ဝၼ်းလိုဝ်ႈၵၢၼ်ဢၼ်ဝႃႈၼႆႉ ပဵၼ်ဝၼ်းဢၼ်ႁဝ်း ဢဝ်ၸႂ်ႉတိုဝ်းတႃႇတေၽိူမ်ႉထႅမ်ၶိုၼ်း ႁႅင်းတူဝ် ႁႅင်းၸႂ် ဢၼ်လႆႈႁဵတ်းၵၢၼ်ႁိူဝ်ႉမွႆႈမႃးတၢင်းဝူင်ႈ ၼၼ်ႉယဝ်ႉ။
ၼႂ်းဝၼ်းလိုဝ်ႈၵၢၼ်ၼၼ်ႉ တေလႆႈႁဵတ်းသင်ၼႆ ဢမ်မီးလွင်ႈမၵ်းတတ်းဝႆႉ ပိူင်တၢႆသေတႃႉ သင်မေႃ ဢဝ်ၸႂ်ႉတိုဝ်းႁႂ်ႈမီးၽွၼ်းလီၵႂႃႇၸိုင် တေၸၢင်ႈၵေႃႇတင်ႈလႆႈၸၢတ်ႈပၢၼ်ဢၼ်လီလီၼၼ်ႉယူႇ။
- ၼွၼ်းႁႂ်ႈဢိမ်ႇ
ၼႂ်းဝၼ်းႁဵတ်းၵၢၼ်ၼၼ်ႉ ယွၼ်ႉတိုၵ်ႉလူဝ်ႇႁဵတ်းၵၢၼ်ၼႆသေ မၢင်ၸိူဝ်းတေၼွၼ်းလိုၵ်း လႄႈ ႁဵတ်းႁႂ်ႈတႃၼွၼ်းဢမ်ႇဢိမ်ႇ။ ၵွပ်ႈၼၼ်လႄႈ ၼႂ်းဝၼ်းလိုဝ်ႈၼၼ်ႉ ၼင်ႇႁိုဝ်ဢဵၼ်ႁႅင်း (energy) တေၶိုၼ်းတဵမ်တူဝ်မႃးၼၼ်ႉ ထုၵ်ႇလီၼွၼ်းပၼ် ႁႂ်ႈတႃၼွၼ်းဢိမ်ႇယူႇ။
- တူမ်ႈႁုင်ၵိၼ် တၢင်းၵိၼ်တၢင်းယႅမ်ႉ ဢၼ်ၸဝ်ႈၵဝ်ႇၶႂ်ႈၵိၼ်
မၢင်ဝၼ်းၼႆႉ ယွၼ်ႉၵၢၼ်သုၵ်ႉသေ တႃႇတေၵိၼ်ၶဝ်ႈၼႂ်ၵူၺ်းၵေႃႈ ယင်းလႆႈႁိမ်ၶၢဝ်းယၢမ်း သေၵိၼ်လူးၵွၼ်ႇ။ ၵွပ်ႈၼၼ်လႄႈ ၼႂ်းဝၼ်းလိုဝ်ႈၼၼ်ႉ ထုၵ်ႇလီပၼ်ၶၢဝ်းယၢမ်းတူဝ်ၸဝ်ႈ ၵဝ်ႇသေ တူမ်ႈႁုင်ၵိၼ် ၶဝ်ႈၽၵ်း၊ တၢင်းၵိၼ်တၢင်းယႅမ်ႉ ဢၼ်ၸဝ်ႈၵဝ်ႇၶႂ်ႈၵိၼ်၊ လႆႈၸႂ်ၵိၼ် ၼၼ်ႉယူႇ။ သင်ဝႃႈ ဢမ်ႇပေႃးမေႃတူမ်ႈႁုင်ၼႆၸိုင် ႁႃလဵပ်ႈႁဵၼ်းတူၺ်း လွၵ်းလၢႆးႁုင် ၶဝ်ႈ ၽၵ်းဢၼ်ငၢႆႈငၢႆႈ ၼႂ်း YouTube သေ ၸၢမ်းၶတ်းၸႂ်တူမ်ႈႁုင်တူၺ်းၵေႃႈလႆႈယူႇ။
- ၵႂႃႇဢႅဝ်ႇလႄႇ ဢွင်ႈတီႈဢၼ်ပႆႇယၢမ်ႈႁွတ်ႈ
