မိူဝ်ႈၼႆႉ ဝၼ်းတီႈ 25 လိူၼ်ဢေႃးၵၢတ်ႉသ် ယၢမ်းၵၢင်ၼႂ် မွၵ်ႈ 11 မူင်းပၢႆၼၼ်ႉ သိုၵ်းမၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇလူင် ႁႅင်း 250 ပွၼ်ႊ 2 လုၵ်ႈ တူၵ်းသႂ်ႇတီႈႁိမ်းၵျွင်း ဝႃႇသူဝ်ႇ ပွၵ်ႉ 7 ၼႂ်းၸႄႈဝဵင်းၵျွၵ်ႉမႄးသေ သင်ႇၶ 3 ပႃး တိူဝ်ႉမၢတ်ႇၺႃးၵႂႃႇႁၢဝ်ႈႁႅင်း လႄႈ လင်ႁိူၼ်းၵူၼ်းမိူင်းလူႉၵွႆၵႂႃႇ 20 လင်ပၢႆ ၵူၼ်းမၢတ်ႇၸဵပ်းၵေႃႈဢမ်ႇၸၢင်ႈပၢႆႈဢွၵ်ႇမႃးတႃႇယူတ်းယႃတူဝ်။
ပၢင်တိုၵ်းတီႈထုင်ႉၼွင်ပိင်ၼႆႉ သိုၵ်းမၢၼ်ႈ တင်း သိုၵ်းတဢၢင်း (TNLA) ၶဵင်ႇၵၼ်ၸႂ်ႉၶိူင်ႈတရူၼ်ႊ ၶိူင်ႈၵွင်ႈလူင်ယိုဝ်းၵၼ်ႁၢဝ်ႈႁႅင်း ၵူၼ်းမိူင်းဢွၼ်ၵၼ်ပၢႆႈၵႂႃႇသွၼ်ႈယူႇတီႈဝတ်ႉၵျွင်းမုၼ်ၸဝ်ႈ။
သိုၵ်းမၢၼ်ႈၸႂ်ႉပႃးႁိူဝ်းမိၼ်တိုၵ်း ပွႆႇမၢၵ်ႇသႂ်ႇတီႈဝတ်ႉဝႃးၽႃသိူဝ်ႇ ဢွင်ႈတီႈမီးၵူၼ်းမိူင်း ပၢႆႈသွၼ်ႉယူႇဝႆႉထႅင်ႈ။ တိူဝ်ႉၺႃးသင်ႇၶ ဢိၵ်ႇ ၵူၼ်းမိူင်းလူႉတၢႆၸွမ်းတင်းၼမ်။ ၵူၼ်းမိူင်းဝဵင်းၵျွၵ်ႉမႄးလၢတ်ႈၼင်ႇၼႆ။
“မၢၵ်ႇတူၵ်းသႂ်ႇၼႂ်းဝၢင်းၵျွင်းၼၼ်ႉ မီးၵႂႃႇသွင်ပွၵ်ႈယဝ်ႉ၊ ၵူၼ်းမိူင်းၵမ်ႈၼမ် ငိူင်ႉပၢႆႈဢွၵ်ႇဝႆႉလႄႈ ဢမ်ႇပေႃးတိူဝ်ႉၺႃးၵႃႈႁိုဝ်။ ႁိူၼ်း ၵူၼ်းမိူင်းၸိူဝ်းမီးယူႇႁိမ်းၼၼ်ႉ တႃႇမွၵ်ႈ 20 လင်ပၢႆတႄႉ လဵၵ်းမုင်းမၼ်း ပိဝ်ၵႂႃႇမူတ်းယဝ်ႉ။”
လိူဝ်ၼၼ်ႉ ယၢမ်းတၢမ်းၶမ်ႈ မွၵ်ႈ 4 မူင်းပၢႆ မၢၵ်ႇလူင် ၸုမ်းသိုၵ်းမၢၼ်ႈ လႄႈ သိုၵ်းတဢၢင်း တူၵ်းသႂ်ႇၼႂ်းဝၢၼ်ႈ လူင်ၵဵင်ထႅင်ႈလႄႈ ႁဵတ်းႁႂ်ႈၵူၼ်းမိူင်း လူႉတၢႆထႅင်ႈ 2 ၵေႃႉ။ ၸိူဝ်းမၢတ်ႇၸဵပ်းဝႆႉၵေႃႈ ယင်းတိုၵ်ႉမီးယူႇ ပႆႇၸၢင်ႈလႆႈတၢင်းၵမ်ႉၸွႆႈ တႃႇယူတ်း ယႃ ၵူၺ်းဢမ်ႇၵႃး တူဝ်တၢႆ ၵူၼ်းၸိူဝ်းၺႃးၸၢၵ်ႇမၢၵ်ႇၼၼ်ႉၵေႃႈ ပႆႇၸၢင်ႈတေႃႉဢဝ်ၵႂႃႇလုမ်းလႃးတူဝ်လႆႈၼႆ ၵူၼ်းမိူင်းၼႂ်းပိုၼ်ႉတီႈ လၢတ်ႈၼႄၼင်ႇၼႆ။
