တႄႇဝၼ်းတီႈ 15/09/2025 မႃး သိုၵ်းတဢၢင်း TNLA ၶဝ်ႈသွၵ်ႈတီႉၺွပ်း ၵူၼ်းမိူင်းဝဵင်းၵျွၵ်ႉမႄး ၸိူဝ်းၵိုတ်းယူႇပႂ်ႉႁိူၼ်းၽႂ်မၼ်း လုၵ်ႈဢွၼ်ႇၼုမ်ႇႁၢႆးၸၢႆးယိင်းၵူၺ်းဢမ်ႇၵႃး တီႉပႃးၵူၼ်းဢႃယုယႂ်ႇ ၼၢင်းယိင်းၸိူဝ်းၼႆႉ ဝႃႈၼႆ။

ၼႂ်းၸႄႈဝဵင်းၵျွၵ်ႉမႄးၼႆႉ သိုၵ်းမၢၼ်ႈ တင်း သိုၵ်းတဢၢင်း ပဵၼ်ပၢင်တိုၵ်းၵၼ်ဝႆႉႁၢဝ်ႈႁႅင်းသေ ၵူၼ်းဝၢၼ်ႈၸိူဝ်းၵိုတ်းၶမ်ဝႆႉ ၼႂ်းပိုၼ်ႉတီႈ ၺႃးသိုၵ်းတဢၢင်း တီႉၺွပ်းႁွင်ႉဢဝ်ၵႂႃႇ ယၢမ်းလဵဝ် ၵပ်းသိုပ်ႇတိတ်းတေႃႇဢမ်ႇလႆႈလႄႈ ပီႈၼွင်ႉၵူၼ်းႁိူၼ်း ပဵၼ်ဢၼ်မႆႈၸႂ်ႁႅင်းဝႆႉၼႆ ၵူၼ်းၼုမ်ႇၵေႃႉႁူႉၸွမ်းပိူင်ပဵၼ်လွင်ႈၼႆႉ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ပူၼ်ႉမႃးသွင်သၢမ်ဝၼ်းၼႆႉ သိုၵ်းလွႆၶဝ် ၺွပ်းၶျေႃးၵူၼ်းဝၢၼ်ႈ။ ႁွင်ႉၵႂႃႇၵူၼ်းၸိူဝ်းၵိုတ်းပႂ်ႉဝႆႉႁိူၼ်းၽႂ်မၼ်းၵႂႃႇတင်းသဵင်ႈ။ ၸဵမ်ၽူႈယိင်း ၵူၼ်းၸၢႆး ႁွင်ႉၵႂႃႇမူတ်း။ ႁွင်ႉၵႂႃႇတၢင်းလႂ်၊ ၵႂႃႇႁဵတ်းသင်ၼႆၵေႃႈဢမ်ႇလႆႈႁူႉၸွမ်း။ မိူဝ်ႈလဵဝ် တိတ်းတေႃႇၵပ်းသိုပ်ႇ ႁႃ ၵူၼ်းၸိူဝ်းၺႃးႁွင်ႉၵႂႃႇၼၼ်ႉၵေႃႈဢမ်ႇလႆႈ။”

လႆႈႁူႉဝႃႈ ၵူၼ်းဝၢၼ်ႈၸိူဝ်းၺႃးသိုၵ်းတဢၢင်း လွၵ်ႇငိုတ်ႈတဵၵ်းႁွင်ႉတီႉၺွပ်းၵႂႃႇၼႆႉ ပဵၼ်ၵူၼ်းၼႂ်းဝၢၼ်ႈ ပဵင်းၼိမ်၊ တိုဝ်ႉလႅင် ဢိၵ်ႇလၢႆလၢႆဝၢၼ်ႈ ၸိူဝ်းမီးယူႇၸွမ်းသၢပ်ႇဝဵင်း ၵျွၵ်ႉမႄး လႄႈ ၼႂ်းဝဵင်းၵျွၵ်ႉမႄးၵမ်ႈၽွင်ႈဝႃႈၼႆ။

