မိူဝ်ႈႁၢင်လိူၼ်ဢေႃႊၵတ်ႊသ် ပူၼ်ႉမႃးၼႆႉ သိုၵ်းမၢၼ်ႈ ယိုတ်းမိူင်း ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းၸႄႈဝဵင်းၵျွၵ်ႉမႄးသေ ႁဵတ်းႁႂ်ႈၵူၼ်းမိူင်း လႆႈပၢႆႈၽေးသိုၵ်းၵႂႃႇသွၼ်ႈဝႆႉ တီႈဝဵင်း သီႇပေႃႉ ၼပ်ႉႁူဝ်ပၢၵ်ႇ ယၢမ်းလဵဝ် ထူပ်းတၢင်းယၢပ်ႇၽိုတ်ႇဝႆႉ လွင်ႈၶဝ်ႈၼမ်ႉတၢင်းၵိၼ်လႄႈ ၶိူင်ႈၸႂ်ႉတိုဝ်းသုၼ်ႇတူဝ် ၼၢင်းယိင်း ၸိူဝ်းၼႆႉ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “တၢင်းၸွႆႈထႅမ်ၼႆႉ လူဝ်ႇၼႃႇၶႃႈ လွင်ႈၵိၼ်ယႅမ်ႉၸိူဝ်းၼႆႉ။ ပေႃးယဝ်ႉ တွၼ်ႈတႃႇၼၢင်းယိင်းၶဝ်သမ်ႉ ၶိူင်ႈၶူဝ်းသုၼ်ႇတူဝ်ၸိူဝ်းၼႆႉႁႄ။ ၵူၼ်းပၢႆႈၽေးသိုၵ်းသမ်ႉ လႆႈပၢႆႈမႃးယူႇဝႆႉ တီႈၵျွင်းမုၼ်ၸဝ်ႈလႄႈ လွင်ႈၶဝ်ႈၽၵ်းၸိူဝ်းၼႆႉ ဢမ်ႇၵုမ်ႇထူၼ်ႈၶႃႈ။ သင်ၸိူဝ်ႉဝႃႈၵူၼ်းဢေႇတႄႉ ၵေႃႈ တေၵုမ်ႇထူၼ်ႈၵၼ်လႆႈယူႇ ယၢမ်းလဵဝ် ၵူၼ်းပၢႆႈၽေးသိုၵ်း သမ်ႉမီးမွၵ်ႈ 700 ၵေႃႉယဝ်ႉ”- ဝႃႈၼႆ။

ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉ ၼႂ်းၸႄႈဝဵင်းသီႇပေႃႉၼႆႉ ၵမ်ႈၼမ် ပဵၼ်ၼၢင်းယိင်း၊ ၵူၼ်းထဝ်ႈလႄႈ လုၵ်ႈဢွၼ်ႇ။ ယဝ်ႉၵေႃႈ ၵူၼ်းၸၢႆး ၸိူဝ်းၼႆႉပႃး ယွၼ်ႉဝႃႈ ၽႂ်ၵေႃႈ ဢမ်ႇႁတ်းယူႇပႂ်ႇႁိူၼ်းယေးၵၼ် ၼႆယဝ်ႉ။

“ၵူၼ်းပၢႆႈၽေးသိုၵ်းတႄႉ မီးၵူႈသႅၼ်းယဝ်ႉ ၸဵမ်ယိင်းၸဵမ်ၸၢႆး၊ လုၵ်ႈဢွၼ်ႇ၊ ၵူၼ်းထဝ်ႈ ၸိူဝ်းၼႆႉ။ ၼၢင်းယိင်းတႄႉ ၼမ်ဢေႃႈ။ ပၢႆႈမႃးတင်းႁိူၼ်းၼၼ်ႉၶႃႈယဝ်ႉ။ မၢင်ၸိူဝ်း ဢမ်ႇႁတ်းပႂ်ႉႁိူၼ်း၊ မၢင်ၸိူဝ်း ပိူၼ်ႈၵူဝ်ႁိူဝ်းမိၼ် ၶဝ်တေမႃးပွႆႇၶၢဝ်းလႂ်ဢမ်ႇႁူႉ ၵွပ်ႈၼၼ်လႄႈ ၽႂ်ၵေႃႈၵူဝ်ႁဵတ်းၼၼ်ၶႃႈဢေႃႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းသီႇပေႃႉ သိုပ်ႇလၢတ်ႈၼႄၼင်ႇၼႆ။

