ၸုမ်းၾၢႆႇၸွႆႈထႅမ်လုၵ်ႈဢွၼ်ႇ ၸၢတ်ႈၸိုင်ႈလုမ်ႈၾႃႉ (UNICEF) ႁၢႆးငၢၼ်းဝႃႈ – ၼႂ်းလုမ်ႈၾႃႉၼႆႉ လုၵ်ႈဢွၼ်ႇ ပီးလူၼ်ႉပူၼ်ႉလိူဝ် မီးၼမ်မႃးၵူႈမိုဝ်ႉၵူႈဝၼ်း။  ပဵၼ်ဢၼ်လီတူၵ်းၸႂ်လႂ်တိုၼ်ႇ။ လ

ၼႂ်းလုမ်ႈၾႃႉၼႆႉ လုၵ်ႈဢွၼ်ႇဢႃယု ၼႂ်းၵႄႈ 5 ၶူပ်ႇထိုင် ႁိမ်းႁွမ်း 19 ပီ ( ၼႂ်းလုၵ်ႈဢွၼ်ႇ 10 ၵေႃႉ ၼၼ်ႉ တႃႇ 1 ၵေႃႉ ပဵၼ်ပီးလူၼ်ႉလိူဝ်ဝႆႉ)။ သင်ဢဝ်ႁူဝ်ၼပ်ႉဝႃႈၸိုင် ၶၢတ်ႈလၢမ်းဝႃႈမီးထိုင် 188 လၢၼ်ႉ ၼႆယဝ်ႉ။

ၽူႈၶူၼ်ႉၶႂႃႉၶဝ် ထတ်းသၢင်လၢတ်ႈဝႃႈ လွင်ႈၼႆႉပဵၼ်မႃးယွၼ်ႉ လႅၵ်ႈလၢႆးတၢင်းၵိၼ်တၢင်းယႅမ်ႉ၊ လုၵ်ႉ တီႈၵိၼ်တၢင်းၵိၼ်တၢင်းတၢင်းယႅမ်ႉဢၼ်ယၢမ်ႈၵိၼ်ယူႇတႃႇသေႇၼၼ်ႉသေ ဢွၼ်ၵၼ်လႅၵ်ႈလၢႆႈ မႃးၵိၼ် တၢင်းၵိၼ်ဢၼ်ၵႃႈၶၼ်ထုၵ်ႇ၊ ဢၼ်ၶိုၼ်းမႄး ၾၢင်ႁၢင်ႈတၢင်းၵိၼ်- ႁဵတ်းႁႂ်ႈ မီးထၢတ်ႈၵႄႊလူဝ်ႊရီႊသုင်  ၸဵမ် ၸိူဝ်းၼႆႉ။ 

ယွၼ်ႉၼၼ်လႄႈ ယူႇတီၸုမ်း UNICEF သေ တိုၵ်းသူၼ်းထိုင် ႁႂ်ႈလူင်ပွင်ၸိုင်ႈၶဝ် တမ်းဝၢင်းမူႇပိူင်၊ ႁႄႉ ႁၢမ်ႈဢဝ်လိူင်ႈ လွင်ႈၶၢႆလႄႈ ၶႂၢၵ်ႈလွၵ်းၵၢတ်ႇတၢင်းၵိၼ် ၸိူဝ်းမီးၵႄႊလူဝ်ႊရီႊသုင်၊ ၵၢၼ်ငၢၼ်း ၸိူဝ်း ႁဵတ်းဢွၵ်ႇတၢင်းၵိၼ်တၢင်းယႅမ်ႉသေ မူၼ်ႉမႄးႁဵတ်းဝႆႉလူၼ်ႉလိူဝ် ဢမ်ႇမႅၼ်ႈၸွမ်းပၢႆးယူႇလီ ၸိူဝ်း ၼၼ်ႉ ဝႃႈၼႆ။

လွင်ႈပီးလူၼ်ႉလိူဝ် လႄႈ လွင်ႈၶၢတ်ႇထၢတ်ႈဢႁႃႇရ

မိူဝ်ႈၽွင်းလၢတ်ႈလွင်ႈ လုၵ်ႈဢွၼ်ႇၸိူဝ်း ဢႁႃႇရ ဢမ်ႇတဵမ်ထူၼ်ႈၼၼ်ႉ ၽူႈလူင်ႉလႅၼ်ႇ ၾၢႆႇပၢႆး ယူႇလီၶဝ် တေၵႆႉၸႂ်ႉတိုဝ်း ၶေႃႈၵႂၢမ်းဢၼ်ဝႃႈ လုၵ်ႈဢွၼ်ႇၸိူဝ်းၼမ်ႉၼၵ်းတူဝ် ဢမ်ႇတဵမ်ထူၼ်ႈ ၼႆ ယူႇ။

