မိူဝ်ႈဝၼ်းတီႈ 2/9/2025  တူဝ်တႅၼ်း ၸုမ်းသိုၵ်းၵဝ်ႈၵၢင်ႉ ၵႂႃႇႁူပ်ႉတင်း တူဝ်တႅၼ်းၸုမ်းသိုၵ်းမၢၼ်ႈ တီႈႁူင်းႁႅမ်း ၸၢင်ႉသွင်တူဝ်  ၵၢင်ဝဵင်းလႃႈသဵဝ်ႈ ပိူဝ်ႈတႃႇလူတ်းယွၼ်ႇပၼ် ၵၢၼ်ၵူတ်ႇထတ်း တီႉၺွပ်းၵူၼ်းၸိူဝ်းယၢမ်ႈၵမ်ႉၸွႆႈၼႃႈၵၢၼ် ပၼ်သိုၵ်းၵဝ်ႈၵၢင်ႉ  ။

ၵူၼ်းပိုၼ်ႉတီႈ ၵေႃႉယူႇဝႆႉ ၼႂ်းဝဵင်းလႃႈသဵဝ်ႈသေ ႁူႉၸွမ်းလွင်ႈပၢင်ၵုမ် ၸုမ်းသိုၵ်းတင်းသွင်ၾၢႆႇၼၼ်ႉ လၢတ်ႈၽူႈတွႆႇႁွၵ်ႈဝႃႈ “ၵႃးၸုမ်းသိုၵ်းၵဝ်ႈၵၢင်ႉၶဝ် ပဵၼ်သၢႆလူင်ၶဝ်ႈမႃး ၼႂ်းဝဵင်းလႃႈသဵဝ်ႈ။ မိူဝ်ႈတႄႇႁဝ်းထၢင်ႇၶဝ်တေမႃးဢုပ်ႇလွင်ႈ သႅၼ်ဝီ။ လႆႈငိၼ်းဝႃႈ ပၢင်ၵုမ်ပွၵ်ႈၼႆႉ ၾၢႆႇသိုၵ်းၵဝ်ႈၵၢင်ႉၶဝ် မႃးတုၵ်းယွၼ်းတီႈသိုၵ်းမၢၼ်ႈ ယႃႇႁႂ်ႈၵူတ်ႇထတ်း ၸႅတ်ႈထၢမ်သင် ၵူၼ်းၸိူဝ်း ဢၼ်ယၢမ်ႈၸွႆႈၵၢၼ်ၶဝ်။ ပေႃးၺွပ်းၺႃးၵူၼ်းၶဝ်ၵေႃႈ ႁႂ်ႈပွႆႇပၼ်ၶိုၼ်း” ၼႆယဝ်ႉ။

တႄႇလိူၼ်ဢေႃးၵၢတ်ႉသ်မႃး သိုၵ်းမၢၼ်ႈ ဢဝ်ၵၢၼ်ႁူမ်ႇလူမ်ႈ ႁဵတ်းၶေႃႈဢၢင်ႈသေ ၵူတ်ႇထတ်းထဵတ်ႈထၢမ် သဵၼ်ႈမၢႆၶႅၵ်ႇႁၢဝ်ႈႁႅင်း၊ ၵူၼ်းပႅၵ်ႇၼႃႈ ဢမ်ႇၼၼ် ၵူၼ်းပိုၼ်ႉတီႈ ၸိူဝ်းၶဝ်မီးလွင်ႈထၢင်ႇထိူမ်ၼၼ်ႉၵေႃႈ ႁွင်ႉၵူတ်ႇထတ်းၸႅတ်ႈထၢမ်ပႃး ။

ၼႂ်းၶၢဝ်းတၢင်း 4 လိူၼ်ပၢႆ ၽွင်းသိုၵ်းမၢၼ်ႈၵုမ်းၵမ်ၶိုၼ်း ဝဵင်းလႃႈသဵဝ်ႈၼႆႉ သိုၵ်းမၢၼ်ႈ တင်း သိုၵ်းၵဝ်ႈၵၢင်ႉ ႁူပ်ႉထူပ်းဢုပ်ႇဢူဝ်း ၵၼ်မႃး မွၵ်ႈ 6 ပွၵ်ႈယဝ်ႉသေတႃႉ ဢမ်ႇလႆႈၶေႃႈတူၵ်းလူင်းသင်ၵၼ်တေႉတေႉဝႃႈဝႃႈၵွႆးဢမ်ႇၵႃး ၼႂ်းပၢင်ၵုမ်ၼၼ်ႉ ဢုပ်ႇသင်ၵၼ် ၵႂႃႇၸိူင်ႉႁိုဝ် ယွၼ်ႉသင်လႄႈ ဢမ်ႇလႆႈၶေႃႈတႅပ်းတတ်းၸိူဝ်းၼႆႉၵေႃႈ တင်းသွင်ၾၢႆႇ ဢမ်ႇပိုၼ်ဢွၵ်ႇၼႄၵူၼ်းမိူင်း ႁႂ်ႈပဵၼ်တၢင်း ၵၢၼ်။

