ပျီႇတူႉၸိတ်ႉ ပဢူဝ်း PNO ၵဵပ်းငိုၼ်း ၼပ်ႉႁူဝ်သိပ်းသႅၼ်ပျႃး တီႈၵူၼ်းပၢႆႈၽေးသိုၵ်း ၸိူဝ်းပွၵ်ႈၶိုၼ်း ႁိူၼ်းယေး  တီႈဝၢၼ်ႈၽြႃးလွႆ ထုင်ႉၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း   ။

တႄႇႁူဝ်လိူၼ် ဢေႃးၵတ်ႉသ်ၼႆႉမႃး ၵူၼ်းပၢႆႈၽေးသိုၵ်းဝၢၼ်ႈၽြႃးလွႆ ဢွၼ်ၵၼ်ပွၵ်ႈမိူဝ်းၶိုၼ်း ႁိူၼ်းယေး ၽႂ်မၼ်း ၊ ပျီႇတူႉၸိတ်ႉပဢူဝ်း PNO ၵဵပ်းငိုၼ်းၵူၼ်းပၢႆႈၽေးသိုၵ်း ၸိူဝ်းပွၵ်ႈမႃးယူႇၶိုၼ်း ၊ ၼိုင်ႈႁိူၼ်းလႂ် သိပ်းသႅၼ်ပျႃး ၊ သင်ဢမ်ႇပၼ် တေၸႂ်ႉၼုင်ႈၶူဝ်းသိုၵ်း PNO သေ ပၼ်ႇပုတ်ႈၵၼ်ဢဝ်ႁူမ်ႇလူမ်ႈၼႂ်းဝၢၼ်ႈ ဝႃႈၼႆ ။

ၵူၼ်းပၢႆႈၽေးသိုၵ်းပွၵ်ႈၶိုၼ်းႁိူၼ်းယေးလၢတ်ႈၽူႈတွႆႇႁွၵ်ႈဝႃႈ -“ ပွၵ်ႈမိူဝ်းတိုၵ်ႉမီး 10 ဝၼ်းၵူၺ်း ၊ ၵဵပ်းငိုၼ်းယူႇယဝ်ႉ ၊ ၵၢၼ်ၵေႃႈ လႆႈႁဵတ်းၼႂ်းၶၢဝ်းတၢင်းၶဝ်တမ်းဝၢင်းဝႆႉၵူၺ်း ။ ဢမ်ႇလႆႈႁဵတ်းၵၢၼ်ငၢၼ်းၼင်ႇၸဝ်ႈၵဝ်ႇယၢမ်ႈႁဵတ်းမႃး ၊  ငိုၼ်းတႄႉတေလႆႈသႂ်ႇ ၼိုင်ႈႁိူၼ်း 10 သႅၼ်ၼႆ ။ ပေႃးဢမ်ႇသႂ်ႇ တေလႆႈၶဝ်ႈႁၢပ်ႇၵၢၼ်သိုၵ်း၊ တေလႆႈၼုင်ႈၶူဝ်း PNO သေပႂ်ႉယၢမ်းဢဝ်ႁူမ်ႇလူမ်ႈ ၼႆဝႃႇ”   – ဝႃႈၼႆ။ 

လိူဝ်ၼၼ်ႉ ၾၢႆႇတင်းပျီႇတူႉၸိတ်ႉပဢူဝ်းၸီႉသင်ၵူၼ်းပိုၼ်ႉတီႈ ႁႂ်ႈႁဵတ်းၵၢၼ်ၼႂ်းယၢမ်းလႄႈတီႈဢၼ်ၶဝ်ပၼ်ၶႂၢင်ႉဝႆႉၼၼ်ႉၵူၺ်း။ ပေႃးပူၼ်ႉပႅၼ်သေၵႂႃႇႁဵတ်းတၢင်ႇတီႈဢမ်ႇၼၼ်ၼွၵ်ႈၶၢဝ်းယၢမ်းၼၼ်ႉၸိုင် သင်ၺႃးယိုဝ်းတႄႉ တေဢမ်ႇဢဝ်ပုၼ်ႈၽွၼ်းသင် ဝႃႈၼႆ။

ၶၢဝ်းယၢမ်းဢၼ်PNO တတ်းမၵ်းဝႆႉပၼ်တႃႇႁဵတ်းၵၢၼ်ၼႆႉပဵၼ်ၶၢဝ်းယၢမ်းၵၢင်ၼႂ် 6 မူင်းထိုင် ၵၢင်ၶမ်ႈ 6 မူင်း။

