မိူဝ်ႈၼႆႉဝၼ်းတီႈ 4/10/2025 ယၢမ်းၵၢင်ဝၼ်းတဵင်ႈ ႁိူဝ်းမိၼ်သိုၵ်းမၢၼ်ႈပွႆႇမၢၵ်ႇသႂ်ႇတီႈဝၢၼ်ႈၸႄႈတူၼ်ႈႁုင်း ၸႄႈဝဵင်းၼမ်ႉသၼ်ႇ ၸိုင်ႈတႆးပွတ်းႁွင်ႇ တူဝ်ႇမၢတ်ႇၵူၼ်းမိူင်း လုၵ်ႈဢွၼ်ႇ တၢႆ 2 ၵေႃႉ မၢတ်ႇၸဵပ်း 9 ၵေႃႉ။
လွင်ႈၼႆႉ ႁွင်ႈၵၢၼ်ၾၢႆႇပွင်ႇၶၢဝ်ႇ PSLF/TNLA ပိုၼ်ၽၢဝ်ႇမိူဝ်ႈယၢမ်းဝၢႆးဝၼ်းၼႆႉဝႃႈ – ပဵၼ်ႁိူဝ်းမိၼ်ၵျႅတ်ႊၾၢႆႊတႃႊ ပွႆႇမၢၵ်ႇသႅၼ်း 250 ပွၼ်ႊ 2 လုၵ်ႈ။ ၵူၼ်းတၢႆ 2 ၵေႃႉ မၢတ်ႇၸဵပ်း 9 ၵေႃႉ ပဵၼ်လုၵ်ႈဢွၼ်ႇၵမ်ႈၼမ်။ ႁိူၼ်းယေးၵူၼ်းမိူင်း လူႉၵွႆၵႂႃႇ 16 လင် ဝႃႈၼႆ။
ႁိူဝ်းမိၼ်တိုၵ်း ၵျႅတ်ႊၾၢႆႊတိူဝ်ႊ မႃးပွႆႇမၢၵ်ႇၵႂႃႇၼႆ ၼၢင်းယိင်းၵူၼ်းပိုၼ်ႉတီႈလၢတ်ႈၼင်ႇၼႆ။
“ဢၼ်တၢႆၼၼ်ႉပဵၼ်လုၵ်ႈဢွၼ်ႇ 2 ၵေႃႉ။ ဢၼ်မၢတ်ႇၸဵပ်းၵေႃႈပဵၼ် လုၵ်ႈဢွၼ်ႇ 6 ၵေႃႉ ၵူၼ်းလူင် 3 ၵေႃႉ”- ဝႃႈၼႆ။
သိုၵ်းမၢၼ်ႈပိုၼ်ၽၢဝ်ႇ ငဝ်းလၢႆးၶိုၵ်ႉၶၵ်ႉၼႂ်းမိူင်းတႆး 15 ဝဵင်းသေ တေၸတ်းၽႅၼ်ၵၢၼ်သိုၵ်းတေႃႇႁၢဝ်ႈႁႅင်းၼႆႉပဵၼ် ဝဵင်း ၼမ်ႉတူႈ၊ မၢၼ်ႈပဵင်း (မဘိမ်းမြို့နယ်) ၊ ၵူတ်ႉၶၢႆ၊ ၼမ်ႉၶမ်း၊ သႅၼ်ဝီ၊ ၵုၼ်လူင်၊ ၼမ်ႉသၼ်ႇ၊ မၢၼ်ႈတူင်ႈ၊ ႁူဝ်ပၢင်ႇ၊ လၢဝ်ႇၵၢႆး(ၵၢတ်ႇၵဝ်ႇ)၊ ၵွင်းၸၢင်ႉ (ၵူင်းၵျၢၼ်း)၊ မိူင်းမိတ်ႈ၊ ၵျွၵ်ႉမႄး၊ သီႇပေႃႉ၊ မိူင်းလႃး ၸိူဝ်းၼႆႉ။
ၼႂ်းလိူၼ်ထူၼ်ႈ 8 လႄႈ လိူၼ်ထူၼ်ႈ 9 ၼႆႉ သိုၵ်းမၢၼ်ႈဢဝ်ႁိူဝ်းမိၼ်သိုၵ်းမႃးပိုတ်းယိုဝ်းၼႂ်းမိူင်းတႆးၶႂ်ႈဝႃႈၵူႈဝၼ်း။ ၼႂ်းဝၼ်းတီႈ 2-3/10/2025 ၼႆႉၵူၺ်း မႃးပွႆႇမၢၵ်ႇသႂ်ႇဝဵင်းၵျွၵ်ႉမႄး- သီႇပေႃႉ -ၼမ်ႉတူႈ လၢႆလၢႆၵမ်း။ ၵူၼ်းမိူင်းမၢတ်ႇၸဵပ်းလူႉတၢႆ။ ၵျွင်းမုၼ်ၸဝ်ႈၵေႃႈလူႉၵွႆ၊ ဝၢၼ်ႈဝဵင်းၵေႃႈလႅဝ်ၽႅဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