ၽွင်းသိုၵ်းမၢၼ်ႈထူဝ်းသိုၵ်းၶဝ်ႈၼႂ်းၸႄႈဝဵင်းဝၢၼ်ႈငႂ်ႈ (ယႂႃႇငၢၼ်ႇ) ၸိုင်ႈတႆးပွတ်းၸၢၼ်းၼၼ်ႉ ပူႇၵႄႇ လႄႈ ၵူၼ်းမိူင်း ထုၵ်ႇၵူၼ်းဢမ်ႇႁူႉၾၢႆႇၶဝ်ႈမႃး ၶႃႈႁႅမ်တၢႆ ။

ၼႂ်းဝၼ်းတီႈ 28/10/2025 မီးၸုမ်းဢမ်ႇႁူႉၾၢႆႇၶဝ်ႈၼႂ်းဝၢၼ်ႈၵျွၵ်ႉပီႉသပ်ႉ ( ကျောက်ပိဇပ် ) သေ ယိုဝ်းပူႇၵႄႇလုင်းတိၼ်ႉဝေႇ( ဦးတင့်ဝေ) ဢႃယု 40 ပီလႄႈ ၺီႇထုတ်ႉ(ညီထွဋ် ) ဢႃယု 30 ပီ တၢႆထင်တီႈ။  

ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ပူႇၵႄႇလႄႈ ၵူၼ်းဝၢၼ်ႈၵေႃႉၼိုင်ႈ ထုၵ်ႇၶႃႈႁႅမ်ထႅင်ႈ ၊ ပဵၼ်ၸုမ်းလႂ်မႃး ၶႃႈႁႅမ်ဢၼ်ဝႃႈၼၼ်ႉတႄႉ တိုၵ်ႉၵူတ်ႇထတ်းတွင်ႈထၢမ်ႇဝႆႉယူႇ ၊ ပူႇၵႄႇလႄႈ ၵူၼ်းဝၢၼ်ႈ ဢၼ်ထုၵ်ႇၶႃႈႁႅမ်ၼႆႉ ပဵၼ်ၵူၼ်းၸမ်ၸႂ်ၵၼ်တင်းသိုၵ်းမၢၼ်ႈ ၊ ပူႇၵႄႇ ၵၢင်ႉၵႄႇ ၵႆႉထုၵ်ႇၶႃႈႁႅမ်ၼႃႇလႄႈ ၽႂ်ၵေႃႈဢမ်ႇၶႂ်ႈႁဵတ်းပူႇၵႄႇယဝ်ႉ”- ဝႃႈၼႆ ။

ဝၢႆးၵၢင်ႉၵႄႇၺႃးၶႃႈႁႅမ်တၢႆယဝ်ႉ ပလိၵ်ႈ သိုၵ်းမၢၼ်ႈ ထႅမ်ႁႅင်းသိုၵ်းသေ လိုပ်ႈလမ်းၵူတ်ႇထတ်း ၼႂ်းပိုၼ်ႉတီႈ ႁၢဝ်ႈႁႅင်း။

ပဵၼ်ၼမ်ႉမိုဝ်းၽႂ်မႃးၶႃႈႁႅမ်တၢႆၼႆ ဢမ်ႇႁူႉလႆႈတႅတ်ႈတေႃးသေတႃႉ –  သိုၵ်းမၢၼ်ႈၼႆႉတႃႇႁဵတ်း ႁႂ်ႈၵူၼ်းမိူင်းၸင်းၸုမ်းလုၵ်ႉၽိုၼ်ႉ တႃႇၸုမ်းလုၵ်ႉၽိုၼ်ႉ တေဢမ်ႇလႆႈတၢင်းၵမ်ႉၸွႆႈ တီႈၵူၼ်းမိူင်းၼၼ်ႉ မေႃၸႂ်ႉလွၵ်းလၢႆးႁဵတ်းသၢင်ႈမႃးတႃႇသေႇ။ ၵွပ်ႈၼႆ ပဵၼ်ၽႂ်ၶႃႈႁႅမ်- ယွၼ်ႉသင်ၼႆ ပႆႇၸၢင်ႈယိုၼ်ယၼ်။

