သိုၵ်းတဢၢင်း ပိုၼ်ၽၢဝ်ႇဝႆႉဝႃႈ သိုၵ်းမၢၼ်ႈတေၶဝ်ႈၵုမ်းၶိုၼ်း မိူင်းၵုတ်ႈ၊ မိူင်းမိတ်ႈၼႆသေ တႄႇဢဝ်ဝူင်ႈလိုၼ်းသုတ်းလိူၼ်ၼူဝ်ႊဝႅမ်ႊပိူဝ်ႊၼႆႉမႃး သိုၵ်းတဢၢင်း ဢွၵ်ႇၵႂႃႇဢဝ်ႁူမ်ႇလူမ်ႈဝႆႉပၼ်တၢင်းၼွၵ်ႈဝဵင်း ပဵၼ်တီႈပဵၼ်တီႈ ၵူၼ်းမိူင်းဝဵင်းမိူင်းမိတ်ႈလၢတ်ႈၼင်ႇၼႆ။
“သိုၵ်းမၢၼ်ႈတႄႉတေၶဝ်ႈဝဵင်းမႃးတၢင်းလႂ်တႄႉဢမ်ႇႁူႉ ယၢမ်းလဵဝ်ၼႆႉသိုၵ်းတဢၢင်းတႄႉ ဢဝ်ႁႅင်းၵူၼ်းသေၵႂႃႇပႂ်ႉတၢင်းၶဝ်ႈတၢင်းဢွၵ်ႇဝဵင်း တင်းသွင်ၾၢႆႇယဝ်ႉ သမ်ႉပေႃးၵႂႃႇပႂ်ႉဢဝ်ႁူမ်ႇလူမ်ႈပၼ်ယူႇယဝ်ႉ။ ၵမ်ႈၽွင်ႈၵေႃႈလၢတ်ႈဝႃႈ သိုၵ်းမၢၼ်ႈတေဢဝ်ၶိူင်ႈမိၼ်မႃးႁိုဝ်ဢမ်ႇႁူႉ ၼႆယူႇ” -ဝႃႈၼႆ။
ၵူၼ်းမိူင်းမိတ်ႈလၢတ်ႈထႅင်ႈဝႃႈ TNLA ပိုတ်ႇလုမ်းၵပ်းသၢၼ်ဝႆႉတင်းတီႈဝဵင်းမိူင်းမိတ်ႈလႄႈ မိူင်းၵုတ်ႈ တင်းသွင်တီႈယဝ်ႉ။ ဢဵၼ်ႁႅင်းသိုၵ်း TNLAဢၼ်မီးဝႆႉၼႂ်းဝဵင်းတႄႉ ဝၼ်းတီႈ 25/11/2025 ႁႂ်ႈဝႆႉပဵၼ်ဝၼ်းလိုၼ်းသုတ်းသေ ထွႆထွၼ်ဢွၵ်ႇၼႆလႄႈ မိူဝ်ႈၼႆႉၵေႃႈ ပလိၵ်ႈလႄႈတင်းၵူၼ်းႁၢပ်ႇၵၢၼ်ၼႂ်းၵူင်းၵၢၼ်ၽွင်းငမ်းၶဝ် ဢွၼ်ၵၼ်ထွႆဢွၵ်ႇယူႇ ဝႃႈၼႆ။
ၵဵဝ်ႇၵပ်းဢၼ်ၵူၼ်းမိူင်းၵုတ်ႈ မိူင်းမိတ်ႈၶဝ်လၢတ်ႈဝႃႈ သိုၵ်းတဢၢင်း TNLA ၵႂႃႇဢဝ်ႁူမ်ႇလူမ်ႈဝႆႉၼွၵ်ႈဝဵင်း တႃႇသိုၵ်းမၢၼ်ႈတေၶဝ်ႈမႃးၵုမ်းၵမ်ၶိုၼ်းၼႆၼၼ်ႉ ယူႇတီႈၽူႈတွႆႇႁွၵ်ႈၶတ်းၸႂ်ၵပ်းသိုပ်ႇၸူးမၢႆၾူၼ်း လူၺ်းယေႇဢူး ၽူႈၶၢၼ်ပၢၵ်ႇ TNLA ယူႇၵေႃႈ ဢမ်ႇလႆႈ။
ၵူၼ်းမိူင်းမိတ်ႈတႄႉလၢတ်ႈဝႃႈ-“ၵူၼ်းၶဝ် ၵမ်ႈၽွင်ႈၵေႃႈ ဢွၵ်ႇၸဵမ်မိူဝ်ႈဝႃး ၵမ်ႈၽွင်ႈဢွၵ်ႇမိူဝ်ႈၼႆႉ။ ႁဝ်းၶႃႈၵူၼ်းမိူင်းတႄႉမႆႈၸႂ်ဝႃႈ ပေႃးသိုၵ်းမၢၼ်ႈၶဝ်ႈၵုမ်းၶိုၼ်းဝဵင်းယဝ်ႉ ၵူဝ်ၶဝ်လမ်းတီႉၵူၼ်းမိူင်း ၸိူင်ႉပိူင်ပဵၼ်တီႈ ၼွင်ၶဵဝ် ၵျွၵ်ႉမႄး ၸိူဝ်းၼၼ်ႉၵူၺ်းယဝ်ႉ။ ၵွပ်ႈၼႆ ၵူၼ်းမိူင်းၸိူဝ်းပဵၼ်ၵူၼ်းၼုမ်ႇၵူၼ်းၵမ်ၵမ်ႈၽွင်ႈၵေႃႈဢွၼ်ၵၼ် ပၢႆႈဝႆႉထႃႈၵေႃႈမီး။ ၵူၼ်းထဝ်ႈလႄႈၵူၼ်းယိင်းၸိူဝ်းၵိုတ်းၼႂ်းဝဵင်းတႄႉ မႆႈၸႂ်ၵူဝ်သိုၵ်းမၢၼ်ႈလႄႈ PDF ယိုဝ်းၵၼ်ၵူၺ်းယဝ်ႉ။ ၶွင်ပိူင် လွင်ႈထွႆထွၼ်ပၼ်ၼႆႉ PDF ၶဝ်ဢမ်ႇၽွမ်ႉၸွမ်းလူး” – ဝႃႈၼႆ။
