ပျီႇတူႉၸိတ်ႉပဢူဝ်း (PNO) တဵၵ်းယွၼ်းၵဵပ်းငိုၼ်း ၵူၼ်းမိူင်းပိုၼ်ႉတီႈ ၼႂ်းထုင်ႉၼွင်ႁၢႆးယႃႈ ၸႄႈဝဵင်းယွင်ႁူၺ်ႈ မိူင်းတႆးပွတ်းၸၢၼ်း ၼိုင်ႈၵေႃႉလႂ် ၼိုင်ႈလိူၼ် 5 သႅၼ်ပျႃး။ ၵူၼ်းၸိူဝ်းဢမ်ႇမီးငိုၼ်းပၼ်လႆႈၼၼ်ႉ ၺႃးပျီႇတူႉၸိတ်ႉပဢူဝ်းႁွင်ႉၵႂႃႇၾိုၵ်းၵၢၼ်သိုၵ်းသေ သူင်ႇၵႂႃႇၼႃႈသိုၵ်း ၸွမ်းဢွင်ႈတီႈပဵၼ်ပၢင်တိုၵ်းၵမ်းသိုဝ်ႈ ၼႆယဝ်ႉ။
တႄႇလိူၼ်ဢေႃးၵၢတ်ႉသ် ဝူင်ႈထီႉၼိုင်ႈမႃး ႁၢၼ်ႉတေႃႇထိုင်ဝၼ်းမိူဝ်ႈၼႆႉ (8/11/2025) ၵူၼ်းမိူင်းပိုၼ်ႉတီႈ ၸိူဝ်းယူႇတီႈဝၢၼ်ႈၽြႃးလွႆ၊ ဝၢၼ်ႈၼမ်ႉမႆႈ၊ ဝၢၼ်ႈလိၼ်ပူၵ်ႇတႅၵ်ႇ ၸိူဝ်းပၢႆႈၽေးပၢင်တိုၵ်းယဝ်ႉသေ ပွၵ်ႈမိူဝ်းယူႇၶိုၼ်းႁိူၼ်းၼၼ်ႉ ၺႃးပျီႇတူႉၸိတ်ႉပဢူဝ်း ၵဵပ်းသိုၵ်း၊ ယွၼ်းငိုၼ်း၊ တဵၵ်းႁႂ်ႈၼုင်ႈၶူဝ်းၸုမ်းသိုၵ်းပျီႇတူႉၸိတ်ႉသေသူင်ႇၵႂႃႇၼႃႈသိုၵ်း – ၼႆယဝ်ႉ။
ၼုမ်ႇၸၢႆး ၵူၼ်းမိူင်းပိုၼ်ႉတီႈ ၼႂ်းထုင်ႉၼွင်ႁၢႆးယႃႈလၢတ်ႈၼႄဝႃႈ “လႆႈသႂ်ႇငိုၼ်းပၼ်ၶဝ် ၼိုင်ႈလိူၼ်ၼႆႉ 5 သႅၼ်။ မီးၵႂႃႇသၢမ် လိူၼ်ယဝ်ႉ။ ၼိုင်ႈလိူၼ်ၼိုင်ႈလိူၼ်ၼႆႉ ငိုၼ်းၶဝ်ႈႁဝ်းသမ်ႉ တမ်ႉဢမ်ႇလႆႈႁႃႈသႅၼ်ၶႃႈလူး။ ၵႂႃႇႁဵတ်းၵၢၼ်လႆႈငိုၼ်းမႃးၵႃႈႁိုဝ်ၵေႃႈ လႆႈမႃးႁွမ်ႁႄ ၵုမ်ႇလႆႈသႂ်ႇပၼ်ၶဝ်ၵႂႃႇတင်းမူတ်းႁဵတ်းၼၼ်ယူႇတိၵ်းတိၵ်း။ ပေႃးဢမ်ႇသႂ်ႇပၼ်ၶဝ်ၼႆ ၶဝ်ႁွင်ႉၵႂႃႇႁႄ ၸႂ်ႉၵႂႃႇတိုၵ်းသိုၵ်း ၼၼ်ႉၼႃႇ။ ၵူၼ်းၸိူဝ်းလႆႈၵႂႃႇၼႃႈသိုၵ်းၼၼ်ႉၵေႃႈ ဢမ်ႇႁၼ်ၶိုၼ်းလႆႈမႃးႁိူၼ်းႁႄၵေႃႉ” ဝႃႈၼႆ။
