သိုၵ်းမၢၼ်ႈတင်း သိုၵ်းတဢၢင်း TNLA  သိုပ်ႇပဵၼ်ပၢင်တိုၵ်းၵၼ်ႁၢဝ်ႈႁႅင်း   ၵူၼ်းမိူင်းၼႂ်းဢိူင်ႇ ၼွင်ပိင် ၸႄႈဝဵင်းၵျွၵ်ႉမႄး  တႃႇ 20 ဝၢၼ်ႈပၢႆ လႆႈၶၢႆႉပၢႆႈ  ၵူၼ်းဝၢၼ်ႈလူင်ၵဵင် (ၵျွင်းၵုင်း) ဢိူင်ႇပၢင်ပဝ်း ဝဵင်းၵျွၵ်ႉမႄး ၶမ်ႇဝႆႉၼႂ်းၵႄႈပၢင်တိုၵ်း   100 ပၢႆ   ဝႃႈၼႆ ။

တႄႇႁၢင်လိူၼ် ဢေႃႊၵတ်ႉသ် ၼႆႉမႃး သိုၵ်းမၢၼ်ႈႁႅၼ်းသိုၵ်းၶဝ်ႈဝၢၼ်ႈၵျွင်းၵုင်း  ယူႇၼႂ်းဝၢၼ်ႈသေပႂ်ႉ တၢင်းၶဝ်ႈ/ဢွၵ်ႇဝၢၼ်ႈ ၵူတ်ႇထတ်းထဵတ်ႈထၢမ်ၵူၼ်းမိူင်း  ။   ႁဵတ်းႁႂ်ႈၵူၼ်းပိုၼ်ႉတီႈ  ၶမ်ဝႆႉၼႂ်းဝၢၼ်ႈ ဢမ်ႇၸၢင်ႈ ၶဝ်ႈဢွၵ်ႇ  လူဝ်ႇတၢင်းၸွႆႈထႅမ်ၶဝ်ႈၼမ်ႉတင်းၵိၼ်ဝႆႉႁၢဝ်ႈႁႅင်းဝႃႈၼႆ ။

ၼၢင်းယိင်းၵူၼ်ပၢႆႈၽေးသိုၵ်းလၢတ်ႈၽူႈတွႆႇႁွၵ်ႈဝႃႈ -“ မိူဝ်းၵေႃႈ ဢမ်ႇၸၢင်ႈမိူဝ်းၶိုၼ်း ၵူၼ်းဢၼ်မီးဝႆႉ ၼႂ်းဝၢၼ်ႈၵေႃႈဢမ်ႇၸၢင်ႈဢွၵ်ႇ ။ ၵူၼ်းၵိုတ်းၼႂ်းဝၢၼ်ႈ မီးပႃးၵူၼ်းၺႃးၸၢၵ်ႇမၢၵ်ႇဝႆႉ ဢမ်ႇၸၢင်ႈယူတ်းယႃတူဝ် ၊ ၶဝ်ႈၶဝ်တႃႇၵိၼ်ၼႆႉ မီးဝႆႉတႃႇ 5 ဝၼ်းၵူၺ်းယဝ်ႉ ။ ယွၼ်းတင်းၸွႆႈထႅမ်ၸုမ်းလႂ်ၵေႃႈၽႂ်ဢမ်ႇႁတ်းမိူဝ်းၸွႆႈ ၊ ယွၼ်ႉႁၢမ်ႈၵူၼ်းၶဝ်ႈၵူၼ်းဢွၵ်ႇ ၊ ပေႃးႁၼ်ၵူၼ်းၶဝ်ယိုဝ်းၵမ်ႈလဵဝ်”- ဝႃႈၼႆ ။

ယၢမ်းလဵဝ် ၵူၼ်းဝၢၼ်ႈ ၵျွင်းၵုင်း ဢၼ်ၵိုတ်းၶမ်ဝႆႉၼႂ်းၵႄႈပၢင်တိုၵ်း မီးမုင်ႉႁေႃႁိူၼ်း 60 ပၢႆ ၵူၼ်း137 ၵေႃႉ ၊ ၼႂ်းၼၼ်ႉ ၼၢင်းယိင်း 62 ၵေႃႉ ၊ ၵူၼ်းၸၢႆး 70 ပၢႆ လုၵ်ႈဢွၼ် 20 ၵေႃႉ လုၵ်ႈဢွၼ်လႅင် 2 ၵေႃႉ – ၼႆယဝ်ႉ ။

လိူဝ်သေ ဝၢၼ်ႈၵျွင်းၵုင်းယဝ်ႉ ဝၢၼ်ႈထၢၼ်းတပၢင်ႇၵေႃႈ ၾၢႆႇတင်းသိုၵ်းမၢၼ်ႈႁၢမ်ႈၵူၼ်းၶဝ်ႈဢွၵ်ႇသေ ယၢမ်းလဵဝ် ၵူတ်ႇထတ်း ႁၢဝ်ႈႁႅင်းယဝ်ႉ လွၵ်ႇငိုတ်ႈပႃး ၵူၼ်းၼႂ်းပိုၼ်ႉတီႈႁဵတ်းႁႂ်ႈ ၵူၼ်းပိုၼ်ႉတီႈဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ ။

