တၢင်းပဵၼ်ဝၢႆႊရၢတ်ႉသ် ၼီႊပႃႊ လၢမ်းၽႄႈၼႂ်းမိူင်းၵြႃး ဢိၼ်ႊတီႊယႃႊ တွၼ်ႈဝၼ်းဢွၵ်ႇဢၼ်တိတ်းၸပ်းမိူင်းပင်ႊၵလႃႊတဵတ်ႉသ် ။ ပဵၼ်တၢင်းပဵၼ်ဢၼ်တၢႆငၢႆႈလိူဝ် တၢင်းပဵၼ်ၶူဝ်ႊဝိတ်ႉ 19 ထႅင်ႈလႄႈယၢမ်းလဵဝ်လူင်ပွင်ၸိုင်ႈသင်ႇပိၵ်ႉ လွၵ်ႊၻၢဝ်ႊ ဝႆႉပိုၼ်ႉတီႈဢၼ်မီးၵူၼ်းၸပ်းတၢင်းပဵၼ် ဝႃႈၼႆ။

တၢင်းပဵၼ်ဝၢႆႊရၢတ်ႉသ် ၼီႊပႃႊၼႆႉ ပဵၼ်တၢင်းပဵၼ်ဢၼ်လုၵ်ႉတီႈသတ်း လၢမ်းၽႄႈတိတ်းၸပ်းၸူးၵူၼ်း။ ယၢမ်းလဵဝ် တီႈမိူင်းၵြႃး မီးၵူၼ်းတိတ်းၸပ်းတၢင်းပဵၼ်ၼႆႉယဝ်ႉ 100 ပၢႆ။

ၵူၺ်းၵႃႈ တေႃႇထိုင်ဝၼ်းမိူဝ်ႈၼႆႉ ပႆႇလၢမ်းၽႄႈမႃးထိုင်မိူင်းထႆး- ၼႆ ၶူးပူင်သွၼ်လူင် ပရေႃႊၾႅတ်ႊသိူဝ်ႊ တီႈၸၼ်ႉၸွမ် ၵျူႊလႃႊလူင်ႊၵွၼ်း ပိုတ်ႇလၢတ်ႈပဵၼ်တၢင်းၵၢၼ်ဝႆႉ မိူဝ်ႈၼႆႉဝၼ်းတီႈ 24/01/2026 ၼင်ႇၼႆ။

ဝၢႆႊရၢတ်ႉသ် ၼီႊပႃႊၼႆႉ လုၵ်ႉမႃးတီႈ တူဝ်ဝိင်ႇ ။ သင်ဝႃႈၵူၼ်း ဢမ်ႇၼၼ် မူ မႃ ၵႃ ၵႆႇ ၵႂႃႇၵိၼ်မႅၼ်ႈ မၢၵ်ႇမႆႉမၢၵ်ႇတွၵ်ႇၽၵ်းယိူဝ်ႈၼၢင်းၶဵဝ်ဢၼ်ၼူၵ်ႉဝိင်ႇမႃးၵိၼ်ဝႆႉ ဢၼ်မီးၼမ်ႉလၢႆးဝိင်ႇၸပ်းဝႆႉၸိူဝ်းၼၼ်ႉ ၸင်ႈတိတ်းၸပ်း။ ပိူင်လူင် ၵူၼ်းၸိူဝ်းယူႇ ၸွမ်းထုင်ႉ ၸွမ်းဝၢၼ်ႈ ပိၵ်ႇထိူၼ်ႇႁၢင်ၶိူဝ်း လႄႈႁိမ်းၸမ်ထမ်ႈ (တီႈဝိင်ႇယူႇ)ၸိူဝ်းၼႆႉ တေလႆႈၾၢင်ႉယႂ်ႇၼမ် – ဝႃႈၼႆ။

