မိူဝ်ႈၼႆႉ ဝၼ်းတီႈ 1 လိူၼ်ဢွၵ်ႇထူဝ်ႊပိူဝ်ႊ သိုၵ်းမၢၼ်ႈ ၸတ်းသၢႆသိုၵ်း သိုပ်ႇမုင်ႈၼႃႈၶဝ်ႈလူမ်ႇတိုၵ်း သိုၵ်းတဢၢင်း (TNLA) ၸိူဝ်း တူင်ႉၼိုင်ယူႇသဝ်းဝႆႉယူႇၼႂ်းဝဵင်းၵျွၵ်ႉမႄးၼၼ်ႉသေ တင်းသွင်ၾၢႆႇပဵၼ်ပၢင်တိုၵ်းၵၼ်ဝႆႉႁၢဝ်ႈႁႅင်းလႄႈ ၵူၼ်းမိူင်းပိုၼ်ႉတီႈဢမ်ႇပႆႇ ၸၢင်ႈပွၵ်ႈယူႇၶိုၼ်းႁိူၼ်းၽႂ်မၼ်းႁႂ်ႈလွတ်ႈၽေး၊ ဢမ်ႇၸၢင်ႈႁဵတ်းၵၢၼ်ႁႃၵိၼ်လဵင်ႉတွင်ႉလီငၢမ်း၊ ၶူဝ်းၶွင်ၵိၼ်ယႅမ်ႉၵေႃႈႁႃသိုဝ်ႉ ယၢပ်ႇ ၼႆယဝ်ႉ။

ၵူၼ်းမိူင်းၼႂ်းဝဵင်းၵျွၵ်ႉမႄး လႄႈ ၸိူဝ်းယူႇၸွမ်းဝၢၼ်ႈသၢပ်ႇဝဵင်းၵျွၵ်ႉမႄး ဢွၼ်ၵၼ်လႆႈငိူင်ႉဝႄႈပၢင်တိုၵ်းသေ ၵႂႃႇယူႇသဝ်းဝႆႉ ဢွင်ႈတီႈလွတ်ႈၽေးမၢၵ်ႇၵွင်ႈ တီႈႁၢင်ႇၵႆပိုၼ်ႉတီႈပဵၼ်ပၢင်တိုၵ်းၼၼ်ႉၸူဝ်ႈၶၢဝ်းသေ ယၢမ်းလဵဝ် ၵူၼ်းၸိူဝ်းငိူင်ႉဝႄႈပၢင်တိုၵ်း ႁူမ်ႈၵၼ်ယူႇၸွမ်းၵၼ်ဝႆႉ မီးမွၵ်ႈ 800 ၵေႃႉယဝ်ႉၼႆ ၼၢင်းယိင်း ဢႃႇယု 40 ပၢႆ ၵေႃႉယူႇဝႆႉၼႂ်းၸႄႈဝဵင်းၵျွၵ်ႉမႄးသေ ႁဵတ်းၵၢၼ်ၸွႆႈထႅမ်ၵူၼ်းပၢႆႈၽေးပၢင်တိုၵ်း လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ၸိူဝ်းႁဝ်းပီႈၼွင်ႉဝၢၼ်ႈၼွင်ၵႂၢင်ၼႆႉဢိူဝ်ႈယၢပ်ႇလွင်ႈၵိၼ်ယႅမ်ႉ။ ၼႂ်းဝဵင်းၵေႃႈပႆႇၸၢင်ႈၶဝ်ႈ။ ပိူၼ်ႈပႆႇပၼ်မိူဝ်းယူႇၶိုၼ်း။ မိူဝ်ႈလဵဝ် လႆႈမႆႈၸႂ်တႃႇဢၼ်ၶမ်ဝႆႉၼႂ်းဝဵင်းၸိူဝ်းၼၼ်ႉ။ မိူဝ်ႈၼႆႉ  1/10/2025  ၸုမ်းၾၢႆႇၸွႆႈထႅမ်ၶဝ် တေဢွၼ်ၵၼ်မိူဝ်းႁပ်ႉ ပီႈၼွင်ႉဝၢၼ်ႈၶူဝ်မုင်း ဢွၵ်ႇမႃး။ သိုၵ်းမၢၼ်ႈၼႆႉ ၽႅဝ်ဝႆႉတီႈဝၢၼ်ႈၶူဝ်မုင်း။ ၼႂ်းဝဵင်းၵေႃႈ သဵင်ၵွင်ႈဢွၼ်ႇ ၵွင်ႈလူင် ပေႃးပၼ်းလူင်ဝႆႉ။ ႁဝ်းၵူၼ်းဝၢၼ်ႈႁိမ်းႁွမ်းဝဵင်းၼႆႉ မႃးႁူမ်ႈၵၼ်ယူႇဝႆႉ မီးမွၵ်ႈ 800 ၵေႃႉ။ တႃႇႁႃၶဝ်ႈၼမ်ႉတၢင်းၵိၼ်မႃးလဵင်ႉၵၼ်ၵေႃႈ ယၢပ်ႇႁႅင်းၼႃႇ။”