“တၢမ်းၶမ်ႈ မိူဝ်ႈၼႆႉ ဝၼ်းတီႈ 25 လိူၼ်ဢေႃးၵၢတ်ႉသ် သိုၵ်းလွႆဢဝ် ဢဝ်တရူၼ်း တင်း ၵွင်ႈလူင် ယိုဝ်းၼႂ်းဝၢၼ်ႈလူင်ၵဵင်ထႅင်ႈ။ ၵႃးပီႈလႄႈ ထေႃႈလႃႈၵျီႈပီႈၵေႃႈ ၵွႆမူတ်းယဝ်ႉ။ မီးၵူၼ်းတိူဝ်ႉမၢတ်ႇၸွမ်းႁႄ လၢႆၵေႃႉ ၼႆတႄႉၵေႃႈ ပႆႇလႆႈႁူႉတႅတ်ႈတေႃး။ တီႈၼၼ်ႈ ၼႆႉ ဢမ်ႇမီးႁူင်းယႃ၊ ၵမ်ႈၽွင်ႈတိူဝ်ႉၺႃးတိၼ် ၺႃးမိုဝ်း၊ တႃႇၵေႃႉၼိုင်ႈသမ်ႉ ၺႃးၸၢၵ်ႇမၢၵ်ႇသႅတ်ႈၵႂႃႇတီႈတူဝ်မၼ်း။ မိူဝ်ႈလဵဝ် သၢႆသိုၵ်းလွႆၶဝ် ၶဝ်ႈၵႂႃႇယူႇဝႆႉၼႂ်းဝၢၼ်ႈယဝ်ႉ။”
ၵဵဝ်ႇလူၺ်ႈလွင်ႈၸိူဝ်းၼႆႉသေ ၾၢႆႇႁွင်ႈၵၢၼ်ၶၢဝ်ႇ သိုၵ်းတဢၢင်း TNLA ပိုၼ်ၽၢဝ်ႇဢွၵ်ႇဝႆႉပဵၼ်တၢင်းၵၢၼ်ဝႃႈ – ဢမ်ႇမီးပၢင်တိုၵ်း သင်သေ ၾၢႆႇသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းယၢမ်းၵၢင်ၼႂ်ၸဝ်ႉၼႆႉလႄႈ ႁဵတ်းႁႂ်ႈ သင်ႇၶ လူႉလွၼ်ႇၵႂႃႇ 3 ပႃး၊ ၵူၼ်းၸၢႆး ၵေႃႉၼိုင်ႈ မၢတ်ႇၸဵပ်းၵႂႃႇႁၢဝ်ႈႁႅင်း၊ ႁိူၼ်းယေးလူႉၵွႆၵႂႃႇ 22 လင်၊ ဝိႁၢရ် ၼႂ်းဝတ်ႉဝႃႇသူဝ်ႇ လူႉၵွႆၵႂႃႇ 4 လင်၊ ရူတ်ႉၵႃး လူႉၵွႆၵႂႃႇ 2 လမ်း- ၼႆယဝ်ႉ။
မိူၼ်ၼႆ မိူဝ်ႈပူၼ်ႉမႃး ၼႂ်းဝၼ်းတီႈ 23 ယၢမ်းတၢမ်းၶမ်ႈၼၼ်ႉၵေႃႈ ႁိူဝ်းမိၼ်တိုၵ်း ၶွင်ၸုမ်းသိုၵ်းမၢၼ်ႈ ၵႂႃႇပွႆႇမၢၵ်ႇသႂ်ႇ ၼႂ်းဝၢၼ်ႈ ၵုၼ်သလၢၼ်း မၢၵ်ႇလူင်သႅၼ်း 250 ပွၼ်ႊ တူၵ်းသႂ်ႇတီႈၵျွင်းမုၼ်ၸဝ်ႈသေ တိူဝ်ႉၺႃး လုၵ်ႈဢွၼ်ႇလူႉတၢႆၵႂႃႇၵေႃႉ 1၊ သင်ႇၶၸဝ်ႈ 2 တူၼ်လႄႈ ၸဝ်ႈသၢင်ႇ ပႃးၼိုင်ႈၵေႃႈ လူႉလွၼ်ႇၵႂႃႇၸွမ်း၊ ၼၢင်းယိင်း 2 ၵေႃႉ လႄႈ ၵူၼ်းၸၢႆး 2 ၵေႃႉၵေႃႈ လူတၢႆ ။
ယၢမ်းလဵဝ် ၼႂ်းၸႄႈဝဵင်းၵျွၵ်ႉမႄး ၸွမ်းသဵၼ်ႈတၢင်းႁူၺ်ႈၵိုတ်ႈ- ၼွင်ပိင်ၼႆႉ သိုၵ်းမၢၼ်ႈ တင်း သိုၵ်းတဢၢင်း ပဵၼ်ပၢင်တိုၵ်းၵၼ်ဝႆႉ ႁၢဝ်ႈႁႅင်းသေ ၾၢႆႇသိုၵ်းမၢၼ်ႈ လုၵ်ႉတၢင်းဝဵင်းၼွင်ၶဵဝ် ၸႂ်ႉၶိူင်ႈတရူၼ်ႊ လႄႈ ၶိူင်ႈၵွင်ႈလူင် ဢိၵ်ႇပႃး ႁိူဝ်းမိၼ်တိုၵ်း ယိုဝ်းသႂ်ႇ ၼႂ်းထုင်ႉၼွင်ပိင် ၼႂ်းဝဵင်းၵျွၵ်ႉမႄး ႁၢဝ်ႈႁႅင်း။ ႁဵတ်းႁႂ်ႈ တင်းသွင်ၾၢႆႇ မီးလွင်ႈမၢတ်ႇၸဵပ်းလူႉတၢႆၼမ်။ ၵူၼ်းမိူင်းၸိူဝ်း ယူႇၼႂ်းပိုၼ်ႉတီႈၵေႃႈ ဢမ်ႇၵိုင်ႉၵၢင်ႉၸၢင်ႈပၢႆႈဢွၵ်ႇသေ တူၵ်းပဵၼ်တူဝ်ယိူဝ်ႇၸုမ်းသိုၵ်းယူႇၵႄႈပၢင်တိုၵ်း ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