မိူဝ်ႈၼႆႉ ဝၼ်းတီႈ 17/10/2025 ယၢမ်းၵၢင်ၼႂ် 7 မူင်းပၢႆ သိုၵ်းမၢၼ်ႈယိုတ်းမိူင်း ပွႆႇမၢၵ်ႇသႂ်ႇ တီႈဝၢၼ်ႈႁူဝ်မိူင်း ၸႄႈဝဵင်းၼမ်ႉသၼ်ႇ လႄႈ ၼႂ်းဝဵင်းၼမ်ႉတူႈ ဢွင်ႈတီႈသိုၵ်းတဢၢင်း TNLA ၵုမ်းၵမ် ၼႂ်းမိူင်းတႆးပွတ်းႁွင်ႇ။
ယွၼ်ႉမၢၵ်ႇသိုၵ်းႁိူဝ်းမိၼ် တူၵ်းတႅၵ်ႇသႂ်ႇၺႃးႁိမ်းႁူင်းႁဵၼ်းသွၼ်လိၵ်ႈၸၼ်ႉသုင် မၢႆ (1) (အထက-၁) ဝဵင်းၼမ်ႉတူႈသေ မၢတ်ႇ ၸဵပ်းၵႂႃႇ 4 ၵေႃႉၼႆ ၵူၼ်းမိူင်းပိုၼ်ႉတီႈ ၼႂ်းဝဵင်းၼမ်ႉတူႈ လၢတ်ႈၼႄၼင်ႇၼႆ။
“ၶဝ်မႃးပွႆႇၼႂ်းဝဵင်း 3 လုၵ်ႈ။ ငိၼ်းဝႃႈဢၼ်မၢတ်ႇၵႂႃႇၼႆႉ ပဵၼ်ၼၢင်းယိင်း၊ ပဵၼ်မေႃသွၼ်တီႈၵျွင်းၼၼ်ႉ တင်း 4 ၵေႃႉၼႆဢေႃႈ။”
ဝၢႆးၼၼ်ႉ 10 မိၼိတ်ႉ ႁိူဝ်းမိၼ်သိုၵ်းမၢၼ်ႈ ၵႂႃႇပွႆႇမၢၵ်ႇသႂ်ႇ တီႈဝၢၼ်ႈႁူဝ်မိူင်း ၸႄႈဝဵင်းၼမ်ႉသၼ်ႇ။ ၵူၼ်းမိူင်း လူႉတၢႆၵႂႃႇၸွမ်း 3 ၵေႃႉ ပဵၼ်ၵူၼ်းၸၢႆးၵေႃႉၼိုင်ႈလႄႈ ၼၢင်းယိင်း 2 ၵေႃႉ ။
ဝၼ်းလဵဝ်ၵၼ် ပိူင်ႈၵၼ် 10 မိၼိတ်ႉၵူၺ်း ၵူၼ်းမိူင်းၸႄႈဝဵင်းၼမ်ႉတူႈ လႄႈ ၸႄႈဝဵင်းၼမ်ႉသၼ်ႇ လူႉတၢႆယွၼ်ႉမၢၵ်ႇလူင်ႁိူဝ်းမိၼ်သိုၵ်းမၢၼ်ႈ 3 ၵေႃႉ မၢတ်ႇၸဵပ်းၵႂႃႇ 6 ၵေႃႉ – လႆႈႁူႉၼင်ႇၼႆ။
တႄႇႁူဝ်လိူၼ်ဢွၵ်ႇထူဝ်ႊပိူဝ်ႊမႃးၼႆႉ သိုၵ်းမၢၼ်ႈၸႂ်ႉႁိူဝ်းမိၼ် လႄႈ ၶိူင်ႈတရူၼ်ႊ ယိုဝ်းသႂ်ႇၸွမ်းၼႂ်းဝၢၼ်ႈ ႁိူၼ်းယေးၵူၼ်းမိူင်း၊ ဝတ်ႉဝႃးၽႃသိူဝ်ႇ၊ ႁူင်းႁဵၼ်းသွၼ်လိၵ်ႈ ၸွမ်းပိုၼ်ႉတီႈသိုၵ်းတဢၢင်း (TNLA) ၵုမ်းၵမ်ဝႆႉ ၼႂ်းၸႄႈဝဵင်းသီႇပေႃႉ၊ ၼမ်ႉတူႈ၊ ၼမ်ႉသၼ်ႇ၊ မၢၼ်ႈတူင်ႈ၊ မိူင်းၵုတ်ႈ ၸဵမ်ၸိူဝ်းၼႆႉႁၢဝ်ႈႁႅင်း ။
