ၵူၼ်းပၢႆႈၽေးသိုၵ်းၸိူဝ်းလုၵ်ႉဝဵင်းၼွင်ၶဵဝ် ပၢႆႈႁွတ်ႈထိုင် ၼွင်ပိင်ၵျွၵ်ႉမႄးၼၼ်ႉ ရူတ်ႉၵႃး 12 လေႃႉၶဝ်ႁၢႆ ၽွင်းသူင်ႇၵႂႃႇမႄးဝႆႉတီႈႁၢၼ်ႉမႄးရူတ်ႉၵႃး လႆႈမႃးၶၢဝ်းတၢင်း 10 ဝၼ်းပၢႆယဝ်ႉ ပႆႇႁၼ်ၶိုၼ်း။

ၽူႈၸွႆႈထႅမ်ၵူၼ်းပၢႆႈၽေးသိုၵ်းလၢတ်ႈတီႈၽူႈတွႆႇႁွၵ်ႈဝႃႈ − “ရူတ်ႉၵႃးၼႆႉ ပဵၼ်ရူတ်ႉ 12 လေႃႉ၊ ပဵၼ်ရူတ်ႉၵူၼ်းမိူင်း ဝဵင်းၼွင်ၶဵဝ် ဢၼ်ပၢႆႈၽေးမႃးသွၼ်ႈဝႆႉ ၼႂ်းထုင်ႉၼွင်ပိင် ၸႄႈဝဵင်းၵျွၵ်ႉမႄး။ မိူဝ်ႈဝၼ်းတီႈ 6 လိူၼ် August ပီ 2025 ၼၼ်ႉ လႆႈမႃးၵိုတ်းဝႆႉႁိမ်းပၢမ်ႉၼမ်ႉမၼ်း(ရွှေလမင်း)သေ ၾူၼ်တူၵ်းႁႃႇယႂ်ႇလႄႈ ရူတ်ႉၵႃး လႆႈလႆလွင်ႈ ၸွမ်းၼမ်ႉၼွင်း။ ယွၼ်ႉရူတ်ႉလွင်ႈၸွမ်းၼမ်ႉသေ လႆႈလူႉၵွႆၵႂႃႇလႄႈ ၵူၼ်းဝၢၼ်ႈၶဝ် လႆႈသူင်ႇမႄးဝႆႉ တီႈႁၢၼ်ႉ မႄးရူတ်ႉ(ကားဝပ်ရှော့)။  ရူတ်ႉ 12 လေႃႉၼႆႉ လႆႈႁၢႆၵႂႃႇ ၼႂ်းၵႄႈဝၼ်းတီႈ 15 – 20/09/2025 ၼႆႉ”- ဝႃႈၼႆ ။

ရူတ်ႉ 12 လေႃႉ ဢၼ်ႁၢႆၵႂႃႇၼႆႉ တေႃႇထိုင်ဝၼ်းမိူဝ်ႈၼႆႉ ႁႃပႆႇႁၼ်ၶိုၼ်း၊ ၽႂ်လႂ်တၼ်းမႃးဢဝ်ၵႂႃႇမိူဝ်ႈလႂ် ဢၼ်ဝႃႈၼၼ်ႉၵေႃႈ ဢမ်ႇလႆႈႁူႉ။ ယၢမ်းလဵဝ် မီးလွင်ႈယၢပ်ႇတႃႇတေႁႃၶိုၼ်းလႄႈ မႆႈၸႂ်ၶူဝ်းၶွင်ႁိူၼ်းယေး ဢၼ်ပႃးၵႂႃႇၸွမ်းရူတ်ႉ – ဝႃႈၼႆ။

ၽူႈၸွႆႈထႅမ်ၵူၼ်းပၢႆႈၽေးသိုၵ်းလၢတ်ႈတီႈၽူႈတွႆႇႁွၵ်ႈဝႃႈ− “ၼႂ်းရူတ်ႉၼၼ်ႉ မီးၶူဝ်းၶွင်ႁိူၼ်းယေး ၵူၼ်းပၢႆႈၽေးသိုၵ်း ၊ တႃႇ 3 မုင်ႉႁေႃႁိူၼ်း။  လႆႈႁၢႆလၢႆၵႂႃႇမူတ်း။ ၶူဝ်းၶွင်ဢၼ်မီးၼႂ်းရူတ်ႉၵေႃႈ တေပႃးဝႆႉၽိူၼ်မႆႉ၊ တူႈဝႆႉၶွင်(ပီႇတူဝ်ႇ)၊ တိူၵ်ႈသႂ်ႇသိူဝ်ႈၶူဝ်း၊ ရူတ်ႉထိပ်ႇ၊ ၵူႇၼွၼ်း၊ ၸၢၵ်ႈလွႆးၶူဝ်းၸိူဝ်းၼႆႉလႄႈ တိူၵ်ႈၼမ်ႉၵတ်း(တူႈယဵၼ်)ၸိူဝ်းၼႆႉ ”- ဝႃႈၼႆ။

ၵူၼ်းပၢႆႈၽေးလၢတ်ႈဝႃႈ − ယွၼ်ႉရူတ်ႉႁၢႆၼႆႉသေ တႃႇတေပွၵ်ႈၶိုၼ်းႁိူၼ်းယေးၼႆႉ မီးဝႆႉလွင်ႈယၢပ်ႇၽိုတ်ႇတင်းၼမ်။ ယၢမ်းလဵဝ် ရူတ်ႉၵႃးတႃႇတေၶီႇပွၵ်ႈႁိူၼ်း ဢမ်ႇမီးၵူၺ်းဢမ်ႇၵႃး ၶူဝ်းၶွင်ႁိူၼ်းယေးၸိူဝ်းၼႆႉၵေႃႈ လႆႈလူႉသုမ်းၵႂႃႇၸွမ်းတင်းၼမ်လႄႈ သင်ဝႃႈ ပေႃးပွၵ်ႈမိူဝ်းယူႇႁိူၼ်းၶိုၼ်း တၵ်း တေလႆႈသိုဝ်ႉၶူဝ်းၶွင်မႂ်ႇၶိုၼ်းမူတ်း ဝႃႈၼႆ။

ယွၼ်ႉပၢင်တိုၵ်းသိုၵ်းမၢၼ်ႈတင်း သိုၵ်းတဢၢင်း TNLA ၼႆႉသေ ၵူၼ်းမိူင်းၼႂ်းၸႄႈဝဵင်းၼွင်ၶဵဝ် လႆႈဢွၼ်ပၢႆႈၽေးသွၼ်ႈၸွမ်းၼႂ်းၸႄႈဝဵင်းၵျွၵ်ႉမႄး၊ ဝဵင်းသီႇပေႃႉ၊ ၵမ်ႈၽွင်ႈၵေႃႈ ပၢႆႈထိုင်ဝဵင်းလႃႈသဵဝ်ႈၸိူဝ်းၼႆႉ။ ၵူၼ်းပၢႆႈၽေးၼႆႉ ၵမ်ႈၼမ်ဢွၼ်ပၢႆႈၽေးမႃး တင်ႈတႄႇၽွင်းႁူဝ်လိူၼ် August ပီ 2025၊ တေႃႇထိုင်ဝၼ်းမိူဝ်ႈၼႆႉ ယင်းပႆႇၸၢင်ႈပွၵ်ႈၶိုၼ်း ႁိူၼ်းယေးၵၼ်မူတ်း  ။