မိူဝ်ႈဝႃး ဝၼ်းတီႈ 30 တႄႇယၢမ်းဝၢႆးဝၼ်း မွၵ်ႈ 1 မူင်း ထိုင် 3 မူင်း သိုၵ်းတဢၢင်း TNLA ၸုတ်ႇၽဝ် ႁွင်ႈၵၢၼ်လုမ်း လူင်ပွင်ၸိုင်ႈ ဢၼ်သိုၵ်းမၢၼ်ႈယိုတ်းမိူင်းသၢင်ႈဝႆႉၼႂ်းဝဵင်းၵျွၵ်ႉမႄးၼၼ်ႉၼႆ ၼၢင်းယိင်းဢႃႇယု 30 ပၢႆၵေႃႉယူႇဝႆႉၼႂ်းဝဵင်းၵျွၵ်ႉမႄး ယိုၼ်ယၼ် လၢတ်ႈၼႄတီႈ ၽူႈတွႆႇႁွၵ်ႈၼင်ႇၼႆ။

“ဢလူဝ်ႉ….မၼ်းဢမ်ႇၸႂ်ႈသိုၵ်းမၢၼ်ႈမႃးပွႆႇမၢၵ်ႇ။ ပဵၼ်သိုၵ်းလွႆၶဝ်ၵႂႃႇႁႃၸုတ်ႇၵူၺ်းဢိူဝ်ႈ။ ၵမ်ႈၽွင်ႈၼႆႉ ဢမ်ႇယူႇဝႆႉတီႈၼႆႈ (ဝဵင်းၵျွၵ်ႉမႄး) သေလႃႈလီတၢင်ႇတိင်ႇလူင်ၵႂႃႇၵွႆး။”

လႆႈႁူႉဝႃႈ မိူဝ်ႈဝႃး ဝၼ်းတီႈ 30/9/2025 သိုၵ်းမၢၼ်ႈ တင်း သိုၵ်းတဢၢင်း ယိုဝ်းၵၼ်တင်ႈတႄႇ ဝၢၼ်ႈၼမ်ႉႁူး တေႃႇမေႃးထိုင် ဝၢၼ်ႈၶူဝ်မုင်း တင်းၶမ်ႈသေ သၢႆသိုၵ်းမၢၼ်ႈ ႁွတ်ႈထိုင်ဝႆႉတီႈဝၢၼ်ႈၶူဝ်မုင်းသေ သိုပ်ႇပဵၼ်ပၢင်တိုၵ်းၵၼ်တင်း သိုၵ်းတဢၢင်း ၸိူဝ်းမီး ယူႇၼႂ်းပိုၼ်ႉတီႈၼၼ်ႉ ဝႃႈၼႆ။

တႅမ်ႈ-ၽူၺ်းၼုမ်ႇ