ဝၢႆးလင်သိုၵ်းတဢၢင်း တင်း သိုၵ်းမၢၼ်ႈ ပိုၼ်ၽၢဝ်ႇၵိုတ်းတိုၵ်းၵၼ်သေ တူၵ်းလူင်းတႃႇဢဝ်သၢႆသိုၵ်း ထွႆဢွၵ်ႇ ဝဵင်းမိူင်းၵုတ်ႈ၊ ဝဵင်းမိူင်းမိတ်ႈယဝ်ႉၼႆႉ ၵူၼ်းမိူင်းၸိူဝ်းယူႇသဝ်းဝႆႉၼႂ်းပိုၼ်ႉတီႈၼၼ်ႉၵမ်ႈၼမ် ဢွၼ်ၵၼ် မႆႈၸႂ်သေႁႅၼ်းၶူဝ်းငိူင်ႉဢွၵ်ႇ ဝဵင်းမိူင်းၵုတ်ႈဝႆႉ။
တႄႇႁူဝ်လိူၼ်ၼူဝ်ႊဝႅမ်ႊပိူဝ်ႊမႃး ၵူၼ်းမိူင်းငိူင်ႉဢွၵ်ႇမိူင်းၵုတ်ႈ မီးၵူႈဝၼ်း ၵမ်ႈၽွင်ႈၵႂႃႇတၢင်းမိူင်းမိတ်ႈ ၵမ်ႈၽွင်ႈထိုင် ဝဵင်းလိူဝ်ႇ။ ၵႃႈရူတ်ႉၵႃးပုင်ႈၶိုၼ်ႈၵႂႃႇ 5 ပုၼ်ႈၼႆၵူၼ်းမိူင်းဝဵင်းမိူင်းၵုတ်ႈ လၢတ်ႈၼင်ႇၼႆ။
“ၵမ်ႈၼမ်ဢွၼ်ၵၼ်ငိူင်ႉၵႂႃႇတၢင်းဝဵင်းလိူဝ်ႇဢိူဝ်ႈ။ ၵႃးၵေႃႈၶၢတ်ႈယၢပ်ႇၼႃႇမိူဝ်ႈလဵဝ်။ ရူတ်ႉၵႃးဢၼ်လႅၼ်ႈသဵၼ်ႈတၢင်း မိူင်းၵုတ်ႈ – ဝဵင်းလိူဝ်ႇၼႆႉ မၼ်းဢမ်ႇလိူင်ႇမိူၼ်မိူဝ်ႈဢွၼ်တၢင်းၼႃႇ။ ၵူၼ်းၸိူဝ်းမီးငိုၼ်းတွင်းၼမ်ဢိတ်းဢိတ်းႁေ ပွင်ပဵၼ်လႆႈၸိူဝ်းၼၼ်ႉတႄႉ ငိူင်ႉၵႂႃႇၵမ်ႈၼမ်ယဝ်ႉ။ မႆႈၸႂ်ၵူဝ်သိုၵ်းၶဝ်ယိုဝ်းၵၼ်ၶိုၼ်းၼၼ်ႉၼႃႇ။ တီႈႁဝ်းၼႆႉဢမ်ႇၸႂ်ႈဝႃႈမီးၸုမ်းသိုၵ်းလွႆ (တဢၢင်း) ထိင်းဝႆႉၸုမ်းလဵဝ်ၵူၺ်းလူး။ မီးပႃးၸုမ်းသိုၵ်း PDF ၶဝ်ႁေၼႃႇ။”
ၵႃႈၵႃးလုၵ်ႉဝဵင်းမိူင်းၵုတ်ႈ- မိူင်းမိတ်ႈၵႂႃႇတၢင်း ဝဵင်းလိူဝ်ႇ (မၢၼ်းတလေး) ၼႆႉ ၼိုင်ႈၵေႃႉ သဵင်ႈငိုၼ်းၸမ် 10 သႅၼ်ပျႃးလႄႈ မၢင်ၸိူဝ်းဢွၼ်ၵၼ်ငိူင်ႉဢွၵ်ႇၵႂႃႇတင်း ၸႄႈဝဵင်းၵျွၵ်ႉမႄး မိူင်းတႆးပွတ်းႁွင်ႇၵေႃႈမီး ။
လႆႈႁူႉဝႃႈ တင်ႈတႄႇဝၼ်းသိုၵ်းတဢၢင်း ပိုၼ်ၽၢဝ်ႇၵိုတ်းတိုၵ်း တူၵ်းလူင်းတေထွႆသၢႆသိုၵ်းဢွၵ်ႇပၼ်ၶိုၼ်း ၼႂ်းဝဵင်းမိူင်းၵုတ်ႈမႃး ႁၢၼ်ႉတေႃႇႇထိုင် ဝၼ်းတီႈ (13/11/2025) မိူဝ်ႈၼႆႉ သိုၵ်းတဢၢင်းယင်းတိုၵ်ႉၵုမ်းၵမ် ပၼ်ႇၵၢၼ်ၽွင်းငမ်းဝႆႉသေ ပႆႇထွၼ်သၢႆသိုၵ်းဢွၵ်ႇ။ ၼၼ်ႉၵူၺ်းဢမ်ႇၵႃး ယင်းၸႅၵ်ႇတတ်းပၼ်ဢွင်ႈတီႈ ၶုတ်းသႅင် သႅၼ်းဢွၼ်ႇသႅၼ်းဢိတ်း ႁႂ်ႈၵူၼ်းမိူင်းၵႂႃႇၶုတ်းဢဝ်သႅင်- ၸိူဝ်းၼႆႉထႅင်ႈလူးၵွၼ်ႇ။
