ယၢမ်းလဵဝ် ၸဝ်ႈၼႃးၼႂ်းထုင်ႉပူင်း ၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း ဢွၼ်ၵၼ်ထူပ်းတၢင်းယၢပ်ႇၽိုတ်ႇ တႃႇပၢတ်ႇၶဝ်ႈ ယွၼ်ႉၼမ်ႉထူမ်ႈၼမ်ႉၼွင်းဝႆႉ ဝႃႈၼႆ။  

ၵူၼ်းပိုၼ်ႉတီႈ ထုင်ႉပူင်း လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၽွင်းပၢတ်ႇမၼ်းလီလီယဝ်ႉ မိူဝ်ႈလဵဝ်ၼႆႉ ၶဝ်ႁွင်ႉၶဝ်ႈၵၢင်ၼၼ်ႉၼႃႇ တူၼ်ႈၶဝ်ႈၼႆႉသမ်ႉ မၼ်းဢမ်ႇၶၢမ်ႇၼမ်ႉလႆႈ၊ ၼမ်ႉၵေႃႈ ဢမ်ႇမူတ်းသႂ်မိူၼ်ၵူႈ ပွၵ်ႈ ပဵၼ်ၼမ်ႉဝူၺ်ႇႁၢင်ႈဝႆႉ သမ်ႉၸႂ်ႉယႃၶႃႈလႄႈ ၵမ်ႈၽွင်ႈၵေႃႈၶူမ်း ပေႃးၵႂႃႇပၢတ်ႇၶဝ်ႈၼႆ၊ ဢၼ်ႁၢႆႉသေ ပိူၼ်ႈသမ်ႉ ပဵၼ်ပႃလုၵ်းၸီး ပႃၼႆႉၵေႃႈ လၢၵ်ႇလၢႆးၼႃႇ ၼႂ်းသွင်သၢမ်ပီမႃးၼႆႉ။ ပေႃးမၼ်းၸီး (ၶူပ်း) ၵူၼ်းၼႆ ပေႃးၶႂ်ႈၼၢဝ်ဢေႃႈ၊ ပေႃးၵႂႃႇပၢတ်ႇၶဝ်ႈၼႆ လႆႈပူၵ်ႉလႆႈႁေႃႇတႄႉတႄႉဝႃႈဝႃႈသေ လူင်းဢေႃႈ ၸိူဝ်းၼၼ်ႉၵေႃႈ ၾၢႆႇၼိုင်ႈ ၽႂ်ၵေႃႈ ဢမ်ႇပေႃးၶၢမ်ႇၼမ်ႉမႃး”- ဝႃႈၼႆ။

ယွၼ်ႉၼမ်ႉထူမ်ႈၼမ်ႉၼွင်းသေ ပီၼႆႉ ႁဵတ်းႁႂ်ႈတူၼ်ႈၶဝ်ႈၼဝ်ႈ ၵူၼ်းမိူင်းလႆႈလူႉသုမ်း ဢမ်ႇယွမ်း 3,000 ဢေႊၶိူဝ်ႊ။ ဢၼ်ၵူၼ်းမိူင်းလႆႈသုမ်းၶဝ်ႈ ယွၼ်ႉၼမ်ႉထူမ်ႈၼႃးၼႆႉ ဢမ်ႇၸႂ်ႈပီၼႆႉၵူၺ်း ပီၵၢႆၵေႃႈ လႆႈသုမ်းမွၵ်ႈ 9,000 ဢေႊၶိူဝ်ႊ ၸိူဝ်းၼႆႉယဝ်ႉ ပွၵ်ႈၼိုင်ႈ ဝႃႈၼႆ။

“တူင်ႈၼႃး ဢၼ်လႆႈလူႉသုမ်းၵႂႃႇၼႆႉ တေမီးလၢႆလၢႆတီႈဝႆႉ မိူၼ်ၼင်ႇ တၢင်းသီႇသႅင်ႇ၊ ႁူဝ်ပူင်း၊ တူၼ်ႈတီး၊ ၵျွၵ်ႉတလူင်း ၸိူဝ်းၼႆႉ။ ဝၢၼ်ႈပွင်းမၼ်းၼမ်ၼႃႇ ဢမ်ႇယွမ်းမွၵ်ႈ 3,000 ၸိူဝ်းၼႆႉ။ ဢၼ်လႆႈလူႉသုမ်းၵႂႃႇတႄႉ ၼဝ်ႈသေ ဢမ်ႇလႆႈပၢတ်ႇလုမ်းလုမ်းၵေႃႈမီး”- ၵူၼ်းပိုၼ်ႉတီႈထုင်ႉပူင်း သိုပ်ႇလၢတ်ႈၼႄၼင်ႇၼႆ။

