မိူဝ်ႈၼႆႉ ဝၼ်းတီႈ 30/09/2025 တႄႇယၢမ်းဝၢႆးဝၼ်း 1 မူင်းပၢႆ ၾႆးမႆႈႁွင်ႈၵၢၼ်လုမ်းပလိၵ်ႈ၊ လုမ်းၾၢႆပႃႇမႆႉ လႄႈ လုမ်းတႅပ်းတတ်းတြႃး ၸိူဝ်းသိုၵ်းမၢၼ်ႈယိုတ်းမိူင်း သၢင်ႈဝႆႉၼႂ်းဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။

ၵူၼ်းမိူင်းၼႂ်းပိုၼ်ႉတီႈဝဵင်းၵျွၵ်ႉမႄး လၢတ်ႈၼႄဝႃႈ “ႁၢၼ်ႉတေႃႇထိုင်ယၢမ်းဝၢႆးဝၼ်း 2 မူင်းၼႆႉ ၾႆးတိုၵ်ႉမႆႈယူႇပႆႇထၢတ်ႇ။ ႁိူၼ်းယေး ၸိူဝ်းမီးႁိမ်းႁွမ်း ႁွင်ႈၵၢၼ်လုမ်းၸိူဝ်းၼၼ်ႉၵေႃႈ လၢမ်းမႆႈပႃးၵႂႃႇ။ မိူၼ်တင်ႈၸႂ် ၽဝ်” ဝႃႈၼႆ။

လႆႈႁူႉဝႃႈ မိူဝ်ႈၼႆႉ  30/9/2025  သိုၵ်းမၢၼ်ႈ တင်း သိုၵ်းတဢၢင်း ပဵၼ်ပၢင်တိုၵ်းၵၼ်ဝႆႉသေ ၾၢႆႇသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း လႄႈ တရူၼ်ႊ ပၼ်ႇလဵပ်ႈထိုင်ၼႂ်းဝဵင်းၵျွၵ်ႉမႄးၵွႆးဢမ်ႇၵႃး သဵင်ၵွင်ႈလူင် လႄႈ သဵင်မၢၵ်ႇၵေႃႈ ႁွၼ်ႈပၼ်းလင်ၸွတ်ႇတူဝ်ႈဝဵင်းဝႆႉ ။

ၼႂ်းဝဵင်းၵျွၵ်ႉမႄးၼႆႉ မီးၸုမ်းသိုၵ်းတဢၢင်း (TNLA) ယူႇသဝ်း တူင်ႉၼိုင်ႈၵႂႃႇမႃး ပၼ်ႇၵၢၼ်ၽွင်းငမ်းဝႆႉ တင်ႈတႄႇဝၢႆးလင်ပၢင်တိုၵ်း ၽႅၼ်ယၼ်ႇသိုၵ်း 1027 ပွၵ်ႈၵမ်းသွင်မႃး ႁၢၼ်ႉတေႃႇထိုင်ယၢမ်းလဵဝ်။

တႄႇၵၢင်လိူၼ်ဢေႃးၵၢတ်ႉသ်မႃး သိုၵ်းမၢၼ်ႈႁႅၼ်းသိုၵ်းၵူႈၾၢႆႇၾၢႆႇလေႃႇတိုၵ်းတပ်ႉသိုၵ်းတဢၢင်းႁၢဝ်ႈႁႅင်း။ ႁဵတ်းႁႂ်ႈၵူၼ်းမိူင်း ပိုၼ်ႉတီႈၸိူဝ်းယူႇၼႂ်းၵႄႈၵၢင်ဝဵင်းၼွင်ၶဵဝ် တင်း ဝဵင်းၵျွၵ်ႉမႄး ပၢႆႈဢွၵ်ႇယၢၼ်ႁိူၼ်းယေး ၼပ်ႉႁူဝ်မိုၼ်ႇၵေႃႉသေ ယၢပ်ႇၽိုတ်ႇ ၵၢၼ်ႁႃၵိၼ်လဵင်ႉတွင်ႉ လူဝ်ႇတၢင်းၸွႆႈထႅမ်ၶဝ်ႈၼမ်ႉတၢင်းၵိၼ်ဝႆႉႁၢဝ်ႈႁႅင်း။

ယၢမ်းလဵဝ်ဢၼ်ၽဝ်ၼႆႉပဵၼ်ၼမ်ႉမိုဝ်းၽႂ်ၵေႃႈ ၵူၼ်းပိုၼ်ႉတီႈပႆႇၸၢင်ႈလၢတ်ႈ ပႆႇလႆႈၶေႃႈယိုၼ်ယၼ်။ ၵူၺ်းၵႃႈ ၼႂ်းဝဵင်းၵျွၵ်ႉမႄးတႄႉ မီးၸုမ်းသိုၵ်း TNLA ၵူၺ်းၵႂႃႇမႃးတူင်ႉၼိုင်။ ၸုမ်းသိုၵ်းမၢၼ်ႈတႄႉတိုၵ်ႉမီးဝႆႉႁိမ်းႁွမ်းလႄႈၼွၵ်ႈဝဵင်းၵျွၵ်ႉမႄးယူႇ – ၼႆၵူၼ်းပိုၼ်ႉတီႈလၢတ်ႈၼင်ႇၼႆ။

ၼင်ႇႁိုဝ်တေၵုမ်းထိင်း ယိုတ်းဢဝ်လႆႈၶိုၼ်း ဝဵင်းၵျွၵ်ႉမႄးၼၼ်ႉ ၾၢႆႇသိုၵ်းမၢၼ်ႈ ၸႂ်ႉၶိူင်ႈၵွင်ႈလူင်၊ ၶိူင်ႈတရူၼ်ႊ လႄႈ ၶိူင်ႈမိၼ်တိုၵ်း ပွႆႇမၢၵ်ႇ ယိုဝ်းသႂ်ႇၸွမ်းဢွင်ႈတီႈ သိုၵ်းတဢၢင်း ပၵ်းတပ်ႉပၢင်သဝ်းဝႆႉၵွႆးဢမ်ႇၵႃး သိုၵ်းမၢၼ်ႈယိုဝ်းသႂ်ႇပႃးၼႂ်းပိုၼ်ႉတီႈ မီးၵူၼ်းမိူင်းယူႇသဝ်းထင်ဝႆႉလႄႈ ႁဵတ်းႁႂ်ႈ ၵူၼ်းမိူင်းလူႉတၢႆမၢတ်ႇၸဵပ်းၵႂႃႇၸွမ်း။

ၵဵဝ်ႇလူၺ်ႈပၢင်တိုၵ်းၼႆႉသေ ၾၢႆႇသိုၵ်းတဢၢင်းတႄႉ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ ပႆႇထွႆဢွၵ်ႇပၼ်ၼႂ်းဝဵင်းၵျွၵ်ႉမႄးသေ တိုၵ်ႉသိုပ်ႇယိုဝ်းတိုၵ်းသိုၵ်းမၢၼ်ႈၶိုၼ်းဝႆႉယူႇ ၼႆယဝ်ႉ။

တႅမ်ႈ-ၽူၺ်းၼုမ်ႇ