ဝၼ်းတီႈ 15/11/2025 ယၢမ်းၵၢင်ၼႂ် ၼႂ်ဝႃး သိုၵ်းၵဝ်ႈၵၢင်ႉ MNDAA ၶိုၼ်းဢဝ်ၶႃႈသိုၵ်း သိုၵ်းမၢၼ်ႈ 200 ပၢႆ ဢၼ်ၶဝ်တီႉလႆႈၽွင်းပၢင်တိုၵ်းၽႅၼ်ယၼ်ႇသိုၵ်း 1027 ၼၼ်ႉ ၶိုၼ်းသူင်ႇပၼ်သိုၵ်းမၢၼ်ႈၶိုၼ်းဝႃႈၼႆ။

ထိုင်မႃးဝၼ်းတီႈ 16/11/2025 သိုၵ်းမၢၼ်ႈ လိုပ်ႈတပ်ႉပၢင်သဝ်း MNDAA ၸိူဝ်းမီးတီႈၼႂ်းၸႄႈဝဵင်းလႃႈသဵဝ်ႈ ၼိူဝ်သဵၼ်ႈတၢင်းၵႂႃႇ မိူင်းယႆဝႃႈၼႆ။

တပ်ႉ MNDAA ဢၼ်သိုၵ်းမၢၼ်ႈၸႂ်ႉထွႆၼႆႉ ပဵၼ်တပ်ႉဢၼ်ပၵ်းဝႆႉတီႈ ဝၢၼ်ႈၼွင်မွၼ် (သီႇပေႃႉ)၊ တပ်ႉပၢင်သဝ်းတီႈဝၢၼ်ႈ ႁူဝ်ယ၊ ၼမ်ႉပွင်ႈ တၢင်းၵႂႃႇဝဵင်းမိူင်းယႆၸိူဝ်းၼႆႉ လႄႈႁဵတ်းႁႂ်ႈသွင်ၾၢႆႇၶဵင်ႈၶႅင်ၵၼ်ဝႆႉ။

ၵူၼ်းၸမ်ၸႂ်သိုၵ်းၵဝ်ႈၵၢင်ႉ တီႈဝဵင်းလႃႈသဵဝ်ႈတႄႉလၢတ်ႈဝႃႈ – “ သိုၵ်းမၢၼ်ႈဢၼ်သိုၵ်းၵဝ်ႈၵၢင်ႉတီႉလႆႈၸိူဝ်းၼၼ်ႉ သိုၵ်းၵဝ်ႈၵၢင်ႉၶိုၼ်းပွႆႇပၼ်တူဝ်ၶဝ်ၶိုၼ်း မီး 200 ပၢႆယဝ်ႉ။ မိူဝ်ႈလိူၼ်ဢွၵ်ႊထူဝ်ႊပိူဝ်ႊ ဝၼ်းတီႈ 17 ၼၼ်ႉၵေႃႈပွႆႇပၼ် 45 ၵေႃႉ။မိူဝ်ႈၼၼ်ႉပႃးတင်း ၸဝ်ႈႁၢၼ် ၵျေႃႇၸေႇယ တပ်ႉၶလရ 277 တႂ်ႈ ၸၵၶ 14 လႄႈ ၸဝ်ႈႁၢၼ်ဢွင်ႇမျိၼ်ႉထူး တႂ်ႈၸၵၶ 1 ။ ထိုင်မႃးဝၼ်းတီႈ 15 ၼူဝ်ႊဝႅမ်ႊပိူဝ်ႊၼႆႉသမ်ႉပွႆႇထႅင်ႈ 202 ၵေႃႉ။ ၵမ်းၼႆႉသမ်ႉ မႃးလိုပ်ႈသိုၵ်းၵဝ်ႈၵၢင်ႉဢွၵ်ႇပိုၼ်ႉတီႈထႅင်ႈ။ ၸင်ႇဝႃႈၶဝ်ၶဵင်ႈၶႅင်ၵၢၼ်သိုၵ်း ႁႅၼ်းသိုၵ်းတေႃႇၵၼ်ဝႆႉသေ ၶူဝ်သီႇပေႃႉ ဢၼ်ၶဝ်တင်းသွင်ၾၢႆႇႁႄႉပိၵ်ႉဝႆႉၼၼ်ႉၵေႃႈတေႃႇထိုင်မိူဝ်ႈဝႃးၼႆႉပႆႇပိုတ်ႇပၼ်ၶိုၼ်း ။” – ဝႃႈၼႆ။