ၼႂ်းဝၼ်းလိုဝ်ႈၼၼ်ႉ သင်ဝႃႈဢမ်ႇၶႂ်ႈယူႇတီႈႁွင်ႈ/တီႈႁိူၼ်းၸိုင် ၵႂႃႇဢႅဝ်ႇလႄႇဢွင်ႈတီႈမႂ်ႇမႂ်ႇ တီႈဢၼ်ပႆႇယၢမ်ႈထိုင်သေ ႁႃတူဝ်ထူပ်းမႂ်ႇမႂ်ႇၵေႃႈ ပဵၼ်လွင်ႈလီယူႇဢၼ်ၼိုင်ႈ။ ၵႂႃႇဢႅဝ်ႇၸွမ်း ၵူၼ်းၼႂ်းမုင်ႉႁေႃႁိူၼ်းၸဝ်ႈၵဝ်ႇ ဢမ်ႇၼၼ် ဢႅဝ်ႇၸွမ်းဢူၺ်းၵေႃႉသေ သၢင်ႈႁႂ်ႈပဵၼ်မႃး ၶၢဝ်းယၢမ်းဢၼ်မီးၵႃႈၶၼ် (Quality Time)။
- ႁဵတ်းၵၢၼ်ႁိူၼ်း ဢၼ်ၸဝ်ႈၵဝ်ႇဢမ်ႇပႆႇတၼ်းလႆႈႁဵတ်း
သင်ဝႃႈ ဢမ်ႇလႆႈၸႂ် ၵႂႃႇဢႅဝ်ႇလႄႇတၢင်းၼွၵ်ႈ/တၢင်ႇတီႈၸိုင် ယူႇတီႈႁွင်ႈ/တီႈႁိူၼ်းသေ ႁဵတ်း လွင်ႈမူတ်းသႂ်၊ သၵ်ႉၶူဝ်းလွႆးၶူဝ်းၵေႃႈလႆႈ၊ ယွၼ်ႉပိူဝ်ႈဝႃႈ ပေႃးၸွမ်းႁိမ်းႁွမ်းႁဝ်းယူႇသဝ်း မီး လွင်ႈမူတ်းသႂ်လီၸိုင် တေႁဵတ်းႁႂ်ႈၸႂ်ႁဝ်းၸိုၼ်ႈပၢင်ႇမႃးၸွမ်း။ ၵွပ်ႈၼၼ် ၼႂ်းဝၼ်းလိုဝ်ႈ ၼၼ်ႉ ထုၵ်ႇလီပၼ်ၶၢဝ်းယၢမ်းမွၵ်ႈ 1 ၸူဝ်ႈမူင်းၼႆႉသေ ႁဵတ်းလွင်ႈမူတ်းသႂ် ၼႂ်းႁိူၼ်း ၸွမ်း ဢွင်ႈတီႈၸဝ်ႈၵဝ်ႇယူႇသဝ်းယူႇ။
- တမ်းဝၢင်းၽႅၼ်ၵၢၼ် (Plan) တႃႇဝူင်ႈတေမႃး
လွင်ႈတၢင်း ဢၼ်ႁႂ်ႈတမ်းဝၢင်း ၽႅၼ်ၵၢၼ် (Plan)ၼႆႉတႄႉ ၼင်ႇႁိုဝ်တေလတ်းၶၢမ်ႈ ဝူင်ႈ တေ မႃး ၼၼ်ႉၵႂႃႇလႆႈငၢႆႈလူမ် မိူၼ်ၼင်ႇ ၼႂ်းဝူင်ႈတေမႃးၼၼ်ႉ တေႁဵတ်းသင်၊ တေၶႂ်ႈလဵပ်ႈႁဵၼ်း သင်၊ တေၸႂ်ႉတိုဝ်းငိုၼ်း ၵႃႈၸႂ်ႉၸၢႆႇၸိူင်ႉႁိုဝ် ၸဵမ်ၸိူဝ်းၼႆႉ။
- တမ်းဝၢင်းဝႆႉ ၶၢဝ်းယၢမ်းတႃႇတူဝ်ၸဝ်ႈၵဝ်ႇ
