ၵၢပ်ႈဝၢၼ်ႈပၢၼ်မိူင်းလႅၵ်ႈလၢႆႈၵေႃႈ လွင်ႈယူႇလွင်ႈၵိၼ်ၵူၼ်းႁဝ်းၵႃႈလႆႈလႅၵ်ႈလၢႆႈ ။ ၵၢၼ်ႁႃၵိၼ်လဵင်ႉတွင်ႉၵေႃႈ လႅၵ်ႈလၢႆႈၸွမ်း။ ၵၢပ်ႈယၢမ်းလဵဝ် ၵၢၼ်ဢၼ် ၵူၼ်းႁဝ်းလႆႈၼင်ႈသေ ႁဵတ်းၵေႃႈ မီးတင်းၼမ် ။ ၵွပ်ႈလႆႈၼင်ႈႁိုင် ထပ်းၵၼ်လၢႆပီလၢႆလိူၼ်လႄႈ တၢင်းပဵၼ်ဢၼ်ဢမ်ႇလၢမ်းၶၢတ်ႈလႆႈၵေႃႈ ၸပ်းမႃးၸွမ်း ။  ဢၼ်ၵူၼ်းၸိူဝ်းၼင်ႈႁဵတ်းၵၢၼ်ၶဝ် ၵႆႉဢွၼ်ၵၼ်ပဵၼ်ၼမ်ၼႂ်းဝၼ်းမိူဝ်ႈၼႆႉ ႁွင်ႉဝႃႈ တၢင်းပဵၼ် ဢွပ်ႉၾိတ်သ်ႉသိၼ်ႊတရူမ်ႊ Office Syndrome ၼႆယဝ်ႉ ။

ဢွပ်ႉၾိတ်သ်ႉသိၼ်ႊတရူမ်ႊ Office Syndrome ဢၼ်ဝႃႈၼႆႉ ပဵၼ်ၸိုဝ်ႈတၢင်းပဵၼ်ၸိူဝ်ႉၼိုင်ႈ ၵူၼ်းၸိူဝ်းႁဵတ်းၵၢၼ်ၼႂ်းလုမ်းၼႂ်းၸႆး ၵူၼ်းၼင်ႈသေႁဵတ်းၵၢၼ်တီႈလဵဝ်ႁိုင်ၼၢၼ်း ၸၢင်ႈပဵၼ်ၵၼ်ၼမ် ။ ၼႂ်းၵၢပ်ႈပၢၼ်မိူဝ်ႈလဵဝ် ယိင်ႈၶႅၼ်းမီးၵူၼ်းၸပ်းတၢင်းပဵၼ်သႅၼ်းၼႆႉၼမ်မႃး ။

ပေႃးတႅၵ်ႈၵၼ်တၢင်းၵူၼ်းမိူဝ်ႈၵွၼ်ႇၼႆ လႆႈဝႃႈ ၵူၼ်းၵၢပ်ႈယၢမ်းလဵဝ် ႁဵတ်းၵၢၼ်ဢၼ်လႆႈၼင်ႈယူႇ တီႈလဵဝ် ၵမ်ႈပႃႈၼမ် ။ မိူဝ်ႈဢွၼ်တၢင်း မိူဝ်ႈၶွမ်ႊၽိဝ်ႊတိူဝ်ႊပႆႇလိူင်ႇၼမ်တႄႉ ၵမ်ႈၼမ်ဢွၼ်ၵၼ်ႁဵတ်းၵၢၼ် လူၺ်ႈႁႅင်းတူဝ် လႆႈတူင်ႉလႆႈၼိုင်ႈတႃႇသေႇ ။

ၵူၼ်းၸိူဝ်း ဢၼ်ယူႇၵႆဝၢၼ်ႈၵႆဝဵင်း လႄႈ ၵူၼ်းၸိူဝ်းယူႇၼႂ်းဝဵင်း တေပိူင်ႈၵၼ် ၵူၼ်းၸိူဝ်းယူႇ ထုၵ်းထူ ၸွမ်းသူၼ်ႁႆႈၼႃးတႄႉ ဢမ်ႇတွၼ်ႉလႆႈၼင်ႈယူႇလၢႆ ထိုင်တီႈတေၸပ်းတၢင်းပဵၼ် Office Syndrome ၸိူင်ႉၼႆ  ။