ႁိူၼ်းယေးၵူၼ်းမိူင်းၵေႃႈထုၵ်ႇယႃႉၵဝ်းတဝ်သွၵ်ႈဝႆႉသမ်ႉပေႃးမၢၵ်ႇပေႃးမိူဝ် ။ ႁိူၼ်းမၢင်လင် ဢမ်ႇမီးၶူဝ်းၶွင်သင်ယဝ်ႉ။  

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ႁွတ်ႈႁိူၼ်းယဝ်ႉၵေႃႈ ႁိူၼ်းၼႆႉၵိုတ်းႁိူၼ်းပဝ်ႇၵူၺ်းယဝ်ႉ ၊ ဢမ်ႇလိူဝ်ဝႆႉပၼ်သင်  ။ ၽၵ်းတူၵေႃႈယႃႉၵွႆ၊ ႁိူဝ်းဝႃႇ ၸၢၵ်ႈဝႃႇ ၸိူဝ်းၼႆႉႁၢႆ ။ ၸွမ်းၵႂႃႇႁႃၼႆ ၵႂႃႇႁၼ်မႅၼ်ႈမီးယူႇတၢင်ႇဝၢၼ်ႈပုၼ်ႉ။ ႁဝ်းၶႃႈၼႆႉတႄႉ တေလႆႈတႄႇၶိုၼ်းမႂ်ႇမႂ်ႇမူတ်းယဝ်ႉ ၸၢတ်ႈပၢၼ်ၼႆႉ”- ဝႃႈၼႆ ။ 

မိူၼ်ၼင်ႇၼႆ တီႈဝၢၼ်ႈမိၼ်းၶျွင်း ၼႂ်းထုင်ႉၼွင်ႁၢႆးယႃႈၵေႃႈ ၵၢင်ႉၵႄႇမႃးႁွင်ႉၵူၼ်းၼုမ်ႇၵႂႃႇ တႃႇၵူတ်ႇထတ်းပၢႆးယူႇလီ။ 15 ဝၼ်းမႃးႁွင်ႉ 1 ပွၵ်ႈ။ ၼိုင်ႈပွၵ်ႈ 2 ၵေႃႉ ။ ၵူၼ်းၸိူဝ်းဢမ်ႇမီးလုၵ်ႈၸၢႆးသမ်ႉ လႆႈသႂ်ႇငိုၼ်းပၼ် ၼိုင်ႈလိူၼ် 15,000 ပျႃး။

ၵူၼ်းမိူင်း ၼႂ်းၸႄႈဝဵင်းယွင်ႁူၺ်ႈ မိူၼ်ၼင်ႇ ဝၢၼ်ႈၽြႃးလွႆ ၊ လွႆၼွႆႉ ၊ ၺွင်ႇလေးပိၼ်ႇ ၊ ဝၢၼ်ႈၼမ်ႉဢုၼ်ႇ လႄႈ  ဝၢၼ်ႈၼမ်ႉတူၵ်းၼႂ်းၸႄႈဝဵင်းပၢင်လွင်းၼႆႉ လႆႈပၢႆႈၽေးသိုၵ်းမီး 6 လိူၼ်ယဝ်ႉ ၊ ထိုင်မႃး ၼႂ်းလိူၼ် ဢေႃးၵတ်သ်ႉ ၼႆႉၸင်ႇပွၵ်ႈမိူဝ်းၶိုၼ်းၽႂ်မၼ်းလႆႈ ဝႃႈၼႆ ။

ယွၼ်ႉသိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း လႄႈ ၸုမ်းလုၵ်ႉၽိုၼ်ႉ ပဵၼ်ပၢင်တိုၵ်းၵၼ် တီႈတၢင်း ၾၢႆႇဢွၵ်ႇ ဝဵင်းၾၢႆၶုၼ် ၼႂ်းထုင်ႉၼွင်ႁၢႆးယႃႈသေ ၾၢႆႇတင်းသိုၵ်းမၢၼ်ႈ ဢဝ်ႁိူဝ်းမိၼ်ပွႆႇမၢၵ်ႇတူၵ်းလႄႈ ၵူၼ်းမိူင်းလႆႈပၢႆႈၽေးသိုၵ်း တႄႇႁူဝ်ပီ 2025 ၼႆႉမႃး  ။