ထိုင်မႃးယၢမ်းလဵဝ်  ဢမ်ႇၸႂ်ႈၸိူင်ႉၼၼ်ႉယဝ်ႉ။ ယၢမ်းလဵဝ် တီႈပွင်ႇၵႂၢမ်းမၢႆဢၼ်ၼႆႉ ပဵၼ်ပႃးတွၼ်ႈ တႃႇ လွင်ႈပီးလူၼ်ႉလိူဝ် ဢၼ်မႃးတုမ်ႉယွၼ်ႈၼိူဝ် ပၢႆးယူႇလီ လႄႈ လွင်ႈႁုၼ်ႈမုၼ်းၶိုၼ်ႈယႂ်ႇ လုၵ်ႈ ဢွၼ်ႇ ဝႆႉ၊ ဢမ်ႇလိူဝ်သေ ဝၢၼ်ႈမိူင်းၸိူဝ်းၵွတ်းၽၢၼ်ၼၼ်ႉၵေႃႈ ယင်းလႆႈမႆႈၸႂ် လွင်ႈပၼ်ႁႃဢၼ် ၼႆႉ  ဝႆႉယူႇ။

ဢိင်ၼိူဝ် ပဵၼ်ၸၢႆး/ယိင်း၊ ဢႃယု ၊ တၢင်းသုင်လုၵ်ႈဢွၼ်ႇသေ သင်ဝႃႈၼမ်ႉၼၵ်းတူဝ်ၶိင်း ၼမ်လိူဝ်သေ ဢၼ်ၵိုင်ႇလီလႆႈမီးၼၼ်ႉၼႆၸိုင် ၼပ်ႉသွၼ်ႇဝႃႈပဵၼ်လွင်ႈပီးလူၼ်ႉလိူဝ် ။

လွင်ႈပီးလူၼ်ႉလိူဝ်ၼႆႉ ပဵၼ်ၾၢင်ႁၢင်ႈဢၼ်ၼႄဝႃႈ ၼမ်ႉၼၵ်းတူဝ်ၶိင်း ၼမ်ၶိုၼ်းမႃးလူၼ်ႉလိူဝ်ႁႅင်း၊ လွင်ႈၼႆႉ ၸၢင်ႈႁဵတ်းႁႂ်ႈပဵၼ် တၢင်းပဵၼ်ၵဵဝ်ႇလူၺ်ႈ သဵၼ်ႈလိူတ်ႈႁူဝ်ၸႂ်လႄႈတၢင်းပဵၼ် ၶႅၼ်ႊသိူဝ်ႊ ၼႂ်းမိူဝ်းၼႃႈၶၢဝ်းယၢဝ်း။

ၼင်ႇႁိုဝ် ဢႁႃႇရတေတဵမ်ထူၼ်ႈ ၽွင်းပၢၼ်ပဵၼ်လုၵ်ႈဢွၼ်ႇၼၼ်ႉ လူဝ်ႇလႆႈၵိၼ်ပၼ် ၽၵ်း ယွတ်ႈ ၼၢင်းၶဵဝ်၊ မၢၵ်ႇမႆႉမၢၵ်ႇတွၵ်ႇ လႄႈ တၢင်းၵိၼ်တၢင်းယႅမ်ႉဢၼ်မီးထၢတ်ႈ ပရူဝ်ႊတိၼ်ႊ တၢင်း ၼမ် တၢင်းလၢႆၼၼ်ႉယူႇ။ လွင်ႈၸိူဝ်းၼႆႉ လမ်ႇလွင်ႈတွၼ်ႈတႃႇ လုၵ်ႈဢွၼ်ႇတေလႆႈႁပ်ႉ ဢႁႃႇရ တဵမ် ထူၼ်ႈ လႄႈ လွင်ႈႁုၼ်ႈမုၼ်းယႂ်ႇသုင်လႆႈလီ။ လိူဝ်ၼၼ်ႉဢမ်ႇၵႃး ပဵၼ်တၢင်းၵမ်ႉၸွႆႈပႃး ၼင်ႇႁိုဝ် ၺၢၼ်ႇမၢႆ တွင်း တေမီးလွင်ႈႁုၼ်ႈမုၼ်းလႄႈ တွၼ်ႈတႃႇလွင်ႈယူႇလီ ပၢႆးၸႂ်ၸိူဝ်းၼႆႉ။