ဢိင်ၼိူဝ် လွင်ႈၼမ်ႉထူမ်ႈတူင်ႈၼႃး ၵူၼ်းထုင်ႉပူင်းၼႆႉသေ မိူဝ်ႈပီၵၢႆၵေႃႈလူႉသုမ်း ပီၼႆႉၵေႃႈ သုမ်းထႅင်ႈ တႃႇတေႁဵတ်းၵႂႃႇပီၼႃႈၼႆႉ ပဵၼ်ဢၼ်ယၢပ်ႇၽိုတ်ႇဝႆႉ ၸဝ်ႈၼႃး ၵမ်ႈၽွင်ႈ ၽႃႈပႅတ်ႈတိူၵ်ႇႁႆႈလွၵ်းၼႃးသေ ပၢႆႈၵေႃႈမီးတင်းၼမ်။ ၵမ်ႈၽွင်ႈၵေႃႈ ဢမ်ႇမီးတိုၼ်းလၢင်းႁဵတ်းယဝ်ႉ။ ၵမ်ႈၽွင်ႈ ပဵၼ်ၼီႈ ယွၼ်ႉလႆႈၵူႈႁိမ်ငိုၼ်းပိူၼ်ႈမႃးလူင်းတိုၼ်းလၢင်း ၸိူဝ်းၼႆႉၵေႃႈမီး။

လွင်ႈတၢင်းဢၼ်ႁဵတ်းႁႂ်ႈၼမ်ႉၼွင်း ယိုင်ႈၶိုၼ်ႈၼႂ်းထုင်ႉပူင်းၼႆႉ ပဵၼ်ယွၼ်ႉႁွင်ႈမိူင်တၼ် ၼမ်ႉလႆလေႃႇယၢပ်ႇ၊ ဢၼ်ၼမ်ႉၼွင်းထူမ်ႈသေ ႁဵတ်းႁႂ်ႈၶဝ်ႈၼႃးၵူၼ်းမိူင်းလူႉသုမ်းၼႆႉ မီးၶၢဝ်းတၢင်းလၢႆလိူၼ်ယဝ်ႉသေတႃႉ ၽူႈမီးပုၼ်ႈၽွၼ်း ၾၢႆႇဢုပ်ႉပိူင်ႇၶဝ်ၵေႃႈ ဢမ်ႇမႃးၵူတ်ႇထတ်း တူၺ်းထိုင်ပၼ်ၵူၼ်းမိူင်းသင်။

“ၼမ်ႉၼႆႉ ထူမ်ႈမႃးႁိုင် 2 လိူၼ်ယဝ်ႉ ၼမ်ႉၵေႃႈဢမ်ႇယွမ်းသေပွၵ်ႈ။ ပေႃးၶိုၼ်ႈသမ်ႉ ၶိုၼ်ႈဝႆး၊ ပဵၼ်ယွၼ်ႉ ႁွင်ႈတၼ်။ ႁွင်ႈၼႆႉ မၼ်းယႂ်ႇ ဢဝ်ၵူၼ်းၶုတ်းၵေႃႈ ဢမ်ႇၸၢင်ႈ။ တီႈ ဢၼ်ၵူၼ်းၽဵဝ်ႈၶုတ်းၵေႃႈ ၵူၼ်းၽဵဝ်ႈၶုတ်းယူႇၵူႈပီ။ မၼ်းတေၵဵဝ်ႇတၢင်းၾၢႆႇလူင်ပွင်ၸိုင်ႈၶဝ်ၼၼ်ႉၵူၺ်း။ ၵဵဝ်ႇလူၺ်ႈလွင်ႈၼႆႉ ႁဝ်းၶႃႈ တၢင်ႇလိၵ်ႈႁႂ်ႈၶဝ်မႃးလၢင်းႁွင်ႈပၼ် မီးသွင်ပွၵ်ႈ သွင်ပီယဝ်ႉ။ ငိုၼ်းဢၼ်တူၵ်းလူင်းမႃးၼၼ်ႉၵေႃႈ မၼ်းဢမ်ႇၵုမ်ႇထူၼ်ႈ၊ ၵူၼ်းၵေႃႈ ဢမ်ႇၸၢင်ႈၶုတ်း မၼ်းလူဝ်ႇဢဝ်ၵႃးၶုတ်းလိၼ်ၼၼ်ႉၵူၺ်း ၸင်ႇၶုတ်းလႆႈ”- ၵူၼ်းပိုၼ်ႉတီႈ ထုင်ႉပူင်း သိုပ်ႇလၢတ်ႈၼႄၼင်ႇၼႆ။