တီႈမိူင်းၵုတ်ႈၵေႃႈ ယၢမ်းလဵဝ် PDF ၶဝ်ထွႆဢွၵ်ႇဝဵင်းဝႆႉယူႇယဝ်ႉ။ ယွၼ်ႉမီးၶၢဝ်ႇဝႃႈ ဝၼ်းတီႈ 30/11/2025 ၼႆႉ သိုၵ်းမၢၼ်ႈလႄႈ သိုၵ်းတဢၢင်း တေၶဝ်ႈဝဵင်းၸွမ်းၵၼ်။ ယၢမ်းလဵဝ်တႄႉ ၼႂ်းဝဵင်းမိူင်းၵုတ်ႈၼႆႉ ၵူၼ်းပႅၵ်ႇၼႃႈပႅၵ်ႇတႃ ၵႂႃႇမႃးတူင်ႉၼိုင်ၼမ်ဝႆႉ။ လုမ်းၵပ်းသၢၼ် TNLA ၵေႃႈဢမ်ႇတၢင်ႇပၢႆႉဝႆႉလႄႈ ၵူၼ်းၼႂ်းဝဵင်းမိူင်းၵုတ်ႈ ၵမ်ႈၽွင်ႈၵေႃႈႁူႉ ၵမ်ႈၽွင်ႈၵေႃႈဢမ်ႇႁူႉ – ၵူၼ်းမိူင်းၵုတ်ႈလၢတ်ႈၼင်ႇၼႆ။
“လႆႈငိၼ်းၶၢဝ်ႇဝႃႈ ဝၼ်းတီႈ 16/11/2025 သိုၵ်း TNLA ႁွင်ႉသင်ႇ PDF ဝႆႉဝႃႈ ပေႃး TNLA လႄႈသိုၵ်းမၢၼ်ႈၶဝ်ႈဝဵင်းမိူင်းၵုတ်ႈမႃး ယႃႇႁႂ်ႈ PDF ယိုဝ်းၵွင်ႈ။ ယႃႇပိုတ်းယိုဝ်းသိုၵ်းမၢၼ်ႈ ဝႃႈၼႆဝႆႉၼႆဝႃႇ” – ၵူၼ်းမိူင်းၵုတ်ႈလၢတ်ႈၼင်ႇၼႆ။
တူဝ်တႅၼ်းသိုၵ်းမၢၼ်ႈလႄႈသိုၵ်းတဢၢင်းၼႆႉၵႂႃႇဢုပ်ႇဢူဝ်းလူင်းလၢႆးမိုဝ်း လႆႈၸႂ်ၵိုတ်းတိုၵ်းၵၼ်တီႈ ဝဵင်းၶုၼ်ႊမိင်ႊ မိူင်းၶႄႇ ပွၵ်ႈၵမ်းတီႈ 9 မိူဝ်ႈဝၼ်းတီႈ 27 လႄႈ 28/10/2025 ပူၼ်ႉမႃးၼႆႉ ။ လႆႈၸႂ်ၵၼ်ပႃးဝႃႈ TNLA တေထွႆထွၼ်ဢွၵ်ႇပၼ်ဝဵင်းမိူင်းၵုတ်ႈလႄႈမိူင်းမိတ်ႈ။
ဝၼ်းတီႈ 6/11/2025 ၵူၼ်းမိူင်းၵုတ်ႈလႄႈၸုမ်းသၢၼ်ၶတ်းသိုၵ်းမၢၼ်ႈ ဢမ်ႇၽွမ်ႉၸွမ်း ဢမ်ႇလႆႈၸႂ်လွင်ႈသိုၵ်းမၢၼ်ႈတေမႃးၵုမ်းၶိုၼ်းဝဵင်းမိူင်းၵုတ်ႈ – ၸင်ႇဢွၼ်ၵၼ်ၼႄၵၢင်ၸႂ်သၢၼ်ၶတ်းလူၺ်ႈတွႆႇပုင်းတွႆႇမေႃႈ။
ထိုင်မႃးဝၼ်းတီႈ 12/11/2025 သိုၵ်းမၢၼ်ႈလႄႈသိုၵ်းတဢၢင်း ၶိုၼ်းဢုပ်ႇၵၼ် တီႈဝဵင်းလႃႈသဵဝ်ႈထႅင်ႈၵမ်းၼိုင်ႈ ၸင်ႇလႆႈၸႂ်တူၵ်းလူင်းတႃႇထွႆထွၼ်ဢွၵ်ႇ မိူင်းၵုတ်ႈ မိူင်းမိတ်ႈ ၼႂ်းဝၼ်းတီႈ 25/11/2025 ၼႆႉပဵၼ်ဝၼ်းလိုၼ်းသုတ်း။
ၸၢႆးၶႂၢၼ်မိူင်း (တႅမ်ႈဝႆႉၾၢႆႇမၢၼ်ႈ)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