သိုၵ်းၶႄႇၵဝ်ႈၵၢင်ႉ ၸိူဝ်းၵုမ်းၵမ် ပၼ်ႇၵၢၼ်ၽွင်းငမ်း ၸႄႈဝဵင်းသႅၼ်ဝီဝႆႉ ပဵၼ်တၢင်းၵၢၼ်ယူႇ ဝၢႆးလင်ပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 မႃးၼၼ်ႉ ယၢမ်းလဵဝ် ႁၢင်ႈႁႅၼ်း ၶိုင်ပွင်တႃႇႁဵတ်းသဵၼ်ႈတၢင်းမႂ်ႇထႅင်ႈသဵၼ်ႈၼိုင်ႈ ႁႂ်ႈရူတ်ႉၵႃးလူင် ပၼ်ႇလဵပ်ႈဢွမ်ႈၵၢင်ဝဵင်း ယႃႇႁႂ်ႈရူတ်ႉၵႃးတေႃႉတၢင်ႇၵုၼ်ႇ လတ်းၶဝ်ႈၼႂ်းၵၢင်ဝဵင်းသႅၼ်ဝီၵႂႃႇမႃး ၼႆယဝ်ႉ။

ႁူဝ်လိူၼ်မေႊ ဝူင်ႈထီႉၼိုင်ႈၼႆႉ လႆႈႁၼ်ႁၢင်ႈၽႅၼ်ႇလိၼ် ၵၢၼ်ဝၢင်းၽႅၼ်ၶွင် ၸုမ်းသိုၵ်းၵဝ်ႈၵၢင်ႉ ၸိူဝ်းၵႂႃႇလူင်းပိုၼ်ႉတီႈထတ်း ဢွင်ႈတီႈတေၸၢင်ႈၸတ်းႁဵတ်း သဵၼ်ႈတၢင်းမႂ်ႇ ၼၼ်ႉၼႆ ၵူၼ်းမိူင်းၵေႃႉယူႇ ၼႂ်းဝဵင်းသႅၼ်ဝီလၢတ်ႈ။

ၵူၼ်းမိူင်းၵေႃႉယူႇဝႆႉၼႂ်းဝဵင်းသႅၼ်ဝီသေ ၸမ်ၸႂ်ၵၼ်တင်း ၵူၼ်းသိုၵ်းၼႂ်းၶႄႇၵဝ်ႈၵၢင်ႉ လၢတ်ႈၼႄတီႈၽူႈတွႆႇႁွၵ်ႈဝႃႈ “သဵၼ်ႈတၢင်းလဵပ်ႈဝဵင်း (မြို့ရှောင်လမ်း) ၶဝ်ၽႄတီႈႁိမ်း ပၢႆႉလူင်ဝဵင်းသႅၼ်ဝီ ႁိမ်းၶူဝ်လူင်ၼၼ်ႉႁႄ လတ်းၶဝ်ႈၵႂႃႇတၢင်းၼႂ်းၵႄႈ ႁိမ်းဝၢၼ်ႈႁူဝ်ၼႃးလႄႈ သၢင်းၶႅင်းၼၼ်ႉႁႄ ၶိုၼ်းၵႂႃႇဢွၵ်ႇတၢင်း ၾၢႆႇၼိူဝ်တူဝ်းၵဵတ်ႉ သႅၼ်ဝီ – ၵူတ်ႉၶၢႆ တီႈ ႁိမ်းပိူၼ်ႈၵႂႃႇထွၵ်ႇယုၵ်းယၢၵ်းပႅတ်ႈၼၼ်ႉ။ ၶူင်းၵၢၼ်ၶဝ်ၼႆႉတႄႉ ၶဝ်ပႆႇတႄႇၼင်ႇၵဝ်ႇ မိူဝ်ႈလဵဝ်တိုၵ်ႉပဵၼ်ၽွင်း ၶဝ်ၵႂႃႇတူၺ်း ထတ်းသဵၼ်ႈတၢင်း လႄႈ ငဝ်းလၢႆး ပိုၼ်ႉတီႈယူႇ” ဝႃႈၼႆ။

သင်ၶူင်းၵၢၼ်ႁဵတ်းသဵၼ်ႈတၢင်းမႂ်ႇ တႃႇဢွမ်ႈလဵပ်ႈဝဵင်းသႅၼ်ဝီ ဢၼ်သိုၵ်းၶႄႇၵဝ်ႈၵၢင်ႉၶိုင်ဝႆႉၼၼ်ႉ ပဵၼ်ၵၢၼ်မႃးတႄႉၸိုင် တေလႆႈလတ်းၶၢမ်ႈ တိူၵ်ႇႁႆႈလွၵ်းၼႃး သူၼ် ဢွင်ႈတီႈၽုၵ်ႇသွမ်ႈၵူၼ်းမိူင်းပိုၼ်ႉတီႈ ၵႂႃႇတင်းၼမ်လႄႈ ၸၢင်ႈမီးၽွၼ်းႁၢႆႉၸႃႉ တုမ်ႉယွၼ်ႈထိုင် ၸဝ်ႈႁႆႈၸဝ်ႈၼႃးၶဝ်ယူႇ ၼႆယဝ်ႉ။

