တႄႇဝၼ်းတီႈ 14 လိူၼ်ၼူဝ်ႊဝႅမ်ႊပိူဝ်ႊမႃး သိုၵ်းမၢၼ်ႈ တင်း သိုၵ်းၵဝ်ႈၵၢင်ႉ ၶႅင်ႇၵၼ်ပိၵ်ႉၶူဝ်ဢိုတ်းသဵၼ်ႈတၢင်းလူင်ႁၢႆးဝေးတီႈဝဵင်းသီႇပေႃႉ ဢၼ်မီးၵႄႈၵၢင် ဝဵင်းလိူဝ်ႇ-လႃႈသဵဝ်ႈ- မူႇၸေႊၼၼ်ႉသေ ၵူၼ်းမိူင်း ၸိူဝ်း လႄႈ ၸဝ်ႈရူတ်ႉၵႃး ၸိူဝ်းၸႂ်ႉတိုဝ်းသဵၼ်ႈတၢင်းၼၼ်ႉ ဢွၼ်ၵၼ်ႁူပ်ႉတၢင်းယၢပ်ႇၽိုတ်ႇႁၢဝ်ႈႁႅင်း။ ႁၢၼ်ႉတေႃႇထိုင်ဝၼ်းမိူဝ်ႈၼႆႉ (22/11/2025) ၵေႃႉ ပႆႇပိုတ်ႇပၼ်သဵၼ်ႈတၢင်း ၼႆယဝ်ႉ။
မိူဝ်ႈဝၼ်းတီႈ 21 လိူၼ်ၼူဝ်ႊဝႅမ်ႊပိူဝ်ႊ ပလူင်ႈဢၼ်တေႃႉဢဝ် ရူတ်ႉၵႃး ၶၢမ်ႈၵႂႃႇၸူးၽင်ႇၼမ်ႉတီႈတႃႈႁိူဝ်းတႃႈလူင်ၼၼ်ႉၵေႃႉ ၶိူင်ႈၸၢၵ်ႈၵွႆၵႂႃႇပႅတ်ႈလႄႈ ရူတ်ႉၵႃးၸိူဝ်းၵိုတ်းၶင်ႉဝႆႉသွင်ၾၢၵ်ႇၶၢင်ႈ ၵႄးၼမ်ႉတူႈ မီးၼပ်ႉႁူဝ်ပၢၵ်ႇလမ်း ၼႆယဝ်ႉ။
ၵူၼ်းမိူင်းပိုၼ်ႉတီႈ ၼႂ်းၸႄႈဝဵင်းသီႇပေႃႉ လၢတ်ႈၼႄတီႈၽူႈတွႆႇႁွၵ်ႈဝႃႈ “တေႃႇထိုင်မိူဝ်ႈၼႆႉ (22/11/2025) ၵေႃႈ ၶဝ်ပႆႇပိုတ်ႇပၼ်ၶူဝ်၊ ပႆႇပိုတ်ႇပၼ်သဵၼ်ႈတၢင်း။ တီႈၶူဝ်ၼၼ်တႄႉ ၶဝ်ပၼ်ၵူၼ်း ပႆၶၢမ်ႈၵႂႃႇမႃးယူႇ။ ပေႃးမီးလွင်ႈယႂ်ႇ။ တေပိုတ်ႇဝၼ်းလႂ်ၼႆတႄႉပႆႇႁူႉ။ ငိၼ်းဝႃႈ ပေႃးၶဝ်ဢုပ်ႇၵၼ် လႆႈၶေႃႈ တူၵ်းလူင်းၵၼ်လီ ပၢင်ၵုမ်ၶဝ်ဢွင်ႇမၢၼ်တႄႉ တေပိုတ်ႇယူႇၼႆဢေႃႈ” ဝႃႈၼႆ။
