တႄႇၵၢင်လိူၼ် သႅပ်ႊထႅမ်ႊပိူဝ်ႊ ဝၼ်းတီႈ 14 ၼႆႉမႃးသိုၵ်းမၢၼ်ႈဢဝ်ဢဵၼ်ႁႅင်းသိုၵ်း 200 ထူဝ်းသိုၵ်းၶဝ်ႈၼႂ်းဝၢၼ်ႈဢလႄႇၶျွင်း ၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်းသေ တီႉၺွပ်းၵႂႃႇ ၵူၼ်းဝၢၼ်ႈ 10 ၵေႃႉ ။ ၼႂ်းသိုၵ်းမၢၼ်ႈတီႉၺွပ်းၵႂႃႇၼၼ်ႉ ပႃးၼၢင်းယိင်း ဢႃယု ၸမ် 30 သွင်ၵေႃႉ ၊ ၵူၼ်းၸၢႆး 8 ၵေႃႉ ဝႃႈၼႆ ။
ဝၢႆးလင် သိုၵ်းမၢၼ်ႈတီႉၺွပ်းၵႂႃႇ ၵူၼ်းဝၢၼ်ႈ 10 ၵေႃႉၼၼ်ႉၵႂႃႇလႆႈ 2 ဝၼ်း ၊ ၼၢင်းယိင်း 2 ၵေႃႉတႄႉ သိုၵ်းမၢၼ်ႈၶိုၼ်းပွႆႇမႃးယူႇသေတႃႉ ၵူၼ်းၸၢႆး 8 ၵေႃႉတႄႉသိုပ်ႇတီႉၺွပ်းဝႆႉ။
ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈဢဝ်သၢႆသိုၵ်း3 သၢႆ ထူဝ်းသိုၵ်းၶဝ်ႈ ၼႂ်းဝၢၼ်ႈ ။ ၵွၼ်ႇပႆႇထူဝ်းသိုၵ်းၶဝ်ႈၼၼ်ႉ ဢဝ်တရူၼ်ႊၶဝ်ႈၵူတ်ႇထတ်းၼႂ်းဝၢၼ်ႈဢွၼ်တၢင်း ၊ ယဝ်ႉတီႉၺွပ်းၵႂႃႇ ၵူၼ်းဝၢၼ်ႈ 10 ၵေႃႉ ။ ၵူၼ်းဝၢၼ်ႈယင်းဢမ်ႇႁူႉလွင်ႈတၢင်းလီလီဝႃႈသိုၵ်းမၢၼ်ႈမႃးတီႉၶဝ်ၵႂႃႇႁဵတ်းသင်။ ”- ဝႃႈၼႆ ။
သိုၵ်းမၢၼ်ႈၶဝ်ႈၵူတ်ႇထတ်း ၵူၼ်းလုၵ်ႉၽိုၼ်ႉၼႂ်းဢိူင်ႇၼႂ်းဝၢၼ်ႈသေ လႄႇလမ်းႁႃ လွၵ်ႇငိုတ်ႈ တီႉၺွပ်းပႃး ပေႃႈမႄႈၵူၼ်းလုၵ်ႉၽိုၼ်ႉ ။ လိူဝ်ၼၼ်ႉ ဢဝ်ရူတ်ႉၵႃး ၵူၼ်းၼႂ်းပိုၼ်ႉတီႈ ၵႂႃႇပႃးထႅင်ႈၼႆ- ၵူၼ်းပိုၼ်ႉတီႈလၢတ်ႈၼႄၼင်ႇၼႆ ။
လုၵ်ႈၸုမ်းလုၵ်ႉၽိုၼ်ႉၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈၶဝ် ၶဝ်ႈသွၵ်ႈႁႃ ၸုမ်းလုၵ်ႉၽိုၼ်ႉ ၸိူဝ်းမီးႁိမ်းႁွမ်းဝၢၼ်ႈၼႆႉ ၊ ၼႂ်းဝၼ်းတီႈ 13/9/2025 ၼၼ်ႉ ပဵၼ်ပၢင်တိုၵ်း ၵမ်းၼိုင်ႈ ၊ ၾၢႆႇတင်းသိုၵ်းမၢၼ်ႈၵေႃႈ မီးၵူၼ်းလူႉတၢႆ တင်းၼမ်”- ဝႃႈၼႆ ။
လိူဝ်ၼၼ်ႉၼႂ်းလိူၼ် ဢေႃႊၵတ်ႉသ် ယွၼ်ႉသိုၵ်းမၢၼ်ႈ ဢဝ်ႁိူဝ်းမိၼ် ပွႆႇမၢၵ်ႇလႄႈ ႁိူၼ်း ၵူၼ်းဝၢၼ်ႈၺွင်ႇပိၼ်ႇတႃႇ ၊ ၵျွၵ်ႉတေႃး ၾႆးမႆႈလူႉၵွႆ ၵူၼ်းဝၢၼ်ႈ ႁူဝ်ၵူၼ်း 800 ပၢႆ လႆႈငိူင်ႉပၢႆႈၽေးသိုၵ်းဝႆႉ ။
လုၵ်ႈၸုမ်းၾၢႆႇၸုမ်းလုၵ်ႉၽိုၼ်ႉသိုပ်ႇလၢတ်ႈထႅင်ႈဝႃႈ -“ သွင်ဝၢၼ်ႈၼၼ်ႉယၼ်ၵႆၵၼ်တင်း ဝဵင်းသေတႃႉ ယွၼ်ႉသိုၵ်းမၢၼ်ႈ ၵႆႉထႅမ်ႁႅင်းသိုၵ်းသေ ၵႆႉဢဝ်ႁိူဝ်းမိၼ်ပွႆႇမၢၵ်ႇလႄႈ ၵူၼ်းဝၢၼ်ႈ လႆႈငိူင်ႉပၢႆႈၽေးသိုၵ်း ။ လွင်ႈတုမ်ႉတိူဝ်ႉၵူၼ်းတႄႉ ဢမ်ႇမီး ”- ဝႃႈၼႆ ။
မိူဝ်ႈဝၼ်းတီႈ 12 ပူၼ်ႉမႃးၼႆႉၵေႃႈ သိုၵ်းမၢၼ်ႈ ႁႅင်းသိုၵ်း မွၵ်ႈ 100 ထူဝ်းသိုၵ်းၶဝ်ႈၼႂ်းဢိူင်ႇ ၵျွၵ်ႉငႅတ်ႉ ၸႄႈဝဵင်းယႂႃႇငၢၼ်ႇ၊ ၵူတ်ႇထတ်းၵူၼ်းဝၢၼ်ႈ ၸိူဝ်းၵႂႃႇႁႆႈၵႂႃႇသူၼ်၊ မၢင်ၵေႃႉ ၺႃးထုပ်ႉပေႃႉမၢတ်ႇၸဵပ်းပႃးသေ သိုၵ်းမၢၼ်ႈၶဝ်ႈ ပၵ်းတပ်ႉၼႂ်းဝၢၼ်ႈ ၸႂ်ႉၵူၼ်းပိုၼ်ႉတီႈသူင်ႇႁေႃၶဝ်ႈၽၵ်းပၼ်- ၼႆယဝ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