တႃႇတေပၢႆႈႁွတ်ႈထိုင် ၼႂ်းၸႄႈဝဵင်းသီႇပေႃႉၼႆႉ ၵူၼ်းပၢႆႈၽေးၶဝ် မီးလွင်ႈယၢပ်ႇၽိုတ်ႇဝႆႉတင်းၼမ်။ ယွၼ်ႉဝႃႈ ၵမ်ႈၽွင်ႈ ဢမ်ႇမီးငိုၼ်းတွင်း၊ ဢမ်ႇမီးရူတ်ႉၵႃး တႃႇတေပၢႆႈလႄႈ လႆႈၸႂ်ယႂ်ႇ ၸုမ်းၸွႆႈထႅမ်ပရႁိတၶဝ် လႆႈဢဝ်ရူတ်ႉၵႃးတေႃႉသူင်ႇမႃးၵူၺ်း ဝႃႈၼႆ။

“ဢၼ်ၶဝ်ပၢႆႈမႃးၼႆႉ ၸွမ်းလူၺ်ႈၶႃႈႁူႉတႄႉ ၸုမ်းပရႁိတၶဝ် မိူဝ်းႁွင်ႉၶဝ်မႃး ၸိူဝ်းဢမ်ႇမီးၵႃး ၸိူဝ်းၼၼ်ႉ ၵွပ်ႈၼႆ ၸုမ်းပရႁိတ ၸင်ႇမိူဝ်းႁွင်ႉၶဝ်ဢွၵ်ႇမႃး။ ၵူၼ်းဢၼ်မိူဝ်းၸွႆႈမၼ်းတႄႉၵေႃႈ ၵႃးပရႁိတၼႆႉ ဢမ်ႇၵုမ်ႇထူၼ်ႈ ၸိူင်ႉၼၼ်ဢေႃႈ။ မၼ်းၵေႃႈလႆႈတေႃႉၼိုင်ႈဝၼ်းၼိုင်ႈဢိတ်း၊ ၼိုင်ႈၵမ်းၼိုင်ႈဢိတ်း ၸိူင်ႉၼၼ်ၵူၺ်း။ ဢၼ်ၶဝ်တေႃႉမႃးၼႆႉ လႆႈ 3-4 ဝၼ်း ထပ်းၵၼ်ယဝ်ႉၼင်ႇၵဝ်ႇ။ ယွၼ်ႉပိူဝ်ႈၼၼ်လႄႈ သဵၼ်ႈမၢႆၵူၼ်းပၢႆႈၽေးသိုၵ်းတႄႉ မၼ်းၵေႃႈဢမ်ႇၼိမ်၊ ဝၼ်းၼိုင်ႈလႄႈ ဝၼ်းၼိုင်ႈၵေႃႈ မၼ်းတိူဝ်းၶိုၼ်ႈမႃးတိၵ်းတိၵ်းၶႃႈယဝ်ႉ”- ၽူႈၸွႆႈထႅမ် ၵူၼ်းပၢႆႈၽေးလၢတ်ႈ။

ၼႂ်းဢိူင်ႇၼွင်ပိင် ၸႄႈဝဵင်းၵျွၵ်ႉမႄးၼႆႉ တေႃႇထိုင်ယၢမ်းလဵဝ် ငဝ်းလၢႆးၼႂ်းပိုၼ်ႉတီႈပႆႇၼိမ်သဝ်း သိုၵ်းတင်းသွင်ၾၢႆႇ တိုၵ်ႉၶဵင်ႈၶႅင်ၵၼ်ဝႆႉယူႇ။ ယွၼ်ႉၼၼ် တေႃႇထိုင်ယၢမ်းလဵဝ် ၵူၼ်းမိူင်း ဢၼ်ပၢႆႈၽေးဢွၵ်ႇမႃးၼႆႉ တိုၵ်ႉမီးယူႇၵူႈဝၼ်း ၼႆယဝ်ႉ။

