သိုၵ်းမၢၼ်ႈသီႇပေႃႉ ထႅမ်ႁႅင်းသိုၵ်းၶိုၼ်ႈၸူးၼမ်ႉတူႈ ဢိူမ်ႈၸမ်ၶူဝ်တႃႈတေႈ ၼႂ်းၵႄႈ သီႇပေႃႉ – ၼမ်ႉတူႈ ၸိုင်ႈတႆးပွတ်းႁွင်ႇ ႁဵတ်းႁႂ်ႈၵူၼ်းမိူင်း ဝဵင်းၼမ်ႉတူႈ ဢွၼ်ၵၼ်မႆႈၸႂ်လွင်ႈႁူမ်ႇလူမ်ႈ သေ ငိူင်ႉပၢႆႈထႅင်ႈဝႃႈၼႆ ။  

ၼႂ်းဝၼ်းတီႈ 21/10/ 2025 ယၢမ်းႁူဝ်ၶမ်ႈ 5 မူင်းၼၼ်ႉ သိုၵ်းမၢၼ်ႈ ၶလယ 23   ဝဵင်းသီပေႃႉ ထူဝ်းသိုၵ်းၶဝ်ႈၼႂ်းဝၢၼ်ႈၶုၼ်ၸၢင်ႈလဵၵ်း ၊ ဝၢၼ်ႈတႃႈတေႈ သေ  ႁိုၵ်ႉၸုၼ်ၽႃႇၺႃး  သိုၵ်းတဢၢင်းလႄႈ လႆႈပိုတ်းယိုဝ်းတိုၵ်းတေႃးၵၼ်။  ၵူၼ်းမိူင်းၼႂ်းၸႄႈဝဵင်းၼမ်ႉတူႈ ပၢႆႈၽေးသိုၵ်းဝႆႉထႃႈ ဢမ်ႇယွမ်း 400 ၵေႃႉ။

ပီႈၸၢႆး ၵူၼ်းမိူင်းဝဵင်းသီႇပေႃႉ လၢတ်ႈၽူႈတွႆႇႁွၵ်ႈဝႃႈ – “ မိူဝ်ႈဝႃး သိုၵ်းမၢၼ်ႈတင်း သိုၵ်းတဢၢင်း ပဵၼ် ပၢင်တိုၵ်းၵၼ်ႁိမ်းၶူဝ်တႃႈတေႈ ။ ၾၢႆႇသိုၵ်းတဢၢင်းထွႆဢွၵ်ႇ ယၢမ်းလဵဝ် သိုၵ်းမၢၼ်ႈ ဢဝ်တီႈ ယူႇဝႆႉတီႈၶူဝ် တႃႈတေႈယဝ်ႉ ၊ ပေႃးပူၼ်ႉၵႂႃႇၶူဝ်တႃႈတႄႈယဝ်ႉၵေႃႈ ပဵၼ်လႅၼ်လိၼ် ၼမ်ႉတူႈယဝ်ႉ လႄႈ ၵူၼ်းမိူင်းပိုၼ်ႉတီႈဢွၼ်ၵၼ်မႆႈၸႂ် လႆႈငိူင်ႉပၢႆႈၽေးသိုၵ်းထႅင်ႈ ”- ဝႃႈၼႆ ။

