လၢဝ်ပွမ်ထႆး ဢၼ်ၵႂႃႇပွႆႇၶိုၼ်ႈၵၢင်ႁၢဝ် တီႈမိူင်းၵြႃးဢိၼ်ႊတီႊယႃႊၼၼ်ႉ ဢမ်ႇဢွင်ႇသေ တူၵ်းလူင်းမႃးၶိုၼ်းၼိူဝ်လိၼ် ၼႆယဝ်ႉ။

မိူဝ်ႈဝၼ်းတီႈ 12/01/2026 ၸုမ်း ISRO လုၵ်ႉတီႈမိူင်းၵြႃးသေ ပွႆႇလၢဝ်ပွမ်ၶွင်မိူင်းထႆး THEOS-2A ၶိုၼ်ႈၵႂႃႇၼိူဝ်ၵၢင်ႁၢဝ်သေတႃႉ ၶိူင်ႈၸၢၵ်ႈမီးပၼ်ႁႃလႄႈ ၶိုၼ်းတူၵ်းလူင်းမႃး ၼႂ်းၼမ်ႉသမုတ်ႉတြႃႇမိူင်းဢိၼ်ႊတီႊယႃႊပွတ်းၸၢၼ်း ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉသေ ဢေႊၵျႅၼ်ႊသီႊၾၢႆႇလွၵ်းလၢႆးပၢႆးသၢင်ႈ လႄႈ ၶေႃႈမုၼ်းၶၢဝ်ႇသၢၼ်ပိုၼ်ႉလိၼ်မိူင်းၵြႃး Gistda ပိုၼ်ၽၢဝ်ႇဢွၵ်ႇဝၼ်းၼၼ်ႉၵမ်းလဵဝ်ဝႃႈ – ႁူဝ်ၶိူင်ႈၸၢၵ်ႈ Polar Satellite Launch Vehicle (PSLV) C62 ၸၼ်ႉ 3 ၼႆႉ မီးလွင်ႈၽိတ်းပိူင်ႈလႄႈ လၢဝ်ပွမ် ၼၼ်ႉဢမ်ႇတၼ်းထိုင် ၵၢင်ႁၢဝ်သေ ၶိုၼ်းတူၵ်းလူၵ်းမႃး။ ၼႂ်းဝၼ်းၼၼ်ႉ ဢမ်ႇၵႃးလၢဝ်ပွမ်ၶွင်မိူင်းထႆးၵူၺ်း လၢဝ်ပွမ်ဢၼ်တူၵ်းမႃးၸူးလုမ်ႈၾႃႉၶိုၼ်းၼႆႉ တင်းသဵင်ႈမီးယူႇ 15 လုၵ်ႈသေတႃႉ မၢင်ႇလုၵ်ႈၵႂႃႇတူၵ်းတီႈႁၢင်ႇၵႆၵူၼ်းလႄႈ ဢမ်ႇမီးလွင်ႈလူႉသုမ်းလူႉတၢႆ ဝႃႈၼႆ။

ၵူၺ်းၵႃႈလၢဝ်ပွမ်ၶွင်မိူင်းထႆး ဢၼ်တူၵ်းလူင်းမႃးၶိုၼ်းၼႆႉ ၾၢႆႇၶွမ်ႊပၼီႊႁပ်ႉပွႆႇပၼ်ၼၼ်ႉ ႁဵတ်းပၼ်ပႃးဝႆႉၵၢၼ်ႁပ်ႉႁွင်း (ၵရၵၼ်/ဢႃႇမၶၢမ်ႇ) ဝႆႉလႄႈ တေၶိုၼ်းမူၼ်ႉမႄးသေ ပွႆႇၶိုၼ်ႈပၼ်ထႅင်ႈၵမ်းၼိုင်ႈယူႇ ၼႆယဝ်ႉ။

ၸုမ်း ISRO ၼႆႉ လုၵ်ႉတီႈမိူင်းၵြႃးဢိၼ်ႊတီႊယႃႊသေ ပွႆႇလၢဝ်ပွမ်ၶိုၼ်ႈၵၢင်ႁၢဝ်မႃး တင်းသဵင်ႈမီးၵႂႃႇ 63 ၵမ်း။ ၼႂ်းၼၼ်ႉ ဢၼ်ဢမ်ႇဢွင်ႇမၢၼ်သေ လၢဝ်ပွမ်တူၵ်းလူင်းမႃးၶိုၼ်း ၼႆႉ မီး 3 ၵမ်းပႃးပွၵ်ႈၼႆႉၵူၺ်းလႄႈ လႆႈဝႃႈ ၼႃႈၵၢၼ်တႃငၢၼ်းဢၼ်သၢင်ႈမႃးၼၼ်ႉ ဢွင်ႇမၢၼ် 95.24% ယူႇ ၼႆယဝ်ႉ။

လၢဝ်ပွမ်ၶွင်မိူင်းထႆး လုၵ်ႈၵမ်းဢွၼ်တၢင်းသုတ်း ဢၼ်ပွႆႇၶိုၼ်ႈၵၢင်ႁၢဝ်ၵႂႃႇၵမ်းၼႆႉဢမ်ႇဢွင်ႇမၢၼ်သေတႃႉ လႆႈႁၼ်ဝႃႈ ပဵၼ်ၼမ်ႉၵတ်ႉၵူၼ်းမိူင်းထႆး ႁဵတ်းလၢဝ်ပွမ်လႆႈယဝ်ႉၼႆလႄႈႈ ပဵၼ်လွင်ႈဢၼ်ၼႄလွင်ႈၶိုၼ်ႈယႂ်ႇၸိုင်ႈမိူင်းလွင်ႈၼိုင်ႈၼႆ Gistda ပိုၼ်ၽၢဝ်ႇဢွၵ်ႇဝႆႉၼင်ႇၼႆ။