ၵူၺ်းၵႃႈ ၵူၼ်းယူႇၼႂ်းဝဵင်းယႂ်ႇဝဵင်းလူင်တႄႉ ၵမ်ႈၼမ် ပဵၼ်ၵၢၼ်ဢၼ်လႆႈၼင်ႈသေႁဵတ်း မိူၼ်ၼင်ႇ ၵၢၼ်လုမ်းၵၢၼ်ၸႆးၵူႈသႅၼ်းသႅၼ်း ၊ ၵၢၼ်ၵဵပ်းသဵၼ်ႈမၢႆ ငိုၼ်းလႄႈ ၶူဝ်းၵုၼ်ႇၵူႈလွင်ႈလွင်ႈ ၊ ၵၢၼ်ၵႃႉၶၢႆ ၼႂ်းဢွၼ်ႊလၢႆႊ ၊ ၵၢၼ်ထတ်းလိၵ်ႈ တႅမ်ႈလိၵ်ႈ ၸိူဝ်းၼႆႉ ။

ဢမ်ႇဝႃႈ တေပဵၼ်ၵၢၼ်မူႇလႂ်ၸုမ်းလႂ် ၶွမ်ႊပၼီႊလႂ်ၵေႃႈယဝ်ႉ မိူဝ်ႈလဵဝ် တိုၼ်းမီးပႃး ႁွင်ႈၵၢၼ် ၾၢႆႇၵၢၼ်လုမ်းၶေႃၶေႃ မိူၼ်ၼင်ႇ တႃႇၸတ်းၵၢၼ်ၵူၼ်း ၊ တႃႇထႅမ်လွင်ႈလူဝ်ႇၼႂ်းလုမ်းၵူႈလွင်ႈလွင်ႈ ဢႅတ်ႊမိၼ်ႊ Admin ၼႆၸိူဝ်းၼႆႉ။ ၵမ်ႈၼမ် လႆႈၼပ်ႉလႆႈမၢႆဝႆႉၼႂ်း ၶွမ်ႊၽိဝ်ႊတိူဝ်ႊၸိူဝ်းၼႆႉလႄႈ လႆႈၼင်ႈၼမ်လိူဝ်သေ ၵၢၼ်တၢင်ႇဢၼ်။

ၵွပ်ႈလႆႈၼင်ႈသေ ႁဵတ်းၵၢၼ်ၵမ်ႈပႃႈၼမ်လႄႈ ၸင်ႈမီးမႃးတၢင်းပဵၼ်  လုပ်ႇၶေႃး  ၊ လုပ်ႇသၼ်လင်ၶူပ်းၶိုၼ်ႈ ၊ ၵွင်ႈၵေႃႈၼၵ်း ၊ ႁူဝ်မႃႇၵူၼ်ႉၶိုၼ်ႈမူၺ်ႈ ၸိူဝ်းၼႆႉ။

 ဢိင်ၼိူဝ်လႆႈၼင်ႈႁဵတ်းၵၢၼ်ၼိူဝ်ၽိူၼ်ႁိုင်ၵႃႈႁိုဝ်ၵေႃႈ လုပ်ႇၶေႃး လုပ်ႇၵွင်ႇၵေႃႈ သၼ်လင်ၸိူဝ်းၼႆႉၵေႃႈ တေပိူင်ႈမႃးၵမ်းလွႆးလွႆး။

ၵူၼ်းၸိူဝ်းဢၼ်လႆႈႁဵတ်းၵၢၼ်ၼိူဝ်ၽိူၼ်ၶွမ်ႊ ၸိူဝ်းၼႆႉ ၵမ်ႈၼမ် တေၵူမ်ႈၼႃႈ တူၺ်းၶွမ်ႊၵူၺ်း ဢမ်ႇတၼ်းယိုတ်ႈတူဝ် ၶဵင်ႈၶေႃးသင် ၊ ဢႅဝ်ၵေႃႈ ဢမ်ႇတၼ်းၾၢင်ႉသေယိုတ်ႈပၼ် ၊ ၶေႃးၵေႃႈ ဢမ်ႇတၼ်းၾၢင်ႉဝႃႈ သိုဝ်ႈဢမ်ႇသိုဝ်ႈ ။