ၵူၼ်းၸိူဝ်းတိတ်းၸပ်းၸိူဝ်ႉမႅင်းဝၢႆႊရၢတ်ႉသ် ၼီႊပႃႊ ၼႆႉ တေမီႊၾၢင်ႁၢင်ႈတၢင်းပဵၼ် မိူၼ်ၼင်ႇ – ဢွၼ်တၢင်းသုတ်းတေပဵၼ် ၼိူဝ်ႉဢုၼ်ႇၼိူဝ်ႉမႆႈ မီးလူမ်းၼၢဝ် – ႁူဝ်ၶႆႈ – ဢႆ- ၶေႃးၸဵပ်း။ ဝၢႆးၼၼ်ႉတေလၢမ်းမႃးပဵၼ်ထႅင်ႈ ႁူဝ်ပၼ်ႇႁူဝ်မဝ်း၊ ဢမ်ႇၸိုၼ်ႈဢမ်ႇပၢင်ႇ။ ပေႃးဢမ်ႇလႆႈႁပ်ႉလွင်ႈယူတ်းယႃၸိုင် လုၵ်ႉတီႈၼၼ်ႉသေ ပဵၼ်တၢင်းပဵၼ် (ၶူဝ်ႊမႃႊ) လူင်လိုမ်း – ဢမ်ႇတွင်းၼႃႈတွင်းလင် ၵႂင်ၵႂင်ၵႃးၵႃး။ ဝၢႆးၼၼ်ႉ တေလၢမ်းၸူးသဵၼ်ႈတၢင်းလွတ်ႇလူမ်းထူၺ်ႈၸႂ် တေထူၺ်ႈၸႂ်ယၢပ်ႇ၊ ႁိူဝ်ႉႁႅင်း သေ တၢႆဝႆး။ တၢင်းပဵၼ်ဢၼ်ၼႆႉ ႁၢႆႉႁႅင်းလိူဝ် ၸိူဝ်ႉမႅင်းဝၢႆႊရၢတ်ႉသ်ၶူဝ်ႊဝိတ်ႉ 19။

မႅင်းဝၢႆႊရၢတ်ႉသ်ၼႆႉဢမ်ႇမႃးၸွမ်းလူမ်းၼင်ႇၸိူဝ်ႉမႅင်းၶူဝ်ႊဝိတ်ႉ 19။

ၸၢင်ႈတိတ်းၸပ်းတၢင်းၼမ်ႉလၢႆး၊ ႁိူဝ်ႇ၊ လိူတ်ႈၸိူဝ်းၼႆႉ။ ၸင်ႇဝႃႈ ၾၢႆႇပၢႆးယူႇလီၸိုင်ႈမိူင်း သႂ်ႇၼႂ်းသဵၼ်ႈမၢႆ ၸိူဝ်ႉမႅင်း 5 သႅၼ်း ဢၼ်ပဵၼ်ၽေးႁၢႆႉႁႅင်းတေႃႇၵူၼ်း ။