ၼႂ်းၵၢၼ်လဵင်ႉလူ တၢင်းၵိၼ်တၢင်းယႅမ်ႉ လုၵ်ႈဢွၼ်ႇၼၼ်ႉ မၢင်ၸိူဝ်းလဵင်ႉ တၢင်းၵိၼ်ဢၼ်ပိူၼ်ႈႁဵတ်းမႃးတႃႇထႅမ်ႁႅင်း (ၵႂၢမ်းထႆးႁွင်ႉ – ဢႃးႁၢရ်သိူမ်) ၸိူဝ်းဢမ်ႇ မႅၼ်ႈၸွမ်းပၢႆးယူႇလီ ၼင်ႇတၢင်းၵိၼ် ဢၼ်မူၼ်ႉမႄးဝႆႉလိူဝ်ႁႅင်း၊ ဢၼ်ပႃးၵိူဝ်ဝၢၼ်ၼမ်၊ ၵိူဝ်၊ ထၢတ်ႈ ၵသီႇ၊ ၼမ်ႉမၼ်း ၸိူဝ်းဢမ်ႇမႅၼ်ႈၸွမ်းပၢႆးယူႇလီ၊ ၸိူဝ်းၼႆႉပဵၼ်ငဝ်ႈႁၢၵ်ႈ ဢၼ်ႁဵတ်းႁႂ်ႈလုၵ်ႈဢွၼ်ႇ ၶဝ် ပီးလူၼ်ႉလိူဝ် မႃး။

ၽူႈပွင်ၵၢၼ်လူင် တီႈၸုမ်း UNICEF လၢတ်ႈဝႃႈ – ပၼ်ႁႃလွင်ႈပီးလူၼ်ႉလိူဝ်ၼႆႉ ဢမ်ႇထုၵ်ႇလီဝႆႉ မဝ် မၢင်။  ယၢမ်းလဵဝ် သင်လၢတ်ႈလွင်ႈ လုၵ်ႈဢွၼ်ႇဢႃႇႁႃႇရဢမ်ႇတဵမ်ထူၼ်ႈၼႆ ဢမ်ႇၵွမ်ႉၵႃးလုၵ်ႈဢွၼ်ႇ ၸိူဝ်းၼမ်ႉၼၵ်းတူဝ်ဢမ်ႇတဵမ်ၼၼ်ႉၵူၺ်း၊ လုၵ်ႈဢွၼ်ႇ ၸိူဝ်းပီးလူၼ်ႉလိူဝ်မႃး ၼႂ်းၵၢပ်ႈပၢၼ် ယၢမ်းလဵဝ်ၼႆႉၵေႃႈ ပဵၼ်လွင်ႈဢၼ်လီမႆႈၸႂ် ဢၼ်ၼိုင်ႈ ၸၢင်ႈတုမ်ႉတိူဝ်ႉၼိူဝ် ပၢႆးယူႇလီလႄႈ ၵၢၼ်ႁုၼ်ႈမုၼ်းယႂ်ႇသုင်လုၵ်ႈဢွၼ်ႇ။ လွင်ႈၼႆႉ လူဝ်ႇလႆႈၸွႆႈၵၼ် ၵႄႈလိတ်ႈၵႂႃႇ ဝႃႈၼႆ။

