ယၢမ်းလဵဝ် ၵူၼ်းပၢႆႈၽေးသိုၵ်း တီႈဝဵင်းယွင်ႁူၺ်ႈ ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်း မီးၶၢဝ်းတၢင်းလိူၼ်ပၢႆယဝ်ႉသေတႃႉ ယွၼ်ႉႁိူၼ်းယေးၵူၼ်းမိူင်းလူႉၵွႆ မိူဝ်ႈၽွင်းပၢင်တိုၵ်း ၼၼ်ႉၼမ်လႄႈ တေႃႇထိုင်ယၢမ်းလဵဝ် တႃႇမႄးၶိုၼ်းႁိူၼ်းယေး တီႈယူႇတၼ်းသဝ်း ၸိူဝ်းၼၼ်ႉ တိုၵ်ႉမီးလွင်ႈယၢပ်ႇၽိုတ်ႇဝႆႉ။

ၵူၼ်းပိုၼ်ႉတီႈ ၼႂ်းၸႄႈဝဵင်းယွင်ႁူၺ်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၵူၼ်းပၢႆႈၽေးသိုၵ်း တီႈဝဵင်းယွင်ႁူၺ်ႈတႄႉ ႁွတ်ႈမိူဝ်းႁိူၼ်းၵၼ်ၵူႈၵေႃႉယဝ်ႉ။ ၵူၺ်းၵႃႈ ႁွတ်ႈၽႅဝ်ႁိူၼ်းၶိုၼ်း ၵေႃႈ တေႃႉတႄႉလႆႈမႃး မႄးလုမ်းလႃးႁိူၼ်းယေးမွၵ်ႈၼၼ်ႉၵူၺ်း။ ႁိူၼ်းယေးၸိူဝ်းၺႃးမၢၵ်ႇတႅၵ်ႇသႂ်ႇၸိူဝ်းၼၼ်ႉၵေႃႈ လူဝ်ႇမႄးထႅင်ႈ။ ၵျွင်းမုၼ်ၸဝ်ႈ ၸိူဝ်းၼႆႉၵေႃႈ လူႉလႅဝ်မူတ်းယဝ်ႉ။ ၵွပ်ႈၼႆ တႃႇတေမႄးသၢင်ႈၶိုၼ်း၊ ၵေႃႇၵုမ်းလုမ်းလႃးၶိုၼ်းၼႆႉ မၼ်းဢမ်ႇငၢႆႈ ယွၼ်ႉဢမ်ႇမီးငိုၼ်းလႄႈ လွင်ႈယၢပ်ႇၽိုတ်ႇတႄႉ မီးတင်းၼမ်ယဝ်ႉ”- ဝႃႈၼႆ။

ၼွၵ်ႈလိူဝ် ထူပ်းတၢင်းယၢပ်ႇၽိုတ်ႇ တႃႇမႄးၶိုၼ်းႁိူၼ်းယေးယဝ်ႉ မိူဝ်ႈၽွင်းပၢႆႈၽေးသိုၵ်းၼၼ်ႉ ဢမ်ႇတၼ်းလႆႈ ႁဵတ်းၵၢၼ်ၽုၵ်ႇသွမ်ႈဝႆႉသင်လႄႈ တႃႇႁႃၵိၼ်လဵင်ႉတွင်ႉ ၵႂႃႇဝၼ်းတႃႇမိူဝ်းၼႃႈတႄႉ တိုၵ်ႉမီးလွင်ႈယၢပ်ႇၽိုတ်ႇဝႆႉတင်းၼမ် ၼႆယဝ်ႉ။

“ၶေႃႈတီႈၼိုင်ႈတႄႉ ၵွပ်ႈပိူဝ်ႈပၢႆႈၽေးဢွၵ်ႇမႃးၵေႃႈမီးၶၢဝ်းတၢင်း 4−5 လိူၼ်ယဝ်ႉ ၸင်ႇလႆႈပွၵ်ႈႁိူၼ်းၶိုၼ်း။ ၽိူဝ်ႇဝႃႈ လႆႈပွၵ်ႈႁိူၼ်းယဝ်ႉ ၶူဝ်းၶွင်ႁိူၼ်းယေးၵေႃႈ ဢမ်ႇၵိုတ်းလိူဝ်သင် ပေႃးယဝ်ႉၵေႃႈ ႁဝ်းသမ်ႉ ဢမ်ႇလႆႈႁဵတ်းသူၼ်ဢမ်ႇလႆႈႁဵတ်းႁႆႈႁဵတ်းၼႃးၵၼ်။ ၵွပ်ႈၼၼ် တႃႇႁႃၵိၼ်လဵင်ႉတွင်ႉတႄႉ ပဵၼ်ဢၼ်ယၢပ်ႇၵိၼ်းၸႂ်ဝႆႉ”- ၵူၼ်းပိုၼ်ႉတီႈ ၸႄႈဝဵင်းယွင်ႁူၺ်ႈ သိုပ်ႇလၢတ်ႈၼႄၼင်ႇၼႆ။

တႄႇဢဝ်ႁူဝ်ပီ 2025 မႃး ၼႂ်းၸႄႈဝဵင်းယွင်ႁူၺ်ႈၼႆႉ တပ်ႉသိုၵ်းမၢၼ်ႈႁူမ်ႈတင်း ၸုမ်းပျီႇတူႉၸိတ်ႉပဢူဝ်း PNO ပဵၼ်ပၢင်တိုၵ်းၵၼ်တင်း ၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉ ၸိူဝ်းၼႆႉသေ လႆႈပိုတ်းယိုဝ်း ၵၼ်မႃးၶၢဝ်းတၢင်းႁိုင်။ ၾၢႆႇသိုၵ်းမၢၼ်ႈၵေႃႈ ယိုဝ်းၵွင်ႈလူင်၊ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇပႃးထႅင်ႈ။

ယွၼ်ႉပၢင်တိုၵ်းၼႆႉသေ ၵူၼ်းဝၢၼ်ႈၸၢင်ႈၸွႆႉ၊ ဝၢၼ်ႈၸၢင်ႈလဵၵ်း၊ လိၼ်ပူၵ်ႇတႅၵ်ႇ၊ ၼႃးၵူင်း၊ ၼမ်ႉဢုၼ်ႇတင်း ဝၢၼ်ႈလွႆလူင် ၸိူဝ်းၼႆႉ ဢွၼ်ၵၼ်ပၢႆႈၽေး ၼပ်ႉႁူဝ်ႁဵင်။

ထိုင်မႃး မိူဝ်ႈႁူဝ်လိူၼ်ဢေႃႊၵတ်ႊသ် ပီ 2025 ၼႆႉ ယွၼ်ႉငဝ်းလၢႆးပၢင်တိုၵ်းယဵၼ်ဝႆႉလႄႈ ၵူၼ်းမိူင်း ၸင်ႇဢွၼ်ၵၼ်ပွၵ်ႈၶိုၼ်းၼႆသေတႃႉ ႁိူၼ်းယေးတီႈယူႇ ပႃးၸဵမ်တႃႇ ၵၢၼ်ၽုၵ်ႇသွမ်ႈလႄႈ လွင်ႈပၢႆးယူႇလီ ၸိူဝ်းၼႆႉတႄႉ လူဝ်ႇတၢင်းၸွႆႈထႅမ်ဝႆႉတင်းၼမ် ၼႆယဝ်ႉ။