ၾၢႆႇတၢင်းသိုၵ်းမၢၼ်ႈ ပဵၼ်ၸွမ်သိုၵ်းလူင် ၵူဝ်ႇၵူဝ်ႇဢူး ၽူႈၵွၼ်းၽႅၼ်ယၼ်ႇသိုၵ်းမၢႆ 5 ႁူပ်ႉထူပ်းဢုပ်ႇဢူဝ်းၵၼ်တင်းသိုၵ်းၵဝ်ႈၵၢင်ႉ တီႈဝဵင်းလႃႈသဵဝ်ႈမိူဝ်ႈဝၼ်းတီႈ 11/11/2025 ၼၼ်ႉသေ သင်ႇႁႂ်ႈသိုၵ်းၵဝ်ႈၵၢင်ႉထွႆထွၼ်ဢွၵ်ႇပိုၼ်ႉတီႈဢၼ်လၢတ်ႈမႃးၸိူဝ်းၼၼ်ႉ- ႁဵတ်းႁႂ်ႈၵၢၼ်ဢုပ်ႇဢူဝ်းဢမ်ႇဢွင်ႇမၢၼ်။

ဝၢႆးလင်သိုၵ်းတဢၢင်းယွမ်းထွႆထွၼ်ပၼ်သေ ၶဝ်ႈၵုမ်းၶိုၼ်းဝဵင်းၵျွၵ်ႉမႄးလႄႈသီႇပေႃႉၼႆႉသိုၵ်းမၢၼ်ႈၼႆႉ ႁႅၼ်းသိုၵ်းၶိုၼ်ႈမႃးၸွမ်းသဵၼ်ႈတၢင်းပျီႇထွင်ႇၸူႉ ဝဵင်းလိူဝ်ႇ- မူႇၸေႊ သေ သင်ႇႁႂ်ႈသိုၵ်းၵဝ်ႈၵၢင်ႉ ၸိူဝ်းမီးၼိူဝ်သဵၼ်ႈတၢင်း လႃႈသဵဝ်ႈ-မူႇၸေႊ ထွႆထွၼ်ဢွၵ်ႇပိုၼ်ႉတီႈ။

သိုၵ်းၵဝ်ႈၵၢင်ႉ MNDAA ၼႆႉ ႁူမ်ႈၵၼ်တင်းၸုမ်းဢူၺ်းလီသေ ပိုတ်းယိုဝ်းတိုၵ်းတေႃးသိုၵ်းမၢၼ်ႈ ၸွမ်းၼင်ႇၽႅၼ်ယၼ်ႇသိုၵ်း 1027 ၽွင်းပီ 2023။ ယိုတ်းလႆႈဝဵင်းလႃႈသဵဝ်ႈ၊ လၢဝ်ႇၵၢႆး၊ ၶျိၼ်ႊသူၺ်ႇႁေႃႇ၊ မိူင်းၵူဝ်း၊ၽွင်းသႅင်၊ ၵွင်းၸၢင်ႉ၊ပၢင်ႇလူင်၊ၵုၼ်လူင်၊ သႅၼ်ဝီ၊ တႃႈမိူင်းငႅၼ်း၊ ပၢင်ႇသၢႆး ၸိူဝ်းၼႆႉသေ ပၼ်ႇၵၢၼ်ၽွင်းငမ်းႁင်းၶဝ်ဝႆႉ။

ထိုင်မႃးပီ 2025 လိူၼ်ဢေႊပရိူဝ်ႊ ၼႆႉဢိင်ၼိူဝ်မိူင်းၶႄႇပၼ်ႁႅင်းဢီးသေ သိုၵ်းၵဝ်ႈၵၢင်ႉလႆႈထွႆထွၼ်ႇဢွၵ်ႇဝဵင်းလႃႈသဵဝ်ႈပၼ်သိုၵ်းမၢၼ်ႈ။ ယၢမ်းလဵဝ် ငိၼ်းဝႃႈသိုၵ်းမၢၼ်ႈဢၢၼ်းၶႂ်ႈလႆႈဝဵင်းသႅၼ်ဝီၶိုၼ်းဝႃႈၼႆယူႇသေတႃႉ ၵူၼ်းမိူင်းသႅၼ်ဝီတႄႉလၢတ်ႈဝႃႈ သိုၵ်းၵဝ်ႈၵၢင်ႉတိုၵ်ႉပၼ်ႇၵၢၼ်ၽွင်းငမ်းၶဝ်ယူႇပႆႇၵိုတ်းပႆႇလိုဝ်ႈဝႃႈၼႆ။

မိူဝ်ႈဝၼ်းတီႈ 25/10/2025 ၼၼ်ႉၵေႃႈသိုၵ်းၵဝ်ႈၵၢင်ႉပိုၼ်ၽၢဝ်ႇဝႃႈ ဢၼ်ၵိုတ်းတိုၵ်းၵၼ်တင်းသိုၵ်းမၢၼ်ႈၼႆႉ တိုၵ်ႉပဵၼ်တႃႇၽွၼ်းလႆႈၶၵ်ႉတွၼ်ႈႁႅၵ်ႈၵူၺ်း။ တႃႇတေလႆႈလွင်ႈငမ်းယဵၼ်ဢၼ်တႄႉမၼ်းၼႆႉတႄႉတေလႆႈပွင်ႇၸႂ်သေဢုပ်ႇဢူဝ်းၵၼ်ထႅင်ႈယူႇ- ဝႃႈၼႆ။