တင်ႈတႄႇလိူၼ်ၵျူႊလၢႆႊမႃး ၸွမ်းၼႂ်းပိုၼ်ႉတီႈ လႄႈ သိုဝ်ႇတူင်ႇဝူင်းၵူၼ်း မီးၶၢဝ်ႇႁူင်လိုဝ်းၵၼ်ဝႃႈ သိုၵ်းမၢၼ်ႈတေၶဝ်ႈၵုမ်းၵမ်ၶိုၼ်း ဝဵင်းလႃႈသဵဝ်ႈသေ သိုၵ်းၵဝ်ႈၵၢင်ႉ တေလႆႈထွႆဢွၵ်ႇပၼ်ၼႆသေတႃႉ တီႈပၢင်ႁူပ်ႉထူပ်းဢုပ်ႇဢူဝ်း ပွၵ်ႈၵမ်းလိုၼ်းၼႆႉ ဢမ်ႇပႃးလွင်ႈၼႆႉ ၼႆယဝ်ႉ။

မိူဝ်ႈႁၢင်လိူၼ်ၵျူႊလၢႆႊၼၼ်ႉ သိုၵ်းမၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇတီႈႁူင်းႁႅမ်းလင်ၼိုင်ႈ တီႈပွၵ်ႉ 2 ဝဵင်းၵူတ်ႉၶၢႆ ၼႂ်းပိုၼ်ႉတီႈ သိုၵ်းၵဝ်ႈၵၢင်ႉ ၵုမ်းၵမ်ဝႆႉၸူဝ်ႈၶၢဝ်းၼၼ်ႉသေ မီးၵူၼ်းလူႉတၢႆၵႂႃႇ 7 ၵေႃႉ ၼႂ်းၼၼ်ႉပႃးၽူႈမီးၸၼ်ႉၼႂ်းသိုၵ်းၵဝ်ႈၵၢင်ႉၵေႃႉၼိုင်ႈ၊ မၢတ်ႇၸႅပ်းၵႂႃႇ 13 ၵေႃႉ ဝႃႈၼႆ။

ၸႄႈဝဵင်းလႃႈသဵဝ်ႈၼႆႉ တင်းမူတ်းမီးယူႇ 12 ပွၵ်ႉ လႄႈ 70 ဢိူင်ႇ ႁူဝ်ၼပ်ႉၵူၼ်းယူႇသဝ်းမီး 3 သႅၼ်ပၢႆ။ ၾၢႆႇသိုၵ်းမၢၼ်ႈၵုမ်းၵမ်ဝႆႉ ၼႂ်းဝဵင်း 12 ပွၵ်ႉသေ သိုၵ်းၵဝ်ႈၵၢင်ႉၵုမ်းၵမ်ဝႆႉ ၾၢႆႇၼွၵ်ႈဝဵင်း တႃႇ 70 ဢိူင်ႇသေ တိုတ်ႉၸၼ်ၶဝ်ႈဝႆႉပႃး ၼႂ်းၸႄႈဝဵင်းသႅၼ်ဝီ တင်း သဵင်ႈ ၼႆယဝ်ႉ။

ၼႂ်းဝဵင်းလႃႈသဵဝ်ႈၼႆႉ သိုၵ်းမၢၼ်ႈ ယုၵ်ႉဢဝ် တပ်ႉၵွင်ၾၢႆႇၵၢၼ်ယူတ်းယႃ လႄႈ ယႃႈယႃ၊ တပ်ႉၵွင်ၾၢႆႇၵမ်ႉၸွႆႈၶိူင်ႈၶူဝ်းသိုၵ်း (626)၊ တပ်ႉမၢႆ (8) ၾၢႆႇပၢႆးပၺ်ႇၺႃႇ၊ တပ်ႉၵွင် ၶလယ 68၊ တပ်ႉၵွင်ၵႃးၵၢပ်ႇလဵၵ်း၊ တပ်ႉၵွင်ႈၶိူင်ႈလၢၵ်ႈၼၢၵ်ႈသိုၵ်း၊ တပ်ႉၵွင်ၾၢႆႇၵဵပ်းၶူဝ်းၶွင်သိုၵ်း၊ တပ်ႉၵွင်ၾၢႆႇတေႃႉသူင်ႇလူတ်ႉၵႃး၊ ၾၢႆႇၵေႃႇသၢင်ႈ၊ ၾၢႆႇၵပ်းသိုပ်ႇၸိူဝ်းၼႆႉ ပၵ်းသဝ်းဝႆႉ ၼႆယဝ်ႉ။

တႅမ်ႈ-ၽူၺ်းၼုမ်ႇ