လိူဝ်ၼၼ်ႉ ပျီႇတူႉၸိတ်ႉပဢူဝ်းၼႆႉ ပၵ်းတပ်ႉပၢင်သဝ်းဝႆႉၼႂ်းထုင်ႉၼွင်ႁၢႆးယႃႈသေ တဵၵ်းၶၢၼ်းၸႂ်ႉၵူၼ်းမိူင်း ႁဵတ်းၶဝ်ႈၽၵ်း ၵႂႃႇသူင်ႇ၊ ၺွပ်းၶျေႃး ဢဝ်ႁိူဝ်းၸၢၵ်ႈၶွင်ၵူၼ်းမိူင်း ၵႂႃႇၸဵမ်ၸိူဝ်းၼႆႉၵေႃႈႁဵတ်းၼႆ ၼုမ်ႇၸၢႆး ၵူၼ်းမိူင်းပိုၼ်ႉတီႈ ၼႂ်းထုင်ႉၼွင်ႁၢႆးယႃႈ လၢတ်ႈၼႄၼင်ႇၼႆထႅင်ႈ။
ဢိင်ၼိူဝ်လွင်ႈၸိူဝ်းၼႆႉသေ ၸဝ်ႈသိုၵ်း ၶုၼ်ႇသၢၼ်းဢွင်ႇ ၽူႈၶၢၼ်ပၢၵ်ႇ ၼႂ်းတပ်ႉသိုၵ်းပဢူဝ်းတႄႉ တုမ်ႉတွပ်ႇလၢတ်ႈဝႆႉဝႃႈ “ႁဝ်းၶႃႈၼႆႉ ဢမ်ႇၵဵပ်းသိုၵ်းၵူၼ်းမိူင်း။ ၵူၼ်းမိူင်းၶဝ်မီးၵၢင်ၸႂ်ၶႂ်ႈႁဵတ်းသိုၵ်းႁႄၶဝ်ႈမႃးႁင်းၵူၺ်းၶဝ် ပိူဝ်ႈတႃႇၵႅတ်ႇၶႄ ပိုၼ်ႉတီႈလိၼ်ၵိူတ်ႇၶဝ်။ ငိုၼ်းၵေႃႈႁဝ်းၶႃႈဢမ်ႇလႆႈၵဵပ်း” ဝႃႈၼႆ။
ၵူၺ်းၵႃႈ မိူဝ်ႈလိူၼ်သႅပ်ႊထႅမ်ႊပိူဝ်ႊ ဝၼ်းတီႈ 2 ၼၼ်ႉ ၵူၼ်းၸၢႆး ဢႃႇယု 42 ပီ ၸိုဝ်ႈႁွင်ႉၵူဝ်ႇဢွင်ႇမျဵဝ်းဝိၼ်း ၺႃးၸုမ်းသိုၵ်းပဢူဝ်း PNO တီႉၺွပ်းဢဝ်ၵႂႃႇ ၽွင်းလုၵ်ႉတီႈဝၢၼ်ႈ မၵျီးသဵၵ်ႉ ၵႂႃႇတီႈဝၢၼ်ႈၵုင်းမၢၵ်ႇလၢင်း (ပိန္နဲကုန်း) ၼႂ်းၸႄႈဝဵင်းယွင်ႁူၺ်ႈ။ ဝၢႆးလင်ၼၼ်ႉ ၵူၼ်းၼႂ်းမုင်ႉႁေႃႁိူၼ်းၶဝ် လႆႈဢဝ်ငိုၼ်း 100 သႅၼ်ပျႃးၵႂႃႇထုတ်ႇဢဝ်ဢွၵ်ႇမႃးလႆႈသေတႃႉ ၸွမ်းတူဝ်မၼ်းၸၢႆး မီးႁွႆးၸမ်ႉ ႁွႆးမၢတ်ႇၸဵပ်းႁၢဝ်ႈႁႅင်းသေ လူႉတၢႆၵႂႃႇၽွင်းတိုၵ်ႉႁွတ်ႈႁူင်းယႃ မိူဝ်ႈသူင်ႇၵႂႃႇယႃတူဝ်ၼၼ်ႉ ၼႆယဝ်ႉ။
လႆႈႁူႉဝႃႈ ယၢမ်းလဵဝ် သိုၵ်းမၢၼ်ႈ တင်း ပျီႇတူႉၸိတ်ႉပဢူဝ်း ႁူမ်ႈၵၼ်ႁႅၼ်းသိုၵ်းၶဝ်ႈၵႂႃႇ တၢင်းၸႄႈဝဵင်းၾၢႆၶုၼ် လႄႈ ၸႄႈဝဵင်းပၢင်လွင်းၼၼ်ႉသေ ပဵၼ်ပၢင်တိုၵ်းၵၼ်တင်း ၸုမ်းသိုၵ်းလုၵ်ႉၽိုၼ်ႉၶဝ်ဝႆႉႁၢဝ်ႈႁႅင်း ၼႂ်းမိူင်းတႆးပွတ်းၸၢၼ်းယူႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