“တေႃႈလဵဝ် ပဵၼ်တီႈၼွင်ပိင် ၵျွၵ်ႉမႄးၼၼ်ႉၼႃႇ။ သိုၵ်းၶဝ် တိုၵ်ႉထူဝ်းၶဝ်ႈမႃးယူႇတိၵ်းတိၵ်း ယွၼ်ႉမၼ်း ၸမ်ၵျွၵ်ႉမႄးႁႅင်းၼႃႇလႄႈ ၵူၼ်းမိူင်းၵူဝ် ဢွၼ်ၵၼ်ပၢႆႈမႃးထႃႈၼၼ်ႉ ၼႃႇ။ မိူၼ်ၸိူင်ႉပီႈၼွင်ႉၼွင်ပိင်ၶဝ်ၼႆႉသမ်ႉ ႁဵတ်းႁိုဝ်လႃႇၼႆ ၶဝ်သမ်ႉၺႃးၵိၼ်မၢၵ်ႇဢၼ်ပိူၼ်ႈပွႆႇမႃးၼၼ်ႉၵမ်းလဵဝ်ၼႃႇၼေႃ။ ၼၼ်ႉတႄႉ ပိူၼ်ႈဢွၼ်ၵၼ်ပၢႆႈၵမ်းလဵဝ်ၼၼ်ႉယဝ်ႉ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းသီႇပေႃႉ သိုပ်ႇလၢတ်ႈၼင်ႇၼႆထႅင်ႈ။

လိူဝ်ၼၼ်ႉ မိူၼ်ၼင်ႇ ၵူၼ်းမိူင်းတီႈဝဵင်းသီႇပေႃႉ တၢင်းပွၵ်ႉၸၢတ်ႈလႄႈ တူင်ႈၸၢင်ႉ ၸိူဝ်းၼၼ်ႉၵေႃႈ လႆႈဢွၼ်ၵၼ်ပၢႆႈ ဢွၵ်ႇဝႆႉထႃႈ။ ယွၼ်ႉဝႃႈ မၼ်းၸမ်လုမ်းႁႅင်းၼႃႇလႄႈ ၵူဝ်သိုၵ်းမၢၼ်ႈ မႃးပွႆႇမၢၵ်ႇသႂ်ႇ၊ မၢင်ၸိူဝ်း ပၢႆႈဢွၵ်ႇဝဵင်း၊ မၢင်ၸိူဝ်း ပၢႆႈၵႂႃႇတၢင်းလႃႈသဵဝ်ႈ၊ မၢင်ၸိူဝ်း ပၢႆႈၵႂႃႇတၢင်းၼမ်ႉလၼ်ႈ ၸိူဝ်းၼၼ်ႉ။ သိုၵ်းမၢၼ်ႈသမ်ႉ ၸႂ်ႉႁိူဝ်းမိၼ် မႃးပွႆႇမၢၵ်ႇ 4-5 ဝၼ်း ၼိုင်ႈပွၵ်ႈ 7-8 ဝၼ်း ၼိုင်ႈပွၵ်ႈ ၸိူဝ်းၼႆႉလႄႈ ဝႃႈၼႆ။

ၵူၼ်းမိူင်းၵျွၵ်ႉမႄး ဢၼ်ပၢႆႈသွၼ်ႈဝႆႉ တီႈဝဵင်းသီႇပေႃႉၼႆႉ မီးဝႆႉယူႇလၢႆဢွင်ႈတီႈ။ ယဝ်ႉၵေႃႈ ၵူၼ်းမိူင်းၵျွၵ်ႉမႄး ဢၼ်ၶမ်ယူႇဝႆႉသေ ဢမ်ႇၸၢင်ႈဢွၵ်ႇမႃး ၼႂ်းၸႄႈဝဵင်းၵျွၵ်ႉမႄး ၸိူဝ်းၼၼ်ႉၵေႃႈ တိုၵ်ႉၵိုတ်းထႅင်ႈတင်းၼမ်။ ယွၼ်ႉၼၼ် ဢွၼ်ၵၼ်ထူပ်းတၢင်းယၢပ်ႇၽိုတ်ႇ မႆႈၸႂ်ဝႆႉ ၵူဝ်သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇထႅင်ႈလႄႈ ၵူဝ်တိူဝ်ႉၺႃးၸၢၵ်ႇမၢၵ်ႇ လႆႈလူႉတၢႆမၢတ်ႇၸဵပ်းထႅင်ႈ ၼႆယဝ်ႉ။