သိုၵ်းၵဝ်ႈၵၢင်ႉ လႄႇလမ်းႁႃ သိုဝ်ႉလွၵ်းလိၼ် တီႈၵူၼ်းဝၢၼ်ႈ ပၢင်ၽၢတ်ႇ ဢိူင်ႇမိူင်းလီ ၸိုင်ႈတႆးပွတ်းႁွင်ႇဝႃႈၼႆ ။

တႄႇၼႂ်းႁူဝ်လိူၼ် ဢွၵ်ႊထူဝ်ႊပိူဝ်ႊ ၼႆႉမႃး သိုၵ်းၵဝ်ႈၵၢင်ႉလၢတ်ႈတီႈၵူၼ်းဝၢၼ်ႈပၢင်ၽၢတ်ႇဝႃႈ တေႁဵတ်း ႁူင်းၸၢၵ်ႈၸႅတ်ႈထွင်ႁႄႈ (သတ္တုသန့်စင်စက်ရုံ ) ၼႆသေလႄႇလမ်းႁႃ သိုဝ်ႉလွၵ်းလိၼ် တီႈၵူၼ်းဝၢၼ်ႈ ပၢင်ၽၢတ်ႇ ၼိုင်ႈဢေႊၶိူဝ်ႊ သိုၵ်းၵဝ်ႈၵၢင်ႉယွၼ်းသိုဝ်ႉ 150 သႅၼ်ပျႃး  ။

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“တႃႇႁဵတ်းႁူင်းၸၢၵ်ႈၸႅတ်ႈထွင်ႁႄႈၼႆသေ သိုၵ်းၵဝ်းၵၢင်ႉ ၶဝ်လႄႇလမ်းႁႃ တဵၵ်းသိုဝ်ႉတီႈလိၼ်ၵူၼ်းဝၢၼ်ႈ ၊ မၢင်ၸိူဝ်းၵေႃႈၶၢႆပၼ် ၊ မၢင်ၸိူဝ်းၵေႃႈ ဢမ်ႇၶႂ်ႈၶၢႆ ၊ ပေႃးဢမ်ႇၶၢႆသမ်ႉလွၵ်ႇငိုတ်ႈၵူၼ်းဝၢၼ်ႈ ၊ ၼိုင်ႈဢေႊၶိူဝ်ႊၼႆႉ ၶဝ်ပၼ် 150 သႅၼ်ၼႆ ” – ဝႃႈၼႆ။

ၼႂ်းႁူဝ်လိူၼ် ဢွၵ်ႊထူဝ်ႊပိူဝ်ႊၼႆႉၵူၺ်း  သိုၵ်းၵဝ်ႈၵၢင်ႉ တဵၵ်းသိုဝ်ႉတီႈလိၼ် ဢၼ်မီးၼိူဝ် သဵၼ်ႈတၢင်း လူင် တၢင်းၶဝ်ႈဝၢၼ်ႈပၢင်ၽၢတ်ႇ တႃႇ16 ဢေႊၶိူဝ်ႊ ၊ ၼိုင်ႈဢေႊၶိူဝ်ႊ သိုၵ်းၵဝ်ႈၵၢင်ႉယွၼ်းသိုဝ်ႉ  60  သႅၼ်ပျႃး ၊ ယွၼ်ႉၸဝ်ႈသူၼ်ဢမ်ႇၶၢႆပၼ်လႄႈ လွၵ်ႈငိုတ်ႈပႃးၸဝ်ႈသူၼ် ႁဵတ်းႁႂ်ႈၸဝ်ႈသူၼ် မႆႈၸႂ်လွင်ႈႁူမ်ႇလူမ်ႈ   ။   

ၼၢင်းယိင်းပၢႆႈၽေးသိုၵ်းဢၼ်ႁူႉၸွမ်းလွင်ႈၼႆႉ- လၢတ်ႈၽူႈတွႆႇႁွၵ်ႈဝႃႈ -“ မိူဝ်ႈတႄႇမႃးသိုဝ်ႉတႄႉတဵၵ်းသိုဝ်ႉၵေႃႈၸႂ်ႈ တဵၵ်းလွၵ်ႇငိုတ်ႈပႃး ၊ ႁွင်ႉၵႂႃႇဢုပ်ႇတီႈလုမ်းၶဝ်တိၵ်းတိၵ်း ၊ ၸဝ်ႈသူၼ် ဢမ်ႇၽွမ်ႉၶၢႆတီႈလိၼ်လႄႈ တလဵဝ် ဢမ်ႇသိုဝ်ႉယဝ်ႉၼႆ တေၵႂႃႇႁႃသိုဝ်ႉ ဢၼ်ၵႆဝဵင်း တၢင်းႁိမ်းတိၼ်လွႆၸိူဝ်းၼၼ်ႉဢဝ်ၼႆဢေႃႈ ၊ ၶဝ်လၢတ်ႈၵႂႃႇဝႃႈ ဢမ်ႇၶၢႆတီႈလိၼ်ၵေႃႈတေလႆႈပၼ်လုၵ်ႈၸၢႆးတႃႇ  ႁဵတ်းၵၢၼ်သိုၵ်းၼႆ”- ဝႃႈၼႆ ။

သင်ဝႃႈတေႁဵတ်းႁူင်းၸၢၵ်ႈ ၼႆၸိုင်တေၸၢင်ႈ တုမ်ႉတိူဝ်ႉသိင်ႇဝႅတ်ႉလွမ်ႉ လႄႈပၢႆးယူႇလီတႃႇ ၵူၼ်းဝၢၼ်ႈၼႆ- မၼ်းၼၢင်းသိုပ်ႇလၢတ်ႈထႅင်ႈၼင်ႇၼႆ ။

မိူၼ်ၼင်ႇၼႆ မိူဝ်ႈပုၼ်ႉမႃး 3-4 လိူၼ်ၼၼ်ႉၵေႃႈ တၢင်းဝၢၼ်ႈၼွင်ၵႃး ၊ ႁူဝ်ၼႃး ၊ ၶမ်းတိူၼ်း ၸိူဝ်းၼႆႉၵေႃႈ သိုၵ်းၵဝ်ႈၵၢင်ႉ တဵၵ်းသိုဝ်ႉသူၼ်ႁႆႈလွၵ်းၼႃး တီႈၵူၼ်းမိူင်းလူၺ်ႈ ၵႃႈၶၼ်ထုၵ်ႇထုၵ်ႇၼင်ႇၵဝ်ႇၼႆယဝ်ႉ ။   

ယၢမ်းလဵဝ် ၼႂ်းၸေႊဝဵင်းသႅၼ်ဝီၼႆႉ ၸုမ်းသိုၵ်းၵဝ်ႈၵၢင်ႉ (MNDAA)၊ ၸုမ်းသိုၵ်းလွႆ (TNLA)၊ ၸုမ်းသိုၵ်းၶၢင် (KIA) ႁူမ်ႈၵၼ်ၵုမ်းၵမ်ဝႆႉသေတႃႉ ၵၢၼ်ၽွင်းငမ်းတႄႉ လႆႈဢဝ်ပိူင် ၸုမ်းသိုၵ်း ၵဝ်ႈၵၢင်ႉသေ ပၼ်ႇၵၢၼ်ဝႆႉယူႇ ။