ပေႃးႁဵတ်းၼၼ် ၶၢဝ်းယၢဝ်းတႄႉ လုပ်ႇၶေႃးၵေႃႈ တေဢမ်ႇမိူၼ်ၵဝ်ႇသေ ၵၢမ်ႈၼိူဝ်ႉတီႈလမ်းၶေႃး လႄႈၵွင်ႇၵေႃႈ တေၶႅင်ၸွမ်း ၊ လုပ်ႇသၼ်လင်ၵေႃႈ တေငေႃး တေၶူတ်းသေ ႁိုင်မႃးၵေႃႈ ထိုင်တီႈယိုတ်ႈၶဵင်ႈၶိုၼ်းပေႃးဢမ်ႇၶႂ်ႈလႆႈ ယွၼ်ႉဝႃႈ ၵၢမ်ႈၼိူဝ်ႉလႄႈသဵၼ်ႈဢဵၼ်ၸိူဝ်းၼႆႉ တေၶဵင်ႈတေၵႅၼ်ႇဝႆႉမူတ်း ။

သင်ဝႃႈ ဢမ်ႇႁူႉၾၢင်ႉသေ ပဵၼ်ၵေႃႈပွႆႇႁႂ်ႈပဵၼ်ယူႇႁဵတ်းၼၼ်ၶၢဝ်းႁိုင်ၸိုင် ယိင်ႈဢႃယုယႂ်ႇၶိုၼ်ႈမႃးၵေႃႈ ၵၢမ်ႈၼိူဝ်ႉၼႂ်းတူဝ်ၵူၼ်းႁဝ်းၵေႃႈ တေၶဵင်ႈၵႂႃႇၵမ်းလွႆးလွႆးသေ တေဢမ်ႇယိုတ်ႈလႆႈ  ၊ ၵမ်းလိုၼ်း လင်ၶူတ်းၵေႃႈ တေၶူတ်းယူႇႁဵတ်းၼၼ်ၵူၺ်းသေ  ၊ ၶေႃးၵေႃႈ တေယိုတ်ႈၶဵင်ႈဢမ်ႇလႆႈမိူၼ်ၵဝ်ႇ ။

လုပ်ႇၶေႃးလႄႈ လုပ်ႇသၼ်လင်ၸိူဝ်းၼႆႉ ၶူတ်းငေႃးဝႆႉၶၢဝ်းႁိုင်လႄႈ ၶၢၼ် ၊ ၶႆမၼ်းၸိူဝ်းၼႆႉ တေၸၢင်ႈၶေႃႇဝႆႉ ၸွမ်းလုပ်ႇၸိူဝ်းၼႆႉ- တႃႇၸိုၼ်ႈၶႅၼ်းၶိုၼ်းယၢပ်ႇ။

 ၸၢင်ႈၸပ်းပႃးတၢင်းပဵၼ် ႁူဝ်ၶႆႈႁူဝ်ငၢၼ်ႈ ၊ ၼမ်ႉၼႂ်းႁူၺ်ႇတႃႁႅင်ႈ လႄႈ ၼွၼ်းဢမ်ႇလပ်း ၊ ႁိူဝ်ႉဢူၼ်ႈငၢႆႈ ၊ တၢင်းပဵၼ်ႁႅင်းၸႂ်တူၵ်းၸိူဝ်းၼႆႉ။

ၼင်ႇႁိုဝ် တေဢမ်ႇၸပ်းတၢင်းပဵၼ်ၸိူင်ႉၼႆၼၼ်ႉ တၵ်းလူဝ်ႇၵႆႉတူင်ႉၼိုင်ပၼ် ၽွင်းၼင်ႈႁဵတ်းၵၢၼ်ၵူႈဝၼ်းဝၼ်းၼၼ်ႉ ။

သင်ဝႃႈ ၸဝ်ႈၵဝ်ႇငမ်းငဝ်းဝႃႈ ၸပ်းတၢင်းပဵၼ် office syndrome ၼႆၸိုင် ၵိုင်ႇလီၵႂႃႇၼႄမေႃယႃၵေႃႈ ႁႂ်ႈၸဵဝ်းၼႄသေ ထၢမ်လွင်ႈထၢမ်တၢင်းမၼ်းလီလီ ။ ႁဵတ်းၸွမ်းၼင်ႇ မေႃၸီႉသင်ႇလီတီႈသုတ်း။

ၸူဝ်ႈပႆႇၸပ်းတၢင်းပဵၼ်ၼႆႉၵေႃႈ ၼင်ႇႁိုဝ်တေဢမ်ႇပဵၼ်ၼၼ်ႉ ႁူႉဝႆႉလၢႆးႁႄႉၵင်ႈမၼ်းသေ ထုၵ်ႇလီႁဵတ်းၸွမ်းယူႇ။