သိုၵ်းတဢၢင်းၼႆႉတႄႇၵုမ်းၵမ်ဢဝ်ဝဵင်းမိူင်းၵုတ်ႈ မိူဝ်ႈလိူၼ်သႅပ်ႊထႅမ်ႊပိူဝ်ႊ ပီ 2024 လင်ပၢင်တိုၵ်းၽႅၼ်ယၼ်ႇသိုၵ်း ၵမ်းထူၼ်ႈသွင်ၼၼ်ႉသေတႃႉ ဢွင်ႈတီႈဢွၵ်ႇသႅင်ၼမ် သုတ်းၼၼ်ႉ ပၼ်သုၼ်ႇလႆႈၶွမ်ႊ ပၼီႊၶုတ်းသႅင်ၶဝ် ၵႂႃႇၶုတ်းဢဝ်ၵူၺ်း။ ဝၢႆးလင် ပိုၼ်ၽၢဝ်ႇဝႃႈ တေထွႆဢွၵ်ႇဝဵင်းမိူင်းၵုတ်ႈယဝ်ႉ ၸင်ႇပၼ် သုၼ်ႇလႆႈၵူၼ်းမိူင်း ၶဝ်ႈၵႂႃႇၶုတ်းဢဝ် သႅင် ၸွမ်းၼင်ႇပွင်ပဵၼ်လႆႈ ႁင်းၽႂ်မၼ်းၼၼ်ႉယူႇ ဝႃႈၼႆ။
လိူဝ်ၼၼ်ႉ ၵူၼ်းမိူင်းၼႂ်းပိုၼ်ႉတီႈ ဝဵင်းမိူင်းၵုတ်ႈၶဝ် လိုဝ်းၵၼ်ထႅင်ႈဝႃႈ ဝၼ်းတီႈ 20 လိူၼ်ၼူဝ်ႊဝႅမ်ႊပိူဝ်ႊ ၼႆႉဝႆႉပဵၼ်ဝၼ်းလိုၼ်းသုတ်းသေ သိုၵ်းတဢၢင်း တေလႆႈထွႆဢွၵ်ႇဝဵင်းမိူင်းၵုတ်ႈ။ သိုၵ်းမၢၼ်ႈတေၶဝ်ႈၵုမ်းၵမ်ၶိုၼ်း ဝႃႈၼၼ်သေတႃႉ ယူႇတီႈၽူႈတွႆႇႁွၵ်ႈ ပႆႇလႆႈႁူႉၸွမ်းတႅတ်ႈတေႃး ။
ၾၢႆႇၼိုင်ႈၵေႃႈ ၼႂ်းဝဵင်းမိူင်းၵုတ်ႈၼႆႉ တိုၵ်ႉမီးၸုမ်းသိုၵ်း PDF ၶဝ်ယူႇသဝ်းဝႆႉ။ ၵဵဝ်ႇၵပ်းလွင်ႈသိုၵ်းတဢၢင်းလႆႈထွႆဢွၵ်ႇပၼ်သိုၵ်းမၢၼ်ႈၵုမ်းၶိုၼ်းလၢႆလၢႆဝဵင်းသေ PDF ၶဝ် ပိုၼ်ၽၢဝ်ႇဝႆႉဝႃႈ ဢမ်ႇယွမ်းပၼ်သိုၵ်းမၢၼ်ႈလႆႈလႃးလႃး။ တေၵႅတ်ႇၶႄဝဵင်းမိူင်းၵုတ်ႈၵႂႃႇ ႁႂ်ႈထိုင်တီႈသုတ်းဝႃႈၼႆလႄႈ ၵူၼ်းမိူင်းၵမ်ႈၼမ်ၵေႃႈဢွၼ်ၵၼ်မႆႈၸႂ်ၵူဝ်ၸုမ်းသိုၵ်းၶဝ်ယိုဝ်း ၵၼ်သေ တႅပ်းတတ်းသဵၼ်ႈၸႂ် ငိူင်ႉဢွၵ်ႇဝဵင်းဝႆႉထႃႈ။ ၼႂ်းဝူင်ႈၼႆႉ ၵူၼ်းမိူင်းၵုတ်ႈၵေႃႈ ဢွၵ်ႇၼႄၵၢင်ၸႂ်ယူႇၵူႈဝၼ်း – လွင်ႈဝႃႈဢမ်ႇၽွမ်ႉၸွမ်းလွင်ႈသိုၵ်းမၢၼ်ႈတေမႃးၵုမ်းၶိုၼ်း ဝဵင်း မိူင်းၵုတ်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