တီႈဝဵင်းယႂႃႇငၢၼ်ႇၼႆႉၼွၵ်ႈလိူဝ်သိုၵ်းမၢၼ်ႈလႄႈ ပျီႇတူႉၸိတ်ႉပဢူဝ်း PNO ယဝ်ႉ မီးၸုမ်းလုၵ်ႉၽိုၼ်ႉ သိုၵ်းမၢၼ်ႈမိူၼ်ၼင်ႇ သိုၵ်း PDF ၼႂ်းပိုၼ်ႉတီႈ လႄႈသိုၵ်းထၼူႉ DSNDA  ၶဝ်တူင်ႉၼိုင်ယူႇသဝ်းဝႆႉ။

လိူဝ်ၼၼ်ႉ ၸုမ်းသိုၵ်းထၼူႉ DSNDA ပိုၼ်ၽၢဝ်ႇလၢတ်ႈဝႃႈ ၼႂ်းဝၼ်းတီႈ 30/10/2025 ၽွင်းသိုၵ်းမၢၼ်ႈ တေႃႉသူင်ႇတင်းၵိၼ် ၼႂ်းဢိူင်ႇယၼႄးၼၼ်ႉ သိုၵ်းထၼူႉ ထူဝ်းသိုၵ်းလေႃႇတိုၵ်းလႄႈ ၾၢႆႇသိုၵ်းမၢၼ်ႈ  တၢႆ 2 ၵေႃႉမၢတ်ႇၸဵပ်း ၵေႃႉၼိုင်ႈ ဝႃႈၼႆ  ။ 

ၼႂ်းဝၼ်းတီႈ 5/10/2025 ၽူႈၵွၼ်းဝၢၼ်ႈတပ်ႉၵုင်း ဢူးပႃႉမူၺ်း ဢႃယု- 45 ပီလႄႈ ၽူႈၶဝ်ႈၸုမ်းၾၢႆႇႁူမ်ႇလူမ်ႈပိုၼ်ႉတီႈ ဢူးမဵဝ်းၵျေႃႇ ဢႃယု – 39  ပီ ၺႃးၸုမ်းဢမ်ႇႁူႉၾၢႆႇ ဢဝ်မိတ်ႈတႅင်း ၶႃႈႁႅမ်တၢႆ တီႈပွၵ်ႉမဵဝ်ႉၵူင်း ၼႂ်းဝဵင်းယႂႃႇငၢၼ်ႇဝႃႈၼႆ ။

မိူၼ်ၼင်ႇၼႆ ဝၼ်းတီႈ 26/11/2024 ယၢမ်းၵၢင်ၶမ်ႈ 6 မူင်းၼၼ်ႉၵေႃႈ   ၵၢင်ႉၵႄႇဝၢၼ်ႈ ၽယႃးၵျီးၵူင်း ဝဵင်းယႂႃႇငၢၼ်ႇ တိုၵ်ႉဢုၵ်ႇၵၼ်တင်းၵူၼ်းဝၢၼ်ႈၵေႃႉၼိုင်ႈယူႇၼၼ်ႉ မီးၽူႈၸၢႆးဢမ်ႇႁူႉၾၢႆႇ 2 ၵေႃႉ  ၶဝ်ႈႁိူၼ်းမႃးယိုဝ်းတၢႆထင်တီႈ တင်းၵၢင်ႉၵႄႇလႄႈၵူၼ်းဝၢၼ်ႈ တင်း 2 ၵေႃႉ   ။

ၸူဝ်ႈသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ တီႈဝဵင်းယႂႃႇငၢၼ်ႇၼႆႉ ၵၢင်ႉၵႄႇ ၵွၼ်းဢိူင်ႇ  ၵမ်းၵမ်းၺႃးၶႃႈႁႅမ်တၢႆ၊  ပေႃးပႃးၵမ်းၼႆႉ မီး 5 ပွၵ်ႈယဝ်ႉ၊  ဢမ်ႇႁူႉပဵၼ်ၽႂ် ၸုမ်းလႂ်လူင်းမိုဝ်းၶႃႈႁႅမ်တၢႆ။  ငဝ်းလၢႆးၸိူင်ႉၼႆ ၽႂ်ၵေႃႈဢမ်ႇႁတ်း/ ဢမ်ႇၶႂ်ႈႁဵတ်း ၵၢင်ႉၵႄႇ  ၵွၼ်းဢိူင်ႇထႅင်ႈယဝ်ႉ ၵူၼ်းပိုၼ်ႉတီႈလၢတ်ႈၼင်ႇၼႆ။