ယွၼ်ႉသိုၵ်းတင်းသွင်ၾၢႆႇ ဢိုတ်းၶူဝ်၊ ဢိုတ်းသဵၼ်ႈတၢင်းသေ ၵူၼ်းမိူင်း လႄႈ ၸဝ်ႈရူတ်ႉၵႃး ၸိူဝ်းတေလုၵ်ႉဝဵင်းသီႇပေႃႉ ၵႂႃႇတၢင်းဝဵင်းၵျွၵ်ႉမႄးၵမ်ႈၽွင်ႈ ဢွၼ်ၵၼ်ၵႂႃႇတၢင်း သဵၼ်ႈတၢင်းၼႃးမၢၵ်ႇၶေႃ- တႃႈလူင်- ဝဵင်းၵျွၵ်ႉမႄး ၼႆယဝ်ႉ။
ၵူၼ်းႁေႃႈရူတ်ႉၵႃး ဝဵင်းလိူဝ်ႇ- လႃႈသဵဝ်ႈ ၵေႃႉၼိုင်ႈလၢတ်ႈၼႄတီႈၽူႈတွႆႇႁွၵ်ႈဝႃႈ “မိူဝ်ႈလဵဝ် ၶိူင်ႈၸၢၵ်ႈပလူင်ႈသမ်ႉၵွႆဝႆႉ။ တေဢိုတ်းလၢႆဝၼ်းၵေႃႈဢမ်ႇႁူႉ။ ၵႃးၸိူဝ်းပႂ်ႉဝႆႉတင်းသွင် ၶၢင်ႈၽင်ႇၼမ်ႉၼႆႉ မီးၼပ်ႉႁူဝ်ပၢၵ်ႇလမ်းမၼ်း။ သဵၼ်ႈတၢင်းဢိုတ်းၸိူင်ႉၼႆ ႁဝ်းလႆႈယွၼ်းၵႃႈၼမ်ႉမၼ်းၽိူမ်ႉတီႈၵူၼ်းဢွၵ်ႇ ၶၢဝ်းတၢင်းထႅင်ႈလႄႈ ယၢပ်ႇၽိုတ်ႇတေႉတေႉယူႇ” ၼႆယဝ်ႉ။
လိူဝ်ၼၼ်ႉ ၸဝ်ႈရူတ်ႉၵႃး ၸိူဝ်းလုၵ်ႉတၢင်းဝဵင်းလႃႈသဵဝ်ႈ ၵႂႃႇတၢင်းဝဵင်းလိူဝ်ႇ (မၢၼ်းတေလေး) သမ်ႉ ၵမ်ႈၽွင်ႈ ၸႂ်ႉတိုဝ်းသဵၼ်ႈတၢင်း ဝဵင်းလႃႈသဵဝ်ႈ-မိူင်းယႆ-ၵေးသီး- ဝဵင်းတူၼ်ႈတီး ၸဵမ်ၸိူဝ်းၼႆႉ ၼႆယဝ်ႉ။
လႆႈႁူႉဝႃႈ ၵႃႈၶီႇပလူင်ႈၶၢမ်ႈၼမ်ႉၼႆႉ ၵႃးဢွၼ်ႇၼိုင်ႈလမ်းလႂ် လႆႈပၼ်မွၵ်ႈ 8 မိုၼ်ႇပျႃး၊ ၵႃးလူင်ၼိုင်ႈလမ်းလႂ် လႆႈပၼ် 3 သႅၼ်ပျႃး ထိုင် 5 သႅၼ်ပျႃး။ ၸၢၵ်ႈပလူင်ႈၼၼ်ႉ ၼိုင်ႈပွၵ်ႈ တေႃႉဢဝ်ၵႃးၶၢမ်ႈၼမ်ႉလႆႈ ၵႃးဢွၼ်ႇ 8 လမ်း၊ ၵႃးလူင် သႅၼ်းမၢၵ်ႇ 6 လေႃႉၼႆႉ 6 လမ်း လႄႈ ၵႃးလူင်လၢႆလၢႆ တေႃႉၶၢမ်ႈလႆႈၸွမ်းၵၼ် 4 လမ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