ၵူၼ်းမိူင်းၼႂ်းၸႄႈဝဵင်းၼမ်ႉတူႈ ဢၼ်ပၢႆႈၽေးသိုၵ်းဝႆႉၼႆႉပဵၼ်ၵူၼ်းတၢင်း ဝၢၼ်ႈလီႈ ၊ ဝၢၼ်ႈယေႇဢူဝ်း ၊ ဝၢၼ်ႈၼႃးၶူဝ်လႅင်  ၊ ဝၢၼ်ႈပၢင်ႇလူင် ၊ ဝၢၼ်ႈမႂ်ႇ ၊  မိူင်းမူႉ ၊ ဝၢၼ်ႈၵွင်းႁုင်း ၊ ဝၢၼ်ႈၸၢမ် ၊ ဝၢၼ်ႈၼမ်ႉတွင်ႇၵုင်း ၊  ဝၢၼ်ႈပၢင်သပေႇ ၊ ဝၢၼ်ႈၶူဝ်ၽိူၵ်ႇ ၊ ဝၢၼ်ႈၽုၺ်း ၊ ဝၢၼ်ႈ ႁၢတ်ႇလႅင် ၊ ဝၢၼ်ႈသႅင်ႇၸႃႇ ၊ ဝၢၼ်ႈပဵင်းလွင်း ၊ ဝၢၼ်ႈၵွင်းသႃႇ ၊ ဝၢၼ်ႈပၢင်မၢၼ်ႈ ၊ ဝၢၼ်ႈၼမ်ႉၵၢၼ်ႇ ၊ ဝၢၼ်ႈသၢႆးၶၢဝ်ၸိူဝ်းၼႆႉ။ ၸိူဝ်းၶဝ် ပၢႆႈၵႂႃႇတၢင်း ဝဵင်းလႃႈသဵဝ်ႈ ၊ ဝဵင်းတၢင်ႉယၢၼ်း – လႆႈႁူႉၼင်ႇၼႆ။

ၵူၼ်းၸိူဝ်းပၢႆႈၵေႃႈပၢႆႈ၊ ၵူၼ်းၸိူဝ်းပႆႇလႆႈဢဝ်မၢၵ်ႇၶဝ်ႈတဝ်ႈၼမ်ႉလႄႈ ပႆႇၸၢင်ႈပၢႆႈၵေႃႈမီး။   ယွၼ်ႉပိူဝ်ႈ ဢမ်ႇမီးငိုၼ်းလႄႈ ၵူဝ်ပဵၼ်ပၢင်တိုၵ်းယူႇၵေႃႈ ဢမ်ႇၸၢင်ႈငိူင်ႉပၢႆႈၵေႃႈ မီးတင်းၼမ်ၼႆ – ၵူၼ်းပိုၼ်ႉတီႈလၢတ်ႈထႅင်ႈၼင်ႇၼႆ ။

ပီႈၸၢႆး ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈထႅင်ႈဝႃႈ -“ပဵၼ်ၽွင်းဢဝ်မၢၵ်ႇၶဝ်ႈတဝ်ႈၼမ်ႉၼႂ်းသူၼ် ပဵၼ်ၽွင်းဢဝ်ၶဝ်ႈၵၢပ်ႇ ၊ ဢမ်ႇပႆႇၸၢင်ႈဢဝ်သင်သေဢိတ်း။ ဢၼ်ပွႆႇၶူဝ်းသူၼ်သေပၢႆႈၵေႃႈပၢႆႈ။  ၵူၺ်းၵႃႈ  ပေႃးပဵၼ်ပၢင်တိုၵ်းတႄႉ  မၢၵ်ႇၶဝ်ႈတဝ်ႈၼမ်ႉဢၼ်ၽုၵ်ႇဝႆႉၸိူဝ်းၼၼ်ႉ တေသုမ်းမူတ်းယဝ်ႉ”- ဝႃႈၼႆ ။  

ၵူၼ်းဝၢၼ်ႈတႃႈတေႈတႄႉ ၵွၼ်ႇၼႃႈၼႆႉ သိုၵ်းတဢၢင်းၸွႆႈဢဝ်တၢင်ႇႁိူဝ်းၶၢမ်ႈၼမ်ႉသေ ပၢႆႈၽေးသိုၵ်း ဝႆႉၸဵမ်လႂ် ၵမ်းဢိတ်းဢိတ်း။ ဢၼ်ၵိုတ်းၼႂ်းဝၢၼ်ႈယၢမ်းလဵဝ်  မွၵ်ႈ 200 တႄႉဢမ်ႇ သိုပ်ႇပၢႆႈထႅင်ႈ။ ယၢမ်းလဵဝ်မီးသိုၵ်း SSPP ၶဝ်ႈမႃးတူင်ႉၼိုင်ယူႇဝႆႉႁိမ်းဝၢၼ်ႈသေ လၢတ်ႈဝႃႈ တေဢဝ်ႁူမ်ႇလူမ်ႈပၼ်ဝႃႈၼႆဝႆႉ – ၵူၼ်းဝၢၼ်ႈတႄႉလၢတ်ႈၼင်ႇၼႆ။

