ၵူၼ်းမိူင်းပိုၼ်ႉတီႈ ၼႂ်းဝဵင်းမိူင်းၵုတ်ႈ ၽွမ်ႉၵၼ်တွႆႇ ၽၢင်လဵၵ်း၊ ပုင်းလဵၵ်း လႄႈ တႅင်ႈလဵၵ်းသဵင်လင် ၼႄၵၢင်ၸႂ်သၢၼ်ၶတ်းၸဝ်ႈဢႃႇၼႃႇသိုၵ်းမၢၼ်ႈ ဢၼ်တေၶဝ်ႈၵုမ်းဝဵင်း ၶိုၼ်း။

ဝၼ်းတီႈ 6/11/2025 ယၢမ်းၵၢင်ၶမ်ႈ 8 မူင်း ၵူၼ်းၼႂ်းဝဵင်းမိူင်းၵုတ်ႈ ၵူႈပွၵ်ႉယွမ်ႇ ၽွမ်ႉၵၼ်တွႆႇ ၽၢင်လဵၵ်း၊ ပုင်းလဵၵ်း။ ၽွမ်ႉၵၼ်ႁွင်ႉၽဵင်းၵႂၢမ်းဢၼ်မီးၸိုဝ်ႈဝႃႈ “ ၵတိသႅတ်ႉၸႃႇ ၵၢၼ်လုၵ်ႉၽိုၼ်ႉ” ။ ၼႄၵၢင်ၸႂ်ဝႃႈ ၵူၼ်းမိူင်းတင်းဝဵင်း မီးၵၢင်ၸႂ်မိူၼ်ၵၼ်တင်းမူတ်း “ဢမ်ႇၽွမ်ႉလွင်ႈသိုၵ်းမၢၼ်ႈတေၶဝ်ႈယိုတ်းၵုမ်းဝဵင်းမိူင်းၵုတ်ႈၶိုၼ်း” – ဝႃႈၼႆ။

ၻွၵ်ႊတိူဝ်ႊ တေႇၸႃႇသၢၼ်း ၽူႈၼမ်း ၸုမ်းၵူၼ်းၼုမ်ႇမၢၼ်ႈ လုၵ်ႉၽိုၼ်ႉၶၢဝ်းႁွင် (နွေဉီးတော်လှန်ရေး) တေႃႇသိုၵ်းမၢၼ်ႈယိုတ်းမိူင်းယူႇၼႆႉတႄႉတႅမ်ႈတၢင်ႇၼိူဝ်ၼႃႈလိၵ်ႈသိုဝ်ႇ တူင်ႇဝူင်းၵူၼ်းမၼ်းၸၢႆးဝႆႉဝႃႈ “ၵူၼ်းဝဵင်းမိူင်းၵုတ်ႈ သၢၼ်ၶတ်းပိူင်ၸဝ်ႈဢႃႇၼႃႇ။ ၶဝ်ၽွမ်ႉၵၼ် တွႆႇတူၵ်ႉတူၵ်ႉတၢၵ်ႉတၢၵ်ႉၼႆႉ ၼႄဝႃႈ ၵူၼ်းမိူင်းဢမ်ႇၶႂ်ႈႁႂ်ႈသိုၵ်းမၢၼ်ႈၶဝ်ႈမႃးၼႂ်းဝဵင်းၶိုၼ်း ” ဝႃႈၼႆ။

ငဝ်းႁၢင်ႈသဵင် ဢၼ်ၵူၼ်းဝဵင်းမိူင်းၵုတ်ႈၶဝ် တွႆႇၽၢင်လဵၵ်း၊ တွႆႇပုင်းလဵၵ်း ႁဵတ်းႁႂ်ႈဢွၵ်ႇသဵင်မေႃး တူၵ်ႉတူၵ်ႉတၢၵ်ႉတၢၵ်ႉၼႆႉ ၸွတ်ႇၽႄႈၼိူဝ်သိုဝ်ႇတူင်ႇဝူင်းၵူၼ်းတင်းၼမ်တင်းလၢႆ။