တႃႇတေႁႄႉၵင်ႈယႃႇႁႂ်ႈတိတ်းၸပ်းတၢင်းပဵၼ်ၼႆႉလႆႈတႄႉ 1- ယိပ်းသင်သေၵေႃႈယဝ်ႉ လၢင်ႉမိုဝ်းလူၺ်ႈသပ်ႉပျႃႇလီငၢမ်းၵူႈၵမ်း၊ 2- ႁၢမ်ႈၵိၼ်ၼိူဝ်ႉသတ်း(ၼူၵ်ႉ၊ ၵႆႇ၊ မူ၊ ဝူဝ်း၊ ပႃ ) ဢၼ်လိပ်းႁိုဝ် ဢၼ်ဢမ်ႇသုၵ်း၊ 3- လၢင်ႉမေႃႈဝၢၼ်ႇၵွၵ်းၸေႃႉလႄႈၶိူင်ႈၶူဝ်းၸႂ်ႉသွႆၼႂ်းႁိူၼ်း လူၺ်ႈသပ်ႉပျႃႇ -လီလီငၢမ်းငၢမ်း၊ 4- ပိူင်လူင် ပေႃးၵႂႃႇႁၼ်တူဝ်တၢႆ လူၺ်ႈဢမ်ႇႁူႉလွင်ႈႁူႉတၢင်းၼႆ တိုၼ်းဝႃႈယႃႇပေဢဝ်မႃးၵိၼ်လႃးလႃး ၊ 5- တူဝ်တၢႆသတ်း ၸွမ်းတႃႈၸွမ်းတၢင်းလႄႈၸွမ်းပိုၼ်ႉတီႈၵူၼ်းတၢင်းၼမ်ၵႂႃႇမႃးယူႇသဝ်းၼၼ်ႉ တိုၼ်းယႃႇပေၵႂႃႇယိပ်းလႄႈၵႂႃႇၶၢႆႉတီႈ။ ႁႂ်ႈၸႅင်ႈထိုင်ၸဝ်ႈၼႃႈတီႈၾၢႆႇပၢႆးယူႇလီလႄႈၾၢႆႇၸွႆႈထႅမ်ၼႂ်းတူင်ႇတၢင်ႇပိုၼ်ႉတီႈၵမ်းလဵဝ်။ ပေႃးပဵၼ်ၼႂ်းဝၢင်းႁိူၼ်းၸဝ်ႈၵဝ်ႇၸိုင် တိုဝ်းမူင်မိုဝ်းပလၢတ်ႉသတိၵ်ႉ/ရႃႊပႃႊ လီလီသေ ၸင်ႇၵႂႃႇယိပ်း/ၶၢႆႉ- ဢဝ်ၵႂႃႇၾင်ပႅတ်ႈလိုၵ်ႉလိုၵ်ႉ ဢၼ်ၵႆယၢၼ်တီႈႁိူၼ်းယေး ၵူၼ်းယူႇ။ 6- ယႃႇၵႂႃႇၵဵပ်းၵိၼ် မၢၵ်ႇမႆႉမၢၵ်ႇတွၵ်ႇလႄႈ ၽၵ်းယိူဝ်ႈၼၢင်းၶဵဝ်ဢၼ်မီးႁွႆးၼူၵ်ႉၼူသၵ်း/ ၵိၼ်ဝႆႉၸိူဝ်းၼၼ်ႉလႃးလႃး။

ယွၼ်ႉဝႃႈ တၢင်းပဵၼ်ဢၼ်ပဵၼ်ယွၼ်ႉၸိူဝ်ႉမႅင်းဝၢႆႊရၢတ်ႉသ် ၼီႊပႃႊ ၼႆႉ ဢမ်ႇပႆႇမီး ယႃႈယႃ ဝၵ်ႉသိၼ်း ဢၼ်တေပေႉမႅင်းၼႆႉလႆႈ – ၾၢႆႇပၢႆးယူႇလီမိူင်းထႆးပိုၼ်ၽၢဝ်ႇဝႆႉၼင်ႇၼႆ။

ၸိူဝ်ႉမႅင်းဝၢႆႊရၢတ်ႉသ်ၼႆႉ ဢမ်ႇၸႂ်ႈၸိူဝ်ႉမႅင်း ဢၼ်တိုၵ်ႉၽႄႈလၢမ်းမႃးယၢမ်းလဵဝ်။ ပူၼ်ႉမႃး 28 ပီၵေႃႈယၢမ်ႈလၢမ်းၽႄႈမႃးတီႈမိူင်းမလေႊသျႃႊ၊ သိင်ႊၵပူဝ်ႊ၊ ပင်ႊၵလႃႊတဵတ်ႉသ်ႊ၊ ဢိၼ်ႊတီႊယႃႊ မႃးယဝ်ႉပွၵ်ႈၼိုင်ႈ။

Source: The Nation. Thairath