တႄႇၵၢင်လိူၼ်သႅပ်ႊထႅမ်ႊပိူဝ်ႊၼႆႉမႃး သိုၵ်းတဢၢင်း TNLA တီႉၺွပ်း ၵူၼ်းဝၢၼ်ႈလဵၵ်ႉယႂ်ႇၼုမ်ႇထဝ်ႈ ၸဵမ်ယိင်းၸဵမ်ၸၢႆး ၼႂ်းၸႄႈဝဵင်းၵျွၵ်ႉမႄး ဢမ်ႇလိူၵ်ႈၽႃႇသႃႇ၊ ဢမ်ႇလိူၵ်ႈၸၢဝ်းၶိူဝ်း၊ ဢမ်ႇမၵ်းတတ်းဢႃႇယု ၊ ႁွင်ႉၵႂႃႇၵူတ်ႇထတ်း မၢင်ၸိူဝ်း ၺႃးထုပ်ႉပေႃႉ လူၺ်ႈဢမ်ႇမီးတၢင်းၽိတ်းသင် ။
ၵူၼ်းမိူင်းၸိူဝ်းၺႃးၸုမ်းသိုၵ်းတဢၢင်း တီႉၺွပ်းၵႂႃႇ ၼႂ်းၸႄႈဝဵင်းၵျွၵ်ႉမႄးၼႆႉ ပဵၼ်ၵူၼ်းဝၢၼ်ႈၸိူဝ်းယူႇၼႂ်းပွၵ်ႉ 1 ပၢင်ပဝ်းဢွၼ်ႇ၊ ပဵင်းၼိမ်၊ ပွၵ်ႉ 9 တိုဝ်ႉလႅင်၊ ဝၢၼ်ႈတွင်ၼဝ်ႈ လႄႈ တၢင်းဝၢၼ်ႈပဵင်းၼႄးၵူင်း ၸဵမ်ၸိူဝ်းၼႆႉၼႆ ၵူၼ်းမိူင်းပိုၼ်ႉတီႈ ၸႄႈဝဵင်းၵျွၵ်ႉမႄး လၢတ်ႈၼႄၼင်ႇၼႆ။
“သိုၵ်းလွႆ မႃးႁွင်ႉၵူၼ်းၸိူဝ်းမီးယူႇၼႂ်းဝၢၼ်ႈၵႂႃႇၵူႈၵေႃႉ။ မိူဝ်ႈၶဝ်မႃးႁွင်ႉၵႂႃႇၼၼ်ႉ မၢင်ၸိူဝ်းထၢမ်ၶဝ်ဝႃႈ ႁဝ်းမီးတၢင်းၽိတ်း သင်လႄႈ ႁွင်ႉႁဝ်းၶဝ်မႃးၼႆၵွႆးၵေႃႈ ၺႃးထုပ်ႉၵမ်းလဵဝ်။ ၶဝ်ဢမ်ႇပၼ်ႁဝ်းထၢမ်သင်။ ၵမ်ႈၽွင်ႈတႄႉၵေႃႈ မီးၵူၼ်းၸွမ်းလၢတ်ႈပၼ် ထိုင်ၸၼ်ႉၵူၼ်းလူင်ၶဝ်ၼၼ်ႉတႄႉ လႆႈဢွၵ်ႇမႃးၶိုၼ်းယဝ်ႉ။ ၸိူဝ်းပႆႇလႆႈပွၵ်ႈမႃးၶိုၼ်းၼၼ်ႉ ၵိုတ်းထႅင်ႈတင်းၼမ်ဢေႃႈ။”
လႆႈႁူႉဝႃႈ တေႃႇထိုင် မိူဝ်ႈဝႃး ဝၼ်းတီႈ 21/9/2025 သိုၵ်းမၢၼ်ႈ တင်း သိုၵ်းတဢၢင်း ပဵၼ်ပၢင်တိုၵ်းၵၼ် ၼႂ်းဢိူင်ႇတွင်သေးလိၵ်ႉ ယၢၼ်ၵႆၵၼ်ဝဵင်းၵျွၵ်ႉမႄးမွၵ်ႈ 10 လၵ်း။ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ လႆႈငိူင်ႉပၢႆႈၽေးပၢင်တိုၵ်းသေ ၵႂႃႇသွၼ်ႈယူႇဝႆႉၼႂ်းသူၼ် ၼႂ်းႁႆႈ ၸွမ်းထိူၼ်ႇတီႈလွတ်ႈၽေးပၢင်တိုၵ်းၼၼ်ႉဝႆႉႁိုင်ၶၢဝ်းတၢင်းမွၵ်ႈ 1 လိူၼ်ယဝ်ႉ ဝႃႈၼႆ။
