ယၢမ်းလဵဝ် ၵူၼ်းၼႂ်းမိူင်းဢိၼ်ႊတီႊယိူဝ်ႊ လၢႆပိုၼ်ႉတီႈ ဢွၼ်ၵၼ်ထူပ်းၽေး ႁႅင်းမႆႈသုင်သေ ယၢပ်ႇၽိုတ်ႇၼမ်ႉၵိၼ်ၼမ်ႉၸႂ်ႉဝႆႉ ဝႃႈၼႆ။

ဝၼ်းတီႈ 22 လိူၼ်မေႊ (ဝၼ်းသုၵ်းပူၼ်ႉမႃးၼႆႉ) ႁွင်ႈၵၢၼ်ၾၢႆႇၾိင်ႈၾႃႉၾူၼ်လူမ်း မိူင်းဢိၼ်ႊတီႊယိူဝ်ႊ ပိုၼ်ၽၢဝ်ႇလၢတ်ႈဝႃႈ – တႄႇဢဝ်ဝၼ်းတီႈ 22 တေႃႇထိုင် ဝၼ်းတီႈ 27 လိူၼ်မေႊၼႆႉ ပိုၼ်ႉတီႈ ၸိူဝ်းမီးၼႂ်းမိူင်းဢိၼ်ႊတီႊယိူဝ်ႊပွတ်းႁွင်ႈၵမ်ႈၼမ် ဢိၵ်ႇပႃး ဝဵင်းလူင်ၼိဝ်ႊတေႊလီႊ ၸိူဝ်းၼႆႉ ၸၢင်ႈႁူပ်ႉလွင်ႈ ႁႅင်းမႆႈၶိုၼ်ႈသုင်ႁႅင်း ၼႆယဝ်ႉ။

ၼႂ်းဝၼ်းတီႈ 23 ပူၼ်ႉမႃးၼႆႉ ၵူၼ်းမိူင်းၸိူဝ်းယူႇသဝ်းၼႂ်းဝဵင်းလူင်ၼိဝ်ႊတေႊလီႊ လႆႈဢွၼ်ၵၼ်ၶဝ်ႈထႅဝ်သေပႂ်ႉ တႃႇတေလႆႈၼမ်ႉ တီႈရူတ်ႉၵႃးတေႃႉတၢင်ႇၼမ်ႉ။ လိူဝ်ၼၼ်ႉ ယွၼ်ႉႁႅင်းမႆႈသုင်လႄႈ တီႈႁူင်းယႃလူင်ပွင်ၸိုင်ႈ ဝဵင်းလူင်ၼိဝ်ႊတေႊလီႊၵေႃႈ မီးၵူၼ်းပဵၼ်ယူတ်းယႃတူဝ်ဝႆႉ 2 ၵေႃႉ၊ ငဝ်းလၢႆးလႆႈမႆႈၸႂ်ႁႅင်းဝႆႉ ဝႃႈၼႆ။

ၼႂ်းပိုၼ်ႉတီႈတူင်ႈပဵင်းၼၼ်ႉ ႁႅင်းမႆႈမီးဢမ်ႇယွမ်း 40 တီႊၵရီႊသိၼ်ႊတီႊၵရိတ်ႉ၊ ၸွမ်းၼႂ်းပိုၼ်ႉတီႈ ၼိူဝ်သၼ်လွႆသမ်ႉ ႁႅင်းမႆႈမီးထိုင် 30 တီႊၵရီႊသိၼ်ႊတီႊၵရိတ်ႉ၊ ပဵၼ်ႁႅင်းမႆႈ ဢၼ်ၶိုၼ်ႈသုင်ႁႅင်းတေႉတေႉ ဝႃႈၼႆ။