သိုၵ်းမၢၼ်ႈယိုတ်းမိူင်းမိၼ်းဢွင်ႇလၢႆႇၼႆႉ ၾၢႆႇၼိုင်ႈၵေႃႈ ဢဝ်ႁူဝ်ၶေႃႈ ဢႅၼ်ႇၸီႇဢေႇ တဵမ် 10 ပီသေ ၸတ်းႁဵတ်း ပၢင်ဢုပ်ႇဢူဝ်း ၵၢၼ်ဝၢင်းၽႅၼ် ၶၵ်ႉၵၢၼ်လွင်ႈငမ်းယဵၼ်ယူႇ တီႈဝဵင်းၼေႇပျီႇတေႃႇ။ ၽွင်းငဝ်းလၢႆးၵၢၼ်မိူင်းဢမ်ႇၼိမ်သဝ်း ၵူၼ်းမိူင်းႁူပ်ႉတၢင်း ယၢပ်ႇၽိုတ်ႇၵိၼ်းၸႂ် ယွၼ်ႉပၢင်တိုၵ်းၼႂ်းမိူင်းယူႇၼႆႉ မိၼ်းဢွင်ႇလၢႆႇ ၶတ်းၸႂ်ယိုတ်းဢဝ်ၶိုၼ်း ၸႄႈဝဵင်း ၸိူဝ်းလႆႈသုမ်းပၼ် သိုၵ်းတဢၢင်း ၼၼ်ႉယူႇ။
တႃႇယိုတ်းဢဝ်လႆႈၶိုၼ်း ၸႄႈဝဵင်းၼႂ်းမိူင်းတႆးပွတ်းႁွင်ႇ ၼႃႈတီႈသိုၵ်းတဢၢင်းၵုမ်းၵမ်ၼႆႉ သိုၵ်းမၢၼ်ႈ ၸႂ်ႉႁိူဝ်းမိၼ် လႄႈ ၶိူင်ႈတရူၼ်ႊ ယိုဝ်းသႂ်ႇဢွင်ႈတီႈမီးၵူၼ်းမိူင်းယူႇသဝ်း။
ၸွမ်းၼင်ႇၽူႈတွႆႇႁွၵ်ႈလႆႈၸွပ်ႇထၢမ်သေဢွၵ်ႇၶၢဝ်ႇဝႆႉတႄႉ ၶၢဝ်းတၢင်းၽၢၵ်ႇလိူၼ်ၵူၺ်း ၵူၼ်းမိူင်းတၢႆယွၼ်ႉမၢၵ်ႇလူင်သိုၵ်းမၢၼ်ႈ 29 ၵေႃႉ- ပဵၼ်လုၵ်ႈဢွၼ်ႇ 7 ၵေႃႉ၊ ၼုမ်ႇၸၢႆး 10 ၵေႃႉ၊ ၼၢင်းယိင်း 12 ၵေႃႉ ။ ဢၼ်မၢတ်ႇၸဵပ်းႁၢဝ်ႈႁႅင်းသမ်ႉမီး 36 ၵေႃႉ ပဵၼ် လုၵ်ႈဢွၼ်ႇ 11 ၵေႃႉ၊ ၼုမ်ႇၸၢႆး 14 ၵေႃႉ လႄႈ ၼၢင်းယိင်း 11 ၵေႃႉ ။