ယွၼ်ႉပၢင်တိုၵ်း ၼႂ်းၸႄႈဝဵင်းၵျွၵ်ႉမႄး ပဵၼ်ဝႆႉၶၢဝ်းႁိုင်လႄႈ မၢင်ဝၼ်းၵေႃႈ သိုၵ်းတင်းသွင်ၾၢႆႇ ယိုဝ်းၵၼ်ႁၢဝ်ႈႁႅင်း၊ မၢင်ဝၼ်းၵေႃႈ သဵင်ၵွင်ႈယဵၼ်ဝႆႉ ။ ၼႂ်းၶၢဝ်းပၢင်တိုၵ်းၼႆႉ ယွၼ်ႉမီးၽူႈလၵ်ႉလိူင်ႇၼမ်ႁႅင်းလႄႈ သင်ဢမ်ႇမီးၵူၼ်းႁိူၼ်းၽႂ်မၼ်းယူႇပႂ်ႉဝႆႉၸိုင် ၶူဝ်းၶွင်ႁၢႆလၢႆၵႂႃႇတင်းသဵင်ႈ။ ၵွပ်ႈၼၼ် ၵူၼ်းၼႂ်းပိုၼ်ႉတီႈ လႆႈၵိုတ်းယူႇပႂ်ႉဝႆႉႁိူၼ်းၽႂ်မၼ်း ၼိုင်ႈႁိူၼ်းလႂ် ၼိုင်ႈၵေႃႉ ဝႃႈၼႆ။

ဢိင်ၼိူဝ်လွင်ႈၼႆႉသေ ၵူၼ်းမိူင်းဝဵင်းၵျွၵ်ႉမႄး ၸိူဝ်းလႆႈပၢႆႈၽေးသိုၵ်းဝႆႉဢွၼ်ၵၼ်တုၵ်းယွၼ်း ႁႂ်ႈသိုၵ်းတဢၢင်းပွႆႇၵူၼ်းဝၢၼ်ႈပၼ်ၶိုၼ်းဝႆးဝႆးၼႆယူႇ။

ၵူၼ်းၸိူဝ်းထုၵ်ႇတီႉၵႂႃႇပႃးၸွမ်းပဵၼ်ၽႂ်လၢႆလၢႆ ဝၢၼ်ႈလႂ်ၽွင်ႈၼႆၸိူဝ်းၼႆႉ တိုၵ်ႉၸွပ်ႇတူၺ်းႁူဝ်ယွႆႈမၼ်းယူႇ။

လွင်ႈၼႆႉယူႇတီႈၽူႈတွႆႇႁွၵ်ႈ ၵပ်းသိုပ်ႇၸူး ၸုမ်းသိုၵ်းတဢၢင်းယူႇၵေႃႈ ၵပ်းသိုပ်ႇဢမ်ႇလႆႈ။

ၸွမ်းၼင်ႇလိၵ်ႈၵိၼ်ၵႅၼ်ႇ ၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊ တႄႉ ပႃးဝႆႉဝႃႈ – သိုၵ်းၼႆႉတေဢမ်ႇလႆႈပႃးၵွင်ႈၶူဝ်းသိုၵ်း ၶဝ်ႈၼႂ်းဝၢၼ်ႈၼႂ်းဝဵင်း၊ တေဢမ်ႇလႆႈတီႉၺွပ်းဢဝ်ၵူၼ်းမိူင်းလႄႈလုၵ်ႈဢွၼ်ႇပဵၼ်တူဝ်ယိူဝ်ႇ ဢမ်ႇၼၼ် တႃႇၸႂ်ႉၼႂ်းၵၢၼ်သိုၵ်းလႃးလႃး။ သိုၵ်းထုၵ်ႇလီၵႅတ်ႇၵင်ႈပၼ်သုၼ်ႇလႆႈလႄႈ လွင်ႈလွတ်ႈၽေး ၵူၼ်းမိူင်းလႄႈလုၵ်ႈဢွၼ်ႇ ၸိူဝ်းဢမ်ႇၶဝ်ႈပႃးၼႂ်းပၢင်တိုၵ်း၊ ၵူၼ်းၸိူဝ်းထုၵ်ႇၵုမ်းၶင်၊ ၵူၼ်းမၢတ်ႇၸဵပ်းလႄႈ ဢမ်ႇယူႇလီ၊ ၽူႈႁၢပ်ႇၵၢၼ်ပၢႆးယူႇလီ လႄႈၸုမ်းပရႁိတ ၸိူဝ်းၼႆႉ – ဝႃႈၼႆ။

တႅမ်ႈ-ၽူၺ်းၼုမ်ႇ