မိူဝ်ႈၼႆႉ ဝၼ်းတီႈ 1 လိူၼ်ဢွၵ်ႇထူဝ်ႊပိူဝ်ႊ ယၢမ်းၵၢင်ဝၼ်း 11 မူင်း သိုၵ်းမၢၼ်ႈယိုတ်းမိူင်း ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၾၢႆႇဝၼ်းတူၵ်း ဝဵင်းမိူင်းၵုတ်ႈ တီႈပွၵ်ႉ ႁူဝ်ၼမ်ႉ (ရေထွက်ကြီး) တိူဝ်ႉၺႃးၵူၼ်းမိူင်း မၢတ်ႇၸဵပ်းၸွမ်း 2 ၵေႃႉ (တၢႆၵေႃႉၼိုင်ႈ မၢတ်ႇၸဵပ်းၵေႃႉၼိုင်ႈ) ၼႆယဝ်ႉ။
ၵူၼ်းမိူင်းပိုၼ်ႉတီႈ ဝဵင်းမိူင်းၵုတ်ႈလၢတ်ႈၼႄဝႃႈ “မၢၵ်ႇၵႂႃႇတူၵ်းသႂ်ႇႁိမ်းႁိူၼ်းၵူၼ်းဢၼ်သေႃႇလဵၵ်း (သံဗန်း) ၵွၼ်ႇပႆႇထိုင်မႆႉၺွင်ႇ သဵၼ်ႈတၢင်းၵႂႃႇပွၵ်ႉႁူဝ်ၼမ်ႉ (ရေထွက်ကြီး) ၼၼ်ႉ။ ႁူဝ်ယွႆႈမၼ်းတႄႉ ပႆႇလႆႈႁူႉၸွမ်းလီလီ” ဝႃႈၼႆ။
ဝဵင်းမိူင်းၵုတ်ႈၼႆႉ ၸုမ်းသိုၵ်းတဢၢင်း TNLA ၵုမ်းၵမ်ဝႆႉ ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်းသွင်ၼၼ်ႉသေ ပၼ်ႇၵၢၼ်ၽွင်းငမ်းဝႆႉႁၢၼ်ႉတေႃႇထိုင်ယၢမ်းလဵဝ်။
ၵွၼ်ႇၼႃႈပၢင်လိူၵ်ႈတင်ႈ ဢၼ်တေၸတ်းႁဵတ်းၼႂ်းႁၢင်ပီ 2025 ၼႆႉ သိုၵ်းမၢၼ်ႈ တင်း သိုၵ်းတဢၢင်း ပဵၼ်ပၢင်တိုၵ်းၵၼ်ႁၢဝ်ႈႁႅင်း သေ ၼင်ႇႁိုဝ် တေၵုမ်းၵမ်လႆႈၶိုၼ်း ဝဵင်းၼႂ်းမိူင်းတႆးပွတ်းႁွင်ႇၼႆႉ သိုၵ်းမၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းၼႃႈတီႈသိုၵ်းတဢၢင်းၵုမ်းၵမ်မႃးႁၢဝ်ႈႁႅင်းယူႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