သိုၵ်းမၢၼ်ႈယိုတ်းမိူင်း ၸီႉသင်ႇႁႂ်ႈၶႃႈႁၢပ်ႇၵၢၼ် ၼႂ်းႁွင်ႈၵၢၼ်လူင်ပွင်ၸိုင်ႈ လၢႆလၢႆႁွင်ႈၵၢၼ် ႁႂ်ႈၶဝ်ႈၵႂႃႇပိုတ်ႇလုမ်း ပၼ်ၵၢၼ်ၽွင်းငမ်းၶိုၼ်း ၼႂ်းဝဵင်းသႅၼ်ဝီ ဢၼ်မီးၸုမ်းသိုၵ်းၵဝ်ႈၵၢင်ႉ ၵုမ်းၵမ်ဝႆႉၸူဝ်ႈၶၢဝ်း ၼႂ်းမိူင်းတႆးပွတ်းႁွင်ႇ ၼႆယဝ်ႉ။

တႃႇၵုမ်းၵမ်ဢဝ်လႆႈၶိုၼ်း ဝဵင်းသႅၼ်ဝီၼၼ်ႉ မိူင်းၶႄႇ ယူႇၵၢင်ႁဵတ်းၶဵဝ်ပၼ်သေ ၸတ်းပၢင်ဢုပ်ႇဢူဝ်း ႁႂ်ႈသိုၵ်းမၢၼ်ႈတင်း သိုၵ်းၵဝ်ႈၵၢင်ႉ ငူပ်ႉငီႉၵၼ်မႃးလၢႆပွၵ်ႈလၢႆၵမ်းသေတႃႉ ဢမ်ႇဢွင်ႇမၢၼ်မႃးတႄႉတႄႉ။ တႄႇလိူၼ်ၵျုၼ်ႊမႃး ႁၢၼ်ႉတေႃႇထိုင်မိူဝ်ႈၼႆႉ ဝၼ်းတီႈ 02/09/2025 ၼႆႉ ၸွမ်းၼႂ်းပိုၼ်ႉတီႈ မီးၶၢဝ်ႇလိုဝ်းၵၼ်ဝႃႈ သိုၵ်းၵဝ်ႈၵၢင်ႉ တေလႆႈထွႆဢွၵ်ႇပၼ်ၶိုၼ်း သိုၵ်းမၢၼ်ႈယဝ်ႉ ဝႃႈၼႆ။

ၼၢင်းယိင်း ၵူၼ်းပိုၼ်ႉတီႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝူင်ႈပူၼ်ႉမႃးၼႆႉ ႁဝ်းၶႃႈ ၵႂႃႇႁဵတ်းမၢႆၾၢင်တီႈလႃႈသဵဝ်ႈ။ ၶဝ်ဝႃႈ ပေႃးလိူၼ်သဵင်ႈၼႆႉ ႁဝ်းတေမိူဝ်းပၵ်းလုမ်းၶိုၼ်းတီႈသႅၼ်ဝီယဝ်ႉ၊ ယႃႇမႃး ႁဵတ်းတီႈလႃႈသဵဝ်ႈထႅင်ႈယဝ်ႉ”- ဝႃႈၼႆ။

ၵူၼ်းမိူင်းၸိူဝ်းယူႇသဝ်းၼႂ်းပိုၼ်ႉတီႈ ဝဵင်းသႅၼ်ဝီၵမ်ႈၼမ်တႄႉ လိုဝ်းၵၼ်ဝႆႉဝႃႈ ပေႃးထိုင်မႃး ဝၼ်းတီႈ 19/09/2025 ၼႆႉ ၶႃႈႁၢပ်ႇၵၢၼ်သိုၵ်းမၢၼ်ႈ တေၶဝ်ႈမႃးပၵ်းလုမ်းၶိုၼ်း။ လွင်ႈၼႆႉ ယိုၼ်ယၼ်လႆႈယဝ်ႉၼႆ ၸၢႆးၼုမ်ႇ ဢႃယု 30 ပီပၢႆ ၵူၼ်းဝဵင်းသႅၼ်ဝီ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“လွင်ႈၸုမ်းၶဝ်တေၶဝ်ႈမႃးၶိုၼ်းၼၼ်ႉ ၼႄႉၼွၼ်းယဝ်ႉၶႃႈ။ ၵူၺ်းၵႃႈ ႁွင်ႈၵၢၼ်လႂ်တေ ၶဝ်ႈမႃးဢွၼ် တၢင်းတႄႉၵေႃႈ ပႆႇလႆႈႁူႉၸွမ်း။ သိုၵ်းၵဝ်ႈၵၢင်ႉၶဝ် တေထွႆဢွၵ်ႇပၼ်ႁႃႉ ဢမ်ႇၼၼ်ၵေႃႈ ၶဝ်တေႁူမ်ႈၵၼ် ၵုမ်းၵမ်ၵႂႃႇႁႃႉ။ တေႁဵတ်းလၢႆးလႂ်ၼႆ ပႆႇလႆႈႁူႉတႅတ်ႈတေႃး။ လိၵ်ႈၸီႉသင်ႇတီႈၸုမ်းသိုၵ်းမၢၼ်ႈတႄႉ ၸိူဝ်းပဵၼ်ၶႃႈႁၢပ်ႇၵၢၼ်ၶဝ် လႆႈႁပ်ႉဝႆႉယဝ်ႉၼႆ ၵူၼ်းၼႂ်းလုမ်းၶဝ် လၢတ်ႈႁဝ်းမႃးၼင်ႇၼႆဢေႃႈ”။

