ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊထရမ်ႉ မၵ်းမၼ်ႈၸိုင်ႈမိူင်း 23 မိူင်း ပႃးမိူင်းႁူမ်ႈတုမ်မၢၼ်ႈ၊ မိူင်းဢိၼ်းတီးယိူဝ်းလႄႈ မိူင်းပႃႊၵိတ်ႊသတၼ်ႊ ပဵၼ်မိူင်းႁဵတ်းဢွၵ်ႇပိုၼ်ၽႄႈယႃႈမဝ်းၵမ် ဢမ်ႇၼၼ် တေႃႉသူင်ႇၵႃႉၶၢႆယႃႈမဝ်းၵမ်ၶၢမ်ႈလႅၼ်လိၼ် ဝႃႈၼႆ။
လွင်ႈၼႆႉ ၸွမ်ၸိုင်ႈထရမ်ႉ လႆႈတႅပ်းတတ်းယိုၼ်ႈတၢင်ႇၵႂႃႇတီႈ United States Congress ၼႂ်းဝၼ်းတီႈ 15 လိူၼ်သႅပ်ႊထႅမ်ႊပိူဝ်ႊၼႆႉ – ႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း မိူင်းဢမေႊရိၵၼ်ႊ ပိုၼ်ၽၢဝ်ႇဝႆႉၼင်ႇၼႆ။
ၼႂ်း 23 ၸိုင်ႈမိူင်းၼၼ်ႉ ပဵၼ်မိူင်းႁူမ်ႈတုမ်မၢၼ်ႈ၊ မိူင်းလၢဝ်း၊ မိူင်းၶႄႇ၊ မိူင်းၵြႃး ဢိၼ်ႊတီႊယႃႊ (India)၊ ပႃႊၵိတ်ႉသထၢၼ်ႊ (Pakistan)၊ ဢႃႊၾၵၼ်ႊၼိတ်ႉသထၼ်ႊ (Afghanistan)၊ ပႃႊႁႃးမႃးသ် (Bahamas)၊ ပီႊလိတ်ႉ (Belize)၊ ပူဝ်ႊလီးပီးယိူဝ်း (Bolivia)၊ ၵူဝ်ႊလမ်ႊပီႊယႃႊ (Colombia)၊ ၵူတ်ႊသတႃႊရီႊၵႃႊ (Costa Rica)၊ တူဝ်ႊမီႊၼီႊၵၼ်ႊ (Dominican Republic)၊ ဢီႊၵူၺ်ႊတေႃႊ (Ecuador)၊ ဢႅဝ်ႊသႃႊဝေႊတေႃႊ (El Salvador)၊ ၵႂႃႊတီႊမႃႊလႃႊ (Guatemala)၊ ႁေႊတီႊ(Haiti)၊ ႁွၼ်ႊတူႊရတ်ႉ (Honduras) ၵျမေႊၵႃႊ(Jamaica)၊ မႅၵ်ႊသီႊၵူဝ်ႊ(Mexico)၊ ၼီႊၵႃႊလႃႊၵႂႃႊ (Nicaragua)၊ ပၼႃႊမႃႊ (Panama)၊ ပီႊရူႊ (Peru) လႄႈ မိူင်းဝႅၼ်ႊၼီႊသွႆႊလႃႊ ( Venezuela) ၸိူဝ်းၼႆႉ ၼႆယဝ်ႉ။
ၸွမ်ၸိုင်ႈ ထရမ်ႉ လၢတ်ႈဝႃႈ – ၼႂ်းၶၢဝ်းတၢင်း 12 လိူၼ်ပူၼ်ႉမႃးၼႆႉ မိူင်းႁူမ်ႈတုမ်မၢၼ်ႈ၊ ဢႃႊၾၵၼ်ႊ ၼိတ်ႉသတၼ်ႊ၊ ပူဝ်ႊလီးပီးယိူဝ်း၊ၵူဝ်ႊလမ်ႊပီႊယႃႊလႄႈ ဝႅၼ်ႊၼီႊသွႆႊလႃႊ ၶဝ် 5 မိူင်းၼႆႉ လုတ်ႈႁၢမ်း တႃႇႁဵတ်းသၢင်ႈၸွမ်းပုၼ်ႈၽွၼ်း ၵၢၼ်ၽဵဝ်ႈမူၺ်ႉတိုၵ်းတေႃး ယႃႈမဝ်းၵမ်ၵူႈမိူင်းမိူင်း ဝႃႈၼႆ။
လိူဝ်ၼၼ်ႉ တိုၵ်းသူၼ်း ႁႂ်ႈၽူႈဢွၼ်ႁူဝ်မိူင်းၶႄႇၶဝ် ဢဝ်လိူင်ႈၵၢၼ်ပိုၼ်ၽႄႈတေႃႉသူင်ႇၵႃႉၶၢႆ ယႃႈမဝ်းၵမ် လႄႈ ၵူၼ်းႁဵတ်းၽိတ်းပူၼ်ႉပႅၼ် ၸိူဝ်းၵဵဝ်ႇၶွင်ႈယႃႈမဝ်းၵမ်ၼၼ်ႉ ႁၢဝ်ႈႁႅင်း ၼႆယဝ်ႉ။
ယႃႈမဝ်းၵမ်ၼႆႉ ဢမေႊရိၵၼ်ႊ ယင်းတိုၵ်ႉမၵ်းမၼ်ႈဝႆႉပဵၼ် ၽေးၶဵၼ်လူင် ဢၼ်လွၵ်ႇငိူတ်ႈတေႃႇ ဝၢၼ်ႈမိူင်းသေ ပဵၼ်လွင်ႈတၢင်းဢၼ်ႁဵတ်းႁႂ်ႈၵူၼ်းမိူင်း ဢမေႊရိၵၼ်ႊ ၼႂ်းၵႄႈဢႃယု 18 ထိုင် 44 ပီ လႆႈလူႉတၢႆၼႆ – ႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း လၢတ်ႈဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