“လႆႈႁၼ်ၶိုၼ်း ငဝ်းႁၢင်ႈသဵင် ဢၼ်ၵူၼ်းမိူင်းႁူမ်ႈၵၼ်ႁဵတ်းၵၢၼ်တူင်ႉၼိုင် သၢၼ်ၶတ်းသိုၵ်းမၢၼ်ႈၸိူင်ႉၼႆ ၵႂႃႇၶုၵ်းၸႂ်လႆႈ မိူဝ်ႈၽွင်းသိုၵ်းမၢၼ်ႈ တႄႇယိုတ်းဢႃႇၼႃႇၸိုင်ႈမိူင်း မိူဝ်ႈလိူၼ်ၾႅပ်ႉပိဝ်ႊရီႊ ပီ 2021 ၼၼ်ႉ။ ၼႂ်းၶၵ်ႉၵၢၼ်လုၵ်ႉၽိုၼ်ႉၼႆႉ ၵူၼ်းမိူင်းၼႆႉလမ်ႇလွင်ႈတေႉတေႉ” – ၼႆ တေႇၸႃႇသၢၼ်း လၢတ်ႈဝႆႉၼင်ႇၼႆ။

ဝဵင်းမိူင်းၵုတ်ႈၼႆႉ သိုၵ်းတဢၢင်း TNLA ယိုတ်းၵုမ်းလႆႈဝႆႉမိူဝ်ႈပၢင်တိုၵ်းၽႅၼ်ယၼ်ႇသိုၵ်း 1027 မႃးတေႃႇထိုင်ယၢမ်းလဵဝ်။

ဢိင်ၼိူဝ်မိူင်းၶႄႇမိပ်ႇငႅၼ်းပၼ်ႁႅင်းဢီးသေ ဝဵင်းဢၼ်တိုၵ်းလႆႈဝႆႉၸိူဝ်းၼၼ်ႉ သိုၵ်းတဢၢင်းလႆႈပွႆႇထွႆပၼ်သိုၵ်းမၢၼ်ႈၶိုၼ်းၽွင်းၼႂ်းလိူၼ်ထူၼ်ႈၵဝ်ႈ ထူၼ်ႈသိပ်း ပူၼ်ႉမႃးၼႆႉ။

ဝဵင်းမိူင်းၵုတ်ႈၵေႃႈမိူၼ်ၵၼ်။ ႁူဝ်လိူၼ်ၼူဝ်ႊဝႅမ်ႊပိူဝ်ႊၼႆႉ သိုၵ်းတဢၢင်း(TNLA) တူၵ်းလူင်းလႆႈၸႂ်ၵၼ်တင်း သိုၵ်းမၢၼ်ႈဝႃႈ တေထွႆသၢႆသိုၵ်းဢွၵ်ႇပၼ်ၶိုၼ်း ၸဵမ်မိူင်းၵုတ်ႈ လႄႈ မိူင်းမိတ်ႈ တင်းသဵင်ႈ – ဝႃႈၼႆ။

ၵူၺ်းၵႃႈ ၾၢႆႇၸုမ်းသိုၵ်းၵူၼ်းၼုမ်ႇမၢၼ်ႈ (PDF) ၶဝ်တႄႉ ပိုၼ်ၽၢဝ်ႇယိုၼ်ယၼ်ဝႃႈ လႆႈႁူမ်ႈၵၼ်တိုၵ်းႁူမ်ႈၵၼ်တၢႆမႃးလႄႈ တေသိုပ်ႇၵႅတ်ႇၶႄႁႄႉၵင်ႈ ဝဵင်းမိူင်းၵုတ်ႈၵႂႃႇမိူၼ်ၵဝ်ႇ- တေဢမ်ႇယွမ်းထွႆထွၼ်ပၼ်လႃးလႃး – ဝႃႈၼႆဝႆႉ။

လႆႈႁူႉဝႃႈ ဝၢႆးလင် သိုၵ်းမၢၼ်ႈ တင်း သိုၵ်းတဢၢင်း တူၵ်းလူင်းၵၼ်ယဝ်ႉ ႁၢၼ်ႉတေႃႇထိုင်ဝၼ်းမိူဝ်ႈၼႆႉ 7/11/2025 ယင်းပႆႇလႆႈႁၼ်သိုၵ်းမၢၼ်ႈၶဝ်ႈၵုမ်းၵမ် ၸႄႈဝဵင်းမိူင်းၵုတ်ႈ ၶိုၼ်း ။