ၼၢင်းယိင်းၸွႆႈထႅမ်လၢတ်ႈၽူႈတွႆႇႁွၵ်ႈဝႃႈ -“ ထၢၼ်းတပၢင်ႇၵေႃႈ သိုၵ်းမၢၼ်ႈႁၢမ်ႈ ဢမ်ႇပၼ်ၶဝ်ႈပၼ်ဢွၵ်ႇ ၶဝ်မႃးၵူတ်ႇထတ်းတိၵ်းတိၵ်း ၶဝ်မႃးထၢမ်ၸွင်ႇ မီးၵူၼ်းပႅၵ်ႇၼႃႈႁႃႉၸိူင်ႉၼႆ ။ ယဝ်ႉၵေႃႈ လွၵ်ႇငိုတ်ႈပႃးထႅင်ႈၵူၼ်းပိုၼ်ႉတီႈဝႃႈ ပေႃးႁပ်ႉဝႆႉၽူႈၶဵၼ် တေၽဝ်ဝၢၼ်ႈ လၢတ်ႈၼႆပႃးၵူၼ်းဝၢၼ်ႈၶဝ်ဢေႃႈ”- ဝႃႈၼႆ ။

ၵူၼ်းဢၼ်ဢမ်ႇၸၢင်ႈဢွၵ်ႇမႃးၼႆႉၵူၼ်းဢၼ်ဢမ်ႇမီးထေႃႈမီးၵႃး ။ ၵူၼ်းႁႃၸဝ်ႉၵိၼ်ၶမ်ႈ ၸိူဝ်းဢမ်ႇၸၢင်ႈပၢႆႈၵႂႃႇတင်းလႂ်  ဢမ်ႇမီးတီႈယူႇတီႈသဝ်း ၊ ပဵၼ်မႄႈလုၵ်ႈဢွၼ်ႇ ၊ မႄႈႁၢင်ႉမႄႈမၢႆႈ ၵမ်ႈၼမ်ၼႂ်းဝၢၼ်ႈ – ၵူၼ်းပိုၼ်ႉတီႈလၢတ်ႈ ။

မိူၼ်ၼင်ႇၼႆ ၼႂ်းဝၼ်းတီႈ 25 လိူၼ်ဢေႃးၵတ်ႉသ် ၾၢႆႇသိုၵ်းမၢၼ်ႈ ထူဝ်းသိုၵ်းၶဝ်ႈၼႂ်းဝၢၼ်ႈၵျွင်းၵုင်း ဢဝ်ႁိူဝ်းမိၼ် ၶိူင်ႈတရူၼ်ႊပွႆႇမၢၵ်ႇၼႂ်းဝၢၼ်ႈ။   သိုၵ်းတဢၢင်းသမ်ႉယူႇၾၢႆႇႁွင်ႇဝၢၼ်ႈသေ ပိုတ်းယိုဝ်းသႂ်ႇၶိုၼ်း ႁဵတ်းႁႂ်ႈ ၸၢၵ်ႇမၢၵ်ႇတူၵ်းတိူဝ်ႉၵူၼ်းဝၢၼ်ႈလူႉတၢႆထင်တီႈထႅင်ႈ 3 ၵေႃႉ  ႁိူၼ်းယေးလူႉၵွႆ တင်းၼမ် – ဝႃႈၼႆ ။

ၵဵဝ်ႇလူၺ်ႈပၢင်တိုၵ်းၼႆႉသေ သိုဝ်ႇၾၢႆႇသိုၵ်းမၢၼ်ႈ (ၶွမ်ႊမသျိၼ်ႊသိုၵ်း) ပိုၼ်ၽၢဝ်ႇဢွၵ်ႇဝႆႉ ပဵၼ်တၢင်းၵၢၼ်မိူဝ်ႈဝၼ်းတီႈ 29 လိူၼ်ဢေႃႊၵတ်ႊသ်ၼၼ်ႉဝႃႈ တႄႇဝၼ်းတီႈ 19 တေႃႇထိုင် ဝၼ်းတီႈ 29 ပဵၼ်ပၢင်တိုၵ်းၵၼ်တင်းသိုၵ်းတဢၢင်း ႁိုင်ယူႇၶၢဝ်းတၢင်း 12 ဝၼ်း ၼႂ်းထုင်ႉၼွင်ပိင် ၸွမ်းသဵၼ်ႈတၢင်းႁူၺ်ႈၵိုတ်ႈလႄႈ ႁိမ်းၶူဝ်ၵိုတ်ႈလူင်ၼၼ်ႉ တႃႇ 47 ပွၵ်ႈ တီႉၺွပ်းလႆႈၶိူင်ႈၵွင်ႈၵၢင်ႇၸေးသႅၼ်း 23 လဝ်း ၼႆယဝ်ႉ။