ၼႂ်းလုၵ်ႈဢွၼ်ႇ 10 ၵေႃႉၼၼ်ႉ တႃႇၵေႃႉၼိုင်ႈပီးလူၼ်ႉလိူဝ်ဝႆႉ

ဢႁႃႇရဢမ်ႇတဵမ်ထူၼ်ႈ – လွင်ႈၼႆႉ ပဵၼ်ဢၼ်ႁဵတ်းႁႂ်ႈ တူဝ်းၶိင်းလွင်ႈႁုၼ်ႈမုၼ်းၶိုၼ်ႈယႂ်ႇလုၵ်ႈ ဢွၼ်ႇလဵၵ်ႉလႄႈ လုၵ်ႈဢွၼ်ႇၼုမ်ႇၶဝ် ၵိုတ်းယင်ႉၵႂႃႇပႅတ်ႈ ႁဵတ်းႁႂ်ႈၾၢင်ႁၢင်ႈတူဝ်ၶိင်းသေးယွမ်။ ပၼ် ႁႃဢၼ်ၼႆႉ ၵႆႉလႆႈထူပ်းႁၼ် တီႈလုၵ်ႈဢွၼ်ႇ ဢႃယု 5 ၶူပ်ႇလူင်းတႂ်ႈ ၼႂ်းၸိုင်ႈမိူင်းၸိူဝ်း မီးငိုၼ်းၶဝ်ႈ ဢေႇ  လႄႈ ၸိူဝ်းမီးငိုၼ်းၶဝ်ႈပၢၼ်ၵၢင်။

ၸွမ်းၼင်ႇ ၸုမ်း UNICEF ၶဝ်ဢိင်ၼိူဝ်ၸိုင်ႈမိူင်း 190 မိူင်းသေလဵပ်ႈႁဵၼ်းၶူၼ်ႉၶႂႃႉဝႆႉၵမ်းလိုၼ်း သုတ်းၼၼ်ႉ လွင်ႈၼမ်ႉၼၵ်းတူဝ်လုၵ်ႈဢွၼ်ႇ ၼႂ်းၵႄႈဢႃယု 5 ၶူပ်ႇထိုင် 9 ၶူပ်ႇ လူတ်းယွမ်းလူင်း ၼၼ်ႉ ထူပ်းႁၼ်မႃးၸဵမ်မိူဝ်ႈပီ 2000 တဵမ် ။ ၵူၺ်းၵႃႈယၢမ်းလဵဝ် လုၵ်ႉတီႈ 13% သေ ယွမ်းလူင်းၵႂႃႇ ပဵၼ် 9.2% ယဝ်ႉ။

ၾၢႆႇၼိုင်ႈသမ်ႉ လွင်ႈလုၵ်ႈဢွၼ်ႇပီးလူၼ်ႉလိူဝ်ၼႆႉ လုၵ်ႉတီႈမီး 3% ၶိုၼ်ႈသုင်မႃးထိုင်  9.4% ။ ပွင်ႇဝႃႈ ယၢမ်းလဵဝ်ၼႆႉ ၼႂ်းလုၵ်ႈဢွၼ်ႇ 10 ၵေႃႉၼၼ်ႉ တႃႇၵေႃႉၼိုင်ႈ ပီးလူၼ်ႉလိူဝ်ဝႆႉ ၼႆယဝ်ႉ။

ၼႂ်းလုၵ်ႈဢွၼ်ႇ ၸိူဝ်းၼမ်ႉၼၵ်းၼမ်ႁႅင်းၼၼ်ႉ ပႃးဝႆႉလုၵ်ႈဢွၼ်ႇၸိူဝ်းပီးလူၼ်ႉလိူဝ်သေ ၼႂ်းလုၵ်ႈ ဢွၼ်ႇၽွင်းပၢၼ်ၶိုၼ်ႈႁူင်းႁဵၼ်း ဢႃယု 10 ၶူပ်ႇပၢႆ 5 ၵေႃႉၼၼ်ႉ တႃႇ 1 ၵေႃႉၼမ်ႉၼၵ်းတူဝ်ၼမ်လိူဝ် ႁႅင်း ထိုင်တီႈပဵၼ် ပီးလူၼ်ႉလိူဝ်ဝႆႉ ၼႆယဝ်ႉ။

ယူႇတီႈၵၢၼ်ၶူၼ်ႉၶႂႃႉ ဢၼ်ၼိုင်ႈတႄႉၶၢတ်ႈလၢမ်းဝႆႉဝႃႈ သင်ႇၽတ်ႉၽဵင်ႇတူၺ်းၸိုင် တူဝ်ႈလုမ်ႈၾႃႉ ၼႆႉ ႁူဝ်ၼပ်ႉလုၵ်ႈဢွၼ်ႇမီးထိုင် 391 လၢၼ်ႉၵေႃႉ။ ၼႂ်းလုမ်ႈၾႃႉၼႆႉ လိူဝ်သေ သႃႊႁႃႊရ ဢႃႇၾရိၵ လႄႈ ဢေးသျႃး ပွတ်းၸၢၼ်းယဝ်ႉ ၸိုင်ႈမိူင်းၸိူဝ်းၵိုတ်းလိူဝ်ၼၼ်ႉ မီးလုၵ်ႈဢွၼ်ႇပီးလူၼ်ႉလိူဝ်ၼမ် လိူဝ်သေ လုၵ်ႈဢွၼ်ႇၸိူဝ်းၼမ်ႉၼၵ်းတူဝ်ယွမ်း ဝႃႈၼႆ။ 