ပေႃးၼင်ႈႁဵတ်းၵၢၼ်ႁိုင်ထိုင် 2 ၸူဝ်ႈမူင်းယဝ်ႉၸိုင် ႁႂ်ႈၽိုၼ်ႉဝၢႆႇပၼ် တူင်ႉၼိုင်ပၼ် ယိုတ်ႈသဵၼ်ႈယိုတ်ႈသၢႆပၼ် ဢႅဝ် ၊ ၶေႃး ၊ သၼ်လင် ၊ ၶႅၼ် ၊ ႁူဝ်မႃႇ ၊ တိၼ်မိုဝ်း ၸိူဝ်းၼႆႉ ႁႂ်ႈၵႆႉတူင်ႉၼိုင်ပၼ်။

သင်ဝႃႈ ဢမ်ႇႁူႉလၢႆးတူင်ႉၼိုင်မၼ်းလီလီၸိုင် ႁႂ်ႈၶဝ်ႈတူၺ်းၼႂ်း ဢွၼ်ႊလၢႆႊ ဢမ်ႇဝႃႈ ၼႂ်းဝႅပ်ႉသၢႆႉ လႄႈ ၼႂ်းသူဝ်ႊသျႄႊမီႊတီႊယႃႊလၢႆဢၼ်ၵေႃႈ မေႃယႃဢၼ်ၵဵဝ်ႇၶွင်ႈၶဝ် လၢတ်ႈပၼ်လၢႆးမၼ်းဝႆႉယူႇ ။ တႅမ်ႈႁႃဝႃႈ  office syndrome ၼႆၵူၺ်းၵေႃႈ တေႁႃႁၼ်လႆႈ။

ႁႂ်ႈပေႃးပဵၼ်ၾိင်ႈယၢမ်ႈလီသေ ႁႂ်ႈပေႃးႁႄႉၵင်ႈလႆႈတၢင်းပဵၼ် office syndrome ၼၼ်ႉ ၼိုင်ႈဝၼ်းၼႆႉ တီႈဢေႇသုတ်း ႁႂ်ႈႁဵတ်းၾိုၵ်းသၢၼ်းပၼ် ၶိုင်ႈၸူဝ်ႈမူင်းၼႆႉၵေႃႈ တေၵုမ်ႇထူၼ်ႈယူႇ ။  ၼိုင်ႈဝူင်ႈလႂ် 3 ပွၵ်ႈၼႆႉ ယႃႇႁႂ်ႈယွမ်း ။

ၾိုၵ်းသၢၼ်းပၼ် ႁႂ်ႈ ၵၢမ်ႈၼိူဝ်ႉၵႅၼ်ႇၶႅင်ႇ မီးႁႅင်းယိုတ်ႈလႆႈ ၶဵင်ႈလႆႈ။ ပေႃးဢဝ်သၽႃႇဝမၼ်းဝႃႈၸိုင် ၵၢမ်ႈၼိူဝ်ႉၵူၼ်းႁဝ်းၼႆႉ ယၢၼ်းလႆႈ ၶဵင်ႈလႆႈႁင်းမၼ်း  ။ ၵူၺ်းၵႃႈ ၵွပ်ႈဢမ်ႇၵႆႉတူင်ႉၵႆႉၼိုင်သေ ၸၢင်ႈႁဵတ်းႁႂ်ႈၵၢမ်ႈၼိူဝ်ႉၵႅၼ်ႇပႅတ်ႈ ပဵၼ်ပိူင်တၢႆပႅတ်ႈ ။  ပိူင်လူင်မၼ်းတႄႉ လူဝ်ႇႁဵတ်းႁႂ်ႈၵၢမ်ႈၼိူဝ်ႉၸဝ်ႈၵဝ်ႇတေဢမ်ႇႁူတ်း ၊ ဢမ်ႇတၢႆပႅတ်ႈၼၼ်ႉ လမ်ႇလွင်ႈတႄႉတႄႉ ။  တႃႇႁႄႉၵင်ႈတၢင်းပဵၼ် office syndrome ၼၼ်ႉၵေႃႈ ပိူင်လူင် လူဝ်ႇႁႂ်ႈၵၢမ်ႈၼိူဝ်ႉတိုၵ်ႉႁဵတ်းၵၢၼ်မိူၼ်ၵဝ်ႇ။