“ယၢမ်းလဵဝ်သိုၵ်းၶႄႇၵဝ်ႈၵၢင်ႉၶဝ် ပႆႇပိုၼ်ၽၢဝ်ႇ ပႆႇလၢတ်ႈသင်တီႈၵူၼ်းမိူင်း လွင်ႈၶူင်းၵၢၼ်သဵၼ်ႈတၢင်းမႂ်ႇၼႆႉ။ ၾၢႆႇၼိုင်ႈၵေႃႈ ၶူင်းၵၢၼ်ၵေႃႈပႆႇတႄႇလႄႈ လွင်ႈတိူၵ်ႇႁႆႈလွၵ်းၼႃး ၵူၼ်းမိူင်းပိုၼ်ႉတီႈ ၸိူဝ်းတေလႆႈယႃႉၼၼ်ႉၵေႃႈ သိုၵ်းၶႄႇၵဝ်ႈၵၢင်ႉၶဝ် ပႆႇလၢတ်ႈသင် ပႆႇလႆႈငူပ်ႉငီႉသင်ၵၼ် ၼင်ႇၵဝ်ႇ။ သင်ၶူင်းၵၢၼ်ၼႆႉပဵၼ်တေႉတႄႉ တေလႆႈငူပ်ႉငီႉၵၼ်တေႉတေႉယူႇ” ၼႆ ၽူႈယႂ်ႇဝၢၼ်ႈ ၼႂ်းပိုၼ်ႉတီႈဝဵင်းသႅၼ်ဝီၵေႃႉၼိုင်ႈ လၢတ်ႈၼင်ႇၼႆ။

တင်ႈတႄႇသိုၵ်းၶႄႇၵဝ်ႈၵၢင်ႉ MNDAA ၶဝ်ႈမႃးၵုမ်းၵမ် ပၼ်ႇၵၢၼ်ၽွင်းငမ်းဝဵင်းသႅၼ်ဝီမႃး ႁိုင်ၶၢဝ်းတၢင်း 2 ပီပၢႆ ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်းယဝ်ႉတူဝ်ႈမႃးၼႆႉ လႆႈႁၼ်ယႃႉလႅဝ်ပႅတ်ႈၵၢတ်ႇလူင် ၵၢင်ဝဵင်းသႅၼ်ဝီသေ ၶိုင်ပွင်ႁဵတ်းသၢင်ႈဝႆႉ ၶူင်းၵၢၼ်ၵေႃႇသၢင်ႈႁူင်းယႃလူင် သၢမ်ၸၼ်ႉ၊ သႂ်ႇ CCTV ၸွမ်းလၵ်းၾႆးၼိူဝ်သဵၼ်ႈတၢင်းလူင် ၼႂ်းၵၢင်ဝဵင်း၊ ပၼ်ငိုၼ်းၵႃႈယႂ်ႇၶၼ်လူင်တီႈၸဝ်ႈၼႃး ႁိမ်းၼွင်မူဝ် တၢင်းၶဝ်ႈဝဵင်းသႅၼ်ဝီၼၼ်ႉသေ ၵေႃႇသၢင်ႈတိုၵ်းယႂ်ႇလူင် သၢမ်ၸၼ်ႉႁႂ်ႈယဝ်ႉတူဝ်ႈၵႂႃႇ ၼႂ်းၶၢဝ်းတၢင်း 1 ပီၸမ်။

ၼွၵ်ႈလိူဝ်ၼၼ်ႉ သိုၵ်းၶႄႇၵဝ်ႈၵၢင်ႉ ယင်းပၼ်သုၼ်ႇလႆႈ လၢဝ်းပၢၼ်းၶႄႇ မႃးတဵၵ်းၶၢတ်ႈ လႄႈ သိုဝ်ႉတီႈလိၼ် ၼႂ်းပိုၼ်ႉတီႈသေ လူင်းတိုၼ်းလၢင်း ၼႂ်းၵၢၼ်ၽုၵ်ႇသွမ်ႈၵူၺ်းဢမ်ႇ ၵႃး ပိုတ်ႇပႃး ပၢင်တေႃႇလွင်း ၊ ႁူင်းမိပ်ႇၼူတ်ႈ လႄႈ ႁူင်းပျေႃႇမူၼ်ႈ KTV ၸိူဝ်းၼႆႉ ၼမ်လိူင်ႇမႃးႁႅင်း ။