မိူၼ်ၼင်ႇၸိုင်ႈမိူင်း ၸိူဝ်းမီးငိုၼ်းၶဝ်ႈသုင်/ၼမ် ၸိူဝ်းၼႆႉၵေႃႈ လႆႈႁူပ်ႉၺႃးပၼ်ႁႃ လွင်ႈလုၵ်ႈဢွၼ်ႇ ပီးလူၼ်ႉလိူဝ် ႁၢဝ်ႈႁႅင်းဝႆႉ။ လုၵ်ႈဢွၼ်ႇၼႂ်းၵႄႈဢႃယု 5 ၶူပ်ႇထိုင် 19 ပီသေပီးလူၼ်ႉလိူဝ်ၼႆႉ တီႈမိူင်း ၶျီႇလီႇမီး 27%၊ မိူင်းဢမေႊရိၵၼ်ႊ 21% လႄႈ မိူင်း UAE မီး 21% ။

ၼႂ်းၵႄႈ ဢႃယုသႅၼ်းပၢၼ်ဢမ်ႇမိူၼ်ၵၼ်၊ ဢွင်ႈတီႈယူႇသဝ်းပႅၵ်ႇပိူင်ႈၵၼ်ၼႆႉသေ ၼႂ်းၵူၼ်းၸိူဝ်း ၼမ်ႉၼၵ်းတူဝ်ၼမ်လိူဝ်ၼၼ်ႉ လႆႈႁၼ်ၵူၼ်းၸၢႆးမီးၼမ်လိူဝ်သေ ၼၢင်းယိင်း။ ၵူၺ်းၵႃႈ သင်တေ တူၺ်း ၼႂ်းၵႄႈဢႃယု 15 ပီထိုင် 19 ပီၼၼ်ႉတႄႉ ႁူဝ်ၼပ်ႉၼၢင်းယိင်း တိူဝ်းၼမ်လိူဝ် ၵူၼ်းၸၢႆး။

လွင်ႈတုၵ်းယွၼ်း ႁႂ်ႈဢဝ်လိူင်ႈ/တၢင်းၽိတ်း

ၼႂ်းလုၵ်ႈဢွၼ်ႇ ၽွင်းပၢၼ်ဢႃယု 10 ၶူပ်ႇပၢႆ 10 ၵေႃႉၼၼ်ႉ တႃႇ 9 ၵေႃႉ ၵႆႉၵႂႃႇတီႈႁၢၼ်ႉယႂ်ႇလူင် တင်း ႁၢႆၶၢႆတၢင်းၵိၼ်ယွႆႈလဵၵ်ႉလဵၵ်ႉဢွၼ်ႇၸိူဝ်းၼႆႉသေ သိုဝ်ႉၵိၼ် တၢင်းၵိၼ်ယွႆႈၼင်ႇ မၢၵ်ႇဢူမ်၊ ၶျေႃးၵ လႅတ်ႉ၊ မၼ်းဢႃႇလူးၶူဝ်ႈ၊ ice cream ၊ ၶဝ်ႈမုၼ်းၶဵၵ်ႉ လႄႈ ၶဝ်ႈမုၼ်းပီႇသၵိတ်ႉ ၸိူဝ်းၸဵမ်းဝၢၼ်လိူဝ်ႁႅင်း။ လွင်ႈၼႆႉယူႇတီႈ ၸုမ်း UNICEF လႆႈႁဵတ်းၵၢၼ်ၶူၼ်ႉၶႂႃႉတူၺ်း တီႈလုၵ်ႈဢွၼ်ႇၼႂ်းမိူင်းၶႄႇ၊ မိူင်းထႆး၊ ဢိၼ်ႇတူဝ်ႇၼီးသျႃး၊ ၾလိပ်ႉပိၼ်း ၸိူဝ်းၼႆႉဝႆႉ။