တီႈၼင်ႈႁဵတ်းၵၢၼ်ၸဝ်ႈၵဝ်ႇၼၼ်ႉၵေႃႈ တေလႆႈဝၢင်းၶပ်ႉႁႂ်ႈမႅၼ်ႈၸွမ်းပၢႆးယူႇလီ ။ ၶွမ်ႊၸိူဝ်းၼႆ ဝၢင်းႁႂ်ႈမၼ်းသိုဝ်ႈၵၼ်တၢင်းသၢႆတႃၸဝ်ႈၵဝ်ႇ ၊ ယႃႇႁႂ်ႈလႆႈၵူမ်ႈပူၼ်ႉ ယႃႇႁႂ်ႈလႆႈ ႁႅၼ်ပူၼ်ႉ ။ သင်ဝႃႈ ဢမ်ႇႁူႉလွၵ်းလၢႆးဝၢင်းၶွမ်ႊၸိူဝ်းၼႆႉ ၵိုင်ႇလီဢုပ်ႇၵုမ် ယွၼ်းတၢင်းႁၼ်ထိုင်ၽူႈလူင်ႉလႅၼ်ႇၶဝ်။

မိူဝ်ႈၼင်ႈၼၼ်ႉ ႁႂ်ႈဝႆႉဢႅဝ် လႄႈ သၼ်လင်သိုဝ်ႈသိုဝ်ႈ ၊ ႁူဝ်မႃႇၸဝ်ႈၵဝ်ႇၼၼ်ႉ ၵႆႉယုၵ်ႉၶိုၼ်ႈယုၵ်ႉလူင်းပၼ် ၵၢမ်ႈၼိူဝ်ႉမၼ်းၸင်ႇတေဢမ်ႇၵႅၼ်ႇပူၼ်ႉ ။

ဢၼ်လမ်ႇလွင်ႈထႅင်ႈၵေႃႈ ႁႂ်ႈလိုဝ်ႈပၼ်သၢႆတႃ ။ ၵမ်ႈၼမ် ၶၢဝ်းႁဵတ်းၵၢၼ်ၼၼ်ႉ တေပၵ်းတႃတူၺ်း ၶွမ်ႊတူၺ်းၾူၼ်းယူႇတႃႇသေႇ ဢမ်ႇတွၼ်ႉဝႆႉၶၢဝ်းယၢမ်းလိုဝ်ႈပၼ်သၢႆတႃ ။ လွင်ႈပၵ်းတႃတူၺ်း သေဢၼ်ဢၼ်ၼၼ်ႉၵေႃႈ ၸၢင်ႈႁဵတ်းႁႂ်ႈ ဢဵၼ်ၸွမ်းၵွင်ႈၵေႃႈၸိူဝ်းၼႆႉ ၶဵင်ႈသေ ၵၢမ်ႈၼိူဝ်ႉ ဢမ်ႇ ႁဵတ်းၵၢၼ် ၼင်ႇသၽႃႇဝမၼ်းယဝ်ႉလႄႈ ႁဵတ်းႁႂ်ႈႁူဝ်ၶိုၼ်ႈႁူဝ်ငၢၼ်ႈထႅင်ႈလူးၵွၼ်ႇ ။

ဢၼ်လၢတ်ႈမႃး ပႃႈၼိူဝ်ၼႆႉ ၵဵဝ်ႇလူၺ်ႈလွင်ႈတၢင်းပဵၼ်ၵူၼ်းၸိူဝ်းလႆႈၼင်ႈၶၢဝ်းႁိုင်သေ ႁဵတ်းၵၢၼ် ဢၼ်ႁွင်ႉဝႃႈ office syndrome။

တၢင်းပဵၼ် office syndrome ၼႆႉ မေႃယႃၾၢႆႇယူတ်းယႃလုပ်ႇၶဝ်လၢတ်ႈဝႆႉတႄႉ ပဵၼ်တၢင်းပဵၼ်လၢႆသႅၼ်း ဢၼ်မႃးၶွၼ်ႈၵၼ်တီႈလဵဝ်သေပဵၼ် ၼႆၵေႃႈ ဝႃႈလႆႈ ၼႆယဝ်ႉ။

ၽိုၼ်ဢိင် – ပပ်ႉလိၵ်ႈ – บำบัด office syndrome ด้วยวิธี DIY