ၵူၺ်းၵႃႈယူႇတီႈၽူႈတွႆႇႁွၵ်ႈသေ ၵပ်းသိုပ်ႇၸူးၽူႈၵဵဝ်ႇၶွင်ႈပႆႇလႆႈလႄႈပႆႇၸၢင်ႈယိုၼ်ယၼ်။

မိူၼ်ၼင်ႇၼႆ တႄႇႁူဝ်လိူၼ် ဢွၵ်ႊထူဝ်ႊပိူဝ်ႊ ၼႆႉမႃး သိုၵ်းမၢၼ်ႈ ၵႆႉၵႆႉၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းၵၢင်ဝဵင်းၼမ်ႉတူႈ လႄႈ ၵူၼ်းမိူင်းလႆႈငိူင်ႉပၢႆႈယဝ်ႉ ၵမ်းၼိုင်ႈ ။ ယၢမ်းလဵဝ် သိုၵ်းမၢၼ်ႈ တင်းသိုၵ်း တဢၢင်း ပဵၼ်ပၢင်တိုၵ်းၵၼ် ၸမ်ဝဵင်းၼမ်ႉတူႈမႃးယဝ်ႉလႄႈ ၵူၼ်းမိူင်းဢွၼ်ၵၼ်ငိူင်ႉပၢႆႈထႅင်ႈ   ၊ ၵူၼ်း ပိုၼ်ႉတီႈလႆႈပၢႆႈပၢႆႈပွၵ်ႈပွၵ်ႈ  လႄႈဢမ်ႇၸၢင်ႈႁႃၵိၼ်လဵင်ႉတွင်ႉလီလီ – ၵူၼ်းမိူင်းဝဵင်းၼမ်ႉတူႈ လၢတ်ႈ ၼင်ႇၼႆ ။

လိူဝ်ၼၼ်ႉ တီႈဝဵင်းၼမ်ႉတူႈလႄႈ ႁိမ်းႁွမ်းဝဵင်း လႅင်းၾူၼ်ႊ လႅင်းဢိၼ်ႊထိူဝ်ႊၼႅတ်ႊ ၶၢတ်ႇဝႆႉ ၊ ပေႃးၶႂ်ႈၵပ်းသိုပ်ႇၵၼ်ၼႆႉ လႆႈၵႂႃႇတၢင်း   မိူင်းယဵၼ်  ဢၼ်ယၢၼ်ၵႆၵၼ်တင်း ဝဵင်းၼမ်ႉတူႈမွၵ်ႈ 10 လၵ်း – 15 လၵ်းၼႆႉၼႆ – ၵူၼ်းၸၢႆးပိုၼ်ႉတီႈလၢတ်ႈ ။

ဝဵင်းၼမ်ႉတူႈၼႆႉ ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 ပွၵ်ႈၵမ်း 2 မႃး သိုၵ်းတဢၢင်း (TNLA) ၵုမ်းၵမ်ဝႆႉသေ ပၼ်ႇၵၢၼ်ၽွင်းငမ်းဝႆႉ  ။

ယၢမ်းလဵဝ် ၸမ်ပၢင်လိူၵ်ႈတင်ႈ မႃးၵိုတ်းယူႇၶၢဝ်းတၢင်းမွၵ်ႈ 2 လိူၼ်။ သိုၵ်းမၢၼ်ႈထႅမ်ႁႅင်းသိုၵ်းတၢင်းလိၼ် တၢင်းၵၢင်ႁၢဝ်သေပိုတ်းယိုဝ်းတိုၵ်းတေႃး ဝဵင်းၸိူဝ်းဢၼ်တူၵ်းဝႆႉၼႂ်းမိုဝ်းၸုမ်းလုၵ်ႉၽိုၼ်ႉၶဝ်ဝႆႉဢမ်ႇထၢတ်ႇဢမ်ႇဝၢႆး ၸဵမ်ၼႂ်းမိူင်းတႆးလႄႈ မိူင်းမၢၼ်ႈတူင်ႈပဵင်း။