မိူၼ်ၼင်ႇတီႈမိူင်း တၼ်ႊၸၼ်ႊၼီႊယႃႊ (Tanzania) လႄႈ မိူင်းၹႅမ်ႊပိူဝ်ႊပူၺ်ႊ   (Zimbabwe) ၸိူဝ်း ၼႆႉ ၸဝ်ႈၶွင်ႁဵတ်းဢွၵ်ႇတၢင်းၵိၼ်တၢင်းယႅမ်ႉ ၸိူဝ်းဢမ်ႇမႅၼ်ႈၸွမ်းပၢႆးယူႇလီၶဝ် ႁူမ်ႈၵၼ်တၢင်း ႁၢၼ်ႉ တၢင်းၵိၼ်၊ ႁၢၼ်ႉတၢင်းၶၢႆတၢင်းၵိၼ်ယႅမ်ႉ ၼႂ်းႁူင်းႁဵၼ်းၸိူဝ်းၼႆႉသေ ပိုၼ်ၽၢဝ်ႇၶၢႆဝႆႉ ၼႆယဝ်ႉ။

လုၵ်ႈဢွၼ်ႇ ၸိူဝ်းယူႇသဝ်း ၼႂ်းဝၢၼ်ႈမိူင်းမီးပၼ်ႁႃပတိၵ်ႈၶၢတ်ႈ ပၢင်တိုၵ်းသိုၵ်းသိူဝ်ၸိူဝ်းၼၼ်ႉၵေႃႈ လႆႈႁူပ်ႉၺႃးပၼ်ႁႃ ဢမ်ႇလႆႈၵိၼ်တၢင်းၵိၼ်တၢင်းယႅမ်ႉ ဢၼ်မႅၼ်ႈၸွမ်းပၢႆးယူႇလီ – ၼႂ်းၽိုၼ်လိၵ်ႈ ႁၢႆးငၢၼ်း UNICEF ပႃးဝႆႉၼင်ႇၼႆ။

သင်ႁုပ်ႈသေတူၺ်းၸိုင် ၵူၼ်းၼုမ်ႇမွၵ်ႈ 68%ၼႆႉ ဢွၼ်ၵၼ်သိုဝ်ႉၵိၼ် တၢင်းၵိၼ်တၢင်းယႅမ်ႉ ၸိူဝ်း ဢမ်ႇမႅၼ်ႈၸွမ်းပၢႆးယူႇလီ ယွၼ်ႉႁၼ်မႃးတီႈၼႂ်းၵၢၼ်ပိုၼ်ၽၢဝ်ႇၶၢႆ။ 

လွင်ႈၼႆႉ ႁဵတ်းႁႂ်ႈတုမ်ႉတိူဝ်ႉၼိူဝ်ပၢႆးယူႇလီ လႄႈ ငိုၼ်းၵႃႈၸႂ်ႉၸၢႆႇၾၢႆႇၵၢၼ် ပၢႆးမၢၵ်ႈမီးၵေႃႈ တေၶိုၼ်ႈ သုင်မႃးၸွမ်း။

ယွၼ်ႉၼၼ်လႄႈ ယူႇတီႈလူင်ပွင်ၸိုင်ႈမိူင်းၽႂ်မၼ်းသေ ထုၵ်ႇလီၶဵၼ်ႇတႅမ်ႈဝႆႉ မူႇပိူင်တႃႇတေႁႄႉၵင်ႈ၊ တႃႇတေဢဝ်လိူင်ႈ/ဢဝ်တၢင်းၽိတ်း ၵၢၼ်ငၢၼ်းၸိူဝ်းႁဵတ်းဢွၵ်ႇတၢင်းၵိၼ်တၢင်းယႅမ်ႉ လူၺ်ႈဢမ်ႇ မႅၼ်ႈၸွမ်းပၢႆးယူႇလီ လႄႈ မိၵ်ႈမၢႆၵၢၼ်ငၢၼ်း ၸိူဝ်းၸႂ်ႉၵၢၼ်ပိုၼ်ၽၢဝ်ႇသေၶၢႆၼၼ်ယူႇ – UNICEF တိုၵ်းသူၼ်းလၢတ်ႈဝႆႉၼင်ႇၼႆ။