ၸုမ်းသိုၵ်းဝႃႉ  UWSA  ၸိူဝ်းပၵ်းတပ်ႉပၢင်သဝ်းသေ တူင်ႉၼိုင်ယူႇ ၼႂ်းမိူင်းတႆးပွတ်းဢွၵ်ႇ တီႉၺွပ်း ယႃႈမဝ်းၵမ်သေ ၶိုၼ်း မွပ်ႈပၼ်တီႈၸုမ်းပလိၵ်ႈ တႂ်ႈသိုၵ်းမၢၼ်ႈၵုမ်းၵမ် မွၵ်ႈ 14 လၢၼ်ႉမဵတ်ႉ ။

ၸုမ်းသိုၵ်းဝႃႉပိုၼ်ၽၢဝ်ႇ ပဵၼ်တၢင်းၵၢၼ်ဝႃႈ  ဝၼ်းတီႈ 29 လိူၼ်သႅပ်ႊထႅမ်ႊပိူဝ်ႊပူၼ်ႉမႃး ဢဝ်ယႃႈမဝ်းၵမ် မွပ်ႈပၼ်ၶိုၼ်း ၸုမ်းပလိၵ်ႈသိုၵ်းမၢၼ်ႈ တီႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇ။  ပဵၼ်ယႃႈမဝ်းၵမ်ဢၼ်တီႉၺွပ်းလႆႈ တႄႇၼႂ်းလိူၼ်ၵျူႊလၢႆႊထိုင် လိူၼ်သႅပ်ႊထႅမ်ႊပိူဝ်ႊ 2025 တၢင်းဝၢၼ်ႈပူႉလူင်၊ မႄႈၸၢင်ႉ၊ ဝၢၼ်ႈမႂ်ႇ လႄႈ ၼွင်ဝၼ်း  ဢၼ်မီးၼႂ်းထုင်ႉ မိူင်းတူၼ် မိူင်းသၢတ်ႇ တၢင်းလႅၼ်လိၼ်ထႆး ၸိူဝ်းၼႆႉ ။  ဢၼ်တီႉၺွပ်းလႆႈ ၼႂ်းထုင်ႉဝဵင်းပုင်ႇပႃႇၶႅမ် ၸႄႈဝဵင်းမိူင်းတူၼ် လႅၼ်လိၼ် ထႆး-မၢၼ်ႈ မိူဝ်ႈဝၼ်းတီႈ 20 လိူၼ်သႅပ်ႊထႅမ်ႊပိူဝ်ႊ ၼၼ်ႉလႆႈၼမ်သုတ်း ။ ပဵၼ်ယႃႈမ 5 သႅၼ်မဵတ်ႉ  သႂ်ႇဝႆႉၼႂ်းထူင် 23 ထူင် – တႅမ်ႈဝႆႉၼင်ႇၼႆ။ 

ၵဵဝ်ႇၵပ်းလွင်ႈ ယႃႈမဝ်းၵမ် ဢၼ်တီႉလႆႈတၢင်းလႅၼ်လိၼ် ထႆး-မၢၼ်ႈၸိူဝ်းၼႆႉသေ ၸွမ်ၽွင်းလူင်ၵဝ်ႇၸိုင်ႈထႆး ထၵ်ႊသိၼ်ႊ သျိၼ်ႊၼဝတ်း ယၢမ်းတူၵ်ႇလၢတ်ႈတီႈၵေႃႊမတီႊ  ၾၢႆႇၵုမ်းထိင်းယႃႈမဝ်းၵမ်မိူင်းထႆး ဝႃႈ – ယႃႈမဝ်းၵမ် ဢၼ်ပလိၵ်ႈထႆး ၵမ်းၵမ်းတီႉလႆႈၼႂ်း ၸွမ်းလႅၼ်လိၼ်ထႆး-မၢၼ်ႈၼႆႉ ၵမ်ႈၼမ် ၵဵဝ်ႇၶွင်ႈၵၼ်တင်းၸုမ်းသိုၵ်းဝႃႉ  UWSA  ၸိူဝ်းတူင်ႉၼိုင်ယူႇတၢင်း မိူင်းတႆးပွတ်းဢွၵ်ႇၼၼ်ႉလႄႈ ထုၵ်ႇလီတုမ်ႉတွပ်ႇ ႁဵတ်းသေလွင်ႈလွင်ႈၶိုၼ်းယူႇ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ မိူဝ်ႈလိူၼ်ၵျုၼ်ႊပူၼ်ႉမႃးၼႆႉ ၸုမ်းသိုၵ်းဝႃႉ ပၢၵ်ႈထဵင်ပႅတ်ႈ ၶေႃႈၵၢဝ်ႇႁႃၸိူဝ်းၼႆႉသေ ပိုၼ်ၽၢဝ်ႇဢွၵ်ႇပဵၼ် တၢင်းၵၢၼ်ဝႆႉဝႃႈ လႆႈတီႉၺွပ်းဢဝ် ၸုမ်းၸိူဝ်းလၵ်ႉၵႃႉယႃႈမဝ်းၵမ် သူင်ႇမွပ်ႈယိုၼ်ႈၸူး ၸုမ်းပလိၵ်ႈမိူင်းၶႄႇၵႂႃႇပဵၼ်တၢင်းၵၢၼ်ယူႇ ၼႆယဝ်ႉ။

တႅမ်ႈ-ၽူၺ်းၼုမ်ႇ