တႄႇဢဝ်ဝၼ်းတီႈ 1 ထိုင် 17/10/2025 ၼႆႉ သိုၵ်းမၢၼ်ႈၸႂ်ႉႁိူဝ်းမိၼ် ယိုဝ်းသႂ်ႇ ၼႂ်းဝဵင်းမၢၼ်ႈတူင်ႈ 1 ပွၵ်ႈ၊ ၵျွၵ်ႉမႄး 3 ပွၵ်ႈ၊ ဝဵင်းသီႇပေႃႉ 5 ပွၵ်ႈ၊ ဝဵင်းမိူင်းငေႃႉ 1 ပွၵ်ႈ၊ ဝဵင်းမိူင်းလူင် 4 ပွၵ်ႈ၊ ဝဵင်းၼမ်ႉသၼ်ႇ 4 ပွၵ်ႈ၊ ဝဵင်းၼမ်ႉတူႈ 5 ပွၵ်ႈ၊ ဝဵင်းမိူင်းမိတ်ႈ 3 ပွၵ်ႈ လႄႈ ဝဵင်းမိူင်းၵုတ်ႈ 1 ပွၵ်ႈ ႁူမ်ႈသဵၼ်ႈ ပဵၼ် 27 ပွၵ်ႈၼႆ ၾၢႆႇသိုၵ်းတဢၢင်း TNLA ၵေႃႈ ပိုၼ်ၽၢဝ်ႇဢွၵ်ႇပဵၼ်တၢင်း ၵၢၼ်ဝႆႉၼင်ႇၼႆ။
လိူဝ်ၼၼ်ႉ ႁိူၼ်းယေးၵူၼ်းမိူင်း 108 လင်၊ ႁူင်းႁဵၼ်းသွၼ်လိၵ်ႈ 3 လင်၊ ဝတ်ႉဝႃးၽႃသိူဝ်ႇ 6 လင် လႄႈ ႁူင်းၵေႃႇၵၢႆႇသုၼ်ႇၵၢင် ၶွင်ၵူၼ်းမိူင်း 4 လင် လူႉၵွႆၵႂႃႇၸွမ်း ၼႆယဝ်ႉ။
ၼႂ်းလိၵ်ႈၵိၼ်ၵႅၼ်ႇ ၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊ ဢၼ်သိုၵ်းမၢၼ်ႈၶဝ်ႈႁူမ်ႈလူင်းလၢႆးမိုဝ်းၸွမ်းဝႆႉၼၼ်ႉတႄႉပႃးဝႆႉဝႃႈ – “ ပိုၼ်ႉတီႈဢၼ်သိုၵ်းတေဢမ်ႇလႆႈယိုဝ်းလႃးလႃး ႁိုဝ် တေဢမ်ႇလႆႈတိူဝ်ႉလႃးလႃးၼႆႉပဵၼ် -ႁိူၼ်းယေးၵူၼ်းမိူင်း၊ ႁူင်းယႃ ႁွင်ႈယႃ၊ ႁူင်းႁဵၼ်း၊ ဝတ်ႉဝႃးၽႃသိူဝ်ႇ ဢွင်ႈတီႈၵိူဝ်းယမ်၊ သိင်ႇဝႅတ်ႉလွမ်ႉဝၢၼ်ႈသူၼ်၊ ႁႆႈၼႃးမၢၵ်ႇၶဝ်ႈတဝ်ႈၼမ်ႉ၊ ႁူင်းၵၢၼ်ႁူင်းၸၢၵ်ႈဢၼ်ၸၢင်ႈတႅၵ်ႇပဵၼ်ၵွင်ႉငူၼ်ႉမီးၽေးတေႃႇၵူၼ်းမိူင်း” ၸဵမ်ၸိူဝ်းၼႆႉ။ ၵူၺ်းၵႃႈ ၸူဝ်ႈပဵၼ်သိုၵ်းၵၢင်မိူင်းမႃးၶၢဝ်းတၢင်း 4 ပီပၢႆၼႆႉ သိုၵ်းမၢၼ်ႈလႄႈၸုမ်းယိပ်းၵွင်ႈၵၢင်ႇၼႂ်းမိူင်း ဢမ်ႇတွၼ်ႉႁဵတ်းၸွမ်းမႃးသေပွၵ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