ပူၼ်ႉမႃး မိူဝ်ႈဝၼ်းတီႈ 14/08/2025 ၼၼ်ႉ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ႁူပ်ႉဢုပ်ႇၵၼ်တီႈႁူင်းႁႅမ်း ၸၢင်ႉသွင်တူဝ် ၼႂ်းၵၢင်ဝဵင်းလူင်လႃႈသဵဝ်ႈ ၵဵဝ်ႇလူၺ်ႈလွင်ႈၵၢၼ်ၽွင်းငမ်း ဝဵင်းသႅၼ်ဝီၼႆႉ ၶေႃႈႁၼ်ထိုင် တင်းသွင်ၾၢႆႇ ဢမ်ႇမႅၼ်ႈၵၼ်လႄႈ တီႈပၢင်ၵုမ်ၼၼ်ႉ ဢမ်ႇလႆႈၶေႃႈတူၵ်းလူင်းသင်ဢွၵ်ႇမႃး ၼႆယဝ်ႉ။

ဝဵင်းသႅၼ်ဝီၼႆႉ လမ်ႇလွင်ႈတႃႇသဵၼ်ႈတၢင်းၵၢၼ်ၵႃႉၶၢႆၸိုင်ႈမိူင်း မိူင်းမၢၼ်ႈ – မိူင်းၶႄႇ။ ယၢမ်းလဵဝ် သိုၵ်းၵဝ်ႈၵၢင်ႉ တင်ႈၵဵတ်ႉလၢၼ်ႇ ၵူတ်ႇထတ်းတႃႇၵဵပ်းၶွၼ်ႇဝႆႉ ၸွမ်းသဵၼ်ႈတၢင်းလူင် ဝဵင်းသႅၼ်ဝီ – မူႇၸေႊ – သႅၼ်ဝီ – ဝဵင်းၼမ်ႉၽႃႈ (ၶျိၼ်ႊသူၺ်ႇႁေႃႇ) တႃႇ 6 ဢွင်ႈတီႈသေ ပၼ်ႇၵၢၼ်ၽွင်းငမ်းဝႆႉ ၼႆယဝ်ႉ။

ယၢမ်းလဵဝ် မီးၶၢဝ်ႇလိုဝ်းဝႃႈ ႁႂ်ႈသိုၵ်းၵဝ်ႈၵၢင်ႉ ထွႆဢွၵ်ႇၼၼ်ႉယူႇသေတႃႉ ၼႂ်းဝဵင်းသႅၼ်ဝီတႄႉ ၾၢႆႇသိုၵ်းၵဝ်ႈၵၢင်ႉၶဝ် တိုၵ်ႉယူႇသဝ်းတူင်ႉၼိုင်ၵႂႃႇမႃးဝႆႉ မိူၼ်ၵဝ်ႇၵူၺ်း ဢမ်ႇမီးလွင်ႈလၢၵ်ႇလၢႆးသင်။

သိုၵ်းမၢၼ်ႈ ပိုၼ်ၽၢဝ်ႇဢွၵ်ႇဝႆႉၸိုဝ်ႈဝဵင်း ၸိူဝ်းတေလႆႈႁဵတ်းပၢင်လိူၵ်ႈတင်ႈၼၼ်ႉ ပႃးဝဵင်းသႅၼ်ဝီ ဝဵင်းၼိုင်ႈ၊ လိူဝ်ၼၼ်ႉ ပဵၼ်ဝႆႉဝဵင်း ဢၼ်မီးတႂ်ႈၵၢၼ်ၽွင်းငမ်းသိုၵ်း တႃႇ 63 ဝဵင်းထႅင်ႈ ၼႆယဝ်ႉ။

တႅမ်ႈ – ၽူၺ်းၼုမ်ႇ