ၼႂ်းထုင်ႉပူင်းၼႆႉ ယၢမ်းလဵဝ် လိူဝ်သေထူပ်းတၢင်းယၢပ်ႇ လွင်ႈၽေးၼမ်ႉထူမ်ႈၼမ်ႉၼွင်းယဝ်ႉ ၵူၼ်းမိူင်း ၶဝ်ယင်းလႆႈႁႃငိုၼ်း သႂၢင်းၶွၼ်ႇတီႈၸုမ်းယိပ်းၵွင်ႈၵၢင်ႇထႅင်ႈ။ လွင်ႈ ၼႆႉၵေႃႈ ပဵၼ်လွင်ႈယၢပ်ႇ၊ လွင်ႈမႆႈၸႂ် ၵူၼ်းမိူင်းဝႆႉ တႃႇတေသိုပ်ႇႁဵတ်းသၢင်ႈၵၢၼ်ငၢၼ်းလႄႈ ႁႃၵိၼ်လဵင်ႉတွင်ႉၵႂႃႇမိူဝ်းၼႃႈ ၼႆယဝ်ႉ။

“ၵူၼ်းမိူင်းၼႆႉ ၵိၼ်းယဝ်ႉၵိၼ်းထႅင်ႈ မၼ်းဢမ်ႇၺႃးၽေးသိုၵ်းၽေးသိူဝ် မိူၼ်ပိူၼ်ႈသေတႃႉၵေႃႈသမ်ႉ မီးငိုၼ်းၵဵပ်းၶွၼ်ႇ 6 လိူၼ်လႂ် 1 ပွၵ်ႈ။ PNO ၶဝ်ၵေႃႈၵဵပ်း ၼိုင်ႈႁိူၼ်းလႂ် 5 မိုၼ်ႇ၊ ၵမ်ႈၼႆႉသမ်ႉ လႆႈၸၢင်ႈၵူၼ်းသႂ်ႇပၼ်ၼႂ်းသိုၵ်းမၢၼ်ႈ ၸၵၸၶဝ် ၼိုင်ႈလိူၼ်လႂ် မၢင်ႁိူၼ်းလႆႈသႂ်ႇ 2 မိုၼ်ႇထိုင် 3 မိုၼ်ႇပျႃး။ ဢၼ်ၵဵပ်းၶွၼ်ႇတႄႉ မီးၼႃႇ ဢၼ်ပူၵ်းပွင်ပၼ် ၵူၼ်းမိူင်းတႄႉ ဢမ်ႇမီးသင်”- ၵူၼ်းပိုၼ်ႉတီႈ ထုင်ႉပူင်း သိုပ်ႇလၢတ်ႈၼႄ ၼင်ႇၼႆထႅင်ႈ။

ယွၼ်ႉငဝ်းလၢႆးဝၢၼ်ႈမိူင်းသုၵ်ႉယုင်ႈ ဢမ်ႇၼိမ်သဝ်း ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇသေ ၸဵမ်ၵူၼ်းဝၢၼ်ႈၵူၼ်းမိူင်း၊ ၵူၼ်းၼုမ်ႇၸိူဝ်းၼႆႉ ဢွၼ်ၵၼ်ပၢႆႈၵႂႃႇတၢင်ႇဝၢၼ်ႈတၢင်ႇဝဵင်းၼမ်။ ယွၼ်ႉၼၼ်လႄႈ တႃႇတေသိုပ်ႇႁဵတ်းၵၢၼ်သူၼ်ၵၢၼ်ၼႃးၵႂႃႇမိူဝ်းၼႃႈတႄႉ လႆႈမႆႈၸႂ်ဝႆႉ ယွၼ်ႉဢမ်ႇမီးၵူၼ်းႁဵတ်းၵၢၼ်ယဝ်ႉ။