ၼႂ်းဝၼ်းလိုဝ်ႈၼၼ်ႉ ၼင်ႇႁိုဝ်တေႁဵတ်းလႆႈ ဢၼ်ၸဝ်ႈၵဝ်ႇၶႂ်ႈႁဵတ်းၼၼ်ႉ လူဝ်ႇလႆႈတမ်း ဝၢင်းဝႆႉ ၶၢဝ်းယၢမ်းတႃႇတူဝ်ၸဝ်ႈၵဝ်ႇႁင်းၶေႃၵွၼ်ႇ၊ ပေႃးဢမ်ႇၼၼ်ၸိုင် ၶၢဝ်းယၢမ်းတေ သဵင်ႈၵႂႃႇၸွမ်း လွင်ႈၼွၼ်းၼိူဝ်ၽႃႈသေ လဵၼ်ႈၾူၼ်းၵူၺ်း။ ၵွပ်ႈၼၼ် သင်ထိုင်ဝၼ်းလိုဝ်ႈ ၸိုင် ႁႂ်ႈဝူၼ်ႉ/ႁဵတ်းသဵၼ်ႈမၢႆဝႆႉဝႃႈ ၸဝ်ႈၵဝ်ႇတေၶႂ်ႈႁဵတ်းသင်လၢႆလၢႆၸဵမ်ၸိူဝ်းၼႆႉ၊ ၶတ်းၸႂ် ႁဵတ်းတူၺ်း ႁႂ်ႈၶၢဝ်းယၢမ်းလိုဝ်ႈ လႄႈတၢင်း ၶၢဝ်းယၢမ်းႁဵတ်းလွင်ႈတူင်ႉၼိုင်သေဢၼ်ဢၼ် မီးလွင်ႈၽဵင်ႇပဵင်းၵၼ်။
- လဵပ်ႈႁဵၼ်းသေဢၼ်ဢၼ်
ဝၼ်းလိုဝ်ႈၼႆႉ ပဵၼ်ၶၢဝ်းယၢမ်းလီ တွၼ်ႇတႃႇၸဝ်ႈၵဝ်ႇ တေဢဝ်ၸႂ်ႉတိုဝ်း လဵပ်ႈႁဵၼ်းဢၼ်ၶႂ်ႈ ႁူႉၶႂ်ႈမေႃ။ ယွၼ်ႉပိူဝ်ႈဝႃႈ ၼႂ်းဝၼ်းႁဵတ်းၵၢၼ်ၼၼ်ႉ လႆႈႁဵတ်းၵၢၼ်ႁိူဝ်ႉမွႆႈဝႆႉတၢင်းဝၼ်းယဝ်ႉ လႄႈ မီးၸႂ်ၶႂ်ႈလဵပ်ႈႁဵၼ်းယူႇသေတႃႉ တူဝ်ႁဝ်းတေဢမ်ႇႁဵတ်းလႆႈၸွမ်းၼင်ႇၸႂ်ၶႂ်ႈပဵၼ်။
ၼႂ်းဝၼ်းလိုဝ်ႈၼၼ်ႉ ၸၢင်ႈႁဵတ်းလႆႈ မိူၼ်ၼင်ႇ ႁႃတူၺ်း Video ဢၼ်ၸဝ်ႈၵဝ်ႇသူၼ်ၸႂ် တီႈၼႂ်း YouTube၊ ထွမ်ႇ Podcast ဢမ်ႇၼၼ်ႇ Audio Book ၸိူဝ်းၼႆႉ။
- ပၼ်ၶၢဝ်းယၢမ်း ၵူၼ်းၼႂ်းမုင်ႉႁေႃႁိူၼ်း
သင်ဝႃႈလႆႈယူႇႁၢင်ႇၵႆၵၼ်တၢင်း ပေႃႈမႄႈပီႈၼွင်ႉ၊ ၵူၼ်းၼႂ်းၼႃႈႁိူၼ်းၸဝ်ႈၵဝ်ႇဝႆႉၸိုင် ႁႂ်ႈ တႅမ်ႈလိၵ်ႈ ဢမ်ႇၼၼ် သိုပ်ႇၾူၼ်းဢုပ်ႇလၢတ်ႈတေႃႇၶဝ်။ ၶတ်းၸႂ်ၵပ်းသိုပ်ႇလၢတ်ႈတေႃႇ ဢူၺ်းၵေႃႉ၊ ၵူၼ်းမိုတ်ႈၵိုဝ်းႁူႉၸၵ်းၵၼ် ၸိူဝ်းၼႆႉ။ ယွၼ်ႉပိူဝ်ႈ မၢင်ပွၵ်ႈၵၢၼ်သုၵ်ႉလႄႈ တေဢမ်ႇမီးၶၢဝ်းယၢမ်း လႆႈလၢတ်ႈတေႃႇၵပ်းသိုပ်ႇၵၼ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