၶူဝ်းၵုၼ်ႇၵႃႉၶၢႆ ၵမ်ႈၼမ်လႆႈတေႃႉဢဝ်တၢင်းမိူင်းၶႄႇ လူင်းမႃးၵမ်းသိုဝ်ႈ။ ယၢမ်းလဵဝ် ၸုမ်းသိုၵ်းၵဝ်ႈၵၢင်ႉ MNDAA ၵုမ်းၵမ်ပၼ်ႇၵၢၼ်ၽွင်းငမ်းဝႆႉပဵၼ်တၢင်းၵၢၼ် ႁိုင်ၶၢဝ်းတၢင်း 2 ပီသေ ၸတ်းႁဵတ်းပၼ်မၢႆၾၢင် ဝႂ်မုင်ႉႁေႃႁိူၼ်း ၵူၼ်းမိူင်းၸိူဝ်းယူႇၼႂ်းပိုၼ်ႉတီႈဝႆႉထႅင်ႈ ၼႆယဝ်ႉ။