ၾၢႆႇသိုဝ်ႇၶၢဝ်ႇတဢၢင်း ဢၼ်ၵဵဝ်ႇၵွင်ႉၵၼ်တင်း သိုၵ်းတဢၢင်း TNLA ၵမ်းသိုဝ်ႈၼၼ်ႉတႄႉၵေႃႈ တႅမ်ႈၶၢဝ်ႇဢွၵ်ႇဝႆႉဝႃႈ- ယွၼ်ႉသိုၵ်း မၢၼ်ႈ ပွႆႇၵူၼ်းပၼ်ၶၢဝ်ႇၵႂႃႇယူႇဝႆႉၸွမ်းဝၢၼ်ႈၵူၼ်းဝၢၼ်ႈလႄႈ ၾၢႆႇသိုၵ်းၶဝ်ႁွင်ႉၵႂႃႇၵူတ်ႇထတ်းၸႅတ်ႈထၢမ်တႃႇ 24 ၸူဝ်ႈမူင်း သင်ဢမ်ႇမီးတၢင်းၽိတ်းသင် တေပွႆႇမႃးပၼ်ၶိုၼ်းယူႇလႄႈ ဢမ်ႇပေႃးလူဝ်ႇမီးလွင်ႈမႆႈၸႂ်သင်ၼႆယူႇ။
ၵဵဝ်ႇလူၺ်ႈၵူၼ်းၼႂ်းပိုၼ်ႉတီႈ ၼႂ်းၸႄႈဝဵင်းၵျွၵ်ႉမႄး ၺႃးသိုၵ်းတဢၢင်း တီႉၺွပ်းႁွင်ႉဢဝ်ၵႂႃႇထိုင် ၼိူဝ်ႁူၺ်ႈႁၢဝ်းလွႆ ၸိူဝ်းၼၼ်ႉသေ ၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇၸူး လူၺ်းယေႇဢူး ၽူႈၶၢၼ်ပၢၵ်ႇၶွင် တပ်ႉသိုၵ်းတဢၢင်းယူႇသေတႃႉ ဢမ်ႇလႆႈၶေႃႈတုမ်ႉ တွပ်ႇသင်မႃးၶိုၼ်း။
ယွၼ်ႉသိုၵ်းတဢၢင်း ဢမ်ႇၸႅင်ႈၼႄလွင်ႈတၢင်းသင်သေ တီႉၺွပ်းႁွင်ႉဢဝ်ၵူၼ်းဝၢၼ်ႈ ပႃးၼၢင်းယိင်းၵႂႃႇၸွမ်းထႅင်ႈလႄႈ ႁဵတ်းႁႂ်ႈ ပီႈၼွင်ႉၵူၼ်းၸိူဝ်းထုၵ်ႇတီႉၺွပ်းၵႂႃႇၼၼ်ႉ မႆႈၸႂ်ၵူဝ်သိုၵ်းတဢၢင်းႁွင်ႉၵႂႃႇႁဵတ်းသိုၵ်း။ ၵူၼ်းမိူင်းပိုၼ်ႉတီႈတႄႉ တုၵ်းယွၼ်းထိုင် ၶႂ်ႈႁႂ်ႈၽူႈမီးပုၼ်ႈၽွၼ်းၼႂ်းၸုမ်းသိုၵ်းတဢၢင်း ပွႆႇပၼ်ၶိုၼ်း ၵူၼ်းဝၢၼ်ႈဝႆးဝႆး ၼႆယူႇ။
ၵူၼ်းမိူင်းၼႆႉဢမ်ႇမီးၶိူင်ႈၵွင်ႈၵၢင်ႇသင်။ ဢမ်ႇလႆႈပိုတ်းယိုဝ်းၽႂ်။ ၵွပ်ႈၼႆပေႃးပဵၼ်ပၢင်တိုၵ်းမႃး လူၺ်ႈလွင်ႈတၢင်းသင်ၵေႃႈယဝ်ႉ သိုၵ်း/ၸုမ်းယိပ်းၵွင်ႈၵၢင်ႇၸိူဝ်းၼႆႉႁၢမ်ႈတီႉၺွပ်းၵူၼ်းမိူင်းၵႂႃႇပဵၼ်တူဝ်ယိူဝ်ႇၼႂ်းၵၢၼ်သိုၵ်းသိူဝ်- ၼႆၼႂ်းၶေႃႈတူၵ်းလူင်း ၵျီႊၼီႊဝႃႊၶွၼ်ႊဝႅၼ်ႊသျိၼ်ႊ ပႃးဝႆႉၼင်ႇၼႆ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